Paka-so 26
26
KỊNỊNYANAḄỌ Akpụrụ-warị Mẹ Nama Ḅẹ Ḅara
(Pks 36.8-28)
1Miemẹ sikima, í bulo tọrụ na, pọpụlụ nwẹn-sịn tọrụ na, awụ tọrụ na sụa oyia ḍoritẹ lọkọ-ḅịtẹ kẹ Ọḅọkụ-Igbe mẹ sime ḅarị Akpụrụ-warị mẹ nama ḅa. Ḅara-ḍịn ḅara ḅụ, ḅịtẹ ḍori laga kẹ ịn kẹ sẹrubimu sịn-arị enjẹlị kịkama aị kẹ anị ḅirimaa. 2Oyia aḅịtẹ warị-warị mẹ ḅẹ nangwọ anie mesi maa ḅụọ-kuḅu finji (12 m), anị ḅẹ finjima anie sonioa ḅụọ-kuḅu (2 m) — ḅịtẹ mamgba gbasị-kịrịrịkwaị ḅa. 3Ḅịtẹ ma ḅẹ sọnọa awarị ị́ nwẹn gbin gboloma ḅa; ị́ pịkị osi sọnọa awarị ma gbin gboloma ḅa. 4Gbin gboloma wararị ḅịtẹ mẹ ḅẹ suku da sịḅị mẹ ḅụ, ị́ bulo-bulo ḅịtẹ kẹ sololo ḅara gbin sụa ḅa; tarị ye mẹ na, maaịn karama ye mẹ na gbọrụ ḅara. 5Gbin gboloma wararị ḅịtẹ mẹ ọgọnọ da sịḅị mẹ ḅụ tarị ye mẹ ḅụ, í ye-sololo-aị mesi oyi finji sụa ḅa, maaịn karama ye mẹ ḅụ pịkị suku da sịḅị mẹ ḅụ ye-sololo-aị mesi oyi finji; maa ḅịtẹ asuku ma ḅẹ ye-sololo-aị ma jen-jen na dama-dama ḅa. 6Anịsakị ị́ golu-golu ye-sụka ọkọḅa mesi oyi finji tẹmẹ ḅa, kẹ gbin gboloma wararị aḅịtẹ ma maa apakịrị ma sụka gboloma ḅẹ ḅara, mịẹtẹ Akpụrụ-warị mẹ bebe gberie-sọ ḅarị ḅara.
7“Ị́ pịkị oḅori oju ḅẹ isuke kẹ ḍori oyi gbọrụ aḅịtẹ finji kẹ ye-gbaịn-aḅịtẹ mịẹ Akpụrụ-warị mẹ pịrị ḅa. 8Akpụrụ-warị mẹ ye-gbaịn-aḅịtẹ ma, gberie-gberie ḅẹ nangwọ anie mesi sọnọa ḅụọ-kuḅu finji (13 m), anịsakị gberie-gberie ḅẹ finjima anie sonioa ḅụọ-kuḅu — ye gbaịn oyi gbọrụ aḅịtẹ ma finjima gbasị-kịrịrịkwaị ḅa. 9Gbọrụ pakịrị ḅụ ị́ sọnọa aḅịtẹ gbin gboloma ḅa, osi pakịrị ị́ pịkị sonio aḅịtẹ gbin gboloma ḅa; anịsakị sonio karama ḅịtẹ mẹ akpụrụ-warị mẹ ḅẹ tọrọkọ ḅụ ị́ anị kẹ maaịn iko ḅa. 10Gbin gboloma wararị ye-gbaịn-ḅịtẹ mẹ ḅẹ akaka da tẹịn sịḅị mẹ ḅụ í ye-sololo-aị mesi oyi finji kẹ sụa ḅa, tẹ maaịn karama gbin gboloma wararị ye-gbaịn-ḅịtẹ mẹ ḅẹ akaka da tẹịn sịḅị mẹ ḅụ sọ ị́ pịkị ye-sololo-aị mesi oyi finji kẹ sụa ḅa. 11Í ojo ye-sụka-aị mesi oyi finji tẹmẹ ḅa, tẹ ye-sụka-aị ma kẹ ye-sololo-aị ma ḅio suu tẹ maa apakịrị ma ọlọ gboloma ḅa, mịẹtẹ anị bebe gbọrụ ye mịẹ ḅarị ḅara. 12Ye-gbaịn-ḅịtẹ mẹ ḅụ kirikọn wararị pakịrị mẹ ị́ anị kẹ Akpụrụ-warị mẹ ọḅụjụ ḅụ sololo ḅa. 13Akpụrụ-warị mẹ Ḅọkọ gbaịn aḅịtẹ ma ḅẹ koro ḅụ mị pakịrị na, osi pakịrị na gbana ḅara maa ẹnzụ ma, ị́ kẹ akpụrụ-warị mẹ ḅụ mị akaka na osi akaka na ḅụ sololo tẹ anị kikima ḅa.”
