maṯa 13
13
asa 13
ŋuɽun ŋun ŋɩlɩbo ŋeḏi gwiji gwe ḏɩri
mks. 4:1-9, lk. 8:4-8
1na gi lamon lono na yecu duḏa kwu dunu, nujiga kɩmerɩmer geḏi ḏɩrawe, 2na liji aɽuwaḏe ldu lugwun lutu kəbe nuəḏi kwu murkab ganu nujiga. na liji wei ḏuḏɩni kɩmerɩmer. 3nuluməḏɩjo ŋuɽuna ŋutu ŋun ŋɩlɩbo, nuleicɩno, gwiji gwe ḏiri mədu gi ḏauuna gwon gwe. 4na gwune auuna ŋwe, kworo ideḏe gi ṯaṯ elo, na nyiɽuwə wila naleʼe. 5na kworo ideḏe ŋworlol ganu ŋwun ŋwate ŋwəṯi gwmyəmə gwutu no, nalobɩḏa coucou gi gwune gwɩnyəm gwate gwijo gwutu no. 6na gwune na anyin abuḏa nalmimɩni gi gwune ŋwate ŋwəṯi dro no, naluḏe. 7na kworo ideḏe gi jugi ganu; na jugi obɩḏa nalijikəje gwuja. 8na kworo ideḏe kwɩnyəm ganu gwun gwiŋir nallɩŋe nyaɽe, na kworo nyibuḏo nanu na kworo nyiwourəno na kworo nyirebɩna. 9na gwun gwəṯi nani neḏi diŋɩna, ŋwudiŋɩni.
ḏaŋiḏio ŋuɽuna ŋeḏi gworo kwe gwun gwəṯi jei ganu
mks. 4:10-12, lk. 8:9-10
10na calɩmis wila naleicɩno, gwudaro gəko naluməḏɩjo ŋuɽuna ŋun ŋɩlɩbo? 11nulwɩrlijo ŋuɽuna nuleicɩno, gi gwune ŋɩmajilḏəḏə kani nyalɩŋe ŋuɽuna ŋun ŋɩlɩbo ŋeḏi ŋele ŋeḏi kanyin, namɩni ŋate ŋɩmalɩḏəḏə luŋaije no. 12ŋi gwune ŋwun ŋaṯulo, ŋulbəḏəṯɩjo na ŋwuləṯi ŋutu; na gwun ŋwate ŋaṯulo no, namɩni ŋun ŋaṯulo ŋulapa lugwun. 13na ŋiro dino nyi luməḏɩjɩlo luŋa ŋuɽuna ŋun ŋɩlɩbo, gi gwune ləṯidaŋa ŋa namɩni late lidaŋəḏi ga no, naləṯidiŋɩni late ləḏiŋɩni no na late lalɩŋe no. 14na ŋaṯɩmulo lagin ŋun ŋaŋidɩlo nebi gwun ŋwan isaia ŋun ŋarno,
ḏidiŋɩna de nyaləḏiŋɩni namɩni nya late lalɩŋe no;
na daŋada de nyaladaŋa ga namɩni nya late laŋu no;
15ŋɩ gwune dugwor ḏeḏi liji leno dɩni,
na nani nagin diŋɩni nɩrimo ganu,
na luŋa nalməṯo jei jagin,
i gwəṯi ladaŋa ga jei je jagin,
naldiŋɩni nani ne nagin
nallɩŋe dugwor de dagin,
nalwɩrla ŋa na nyilgele muma.
16namɩni ḏimoreḏa daje gi jei jalo gi gwune jimadaŋa ŋa, na ŋi nani nalo ŋi gwune nimadiŋɩni. 17na gwerkwe ganu nyi gweiceijɩno, nebɩŋa lo lutu na ləmɩnyo lun liŋir lar laŋu gworki ŋun ŋaŋəḏanyalo nalmɩni ate nalaŋu no, nalar ŋalɩdiŋɩni ŋun ŋidiŋɩnanyalo nalmɩni ate nalɩdiŋɩni no.
