Génesis 39
39
José ex aju t-xu'jil Potifar
1Tponlen q'i'n José max tuj Egipto kyu'n aj Ismael, xi kyk'ayin te Potifar aju aj Egipto. Ate xjal lu ajb'eltoq te Faraón ex nejeneltoq kye soldad kwentil te. 2Atzunte Qman attoq tuk'il José, ex b'a'n e'la tq'ij tuj tja tpatrón aju aj Egipto. 3El tnik' tpatrón ti'j attoq Qman tuk'il, ex tkyaqilju in tb'incha'ntoq, b'a'ntoq nne'la. 4Kyja'tzun tten o tzalaj Potifar ti'j José, ok tq'o'n te ajb'el te ex te tmayordom tuj tja, ex xi tq'o'n toklen ti'j tkyaqilju attoq tuk'il. 5Tej tkyaj tq'o'n Potifar tkyaqil aq'untl ex tkyaqilju attoq te tuj tkwent José, o kub' tky'iwlan Qman noq tu'n tlaj José, ex tk'am t-xtalb'il Qman tuj tja ex ti'j ttx'otx'. 6Kyaj tq'o'n tuj tkwent José tkyaqilju attoq te. Tu'ntzun jlu minti'tl o b'isun Potifar ti'j taq'un, noq o'kx ti'j twa.
Tb'anilxix ke'yin twitz José, ax ikx t-ximlal. 7Tejtzun tel q'ij, aju t-xu'jil Potifar ok tq'o'n twitz ti'j José, ex xi tma'n te kyja':
—Tankuya wuk'ile, chi xu'j.
8Atzunte José minti' o tajb'e, ex xi tma'n te t-xu'jil tpatrón kyja':
—B'intza, minti' in b'aj tk'u'j npatrone wi'je ti'j tkyaqilju at tuj tja ex o tzaj tq'o'n tuj nkwente tkyaqilju at te. 9Tuj ja lu mi a'l juntl mas ma' toklen nwitze, ex minti' in kub' t-xk'ayin jun ti'xti weye, noq o'kx aya tu'nju aya t-xu'jil. ¿Tza'ntzun tten tu'n nb'inchanteye matij il lu ex tu'n nb'inchanteye il twitz Dios? Chi José.
10Kykyaqil q'ij in xi tma'ntoq te José tu'n tkub' tan tuk'il ex tu'n tkub' ten ttxlaj. Atzunte José minti' xi tq'o'n amb'il te. 11At jun q'ij okx José tuj ja tu'n tb'ant taq'un, ex mi a'ltoq jun xjal at tuj ja. 12Tzyet José ti'j t-xb'alun tu'n xu'j ex xi tma'n te kyja':
—Tankuya wuk'ile, chi xu'j.
Atzunte José etz ojqelan, ex ax kyaj ten t-xb'alun tuj tq'ab' xu'j. 13Tejtzun tlonte xu'j otoq tz'etz oq José ex ax kyaj ten t-xb'alun tuj tq'ab', 14e tzaj ttxko'n qe majen ate'toq tuj tja ex xi tma'n kye kyja':
—Kyb'intze, tzaj ti'n nchmile jun aj Hebreo tu'n t-xmayin qi'j. Soktz wi'je tu'n tkub' tan wuk'ile; atzun weye ẍin jaw sch'ine kyuw wen. 15Tejtzun ẍin jaw sch'ine, sex oq, ex ax xkyaj tz'aq t-xb'alun wuk'ile, chi xu'j.
16Kub' tq'o'n t-xb'alun José ttxlaj tejxi tpon tchmil. 17Tej tpon tchmil ax yol xi tma'n te, ex chi kyja': Aju majen aj Hebreo tzaj ti'na, soktz wi'je tu'n tkub' tan wuk'ile. 18Tejtzun ẍin jaw sch'ine sex oq, ex ax xkyaj tz'aq t-xb'alun wuk'ile. 19Kyja'tzun ma tb'incha tmajena wi'je, chi xu'j te tchmil.
Tejtzun tb'inte tpatrón José tkyaqilju otoq tzaj tma'n t-xu'jil, tzaj nimxix tq'oj. 20Tzajtzun tzyu'n José tu'n tpatrón ex okx tq'o'n tuj tjayil tze' jatum ate'toq qe pres otoq che okx tq'o'n rey. Axtzun kyaj ten tuj pres. 21Atzunte Qman attoq tuk'il José, tzaj q'aq'an tk'u'j ti'j, ex o tz'onin ti'j tu'n tel b'a'n tuj twitz nejenel kyib'aj qe pres. 22Kykyaqil qe pres ate'toq tuj tjayil tze' lu, e kyaj tq'o'n nejenel tuj tkwent José, ex ate José o q'mante tkyaqil aq'untl in b'anttoq kyxol. 23Minti'tltoq tb'is nejenel ti'j tu'n tb'aj tke'yin aju attoq tuj tkwent José, tu'nju attoq Qman tuk'il José ex o tz'onin ti'j, kyja'tzun, tkyaqil aju in b'ant tu'n b'a'n nne'la.
Attualmente Selezionati:
Génesis 39: MAMNO
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