14“Í ejimina oju apara tẹ ịn awụ tọrụ kẹ ḅaa ye mịẹ Akpụrụ-warị mẹ gbaịn ḅa, tẹ tẹlẹmatẹ isuke nyana-a nama-apara kẹ ejimina apara mẹ gbaịn ḅa.”
15“Ị́ ịn kẹ akasiya sịn-arị ḍụḅọ mẹ kẹ tọnwa sụụn yarịrịtẹ sịẹ-geletẹ asịn ịkasị Akpụrụ-warị mẹ pịrị ḅa. 16Gberie-gberie ḅẹ nangwọ anie jeia ḅụọ-kuḅu (4 m), tẹ maa ḅụọ-kuḅu na ḅara gbọrụ ẹnzụ na (66 cm) anị ḅẹ finjima sọ ḅa, 17gberie-gberie ḅụ ị́ arị kẹ jen-jen ḅụ sụka ḅẹ maa ye-sụka-aị sụa ḅa, mịẹtẹ arị jen-jen sụka tẹ gboloma ḅẹ ḅara. Mie ị́ kẹ Akpụrụ-warị mẹ ḅẹ amasịn mamgba ịkasị anị pịrị ḅarị ḅara. 18Ị́ si amasịn ịkasị Akpụrụ-warị mẹ ḅẹ suku-jụ da pakịrị anga mẹ pịrị ḅa. 19Si amasịn ma suku, í seleḅa kẹ otolo amesi sụa ḅa, gbọrụ amasịn maa otolo maa otolo, anie anị kẹ jen sụa-paka maaịn ḅụ sụka ḅarị maa anga ma. 20Akpụrụ-warị mẹ ḅẹ maaịn karama pakịrị mẹ anie tọrọkọ da pakịrị mẹ. Anị sọ pịkị si amasịn nyana ḅa; 21arịḅẹ seleḅa otolo anie mesi, tẹ gberie-gberie maa otolo, maa otolo nyana ḅa. 22Í sonioa amasịn ịkasị Akpụrụ-warị mẹ ḅẹ ọḅụjụ tẹ ịrụa-ideriarị-anga anga mẹ da anga mẹ pịrị ḅa. 23Ị́ maa amasịn ịkasị Akpụrụ-warị mẹ ḅẹ ọḅụjụ ḅẹ ịkọlị ma pịrị ḅa. 24Mịna ịkọlị ḅẹ maa amasịn ma, arị suku ḅụ sụka gboloma mu ọgọnọ-jụ la ḅa gbọrụ nụnụma ḅio ḅụ. Maa amasịn ma tẹ maa ịkọlị ma mịẹ aị ma mị ḅara mie ịn kẹ arị mịẹ ḅarị ḅara. 25Ninea amasịn mie arịḅẹ ini fa si seleḅa otolo ma na sime ḅarịye, gbọrụ amasịn suku maa otolo maa otolo.”
