Lukas 3
3
'A Yohanes tukanga baptis 'o doto'o ngowa'a kawasa
(Mat. 3:1-12; Mrk. 1:1-8; Yoh. 1:19-28)
1Wakutu Kaisar Tiberius 'o parenta ma di'ara musungu nyagi moi re romotoa ḏua, 'a Pontius Pilatus 'o dadi gubernur toma daeraha Yudea, 'a Herodes 'o dadi 'olana toma daeraha Galilea, re 'a Filipus 'o dadi 'olana toma daeraha Iturea re Trakhonitis ('A Herodes re 'a Filipus ananga nga muḏiḏi gia nongoḏu). Re ḏi'i 'a Lisanias 'o dadi 'olana toma daeraha Abilene 2re 'a Hanas re 'a Kayafas#3:2 Hanas, Kayafas 'ai dedono wala. 'aḏi dadi 'imam 'agung. Toma 'orasa gena-ge, Ma Jou'ongu Madutu 'ai demo 'i sapolo ra Yohanes, 'a Zakaria 'ai ngowa'a, toma ngi'i baulaco 3Ḏua 'a Yohanes 'o tagi 'a sigoloḏi daeraha Ḇanyo Yordan, re 'a singadolo habari ra Ma Jou'ongu Madutu ino re 'o kanau, “Ngini balasu ni maḏibo toma ngo'omo boloto re ni sanga baptis, la Ma Jou'ongu Madutu 'a singi-ngiranga ninga ḏosa.” 4Gena-ge 'i mete'e ra nabi Yesaya 'ai boku, ga'a 'i silefo:
“ 'Age rema ngowa'a matengo 'o kanau siduga-duga toma daeraha baulaco so'o ne:
‘Sidodahe ngo'omo di'a Ma Jou,
siboloto ngo'omo gena-ge di'a Unanga.
5Ngabanga mo-moini na jujumu,
kie re sau mo-moini na patu sirata,
ngo'omo 'i pale-pale na siboloto
re ngo'omo 'i tuso-tuso'o na jujumu,
6la ngowa-ngowa'a toma dungia sitabi donga ḏuanga i'a ya oḏi'i Ma Jou'ongu Madutu sisalamata 'Ai ngowa-ngowa'a.”#Yes. 40:3-5
7Ngowa'a repe 'aḏi sapolo ra Yohanes, la 'aḏi sanga baptis. Unanga 'o kanau ra ananga, “Ngini ngowa'a ma jira ma ju'uda ma tero sa'olo cuku'u rema bisa ma ngowa! 'A guna 'o kanau ra ngini mangale na'o 'aḏi sanga baptis ḇato ngini ḏuanga i'a sanga hukumu ua ra Ma Jou'ongu Madutu!#Mat. 3:7, 12:34, 23:33 8Sijumu taninga de'oso re ḏegoro mangale ngini reni maḏibo mode-mode'e toma ngo'omo boloto! Awa ngini ni ta'ajiri taninga 'akala re sinyingara, ‘Ngomi mi sanga hukumu ua, sababu Abraham ngomi minga ete re dotumu.’ 'Elingi 'Ari demo nena-ne: Ma Jou'ongu Madutu nga'unu 'o sidadi maḏi-maḏi nena-ne 'i dadi Abraham 'ai ju'uda! 9Ma Jou'ongu Madutu ro ḏu-ḏuanga ḏua 'O sihukumu ngowa'a ga'a 'aḏi maḏibo ua toma ngo'omo boloto ma tero sa'olo tama'ono 'i ḏu-ḏuanga ḏua di'a sitawele ate re sitola'a ngadolo toma utu'u. Sababu gena-ge, na'o ate gena-ge ma sowo'o 'i rousu ua, ḏuanga i'a 'a tawele re 'a upa'a toma u'u ma dara.”#Mat. 7:19
10Dadi ngowa-ngowa'a 'aḏi sano ra Yohanes, “Dadi ngomi balasu mi 'a'a 'oru?”
11Yohanes 'a sangoro, “Ngowa'a remanga baju bela ḏiḏi balasu sipula'a bela moi toma ngowa'a kamanga baju ua, re ngowa'a remanga ngo-ngoromo balasu sibalangu toma ngowa'a kamanga ngo-ngoromo ua.”
12Ngowa'a golo-golo'o balastengi ḏi'i 'aḏi sapolo ra Yohanes di'a 'aḏi sanga baptis. Ananga 'aḏi sano, “Guru, ngomi balasu mi 'a'a 'oru?”#Luk. 7:29
13Yohanes 'a sangoro, “Awa ni golo'o pai-pai'i 'oru ga'a pamarenta ya sitantukanga ḏua.”
14'Age ḏi'i sordado 'aḏi sano, “Ngomi balasu mi 'a'a 'oru?”
Yohanes 'a sangoro, “Awa ni simau-mau ngowa'a 'aḏi sipula'a pipisi ra ngini re awa ni da'awa ngowa'a 'i banari ua. Ngini balasu ni masisanangi reo ninga gaji masiretene.”
