Bie Ndụ n’Ike n’Obi Ike!Ihe Atụ

“Onye Nnọchianya nke Eluigwe – Mmụọ Nsọ”

Onye nnọchianya bụ onye na-anọchite anya otu ọchịchị obodo ezigara obodo ọzọ ịga bie n'etiti ndị ya, iji mezuo ozi udo na ezi uche. Ọ na-arụ ọrụ ya site n'ikike, mmesapụ aka na ihe onwunwe nke ọchịchị obodo ọ na-anọchi anya ya. Site n'inwe ntụkwasị obi siri ike n'ebe ọ nọ, ọ na-eme nzube ya n'ụzọ dị ùgwù ma mezuo ya.

N’ọtụtụ ụzọ, ozi nke Mmụọ Nsọ yiri nke onye nnọchite anya sitere n’Eluigwe. Mmụọ Nsọ na-achịkọta ikike, ike na ihe onwunwe nile nke Chineke, ma na-egosipụta ma na-ekpughe ịhụnanya Chineke nye onye ọ bụla nọ n'ụwa site na ọnụnọ Ya na ọrụ Ya.

Dika oge Jizọs na ndị na-eso ụzọ Ya nọ na-abịa ná ngwụcha, Ọ gwara ha na Ya agaghị ahapụ naanị ha ma Ọ lachaa. Ọ gwara ha maka otu onye a ga-ezite n’ọnọdụ Ya ka Ya na ha nọrọ, ka O duzie ha, kuziere ha, na-akasi ha obi ma na-edu ha – Mmụọ Nsọ. Jizọs kwuru, sị:

“...n'ihi na asi na alaghm, Onye-nkasi-obi ahu agaghi-abiakute unu; ma ọ buru na alam, M'gēzite Ya nye unu.” Jọn 16:7

Mgbe Jizọs rụchara ọrụ Ya n’ụwa, O zitere Mmụọ Nsọ ka Ọ nọnyere anyị n’ọnọdụ Ya ruo mgbe Ọ ga-alọghachi ọzọ. Mmụọ Nsọ na-enye nduzi, nkuzi, nkasi obi na ndụmọdụ gbasara ndụ anyị. Jizọs kọwara Mmụọ Nsọ nye ndị na-eso ụzọ Ya n’ụzọ dị otú a:

“Ma Onye-nkasi-obi ahu, bú Mọ Nsọ, Onye Nnam gēzite n'aham, Onye ahu gēzí unu ihe nile, me kwa ka unu cheta okwu nile Mu onwem gwara unu.” Jọn 14:26

Ọnụnọ nke Chineke nọnyeere anyị taa n'ụdị nke Mmụọ Nsọ, ma Ọ na-arụsi ọrụ ike n'ụwa anyị na na ndụ anyị.