26“Akasiya nwẹn-sịn ḍụḅọ kẹ jeia ẹngbẹsẹ-ḅọrọma-asịn mịẹ. Sọnọ sime Akpụrụ-warị mẹ ḅẹ gbọrụ pakịrị anga ḅẹ amasịn ma pịrị ḅa, 27anịsakị sọnọ sime Akpụrụ-warị mẹ ḅẹ osi pakịrị anga ḅẹ amasịn ma pịrị ḅa, tẹ sọnọ pịkị sime Akpụrụ-warị mẹ ḅẹ ịrụa-ideriarị-anga anga ọḅụjụ ḅụ kunoma amasịn ma pịrị ḅa. 28Ogboku simearị ẹngbẹsẹ-ḅọrọma-sịn mẹ, tẹ amasịn ma ḅẹ maa anga ḍie wararị ye mẹ, anị Akpụrụ-warị mẹ ḅẹ gbọrụ kunoma ḅụ ḅọrọ mu osi kunoma tolu-paka ḅa. 29Í golu sọ sara amasịn ma gbaịn ḅa, tẹ arị ḅụ golu-golu nụnụma sụa ẹngbẹsẹ asịn ma ọlọ aị mịẹ ḅa; anịsakị í golu sọ sara ẹngbẹsẹ-ḅọrọma-asịn ma gbaịn ḅa. 30Anịsakị ị́ anị sime-ḅara mẹ tẹ tụndụ mẹ ọgọnọ à kẹ í ḍie ḅara mẹ kẹ Akpụrụ-warị mẹ nama sịẹma ḅa. 31Bulo tọrụ na, pọpụlụ nwẹn-sịn tọrụ na, awụ tọrụ na sụa iḅi aḅịtẹ na ḍoritẹ lọkọ-ḅịtẹ na kẹ kiki-pẹlẹ ye mịẹ ḅa; ḅara-ḍịn apụ ịn kẹ Sẹrubimu sịn enjẹlị apụ kịkama ye kẹ arị ḅirima ḅa. 32Ịn golu sọ sara gbaịn wararị inia akasiya ḅeriaị ọgọnọ ḅụ ị́ arị sololo ḅa. Golu-golu ye-sụka-aị arị ḅụ emi tẹ ịn kẹ seleḅa kẹ mịẹ inia otolo ḅụ sụka ḅa. 33#Hib 6.19; 9.3-5Í kiki-pẹlẹ-ḅịtẹ mẹ kẹ Akpụrụ-warị mẹ isun mẹ suku-ḅio sụa-kịrịkịrịma wararị ye-sụka-aị ma ḅụ sololo ḅa, tẹ ḍụḅarị maa apakịrị ma simearị Ọḅọkụ-Igbe mẹ kẹ kiki-pẹlẹ-ḅịtẹ mẹ ọḅụjụ koroma ḅa. Kiki-pẹlẹ-ḅịtẹ mẹ nwẹnị Fịafịa Yọ mẹ puu sikima ḅa Fịafịa-tẹịn Yọ mẹ ḅụ. 34Fịfịa-tẹịn Yọ mẹ ḅụ í ḅịḅị-gbaịnye mẹ kẹ Ọḅọkụ-Igbe mẹ gbaịn ḅa. 35Kiki-pẹlẹ-ḅịtẹ mẹ ḅọrọ paka-ḅo ḅụ, ị́ dẹbịlẹ mẹ koroma ḅa, tẹ tọnjọ-sịẹmaye mẹ Akpụrụ-warị mẹ ḅio suku-jụ da pakịrị anga sime tẹ dẹbịlẹ mẹ na dama-dama ḅa. Anịsakị ị́ nwẹnị dẹbịlẹ mẹ kẹ ọgọnọ-jụ da pakịrị anga ḅụ koroma ḅa.”
36“Mẹnjị Akpụrụ-warị mẹ sọ muarị ḅọkọ mẹ ḅụ í bulo tọrụ na, pọpụlụ nwẹn-sịn tọrụ na, awụ tọrụ na sụa iḅi aḅịtẹ na ḍoritẹ lọkọ-ḅịtẹ tẹ laga-kọrịnama-kọrịapụ ḍori ḅirimatẹ ḅịtẹ kẹ sụa ḅa. 37Ị́ akasiya sịn kẹ sọnọa ḅeriaị mịẹ ḅọkọ kikima ḅịtẹ mẹ pịrị tẹ golu sọ sara arị gbaịn ḅa, tẹ golu-golu ye-sụka-aị kẹ arị ḅụ sụa, tẹ ojo kẹ otolo sụa arị pịrị ḅa.”
Attualmente Selezionati:
Paka-so 26: KBTP
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
(C) The Bible Society of Nigeria
