maṯa 12
12
asa 12
ḏidɩmino ḏeḏi lamon le sabiṯ
mks. 2:23-28, lk. 6:1-5
1na kaja kono na yecu wele gi lamon le sabiṯ gi dɩri ganu na calɩmis nal jaŋu e, nalakɩre ŋwona nalʼe. 2gwune na lɩbarɩsi aŋu naleicɩno, eʼe, calɩmis juŋa ŋalarre ŋun ŋɩtumuḏu gi lamon le sabiṯ. 3nulmɩni eicɩno, nya late ləgɩri ŋuɽuna ŋun ŋarrɩlo ḏauuḏ gi gwune iti jaŋu, na liji lun lijille na? 4galakwe nuəḏi kwu dunu gweḏi elo nuʼe gia gun gaṯɩlgegɩle, gun gitumuḏu lugwun na lun lijille, namɩni gaṯi jɩsis e cucun? 5i nya late ləgɩri ŋuɽuna ŋun ŋigelijɩlo elo musaŋ, galakwe jɩsis kwu dunu gweḏi elo gwun gwubuḏo naṯɩlki lamon le sabiṯ namɩni late laṯarre ŋuɽuna ŋun ŋɩki na? 6namɩni nyi gweiceijɩno, kalo keno gwo gwete gwubuṯano kwu kunu gweḏi elo gwun gwubuḏo. 7namɩni da nyalɩŋiḏi ŋuɽuna ŋeno, nyi gwubunyu ŋino ŋədu n ŋe ḏiḏuga no, nya late lakɩmi lun late ləṯi ŋuɽuna ŋɩki no. 8gi gwune ŋəɽe ŋeḏi liji ŋiro gwele gweḏi lamon le sabiṯ.
ḏɩmiḏa ḏeḏi ḏi ḏun ḏoḏeḏo elo
mks. 3:1-6, lk. 6:6-11
9gwune nuwele nuəḏi kwu dunu gweḏi elo gwagin. 10na gwəmɩnyo je gwun gwoḏeḏo di elo. kani alicigi lugwun, nalɽoṯəḏɩjo nalicɩgi naleicɩno, gwiŋir gwilmidi gi lamon leḏi sabiṯ a? 11nuleicɩno, əḏi gwiro gwete lagalo gwəṯi goŋolia geṯɩdo, na da gɩmauṯaḏe gi lɩbuɽul gi lamon le sabiṯ gate guməṯo guwala na? 12namɩni gwiji gwate gwinəno gworki koŋol na? na ŋiro dino giŋir ŋularre ŋun ŋiŋir gi lamon leḏi sabiṯ. 13nueico gwiji no, wali ḏi ganu. nuwal ganu nuaɽuwade nuro muma gi gworo.
14na lɩbarɩsi du, naluməḏəṯo lugwun galakwe gwalɽinye.
gaḏam gun gɩməṯɩnu
15gwune na yecu lɩŋe ŋuɽuna nuwele ŋɩnəwei. na liji gwujane lutu, nulmidi wei. 16nuluməḏɩjo ŋuɽuna ŋɩbɩje nuarno late gwalaŋidi no, 17kani nalṯɩmi ŋuɽuna gun ŋuməḏɩlo nebi gwun gwan isaia, ŋarno,
18eʼe gaḏama ginyi gun gɩməṯi,
gun gəmɩnyi, na ŋiro gun gaṯɩnyiŋiri ḏugwore.
nyi gwagele gwuɽɩwə gwinyi lugwun,
nuaŋɩḏi ŋuɽuna ŋe ḏakɩmiḏa gi liji leḏi jɩmɩrɩgen wei;
19ŋu gwate gwaṯarre ŋɩrəkwənəŋe i gwəri
gwula no; na liji late laḏiŋɩni ŋwal ŋwuŋun gi daṯ no.
20na iṯa yun yimakɩraḏe lɽa gi ḏɩɽeḏe yate
yalbanya ganu no, na lambə lun lar lai late
laṯoɽa ga muma no late luɽinye no, kəbe
nudio ŋuɽuna ŋe ḏakɩmiḏa gi ḏɩḏamiḏa.