ḏaŋiḏio ŋuɽuna ŋun ŋɩlɩbo ŋeḏi gwiji gwe ḏɩri
mks. 4:13-20, lk. 8:11-15
18na dino diŋɩnɩl ŋuɽuna ŋun ŋɩlɩbo ŋeḏi gwiji gwe diri. 19na ḏa ŋwete madiŋɩni ŋuɽuna ŋeḏi ŋele nate nuliŋe no, na gwun gwɩki wila ŋulape ŋun ŋauunu ŋe gi ḏugwor ganu ḏuŋun. na ŋu gwiro gwun ŋauunu ŋe gi ṯaṯ. 20namɩni gwun ŋauunu ŋe ŋworlol ganu, ŋu gwiro gwun gwatɩḏiŋɩni ŋuɽuna na cou ŋwulməṯo ḏidila ḏe ganu, 21namɩni gwate gwəṯi dro kwulo gwuŋun no na ŋu gwajiga mɩce namɩni gwune na ḏɩdia wila i ḏiḏagɩɽina ḏan ŋuɽun, na cou gwobṯɩkadɩni. 22na gwun ŋauunu ŋe gi jugi ganu, ŋu gwiro gwun gwatɩḏiŋɩni ŋuɽuna, na ŋuɽun ŋeḏi gɩḏilio keno na ḏinyinyiməḏeico ḏeḏi ḏuṯɩḏo ŋɩdio ɽikəjo ŋuɽuna, ŋate ŋalɩŋe nyaɽe no. 23na gwun ŋauunu ŋe kwɩnyəm. ganu gwun gwiŋir, ŋu gwiro gwun gwatɩḏiŋɩni ŋuɽuna nulɩŋe. ŋu gwiro gwun gwilɩŋiḏi nyaɽe. kworo lɩŋeḏa nyaɽe nyibuḏo nanu, na kworo nyiwourəno na kworo nyirebɩna.
ŋuɽun ŋun ŋɩlɩbo ŋeḏi jɩmuruḏ
24nuluməḏɩjo ŋuɽuna ŋun ŋɩlɩbo ŋiro kaja nuleicɩno, ŋele ŋeḏi kanyin ŋiro gi gwiji gwun gwukwuḏi ḏigwuḏe ḏun ḏiŋir gi ḏiri ganu ḏuŋun; 25na gwune na liji je gi ḏiḏɩra, nuwila gwun gwikiḏiḏɩlgwe nukwoi jɩmuruḏo dino kɩlɩgi ganu geḏi ŋwon, nunwalane. 26gwune na ŋwon obɩḏa ŋwaliŋe nyaɽe, na jɩmuruḏ obɩḏa dino. 27na lɩwainy leḏi gwele gweḏi dunu wila naleicɩno, gwele gwəri, ga gwate gwukwuḏi ḏigwude ḏun ḏiŋir gi ḏɩri ganu ḏuŋa na? namɩni jɩmuruḏ wila ne? 28nuleicɩno, gwiji gwun gwɩkiḏiḏɩle gwiro gwarro dino. na lɩwainy eicɩno, ŋa gwubunyu anele analwəɽeice ldu a? 29nuarno, awe, i gwəṯi ḏa nyalmakwuri jɩmuruḏo nanyalawawala ŋwona ga dino. 30ouwɩricɩlo albuḏe kal gete kəbe kaja ge ḏɩwona, na kaja ge ḏɩwona nyi gweico lun laṯɩwone no, wəɽeicɩl jɩmuruḏo ldu gwerre nyalkaii ldu kani alwude, nyamɩni ŋwon wəɽeice ŋwona ldu aləḏi ŋuɽulo ŋinyi.
