MATTHEW 24

Biehinnpi Siet ding Kimagen

(Mrk 13:1-2; Luk 21:5-6)

1Biehinnpi panin Jesu a peikhiet laitahin tua biehinnpi’ innte ensah dingin ama kungah a nuazuite a pei uhi. 2Tua ciengin amate kungah, “Tam teng zosie mu hi lo uh na mah? A tahtah a kang ci-in, tam sunga suongte khat tungah adang khat a kiciengin kinuasie lo ding hi; a unpi-in kicimzansah ding hi,” a ci hi.

Hun Tawp Ni ding Limte

(Mrk 13:3-13; Luk 21:7-19)

3Olive Muol tungah Jesu a to laitahin a nuazuite in a a tuom hopi vua, “Tami thute bang cih ciengin hing pieng ding a, nang peikia nading hun le hun tawp nading limte bang hi ding ahei, ei gen in,” a ci uhi. 4Jesu in amate kungah, “Koima in na kipuikhiel sah lo nadingun kidawm un. 5Azieh pen mi tampi in, ‘Keima Messiah#24:5 Ahi sihle “Khris” ka hi hi!’ ci-in keima’ min suongin ang pei ding vua, tuale amate in mitampi a puikhiel ding uhi. 6Note in gal kidonate le galdona thuthangte na za ding uhi; tamte ang pieng ding ma hi a, ahi vangin a tawpna ding hi nai lo ahi ziehin patau sih un. 7Azieh pen minam khat le minam khat, gam khat le gam khat ang kido ding a, mun tuomtuomte ah kielpite#24:7 Adang tang laibute ah “pul natnate” belap hi. tungin zil ang ling ding hi. 8Tam teng zosie pen gimna kipatna ahi na bo hi.

Bawlsietna Kimagen

9“Tua ciengin amate in bawlsiet ding le tha dingin note ang pie ding vua, tuale keima’ min ziehin minam zosie in ang muda ding uhi.#Mat 10:22 10Tua ciengin mi tampite a pua#24:10 Ahi sihle “kipalpua” ding vua, amate khatlekhat kilebawlin khatlekhat kimuda ding uhi. 11Kamsang zuou tampitah ang khangin mi tampi lam a khielsah ding uhi. 12Gitlona pung ding ahi ziehin mi tampite’ ki-itna kiem ding hi. 13Ahi vangin a tawp donga a thuohzo pa kihundam ding hi.#Mat 10:22 14Minam zosie tungah teci ahi dingin leitung buppi-ah tami manggam lungdamna thu kiphuongzah ding hi; tua zaw ciengin tawpna ang tung ding hi.

A Susie thei a Kidahhuoina

(Mrk 13:14-23; Luk 21:20-24)

15“Tuaci’n kamsang Daniel in a gen bangin a siengtho mun sungah a susie thei kidahhuoina ang din na mu uh ciengin (laisimte in thei ta uheh),#Dan 9:27; 11:31; 12:11 16tua ciengin Judea gama omte muolte tungah tai uheh; 17innkhum tunga omte inn sunga van la dingin kumsuh sih heh; 18lo lai-a om mipa zong a puon la dingin peikia sih heh.#Luk 17:31 19Khum ni ciengin numei gaite le nausen neite mi hamsie ahi uhi! 20Na galtai ding hun uh pen phalbi le sabbath ni ahi lo nadingin thu ngen un. 21Azieh pen leitung piencil a kipanin tuni cieng dong a pieng ngai nai lo, nidang cienga zong a pieng ngai nawn lo ding gimna lienpi tua hun ciengin ang pieng ding hi.#Dan 12:1; Kln 7:14 22Tua nite a kitomsah sih leh koima a suohta sih ding hi; ahi vangin a teelsate adingin tua nite kitomsah ding hi. 23Tua ciengin mi khatpo in na kung vuah, ‘En un! Tanah Messiah#24:23 Ahi sihle “khris” om! ahi sihle, ‘Ama khunah om! ang ci uleh um sih un. 24Bangzieh ahei cile messiah#24:24 Ahi sihle “Messiah” zuoute le kamsang zuoute ang pieng ding a, ahi thei leh a tatsate nangawn lampielsah dingin lim le na lamdang lienpite ang bawl ding uhi. 25Ciemte in, kang gen masah ahi hi. 26Tuaci’n amate in na kung vuah, ‘En un! Gamlahah a om hi,’ ang ci uleh va pei ta sih un. Amate in, ‘En un! Innkhan sungah ama om hi,’ ang ci uleh zong tahsang sih un. 27Bangzieh ahei cile tunphe in nisuona panin nitumna dong a tansah bangin, Mihing Tapa ang pei ding zong tua bang ma hi ding hi.#Luk 17:23-24 28Siluong opna popo-ah langtate a kikhawm ding uhi.#Luk 17:37