21na gi jiri juŋun a liji leḏi jɩmɩrɩgen wei əmɩnyi.
jesu wɩrli ŋuɽuna gu ŋun ḏapa ŋɩru ḏigeleja uwə seiṯan gwe
mks. 3:20-30, lk. 11:14-23; 12:10
22nalapijo gwiji gwete gwəṯi ḏiŋeroma gwun gwɩrimə gi jei na gwate gwaṯumə no, nugele muma, kəbe gwun gwate gwaṯumə no nuumə nudaŋa ga. 23na liji wei obaga ṯuṯ nalarno, kweno gwate gwiro ŋaɽe ŋeḏi ḏauuḏ na? 24namɩni gwune na lɩbarɩsi diŋɩni, nalarno, kweno gwate gwatɩḏi ḏiŋeroma namɩni bilsibul gwe gwun gwiro gwele gweḏi diŋerom. 25na yecu lɩŋe ḏuməḏɩno dagin nuleicɩno, ŋele wei ŋɩkenyɩḏiḏi ganu ŋake, na amɩrigen i liji leḏi dunu lun lɩkenyɩḏiḏi ganu late ləṯijaḏaṯa no. 26na da seiṯan maṯɩdi seiṯanŋ, ŋu gwəkenyɩḏiḏi ganu kwulo gwuŋun na galakwe ŋele ŋuŋun ŋajaḏaṯa? 27na ḏa nyi maṯɩdi diŋeroma bilsibul gwe, namɩni nyaɽe nyalo nyədi əḏi gwe? na ŋiro dino luŋa laro jaḏi jalo. 28namɩni ḏa nyi maṯɩdi diŋeroma gwuɽɩwə gwe gweḏi elo na ŋele ŋeḏi elo ŋɩmila lagalo gwerkwe. 29na galakwe gwiji gwete gwəḏi kwu dunu gweḏi gwiji gwun gwubɩɽe nanu nuape ŋɩdio ŋuŋun, ḏa gwate makaii gwiji gwun gwubɩɽe nanu gwerre no? na ḏa mukaii nuəḏi kwu dunu nuape ŋɩdio ŋuŋun. 30gwun gwate gwijanagwe no gwɩkiḏiḏianagwe, na gwun gwate gwaṯana gwiwəɽeice ldu no ŋwulwɩreiji elo. 31na ŋiro dino nyi gweiceijɩno, ŋuɽun wei ŋun ŋɩki na ḏɩḏenɩḏia ŋaliḏuḏɩjo liji ganu, namɩni ḏɩḏenɩḏia kwuɽɩwə gwun gwɩpiḏo pɽul gwate gwanḏuḏɩjo liji ganu no. 32na gwun gwuməḏəṯo ŋuɽuna ŋaɽe elo ŋeḏi liji ŋuniḏuḏɩjo ganu; namɩni gwun gwuməḏəṯo kwuɽɩwə elo gwun gwɩpiḏo pɽul, ŋate ŋaniḏuḏɩjo ganu kɩḏilio keno i gun gaje gila no.
33kadɩl gwaɽe gwiŋir na nyaɽe nyuŋun nyiŋir, i kadɩl gwaɽe gwɩki na nyaɽe nyuŋun nyiki. gi gwune lɩŋiḏi gwaɽe nyaɽe. 34nyaɽe nye nyeḏi juŋə, galakwe nyaləṯi ŋɩma nyalumə ŋuɽuna ŋiŋir namɩni nyaŋa lɩki? gi gwune lɩnyu laṯumə gi ḏɩbona ḏuŋun ḏun ḏutu ḏeḏi ḏugwor. 35gwiji gwun gwiŋir gwatɩḏi ŋɩdio ŋun ŋiŋir ŋun ŋaṯɩje gi dugwor ganu duŋun, na gwiji gwun gwɩki gwatɩḏi ŋɩdio ŋun ŋɩki ŋun ŋaṯɩɽe gi ḏugwor ganu ḏuŋun. 36namɩni nyi gweiceijɩno, ŋuɽun wei ŋun ŋɩki ŋiro jai ŋun ŋaṯɩŋi liji umə lakɩmini gi lamon le ḏakɩmiḏa. 37na ŋuɽun ŋuŋa ŋe ŋaŋədu, na ŋuɽun ŋuŋa ŋe ŋaŋakɩmi.