ŋuɽun ŋun ŋɩlɩbo ŋeḏi ŋaɽe ŋeḏi kardal na ŋeḏi jɩduɽu
mks. 4:30-34, lk. 13:18-21
31na guluməḏɩjo ŋuɽuna ŋun ŋiro kaja ŋun ŋɩlɩbo, naleicɩno, ŋele ŋeḏi kanyin ŋiro gi ŋaɽe ŋeḏi gwaɽe gwun gwan kardal ŋɩma gwiji ape nukwoḏa gi ḏɩri ḏuŋun, 32na ŋeno ŋɩtieno gi ḏigwuḏe wei, namɩni ḏa ŋɩmobɩḏa ŋɩbuṯano gi jaɽe wei jun jəṯi nəni neḏi ŋɽa, ŋaro gwaɽe kəbə naṯi nyiɽuwə nyeḏi kanyin wila naṯɩlḏɩre gi dɩrna duŋun.
33nuaɽu nuluməḏɩjo ŋuɽuna ŋiro kaja ŋun ŋɩlɩbo, nuleicɩno, ŋele ŋeḏi kanyin ŋiro gi jɩduɽu jun japɩlo ŋwa nulɩbɩji ŋi jəlmɩḏ ganu ṯəɽɩl jeḏi jilo kəbe nalro jɩduɽu wei.
34na yecu uməḏɩjo lijɩ lutu ŋuɽuna wei ŋuɽun ŋe ŋun ŋɩlɩbo; namɩni nate nuluməḏɩjo ŋuɽuna ŋədi ŋun ŋate ŋɩlɩbo no, 35kani ŋuṯɩmi ŋuɽuna ŋun ŋarɩŋe nebi gwune aruno,
nyi gwiḏi linyu linyi ŋuɽun ŋun ŋɩlɩbo,
na nyi gwumə ŋɩdio ŋun ŋɩlɩbiḏɩnu uro kaja gun
gigelɩlge gɩḏilio.
ŋuɽun ŋun ŋɩlɩbo ŋeḏi jɩmuruḏ ŋɩmalɩŋiḏɩni
36na yecu walane gi liji lutu nuəḏi kwu dunu; na calɩmis juŋun wila lugwun, naleicɩno, aŋijije ŋuɽuna ŋeḏi jɩmuruḏ jeḏi dɩri. 37nulwɩrliɽo ŋuɽuna nuleicɩno, gwun gwaṯɩkwoi ḏigwuḏe ḏun ḏiŋir gwiro ŋaɽe ŋeḏi liji. 38namɩni ḏɩri ḏiro gɩḏilio. namɩni ḏigwuḏe ḏun ḏiŋir ḏiro nyaɽe nyeḏi ŋele ŋeḏi kanyin; na jɩmuruḏ jiro nyaɽe nyeḏi ŋu gwun ŋwɩki; 39na gwun gwɩkiḏiḏɩlgwe gwun gwukwuḏɩlo gwiro iblis; na ḏɩwona ḏiro gaja gun gɩṯɩmige gɩḏilio; na lun laṯiwone liro liji leḏi kanyin. 40na ŋiro gi jɩmuruḏ jun juwəjeicɩlo ldu jalɩnuni kigo, na dino ŋaro kaja ŋun gɩṯɩmige gɩḏilio. 41na ŋaɽe ŋeḏi liji nuwəjo liji luŋun leḏi kanyin, nalwəɽeice ŋɩdio wei ldu ŋun ŋaṯobɩlkejo, na luŋa lun laṯape ŋuɽuna ŋɩki ŋele ŋuŋun, 42nalɩwini kigo yun yɩbuḏu; na ŋɩnəwei ḏərio gwula ḏaje na diʼino gi jɩŋaḏ. 43naləɽəḏɩjo lun liŋir ŋele ŋeḏi baba gwagin liro gi anyin. na gwun gwəṯi nəni neḏi diŋɩna, ŋwudiŋɩni.
