Paka-so 23
23
Iḅi Ḅẹrẹ Kọn Na Karakara Mịẹ Na
1 #
Pks 20.16; Lẹv 19.11,12; Dit 5.20 “Iruoye kẹ paka ye sọma ḍuko ma. Si-sịḅịḅio-sụa tomḅọ na ḅara gboloma tẹ tọn tomḅọ pịrị si gotẹ ogbo-sịẹḅọ sọ ma. 2Tomina-ogbo ḍuka mu siye mịẹ ma; anịanịa ogbo-ogbo ḅẹrẹkọn-siri ḅụ ḅẹrẹ pịkị iḅo ḅẹm ẹrẹsị tomina-ogbo na gbọrụ jụ ḅọrọ tẹ ogbo-sịẹ ma. 3#Lẹv 19.15Ḅẹrẹ kọn igoinḅọ aḍụa ma ḅẹrẹkọn-siri ḅụ.”
4 #
Dit 22.1-4
“Ị́ na fịya-a ḅọ pootẹ-nambulo, anịanịa ò yedogi-nama etela-iriarị tẹ í ori na kura paka-paka, í ori ọkị-ḅo ọ̀ pịrị ḅa. 5Ị́ í ḍiki-ḅioḅuarị gbọrụ tomḅọ yedogi-nama ẹrịm ori ò dogi ye na ḅịkị tẹ emi ḅẹḅẹ, anị ḅara mẹ kẹ ò dogi ye na ori na koroma-so ma, ị́ ḅarasụa ọ̀ pịrị tẹ ori anị saakị ḅa.”
6 #
Lẹv 19.15; Dit 16.19 “Igoinḅọ gboo ogbo ḅụ ḅẹrẹ pịkị iḅo ma. 7Iruo ye kẹ kịnị sịḅị gbana ḅụ ị́ ḅụụ ḅelemaa, tẹ mịẹye-ofori ḅọ ḅe na, karakaraḅọ ḅe na ḅaa ma, kẹ gotẹ ọkọ ḅẹẹarị, à ḅẹrẹ-ḅarasii-a ḅara kẹ si-sịḅịḅio-sụaḅọ ḅe wẹrịso tẹ ò so ḅịa. 8Ọḅụjụ igbigi da fị ma, gbala ọḅụ-fị fịrịmẹnjị-opuapụ atọrụngbọ pụnma tẹ inima tẹ kuraye mịẹarị apụ ma etela mẹ simarị.”
9 #
Pks 22.21; Lẹv 19.33,34; Dit 24.17,18; 27.19 “Ọ́ gbọrụ igoniḅọ sọ ponoma ma; ọmịnị igoniḅọ mẹ ḅioḅẹngbọ mẹ nimi wararị, kẹ gotẹ ọkọ ḅẹẹarị, ọmịnị sọ Ijiputi ḅụ igoniapụ sọ simem.”
Sọnọma Akụra Karama Kụra Mẹ Na, Sọnọma Aḍin Karama Ene Mẹ Na
10 #
Lẹv 25.1-7
“Sonio akụra ọ́ nwẹn kẹ ọmịna kiri ḅụ fịye ḍiḅi-ḍiḅi tẹ anị ḅụ paka-ḅo ye kobiri ọkị ḅa; 11kụma sọnọma akụra karama kụra ḅụ ọmịnị anị wẹrịso tẹ anị ịnyọsara ḅa, mịẹtẹ ọmịna atomi ma ḅụ ḅẹ igoin-apụ ma sọ mu ye kọn fị, tẹ piri-ḅio-ḅẹ anama ma ịna tọrụ gbarị aị fị ḅẹ ḅara. Ọ́ mị gbọrụ ḅara mẹ mịẹ ḅa ọmịna girepu-ḍụọ na, olivu-ḍụọ na ḅụ.”
12 #
Pks 20.9-11; 31.15; 34.21; 35.2; Lẹv 23.3; Dit 5.13,14 “Sonio aḍin ḅụ ọmịnị ọmịna kọrịnama kọrị ḅa, kụma sọnọma aḍin karama ene mẹ, ḅụ ọmịnị ịnyọsara ḅa; mịẹtẹ ọmịna pootẹ-nambulo na ọmịna yedogi-nama na ịnyọsara, tẹ ọmịna furo ḅẹ owiḅọtụḅọ ḅe na, ị́ warị bịan igoniḅọ ḅe na sọ ịwọ ịnyọ sụa ḅẹ ḅara. 13Ọmịnị àrị ọ́ ḅẹẹ aị mamgba kẹ elekima sụa tẹ mịẹ. Anịsakị ọmịnị oru-atamụnọ ẹrẹ sịn tẹ ịn tẹkẹ ma, anịanịa ọmịna ḅịḅị ḅụ kịnị ọkọ kịkama ye naa.”