yu gwudonyo ḏiɽoṯeḏa ḏan ḏəŋinio
mks. 8:11-12, lk. 11:29-32
38na kworo lun liro jalgaṯɩm na lɩbarɩsi naluməḏɩjo naleicɩno, muəlɩm gwəri, anbunyu ənaŋu doŋinio lugwuŋa ŋun ŋɩbuḏo. 39nulmɩni wɩrlijo ŋuɽuna nuleicɩno, liji leḏi gwunne lun lɩki na late laṯɩməṯo eloŋ gwagin no, laɽoṯeḏe ḏəŋinio, nate nalinḏəḏe no namɩni ḏəŋinio ḏeḏi yunan gwun gwiro nebi. 40na ŋiro gi gwune yunan gwijo kare ganu geḏi lumi ŋwamon ṯəɽɩl lun libuḏo gworki, na ŋiro dino ŋaɽe ŋeḏi liji ŋaje kwɩnyəm ganu ŋwamon ṯəɽɩl. 41na ləmɩnyo leḏi ninuwa lədiɽi gi ḏakɩmiḏa luŋale le leḏi gwunne nalakɩmiḏe, gi gwune lɩwɩrlo ga ḏuməḏɩjo ḏe ḏeḏi yunan; na eʼe, gwete gwo ŋɩne ŋwubuṯano gworki ḏi yunan. 42gwele gweḏi gelio gwun gwiro gwa, gweḏiɽi gi lamon leḏi ḏakɩmiḏa liji le leḏi gwunne nalakɩmi, gi gwune gwuwiḏi kalo gwola ganu geḏi gɩḏilio gwadiŋɩni ḏilɩŋeḏa ḏeḏi suliman; na eʼe, gwere gwo ŋɩne gwubuṯano gworki di suliman.
ḏuwɩrla ga ŋuɽun ŋun ŋɩki ḏun ḏate ḏiṯɩminu no
lk. 11:24-26
43gwune na ḏiŋerom du kwiji ganu, nuwewele kalo gun gate gəṯi ŋau no nubunyi ḏijaga, na ḏa ḏate ḏimubuje no, 44gwarno, nyi gwaɽuwe kwu dunu gwi gwun gwuduḏɩne ganu. na gwune nuwila nubuje duno gwuḏu ganu, muḏinu ganu gwijiga muma. 45nuwele gwapa ḏiŋeroma kwoɽoṯəɽɩl diro kaja ḏɩkeno lugwun, naləḏi nalijiga ŋɩnəwei; na ŋakene kwiji kworo gweḏi uro gwerre. na ŋaro dino gi liji leḏi gwunne lun lɩki.
ŋɩmaga ŋun ŋiro gwerkwe
mks. 3:31-35, lk. 8:19-21
46gwune nujɩre gwuməḏɩjo liji, na nana gwuŋun na lɩmegin nalḏuḏɩni kɩluḏo nalɽoṯeḏe gwalumə. 47na gwete eicɩno, eʼe nanaŋ gwuŋa na lɩmagalo lo lɩḏuḏɩnu kɩludo lar lanyalumə. 48nuwɩrlijo ŋuɽuna nueicɩno, əḏi gwiro nana gwi na odɩŋa liro lɩmagəri? 49nukuwa ḏi ḏugun gi calɩmis juŋun nuarno, eʼe nanaŋ gwi na lɩmagəri. 50gi gwune gwun gwanduji ŋuɽuna ŋun ŋɩbunyɩlo baba gwi gwun gwaṯɩje kanyin, gu gwiro magəri gwun gwiro gwəmɩnyo na gwun gwiro gwa na nana gwi.
Nke Ahọpụtara Ugbu A:
maṯa 12: OTR1966
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Nuba, Otoro New Testament
© British and Foreign Bible Society, 1966.