Mihing Tapa ang Peina

(Mrk 13:24-27; Luk 21:25-28)

29“Tua gimna nite zaw ciengin thakhatthu-in

ni kimielsah ding a,

hlapi zong tang nawn lo ding hi;

van panin aasite kiesuh ding a,

vana om vanglietnate kiling ding hi.#Isa 13:10; 34:4; Ezk 32:7; Joel 2:10, 31; 3:15; Kln 6:12-13

30Tua ciengin vantungah Mihing Tapa’ lim ang kilang ding hi; tua ciengin leitung minam zosie kap ding a, amate in vanglietna le minthanna lienpi tawh vana meiilumte tungah tuonga ang pei Mihing Tapa a mu ding uhi.#Dan 7:13; Zech 12:10-14; Kln 1:7

31Ama in a gin ngaih mama pengkul mutna tawh a vantung mite ang sawl ding a, van mong khat pan mong khat dong, lei kiu li panin a teelsa mite a kaikhawm ding hi.

Theikung Thuhilna

(Mrk 13:28-31; Luk 21:29-33)

32“Theikung panin thusinna nei un: Theikung a bate hing mengin a na ang dawn ciengin khuokhal hun nai ta hi, ci-in na thei uhi. 33Tua ma bangin tam thute zosie na mu ciengun kotbieng dongin ama#24:33 Ahi sihle “tua thu” ang nai ta hi, ci-in thei ta un. 34A tahtah a kang ci-in, tam thute zosie ang tun sieng masangin tam khang mite a si sih ding uhi. 35Van le lei maimang ding a, hizongle ka thute maimang lo ding hi.

Pilvanna tawh Ngah ding a Kisapna

(Mrk 13:32-37; Luk 17:26-30, 34-36)

36“Ahi vangin a ni le a hun koima in thei lo hi, vantunga om vantung mite in ahi a, Tapa in ahi zongin#24:36 Adang tang laibute ah “Tapa in ahi zongin” ci om lo hi. thei lo a, Pa khat beh in thei hi. 37Bang ding ahei cile Mihing Tapa ang peikia ding hun pen Noah hun lai ma tawh kibang ding hi.#Pien 6:5-8 38Azieh pen tuizin a tun masanga kipan tembaw sungah Noah a lut dongin mite in an ne tui dawnin numei pasal kipi kitengin a om vua, 39tuale tuizin tungin a unpi-un a lahmang hun dongin bangma thei loin a op ma bangun, Mihing Tapa ang pei ciengin zong tua bang ma hi ding hi.#Pien 6:5-8 40Tua ciengin lo lai-a om mi ni; khat kila-in khat kinuasie ding hi. 41An neh suton numei ni; khat kila-in khat kinuasie ding hi. 42Tua ahi ziehin na Topa uh ang pei ni ding thei lo na hi ziehun kigalging un. 43Ahi vangin tam thu thei un: Inn neipa in zan lai-in guta pa pei ding hun theikhol leh na kigalging ding a, a inn lusah lo ding hi. 44Tua ahi ziehin na upmaw lo laitahun Mihing Tapa ang pei ding ahi ziehin note zong a kigingsa-in om un.#Luk 12:39-40

A Muonhuoi le a Muonhuoi lo Sila

(Luk 12:41-48)

45“Tua ahile a pupa in ama’ innkuon sunga vaihawm ding le a hunhuna nasem dangte nga ding za ciet an pie dinga a koi a muonhuoi le a pil silapa koi ahei? 46A pupa ang tun ciengin tua bangin nasemin a om sila a mu pa pen mi hampha ahi hi. 47A tahtah a kang ci-in, a pupa in ama’ neisa zosie tungah a vaihawm dingin tua pa a koi ding hi. 48Ahi vangin tua sila gilopa in a lungsim sungah, ‘Ka pupa hing kiheh lel va,’ ci-in, 49a seppi silate satgawp hinlen, zukhamte tawh an ne zu dawnin na om leh, 50a upmaw lo kal le a thei lo kalin tua silapa’ pupa ang tung ding hi. 51Ama in tua silapa semnenin mihoi kipangte tawh kaana le hagawina munah a koiton ding hi.

Attualmente Selezionati:

MATTHEW 24: ZBOTF01

Evidenziazioni

Copia