Uche Chineke banyere onye ọbụla kwere ekweIhe Atụ

Nzisa oziọma; Iwu nke Ikpeazụ.

Site na Jenesis, anyị ga-ahụ etu Chineke si mara ụma na-adọrọ ụmụ mmadụ nye onwe ya, ozigbo Adam na Iv dàchàrà n’ogige Iden. Nke a abụrụla ihe ịma aka na obi na-eti kpumkpum nke Chineke. Ekère mmadụ ka ya na Chineke na-akpakọrịta, mana onye iro bara n'aghụghọ ya, ewee napụ mmadụ ọnọdụ ya.

E mesịa, Chineke gbalịrị ọtụtụ mgbe iweghachi mmekọrịta a, bụ́ nke mesịrị duga n’ọmụmụ, ọnwụ ya, na n’ikpeazụkwa, mbilite n’ọnwụ ya. Na mbili n’ọnwụ, Jizọs nyere ndị na-eso ụzọ ya iwu ikpeazụ n’akwụkwọ Ọrụ Ndịozi 1:7-8 . Iwu a bụ ka ha bụrụ ndị akaebe nke Jizọs Kraịst n'akụkụ dị iche iche nke ụwa. Ma otu ihe dị oké mkpa e kwesịrị ịrịba ama bụ mkpa ọ dị ịkwado akwado, tupu ị̀zọpụ̀ ụkwụ nke nkwuwa okwu, ịbụ onye àmà nke Jizọs Kraịst. Jizọs nyere ndị na-eso ụzọ ya ntuziaka ka ha chere Mmụọ Nsọ tupu ha amalite ozi nzisa oziọma ha. Nke a bụ maka na nzisa oziọma chọrọ ikike.

Enwere ike iwere ikwusa ozi ọma dị ka ọrụ dị oke mkpa, nke a bụ iwu ikpeazụ Jizọs nyere tupu Ọ̀ rịgoo n'eluigwe. Nke a na-egosi ka ọrụ a si dị oke mkpa nye onye ọbụla kwere ekwe. Ọ bụrụ na ọrụ a dị oke mkpa, e nwere ike isi na ọ dịkwa oke mkpa ịgbaso iwu na ntuziaka onye nwe ya na-etinyeghị maọbụ wepụ ihe na ya. Ọ dị ezigbo mkpa ịkwado akwado na ikpe ekpere. Nke a bụ n’ihi na ike dị oke mkpa n’iji zisaara ndị mmadụ ozi ọma nke ọma. Nke a na-eme mgbe onye kwere ekwe jupụtasịrị na Mmụọ Nsọ. Mmụọ Nsọ na-enye aka nke ọma n’iji zisaara ndị na-ekweghị ekwe ozi nke nzisa oziọma. Otu n’ime ihe a na-enweta site na njupụta nke Mmụọ Nsọ dịka a hụrụ na Ọrụ Ndịozi 2, bụ nkwuwa okwu na-abịa n’ikwusa ozi ọma nke ọma, maka na okwu ọnụ nkịtị enweghị ike izisa ozi ọma, kama, ọ bụ okwu ejiri ike kwado.

Iji soro iwu ikpeazụ a, ọ dị mkpa ịgbaso ntụziaka nke Jizọs Kraịst, onye nyere anyị ntụziaka a, ma cherekwa Onye nwe anyị n’ekpere, amamihe, na nduzi nke Chineke iji malite njem nke nzisà oziọma nke ọma.