Tẹra Gburo-gburotẹ Opu Alalị Ma
(Pks 34.18-26; Dit 16.1-17)
14“Kụra mẹ ḅụ tẹra sakị ọ́ nwẹn kẹ alalị fị ị̀ pịrị ḅa. 15#Pks 12.14-20; Lẹv 23.6-8; Kịẹ 28.17-25Ó Sunmaye sọ-a Fịturu Alalị mẹ fị ḅa; à wẹrịtẹ tọn ọ́ pịrị ḅara, Abibu nwẹn-sịn akalụ mẹ ḅio, tọọn wararị sakị mẹ ḅụ sọnọma aḍin ḅụ ó sunmaye sọ tẹ fịturu fị ma; kẹ gotẹ ọkọ ḅẹẹarị, anị ḅụ mie ọmịnị Ijiputi ama mẹ ḅio paka-ḅo ye. Ó ḅo sunsin ị̀ pịrị ḅarị sakị, gbọrụḅọ-sọ papaa, ḅara-ḅio gberie-sọ ofori ḅara kẹ boma.”
16 #
Lẹv 23.15-21; Kịẹ 28.26-31;
Lẹv 23.39-43
“Ó Fịye Soku Alalị fị ḅa ó ḍiḅi ḍụọ mẹ ḅẹ kọrịnama mẹ ḅụ ḅẹ tarị asịnmgbọlụ ḅụ.”
“Kụra mẹ ḅẹ kunoma ọ́ ḍụọ ḅio ọ́ kọrị kọrịnama mẹ ḅẹ sịnmgbọlụ mẹ kobiri warị suu ḅarị sakị ḅụ ó Kobiri Warị Suu Alalị fị ḅa. 17Kụra mẹ ḅụ tẹra sakị ọmịna owiapụ mamgba KỊNỊNYANA-TAMỤNỌ ḅe tọrọkọ ḅụụ ḍie-pakama ḅa.”
18“Ọ́ nama kẹ agba mịẹ ị̀ pịrị ḅẹ sakị ó sunmaye sọ tẹ fịturu kẹ sụa ḅịa. Yee ị̀ alalị mẹ ḅụ ọ́ mịẹ ị̀ pịrị agba mẹ ḅẹ ḅẹlẹkị sime nwenii dede-ḅio lama.”
19 #
Dit 26.2; Pks 34.26; Dit 14.21 “Ọmịna kiri mẹ ḅẹ tarị asịnmgbọlụ ma ḅụ ḅẹ tarị aị ma ọmịnị arị ọkị-ḅo KỊNỊNYANAḄỌ ọmịna Tamụnọ ḅe warị ḅio suu ḅa.”
“Ọmịnị asambịrịma oḅori ḅe iyingiḅọ ndo-minji kẹ ọ̀ sọ ma.”
Minini-aị Na Toluma-aị Na
20“Ḍikii, àrị etela mẹ ḅụ ó ḍikiḍiki tẹ ọmịnị ọkị-ḅo ye-yọ mẹ tẹ à tẹlẹma tẹ yọ mẹ lama ḅẹ enjẹlị kẹ tarị ọmịna tọrọkọ fịrịma tẹ. 21Ọmịnị ò ḍikiḍiki mẹnjị tẹ ò ḍuko ye mịẹ, ọ́ sịḅị-kụrọma ọ̀ pịrị ma, kẹ gotẹ ọkọ ḅẹẹarị, ọmịnị oloko kan ọ̀ wẹrịso ọ́ pịrị ḅịa gbala ị̀ ẹrẹ ọ̀ ḅụụ emi ẹrẹsị.”
22“Kụma ọmịnị ḍikiḍiki mẹnjị ḅara kẹ ọ̀ ḅịḅị poki, tẹ ye tẹ à ḍuko ye mẹmgba mịẹ ḅẹḅẹ, anịrẹ àrị ọmịnị na fịya-a apụ mamgba na fịya-a ḅọ sọ ḅa tẹ, ọmịnị na tụḅụrụ apụ na tụḅụrụ ḅa.”