ŋuɽun ŋun ŋɩlɩbo ŋeḏi ŋɩda ŋun ŋiro loiny bibɩɽyal, na ŋeḏi ŋɩdi ŋun ŋiŋir gworki na ŋeḏi car jeḏi ŋwumi
44na ŋele ŋeḏi kanyin ŋiro gi ḏɩbona ḏun ḏɩlɩbiḏɩnu gi ḏɩri, ḏun ḏɩmal gwiji buje nuaɽu nulɩbɩji, na gi gwune gwadile ganu, nuwele nuleḏila wei gun ŋəṯulo kəbe nueḏila ḏɩri ṯeno.
45na dino ŋele ŋeḏi kanyin ŋiro gi ŋɩlabo ŋaṯɩbunyi nyida nye nyiro gi ŋwoiny nye nyiŋir gworki nyiro bibɩɽŋal. 46gwune nubuje ŋɩda ŋetɩdo ŋutu jilɩnya, nuwele nuleḏɩla wei ŋun ŋəṯulo nueḏɩla.
47na dino ŋele ŋeḏi kanyin ŋiro gi car jeḏi gwumi jun jɩwinu gi ḏɩrawe na juwəɽeico ŋwumi ldu gwun ŋwiro kajakaja, 48gwune nalenyeḏe nalabuɽa kɩməmu elo, nalijiga nalwəɽeice gwumi ldu gwun ŋwiŋir nalɩgele gi niḏi ganu, namɩni gwun ŋwɩki nalŋwuwini kaja. 49na ŋaro dino kaja gun gɩṯɩmige gɩḏilio. liji leḏi kanyin lila lalɩkenyə ganu lun lɩki na lun liŋir, 50nalɩwini lun lɩki kigo ganu yun yɩbuḏu; na ŋɩnəwei ḏərio gwula ḏaje na ḏiʼino gi jɩŋaḏ.
51nyalmalɩŋe ŋuɽuna ŋeno wei a? naleicɩno, i. 52nuleicɩno, na ŋiro dino jalgaṯɩm wei jun jəlɩminu ŋele ŋeḏi kanyin jiro gi gwəmɩnyo gwun gwiro gwele gweḏi dunu ŋun ŋaṯuldio ŋuɽulo ŋuŋun ŋɩdio ŋun ŋiya na ŋun ŋuɽun.
yecu gwudonyinu nasira
mks. 6:1-6, lk. 4:16-30
53gwune na yecu ṯɩmi ŋuɽuna ŋeno ŋun ŋɩlɩbo, nuwalane kalo keno. 54nuəḏi kamɩrɩgen yuŋun nuje gi ḏalɩmɩḏa gi lɩdunu lagin leḏi elo, kəbe nalobaga ṯuṯ, nalarno, gwiji kweno gwəri gwapo ḏilɩŋeḏena ṯeno na ŋɩru ŋun ŋɩbuḏo ne? 55ŋu gwədu gwun gwiro ŋaɽe ŋeḏi gwun gwaṯɩkade jɩburə na? na nana gwuŋun gwədu gwan mariam, na lɩmegin lədu lan yagub, na yusi, na simian na yauḏa na? 56na lɩmegin wei lun liro la lədu ləṯilɩɽe na? na dino gwiji kweno gwəri gwapo ŋuɽuna ŋeno wei ne? 57nalobɩlkejo lugwun. nalmɩni yecu eicɩno, nebi gwate gwete gwun gwate gwatɩnəji no, namɩni liji leḏi amɩrɩgen yuŋun na dunu gwuŋun gwate gwaṯɩlnəji no. 58na ŋu gwate gwaṯape ŋɩnəwei ŋɩru ŋutu ŋun ŋɩbuḏo no, gi gwune ḏɩməṯo dagin ḏɩməmɩrṯəde.
Nke Ahọpụtara Ugbu A:
maṯa 13: OTR1966
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Nuba, Otoro New Testament
© British and Foreign Bible Society, 1966.