Paka-so 24
24
Ini Ọḅọkụ Mẹ Mịẹ Kụrọmam
1KỊNỊNYANAḄỌ ḅe nwẹnị Mozizi ḅẹẹ, “Ị́yẹrị na, Erọnị na, Nadabụ na, Abihu na, Izirẹlị ḅẹ omongiapụ ma ḅẹ kịnị atesi oyi finji na iwo ị̀ ḍọkụma-ḅo tẹ ala-jụ sime tẹ sunsin. 2Ị́yẹrị ngẹrị mie iwo ḅo ì kpeki ḅarịye; kụma osi apụ ma ịn ḅo kpeki ḅịa, anịsakị tomi ma ini ị́ ḅụụ sọ tẹ ị́nịna iwo ḅo ḅịa.”
3Mozizi ḅo tẹ KỊNỊNYANAḄỌ ḅe ẹkwẹn-aḅịḅị mamgba na, kụrọ ḅara-ḅio sime ḅọ oloko tẹ ọ̀ sụa aị mamgba na ḍuko tomi ma pịrịm; tẹ tomi mamgba gbọrụ pọkọ kẹ pakịrị gboloma tẹ ḅẹẹm, “Ẹkwẹn-aḅịḅị tẹ KỊNỊNYANAḄỌ ḅe kọn ẹkwẹn mamgba wa mịẹ ḅa.” 4Tẹ Mozizi KỊNỊNYANAḄỌ ḅe ẹkwẹn-aḅịḅị mamgba kẹẹ famam. Ọ̀ nwẹnị dede-funfun ḅụ saakị, tẹ nwẹnị tụndụ mẹ suku ḅụ gbọrụ agbamịẹ-anga nama, tẹ oyi maa ḅeriaị finji pike Izirẹlị ḅẹ oyi maa afuro finji ma wẹrịtẹ sime-ḅara. 5Anịtẹso ori Izirẹlịapụ ma ḅẹ asawọ ma fịrịmam, inima tẹ dọkịma-agba na, pootẹ-anambulo kẹ dein-pịrị-agba na mịẹ KỊNỊNYANAḄỌ ḅe pịrị apụ ma. 6Tẹ Mozizi nama ma ọmbie mẹ kẹ maa anga ḍiya ḅẹ gbọrụ anga ọkị tẹ kẹ opu apanị ḅio sụam, tẹ ọmbie mẹ ḅẹ osi anga mẹ kẹ agbamịẹ-anga mẹ ḅụ saram. 7Anịtẹso ori ọḅọkụ mẹ ḅẹ ḍiri mẹ ọkịm, tẹ tomi ma anị naarị ḅara kẹ anị gom; tẹ ịn nwẹnị pakịrị tẹ ḅẹẹ, “Ẹkwẹn tẹ KỊNỊNYANAḄỌ ḅe kọn tẹ ye mẹmgba wa mịẹ ḅa, anịsakị wa ḅịḅịpoki ḅa.”
8 #
Mat 26.28; Mak 14.24; Luk 22.20; 1 Kọr 11.25; Hib 10.29;
Hib 9.19,20 Tẹ Mozizi nwẹnị opu apanị ma ḅio sime ọmbie mẹ kẹ tomi ma ọgọnọ sara, tẹ ḅẹẹ, “Ọmịnị Ọḅọkụ mẹ tẹ KỊNỊNYANAḄỌ ḅe na, ọmịnị na mịna ẹkwẹn-aḅịḅị mamgba wẹrịtẹ koro ḅara ḅụ fị Ọḅọkụ mẹ ḍikii.”
9Anịtẹso Mozizi na, Erọnị na, Nadabụ na, Abihu na, Izirẹlị ḅẹ omongiapụ tesi oyi finji ma na tụndụ mẹ kpọlị iwom, 10tẹ ini Izirẹlịapụ tẹkẹarị Tamụnọ ḅe ẹrịm. Anịsakị ori aḅụọ-suku ḅio ḅụ gbala ịn kẹ safaya nwẹn sịn ḍụḅarị kẹlẹ kiri mẹ ọgọnọ nama gelema finjima tẹ banabana ḅara ḅụ so mẹ sime-ḅara sime wararị. 11Ọ̀ gbọrụ ḅara ḅụ so ḅara kẹ Izirẹlị ḅẹ atomi ma asịḅịdapụ ma ọgọnọ gbana-a; ịn Tamụnọ ẹrịm, tẹ fịye fị, tẹ minji ḅuum.
Mozizi Tamụnọ Dama-mum Sayịnayị Tụndụ Ọgọnọ
12KỊNỊNYANAḄỌ ḅe nwẹnị Mozizi ḅẹẹ, “Tụndụ mẹ ọgọnọ-jụ ḅụ ị̀ ḍọkụma-ḅo tẹ anị yọ ḅụ sime koru anịsakị à ḍụḅarị ma tẹ arị à kẹ ịn toluma ḅẹ oloko ma na, à tọn aị ma na kẹ kẹẹ wararị aḍụḅarị ma kẹ ị́ pịrị ḅa.” 13Mie ḅụ Mozizi ò fịrịmẹnjịḅọ jọsụwa kẹ ọ̀ ḅụụ sụa tẹ saakịm tẹ Mozizi Tamụnọ Tụndụ mẹ kpọlị iwom. 14Ọ̀ nwẹnị omongiapụ ma ḅẹẹ, “Ọ́ mị yọ sime wa koru nwenii wa sin ḅo ọ́ la sakị la, anịsakị ḍikii, Erọnị na Họ na ọmịnị na emi; ọmịna aḅụụ ye ḅụụ-fụkama ḅọ fụkama ḅọ, yee mḅọ ịn ḍọkụma-ḅo.”
15Anịtẹso Mozizi tụndụ mẹ kpọlị iwom, tẹ oḅuto tụndụ mẹ gbaịnm. 16KỊNỊNYANAḄỌ ḅe ebube mẹ Sayịnayị Tụndụ mẹ ọgọnọ sime tẹ ḅịyam, tẹ oḅuto mẹ sonio aḍin kẹ anị gbaịnm; tẹ sọnọma aḍin karama ene ḅụ KỊNỊNYANAḄỌ ḅe nwẹnị Mozizi sin oḅuto mẹ ogboku ḅụ. 17Mịọkụ KỊNỊNYANAḄỌ ḅe ebube mẹ tụndụ mẹ sịḅị ọgọnọ ḅụ Izirẹlịapụ ma tọrụ ḅio sime-ḅara gbala ye-yọ dọkịma gulugulumarị fịnị. 18#Dit 9.9Tẹ Mozizi mẹnjị oḅuto mẹ ḅio sọ-mu, tẹ tụndụ mẹ kpọlị iwom. Tụndụ mẹ ọgọnọ-jụ ḅụ Mozizi ḍin amesi na, eneḅaka amesi na simem.
Attualmente Selezionati:
Paka-so 24: KBTP
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
(C) The Bible Society of Nigeria