23“Ì enjẹlị ọmịna tọrọkọ tarị mu tẹ ọmịnị ọkị-ḅo Amọrayịtị apụ ma na, Itayịti apụ ma na, Pẹrịzayịtị apụ ma na, Kenanị ḅẹ apụ ma na, Hivayịtị apụ ma na, Jebusayịtị apụ ma na ogbo-ḅio suu, tẹ àrị ịn ḅaa siin sakị, 24ọ́ sịḅị-tuu ịna oru-atamụnọ ma pịrị, anịanịa, fịrịmẹnjị ịn pịrị, anịanịa ini ịna akọrịnama kọrịarị ḅara kọrị ma, kụma ọmịnị ịkatakirikọn-a-ḅara kẹ ịn saakị sin, tẹ ịna ịḅalị ma kẹ pakịrị-pakịrị puu ḅa. 25KỊNỊNYANAḄỌ ọmịna Tamụnọ ḅe mie ọ́ fịrịmẹnjị pịrị ḅarị ḅọ, anịsakị yẹrị nwẹnị ọmịna fịye na, ọmịna minji na boma ḅa; anịsakị àrị ọmịna ogbo-ḅio ḅụ obi nwẹn-sịn ye saakị-siin ḅa. 26Ọmịna ama mẹ ḅio gbọrụ ẹrẹḅọ fura sọ so ḅịa, anịanịa furo pụụn tẹ gbọrụ ẹrẹḅọ sọ paka ḅịa; ọmịna ḍumo-ene ma kịẹn-ḅịḅị mẹ àrị anị mịẹ ḅinma ḅa.”
27“Tomi mamgba tẹ ó ḅo la tẹ da-paka ḅarị apụ ma à tarị ọmịna tọrọkọ ị̀ tẹmẹ-naịn-naịn kẹ ịn fịrịma tẹ ịn kẹ ḅịḅị-kẹ-ogbosọ-a ḅio gbin suu ḅa, anịsakị à mịẹtẹ ọmịnị na fịya-a apụ mangị ḅụ ịna oḅukulo kẹ ọ́ da ḅa. 28Anịsakị à tarị ọmịna tọrọkọ ḅịlagbin kẹ fịrịma ḅa, arị aị ma tẹ ọmịna tọrọkọ Hivayịtị apụ na, Kenanị ḅẹ apụ na, Itayịti apụ na dee-pakama ḅarị aị ma. 29À gbọrụ kụra ḅụ ịn dee-pakama ḅịa ọmịna tọrọkọ ḅụ, anieofori ama mẹ ḅofa ḅo fatẹ ama sọ, tẹ piri-ḅio-ḅẹ anama ḅo ḅin tẹ ọmịna aḅụụ fụkama. 30Kẹlẹkẹlẹ mie arị ọmịna tọrọkọ ḅụ ịn dee-pakama ḅarịye, nwenii ó ḅo tọnwa atomi sọ tẹ ama mẹ nyana ḅa. 31Anịsakị àrị ọmịna oke pakama ḅa Awụ Tọrụ mẹ ḅụ saakị mu Filisiteniapụ ma la, pịkị Ịkpa mẹ ḅụ saakị mu Yuferetisi la; gbala àrị ama mẹ ḅio angarị apụ ma ḅọrọma ọmịna ḅara-ḅio suu ḅa, tẹ ọmịnị ọmịna tọrọkọ ḅụ ịn dee-pakama ḅa ẹrẹsị. 32Ọmịnị ini, anịanịa ịna oru-atamụnọ ma na gbọrụ ọḅọkụ sọ fị ma. 33Ini ọmịna ama mẹ ḅio anga ḅịa; anieofori ịn ḅofa ọ́ mịẹ tẹ ọmịnị ị̀ ḅụụ si mịẹ; kẹ gotẹ ọkọ ḅẹẹarị, ọ́ fịrịmẹnjị ịna oru-atamụnọ ma pịrị-pịrị, tụkụma ḅara ḅụ anị ḍiein sọ ọ́ pịrị ḅa.”
Attualmente Selezionati:
Paka-so 23: KBTP
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
(C) The Bible Society of Nigeria
