Génesis 37
37
El ik'un José kyu'n qe ttzik
1Kyajtzun ten Jacob najal tuj tx'otx' Canaán jatum otoq najan tman. 2Atzun tx'olb'ab'l kyi'j qe tky'ajal Jacob jlu.
Tej otoq japun José twi' wuqlaj ab'q'i in pastorintoq ẍne'l junx kyuk'il qe ttzik, aqeju tal Bilha ex qe tal Zilpa qe t-xu'jil tman. Kok'x xi tma'n José te tman aju mya b'a'n in kyb'incha'ntoq qe ttzik.
3Mas o k'ujlanjtz José tu'n Israel kywitz qe txqantl tky'ajal, tu'nju ul itz'j ku'xun lu tuj ttijil, ex o b'ant jun t-ẍjo'w tb'anilxix tu'n. 4Tejtzun tel kynik' qe ttzik José ti'j, mas k'ujla'ntoq José tu'n kyman, el kyik'un ex minti' e yolin te tuj cheb'a.
5At jun maj ok jun twitzik' José ex xi tma'n kye ttzik. Atzun kye, mas el ik'un José kyu'n. 6Xi tma'n kye kyja':
—Kyb'intze aju nwitzik'e o tz'ok: 7Lu qo in qo k'alo'ntoq junjun che'l triw tuj kojb'il. Aju weye che'l ntriw jaw we' tu'nx tib' ex ax kyaj we'. Atzun kyeye che'l kytriw b'aj kytxolb'an kyib' ti'jele weye, ex e kub' mok'e' twitz weye, chi José.
8Xitzun kytzaq'we'n qe ttzik kyja':
—¿Maj k'okela te qreye ex kkawila qib'aje? Che chi.
Mas el ik'un José kyu'n tu'n kylaj twitzik' ex qe tyol.
9Te tib'ajxi ok juntl twitzik' José, ax ikx xi ttx'olb'a'n kye ttzik ex xi tma'n kye kyja':
—Kyb'intze juntl nwitzik'e o tz'ok: Lu q'ij tuk'ix xjaw ex junlaj che'w in che kub' mok'e'toq nwitze, chi José.
10Ax ikx xi ttx'olb'a'n José te tman ik tza'nx otoq b'aj ttx'olb'a'n kye terman. B'ajtzun kawin tu'n tman ex xi tma'n tman te kyja':
—¿Ti t-xilen twitzik'a lu? ¿Chin b'elpetzun mok'e'ye twitza ex tu'n tpon takl tib'aj nwitze twitz tx'otx' junx tuk'il ttxu'ya ex kyuk'ix qe termaniya? Chi tman.
11Qe ttzik José tzaj tlo'ch kyk'u'j ti'j, atzunte tman ok ten ximal ti'j jlu.
Xi k'ayin José kyu'n ttzik
12At jun q'ij e je'x ttzik José pastoril qe t-ẍne'l kyman max tuj Siquem. 13Xitzun tma'n Israel te José kyja':
—In che kwentin qe ttzika qe ẍne'l max tuj Siquem. Tzaja, ex kxe'l nsama'ne kyuk'il, chi Israel.
—Lu qine lu, chi José.
14Xi tma'n Israel te kyja':
—Txi'ya ke'yilte tza'n ate' qe ttzika ex qe ẍne'l, ex q'intza tqanil wuk'ile, chi Israel.
Tej t-xi t-sama'n, atzun najltoq tuj chq'ajlaj Hebrón. Pontzun José tuj Siquem. 15Akux in b'etje'toq tuj kojb'il, ok noj jun xjal ti'j ex xi tqanin xjal te kyja':
—¿Ti in tjyo'na tzalu? Chi xjal.
16Xi ttzaq'we'n José kyja':
—In chin jyone kyi'j qe ntzike. B'inchama xtalb'il q'mantza jatum in che pastorin ẍne'l, chi José. 17Xi tma'n xjal te kyja':
—O che ik' tzalu. O nb'iye kyyol kyja': Qo'qe tuj Dotán, che chi, chi xjal.
Xi'tzun José ke'yilte kye ttzik, ex e knet tu'n max tuj Dotán. 18Ilwaj José kyu'n najchaq, kyja' ttzaj. Tej na'nxtoq tkanun José kyuk'il, b'ant ti'j kyu'n tu'n tkub' kyb'yo'n. 19Kymatzun kyxolx kyja':
—Kyke'yinxe, lu witzky'al tzul. 20Kytzaje, e tkub' qb'yo'n, e tku'x qxo'n tuj jul, ex jaku txi qma'n te qman kyja': Jun txkup mya b'a'n ma kub' b'yonte te, qo chi kxel qma'n. Qila'tzun qa che japunel qe twitzik', che chi.
