Génesis 38
38
Judá ex Tamar
1Tuj tq'ijlalil lu el tpa'n tib' Judá kyi'j qe terman, ex xi' najal tuj tja jun aj Adulam, Hira tb'i. 2Oktzun tke'yin Judá tme'jel jun aj Canaán, Súa tb'i, tzaj ti'n te t-xu'jil, ex kub' tan tuk'il. 3Oktzun ten tal, q'a tal ul itz'j ex Er tb'i ok tq'o'n. 4Ok tentl tal, ax q'a tal ul itz'j, ex Onán tb'i ok tq'o'n. 5Ok ten juntl tal, ax q'a tal ul itz'j, ex Sela tb'i ok tq'o'n. Atzun ul itz'j tej attoq tuj Quezib.
6Tzaj ti'n Judá t-xu'jil Er aju tnejel tky'ajal. Ate xu'j lu, Tamar tb'i. 7Ate Er, aju tnejel tky'ajal Judá, mya b'a'ntoq tb'inchb'en tuj twitz Qman ex o kyim naj tu'n. 8Xitzun tma'n Judá te Onán kyja': Moje'kuya tuk'il t-xu'jil qtzan ttzika, tu'ntzun tjapun tu'na aju ley q'mamaj tu'n Dios, porke t-xna'na, ex tu'n tjaw jlet tiyjil tu'na, chi Judá. 9Ok tkub' tan Onán tuk'il t-xu'jil qtzan ttzik, kub' tqo'n tiyaj twitz tx'otx' tu'ntzun mi'n ttzaj tiyjil qtzan ttzik tu'n, tu'nju b'a'ntoq tu'n mya te qe k'wa'l attoq kyulel itz'j. 10Mya b'a'n e'la tuj twitz Qman aju in tb'incha'ntoq Onán. Ax ikx te o kyim naj tu'n Qman. 11Xitzun tma'n Judá te Tamar aju tlib' kyja': Tena te meb'a xu'j tja tmana okxi tch'iy Sela aju nky'ajale, chi Judá te Tamar, tu'nju kub' t-ximan Judá kyja': Mya yajku ikx te jaku kyim te ik tza'nx qe ttzik. Xi'tzun Tamar tja tman.
12El nim q'ij ex kyim t-xu'jil Judá, aju tme'jel Súa. Tejtzun tel tb'is Judá, jax jatum ate'toq qe q'il kytzmal t-ẍne'l, max tuj tnam Timnat. Xi' Hira aju aj Adulam tuk'il, aju tamiw. 13Pon tqanil tuk'il Tamar kyja': Lu tlib'a ma jax max Timnat tu'n tel kytzmal t-ẍne'l. 14Eltzun ti'n Tamar t-xb'alun te meb'yil, ok tmaqsi'n twitz tu'n jun xb'alun xaxj tu'n mi'n tel nik'b'aj ti'j, ex kub' qe' ttxa'n tnam Enaim, aju tkub' tuj tb'eyil Timnat. O tb'incha ikju tu'nju o til otoq ch'iy Sela ex na'nxtoq t-xi q'o'n tu'n tok te tchmil.
15Tejtzun tke'yinte Judá xu'j lu, kub' t-ximan qa jawni twitz kyuk'il xinaq, tu'nju otoq tz'ok tmaqsi'n twitz. 16Xitzun laq'e' ttxlaj xu'j ex minti' el tnik' ti'j atoq tlib'. Xi tma'n Judá te kyja':
—¿Mlaype kub' tuj twitza tu'n nkub' tane tuk'ila? Chi Judá.
—¿Titzun ktzajel tq'o'na weye ti'j tkub'len tana wuk'ile? Chi xu'j.
17—Ktzajel nsama'ne jun tal tchipa kyxol qe walune, chi Judá.
—B'a'n, ex q'ontza jun ti'xti teya te jun tzuyb'il, ex k'ajel nq'o'ne okxi tul t-sama'na tal nchipe, chi xu'j.
18—¿Titzun taja tu'n t-xi nq'o'ne teya? Chi Judá xi tqanin.
Xi ttzaq'we'n xu'j:
—Q'ontza t-seya tuk'ix taq'al, tuk'ix tky'aqo'cha tzyu'n tu'na, chi xu'j.
Xitzun tq'o'n Judá te xu'j, kub' tan tuk'il, ex ok ten tal.
19Tb'ajlenxi jlu ajtzun Tamar, el ti'n aju xb'alun toktoq twitz, ex ok tq'o'n juntl maj t-xb'alun te meb'yil.
20Xitzun t-sama'n Judá tal chip. Ate aj Adulam aju tamiw xi q'inte te tu'n tpon tuk'il xu'j, tu'ntzun kyajtz tq'o'n qe tzuyb'il; ex minti' knet xu'j tu'n. 21Xi tqanin kye xjal tuj lugar lu:
—¿Jatum ta' aju xu'j aj Enaim jawni twitz kyuk'il xinaq, aju in tentoq ttzi b'e? Chi tamiw Judá.
—Tzalu minti' jun xu'j jawni twitz kyuk'il xinaq, che chi xjal.
22Ajtzun meltz'aj tu'n tpon tuk'il Judá ex xi tma'n te kyja':
—Minti' ma knet xu'j wu'ne, ax ikx ma tzaj kyma'n qe xjal tuj lugar ma chixin: Tzalu minti' jun xu'j jawni twitz kyuk'il xinaq, che chi, chi tamiw Judá.
23Xitzun tma'n Judá te:
—E kykyaj ten qe tzuyb'il tuk'il, tu'ntzun mi'n kyxmayin xjal qi'j; matzun tila ma txi nsama'ne tal chip te, ex minti' ma knet xu'j tu'na, chi Judá.
24Tb'ajlenxi ox xjaw, e ul xjal q'malte te Judá kyja':
—Aju tlib'a Tamar o yaẍin kyuk'il xinaq, ex o tz'ok ten tal, che chi.
Tmatzun Judá kyja':
—Kyi'metze ex kypatun kub'e.
25Tejtzun tetz q'i'n Tamar kyu'n xjal, xi t-sama'n tqanil te tlib':
—O tz'ok ten wale tu'n kyajaw qe jlu. Ke'yin oka al e qe jlu, aju sey tuk'ix taq'al, tuk'ix ky'aqo'ch, chi Tamar. 26Tejtzun tel tnik' Judá kyi'j, tma kyja':
—Ax tok mas tz'aql xu'j lu nwitze, tu'nju minti' jaw nmojb'a'ne tuk'il Sela aju nky'ajale, chi Judá.
Minti'tl kub' tan tuk'il.
27Tej tpon tq'ijlalil tu'n tul itz'j tal Tamar, yo'ẍ qe tal e ul itz'j. 28Tej kyja'toq kyul itz'j, etz tq'o'n tq'ab' jun tal ne'. Oktzun tk'alo'n b'etx'lon jun piẍ noq' kyaq ke'yin ti'j tq'ab' ex tma: Ate jlu ma tz'itz'j nej.
29Aj ti'n tal ne' tq'ab', ex a juntl ul itz'j nej. Tmatzun b'etx'lon kyja': Tza'n tten xjaqet b'e tu'na, chi b'etx'lon. Tu'ntzun jlu, Fares tb'i ok q'o'n.
30Ultzun itz'j juntl, aju otoq tz'ok k'alo'n tq'ab' tu'n noq' kyaq ke'yin, ex Zara tb'i ok q'o'n.
Attualmente Selezionati:
Génesis 38: MAMNO
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
