maṯa 14
14
asa 14
ḏaiya ḏeḏi yuwana mamadan
mks. 6:14-29, lk. 9:7-9
1na kaja kono gɩdiŋɩnige ərudus gwun gwiro gwele ŋan yecu, 2nuuməḏɩjo jaḏama juŋun, nuleicɩno, kweno gwiro yuwana mamadan; ŋu gwɩdiɽu gi ḏaiya, na ŋiro dino ŋɩmaŋino lugwun ŋɩru ŋɩbuḏo. 3gi gwune ərudus gwuməṯi yuwanaŋ, nugaki nugele kɩrkon gwan ərudiya, gwun gwiro gwa gweḏi megin gwan bilibis, 4gi gwune yuwana gwuməḏɩju nueicɩno, ŋuɽun ŋeno ŋɩtumuḏu ga gwago gwa kweno. 5nuar gwuɽinye numini donye liji lun lutu gi gwune naṯɩlarno gwiro nebi. 6na gaja geḏi ḏilɩŋino ḏeḏi ərudus, na ŋera ŋeḏi ərudiya riṯe kɩlɩgi ganu nuiŋiri ərudusŋ ḏugwore; 7nuorɩmi nuḏəḏə ŋidio wei ŋun ŋɩbunyɩlo lugwun. 8nuɽoṯeḏe gi gwune uməḏɩjɩne nana gwuŋun gwerre, nueicɩno, ḏəḏinyi lɽa leḏi yuwana mamadan gi sinia elo. 9na gwele rone gi ḏugwor ganu ḏuŋun, namɩni gwan ḏərɩmiə ḏuŋun na luŋa lun lijille gi ḏiṯa nuluməḏɩjo alḏəḏə. 10nulwəjo naluɽəḏə lɽa leḏi yuwana kɩrkon. 11na lɽa luŋun ləpinu gi sinia elo, nalḏəḏə ŋeria nuəpijo nana gwuŋun. 12na calimis juŋun wila nalape aŋina yuŋun, nalkwuri; ki nalwele naluməḏɩjo yecuŋ.
ḏia liji lun liro alɩb ṯoḏɩne
mks. 6:30-44, lk. 9:10-17, ywn. 6:1-13
13gwune na yecu diŋɩni, nuwalane kalo ŋɩnəwei murkab ŋwe, nuar gwele kiḏɩwer kaja guŋun. na liji diŋɩni nalgwujane ŋwara ŋwe gi jɩmɩrɩgen. 14gwune na yecu duḏə nuaŋu liji gɩrɩpi, nulino nugele liji lagin muma lun ləṯi ŋɩɽainy. 15gwune na kalo ro garage na calɩmis wila lugwun naleicɩno, kalo ŋiro ḏɩwer, na galo gɩmele wɽi. kuwəḏi liji kani alwele gi jɩmɩrɩgen aleḏɩla ŋɩdio ŋe ḏiṯa. 16nalmɩni yecu eicɩno, ouwɩricɩlo mɩno, ḏəḏɩlo nyaŋa aleʼe. 17naleicɩno, anəṯi ŋɩne gia ṯoḏɩne na ŋwumi ŋwɩttən kuwei. 18nuleicɩno, əpɩjil ŋɩne. 19nuuməḏijo liji aljiga karom elo, na gwune nuape gia ṯoḏɩne na ŋwumi ŋwɩttən nuŋalaḏe elo kanyin, nueico eloŋu sukran; na gwune nubɩleṯɩnya ganu nuḏəḏə calɩmis juŋun gia, na calɩmis ḏəḏə liji. 20na liji eʼe wei nalpe, nalwəɽeice ŋidio ldu ŋun ŋiṯɩlɩne ganu nalenyeje jiḏi di na gwuttən. 21na lun liṯi liro alɩb ṯoḏɩne lun liro ləmɩnyo, na late limanḏuɽə la na nyaɽe no.
yecu gwuwiḏi ŋwara ŋwe gi ḏɩrawe elo
mks. 6:45-52, ywn. 6:16-21
22na cou nuremeṯeḏeice calɩmis juŋun naləḏi kwu murkab ganu, naldarane nalmuri kiməmu ŋiro kaja, gwune nuwɩreiji liji elo. 23gwune nulwɩreilji elo nuabo gi lɩrgwom elo gwetɩdo gwar gwuməḏɩjo eloŋu. gwune na galo ro garage gwijɩre ŋɩnəwei gweṯɩdo. 24namɩni murkab gwijo kɩlɩgi ganu ge ḏɩrawe, na ŋau upi murkab, gi gwune lakajɩlo ḏɩron. 25na gɩṯo gala duɽa na yecu wila lagin ŋwara ŋwe gi ḏɩrawe elo. 26gwune na calɩmis aŋu wiḏi gi ḏɩrawe elo, naldonye nalarno, gumɩḏi ŋiro; naləri gwula ŋɩḏe ŋe. 27nal yecu uməḏijo nuleicɩno, bɩriḏɩl nanu. nyi gwiro, nyaḏonyɩḏa no. 28na buṯrus wɩrlijo ŋuɽuna nueicɩno, gwele gwəri, ḏa ŋa maro ŋa, uməḏɩjɩnyi kani nyi wila lugwuŋa ŋau elo. 29nueicɩno, wila mino. gwune na buṯrus gwulo kwu murkab ganu nuwele ŋau elo nuar gwele ḏi yecu. 30namɩni gwune nuaŋu ḏɩronia ḏutu nuḏonye, na gwune nuiḏeije nugwuli ŋau ganu nuərəjo gwula nuarno, gwele gwəri, əbɩrinyi. 31na yecu kuwa ḏi ḏuŋun nuḏɩməṯo nueicɩno, ŋa gwun gwiṯi ḏɩməṯo, gwudaro gəko na gigəreje? 32gwune naləḏi kwu murkab ganu na ḏɩron gwulə ga. 33na luŋa lun lijo kwu murkab ganu nalidi ga gi jei ganu lugwun, naleicɩno, gwerkwe ŋa gwiro ŋaɽe ŋeḏi elo.
ḏiŋiriḏa nanu janisaraṯ
mks. 6:53-56
34gwune nalmuri nalṯɩmi kamɩrɩgen yun yan janisaraṯ. 35na ləmɩnyo lɩŋe leḏi galo kono nalwəje gi liji leḏi galo wei gun gɩwəɽeico ga, na luŋa əpijo wei lun leḏeḏo nanu. 36nalɽoṯeḏe lugwun gworki naldɩmumi ḏiɽil ḏeḏi giria guŋun kuwei, na wei lun lɩmaldɩmumi naliŋir nanu.
Nke Ahọpụtara Ugbu A:
maṯa 14: OTR1966
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Nuba, Otoro New Testament
© British and Foreign Bible Society, 1966.