21Tejtzun tb'inte Rubén jlu, ok ten kolol ti'j José ex tma kye titz'in kyja':
—Mi'n kub' qb'yo'n. 22Mi'n tz'el kyi'ne tchk'el. Kyq'on ku'xe tuj jul lu, aju at tuj tzqij tx'otx', ex mi'n tz'ok kyq'o'n kyq'ab'e ti'j tu'n tkub' kyb'yo'ne, chi Rubén.
Tma Rubén ikju tu'nju tajb'iltoq tu'n tklet José ex tu'n taj t-sama'n tuk'il tman. 23Tejtzun tpon kanun José kyuk'il ttzik, tzyet kyu'n ex el kyi'n t-ẍjo'w tb'anil, aju toktoq ti'j. 24Xitzun kyi'n ex ku'x kyq'o'n tuj jul. Aju jul lu minti'toq tuj ex tzqijtoq tuj.
25E kub'tzun qe' wa'l, ex xi kyke'yin kyja'toq kytzaj txqan xjal aj Ismael, tzajni qe max tuj Galaad, q'i'ntoq perjum, bálsamo ex ttxk'omil tze' mirra, kyu'n kychej camey; kyja'toq kyxi' tu'n kypon tuj Egipto. 26Tmatzun Judá kye terman:
—¿Ti ok qkamb'a' qa ma kub' qb'yo'n qitz'in ex tu'n tkub' qewan qa qu'n kub' qb'yo'n? 27Mas b'a'n tu'n t-xi qk'ayin kye aj Ismael, twitz tu'n tkub' qb'yo'n, tu'nju ax qitz'in ex ax qchib'jal, chi Judá.
B'a'n e'la jlu tuj kywitz qe terman, 28ex tej kyul kanun qe comersyant aj Madián, aqeju aj Ismael juntl kyb'i, jatz q'i'n José tuj jul kyu'n terman, xi kyk'ayin kye, ex o kyk'am winqin saq pwaq twi'. Xitzun q'i'n José tuj Egipto.
29Tej tul meltz'aj Rubén, ku'x tke'yin tuj jul, ex mi a'ltoq te José tuj. Eltzun t-sb'it'un t-xb'alun tu'n tb'is. 30Aj meltz'aj jatum ate'toq qe titz'in ex xi tma'n kye kyja': Mi a'l ku'xun tuj jul. Atzun weye ¿jatum chin xe'le ja'lo? Chi Rubén.
31Tzajtzun kyi'n aju t-ẍjo'w José, kub' kyb'yo'n jun tal chip, ex ku'x kymu'n ẍjo'w tuj tchk'el. 32Xi kyi'n ẍjo'w tuk'il kyman ex xi kyma'n te kyja':
—O qo ok noje ti'j jlu. Ke'yin oka qa a t-ẍjo'w tky'ajala ex qa mya a, che chi.
33Eltzun tnik' Jacob ti'j ex tma kyja':
—Ax tok te nky'ajale José ẍjo'w lu. Atlo jun txkup o b'aj chyo'nte te ex o b'aj tpaẍu'n, chi Jacob.
34Eltzun t-sb'it'un Jacob t-xb'alun, ok tq'o'n t-xb'alun ch'i'x twitz te jun techal ti'j tb'is, ex o b'isun nim q'ij ti'j tky'ajal. 35Kykyaqil qe tky'ajal ex qe tme'jel e ok ten q'uqb'alte tk'u'j, atzun te minti' o kub' tuj twitz tu'n tq'uqb'anjtz tk'u'j; noq o'kx ok ten oq'el ti'j tky'ajal ex in tma'ntoq kyja': Kukx chin b'isule ti'j nky'ajale, ex max kxel nkoline okxi npone tuk'il kyxol kyimni, chi Jacob.
36Xitzun q'i'n José tuj Egipto kyu'n aj Madián, ex xi kyk'ayin ma chixin te Potifar. Ate xjal lu ajb'eltoq te Faraón ex nejeneltoq kye soldad kwentil te.
Attualmente Selezionati:
Génesis 37: MAMNO
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