15Toma 'orasa gena-ge, ngowa-ngowa'a mulaingi 'aḏi ta'ajiri: Yohanes nena-ne 'o dadi 'O Kristus bolo ua ga'a ngene wo totoma? 16Sababu gena 'a Yohanes 'o kanau ra ananga mo-moini, “Ngoi pa'i to baptis ngini reo ḇanyo, mada'a ḏuanga i'a 'age rema ngowa'a matengo lebe la-lamo'o ra ngoi, ta gasa 'Ai tarupa mai patasa ua. Unanga gena-ge ḏuanga i'a 'O sapolo re 'O baptis ngini rema Ngagara 'Ofi-'Ofi re u'u. 17Gena-ge ma tero sa'olo Tai giama 'age rema garpu lamo'o, re Unanga ḏuanga i'a 'o sitaro'o gandum mo-moini singadolo 'i 'ofi. Gandum rema la'eme ḏuanga i'a sigare toma titila ma dara, mada'a ma 'omanga 'i siupa'a toma u'u kama sengene ua.”
18So'o gena 'a Yohanes 'o siajele mangale duhu mo-moini toma ngowa-ngowa'a wakutu unanga 'o singadolo Habari Roanga. 19Mada'a 'a Yohanes 'o ḇangata Herodes wakutu unanga 'o kuasa toma daeraha Galilea. Yohanes 'o ḇangata tau-taunu sababu Herodes 'o molo'ara 'ai dau'u ngo Herodias, 'a Filipus 'ai were'a, re 'o madaga'a kajahatana ma lelegu ḏi'i. 20Dadi 'a Herodes 'ai kajahatana lebe dogo sababu unanga 'o singosama Yohanes toma bui ma dara.#Mat. 14:3-4; Mrk. 6:17-18
Yohanes 'o baptis Yesus
(Mat. 3:13-17; Mrk. 1:9-11)
21Wakutu Yohanes 'o baptis ngowa'a mo-moini unanga 'o baptis Yesus ḏi'i, re wakutu Yesus 'o manyiata, diwanga 'i talanga, 22kara Ma Ngagara 'Ofi-'Ofi 'i matuhu sa'olo namo dara, 'i 'uci ra Unanga. Ḏua Unanga 'o 'isene Ma Jou'ongu Madutu 'ai iḏingi ma betongo so'o ne, “Ngana nena-ne 'Ari ngowa'a Ta dadalara, Ngoi 'ari 'akala re sinyingara ma sanangi Ta sipa'ala ra Ngana.”#Do. 22:2; Nya. 2:7; Yes. 42:1; Mat. 3:17; Mrk. 1:11; Luk. 9:35
Yesus 'ai ete re dotumu
(Mat. 1:1-17)
23Wakutu Yesus mulaingi 'ai munara, 'Ai 'umuru ḏa musungu nyagi ro'ange. Mete'e ngowa'a manga wo-waro, Unanga 'a Yusuf 'ai ngowa'a nau'u re
24Yusuf: Eli 'ai ngowa'a nau'u, Eli: Matat 'ai ngowa'a nau'u,
Matat: Lewi 'ai ngowa'a nau'u, Lewi: Malkhi 'ai ngowa'a nau'u,
Malkhi: Yanai 'ai ngowa'a nau'u, Yanai: Yusuf 'ai ngowa'a nau'u,
25Yusuf: Matica 'ai ngowa'a nau'u, Matica: Amos 'ai ngowa'a nau'u,
Amos: Nahum 'ai ngowa'a nau'u, Nahum: Hesli 'ai ngowa'a nau'u,
Hesli: Nagai 'ai ngowa'a nau'u,
26Nagai: Maat 'ai ngowa'a nau'u, Maat: Matica 'ai ngowa'a nau'u,
Matica: Simei 'ai ngowa'a nau'u, Simei: Yosekh 'ai ngowa'a nau'u,
Yosekh: Yoda 'ai ngowa'a nau'u.
27Yoda: Yohanan 'ai ngowa'a nau'u, Yohanan: Resa 'ai ngowa'a nau'u,
Resa: Zerubabel 'ai ngowa'a nau'u, Zerubabel: Sealtiel 'ai ngowa'a nau'u,
Sealtiel: Neri 'ai ngowa'a nau'u,
28Neri: Malkhi 'ai ngowa'a nau'u, Malkhi: Adi 'ai ngowa'a nau'u,
Adi: Kosam 'ai ngowa'a nau'u, Kosam: Elmadam 'ai ngowa'a nau'u,
Elmadam: Er 'ai ngowa'a nau'u,
29Er: Yosua 'ai ngowa'a nau'u, Yosua: Eliezer 'ai ngowa'a nau'u,
Eliezer: Yorim 'ai ngowa'a nau'u, Yorim: Matat 'ai ngowa'a nau'u,
Matat: Lewi 'ai ngowa'a nau'u,
30Lewi: Simeon 'ai ngowa'a nau'u, Simeon: Yehuda 'ai ngowa'a nau'u,
Yehuda: Yusuf 'ai ngowa'a nau'u, Yusuf: Yonam 'ai ngowa'a nau'u,
Yonam: Elyakim 'ai ngowa'a nau'u,
31Elyakim: Melea 'ai ngowa'a nau'u, Melea: Mina 'ai ngowa'a nau'u,
Mina: Matata 'ai ngowa'a nau'u, Matata: Natan 'ai ngowa'a nau'u,
Natan: Daud 'ai ngowa'a nau'u,
32Daud: Isai 'ai ngowa'a nau'u, Isai: Obed 'ai ngowa'a nau'u,
Obed: Boas 'ai ngowa'a nau'u, Boas: Salmon 'ai ngowa'a nau'u,
Salmon: Nahason 'ai ngowa'a nau'u,
33Nahason: Aminadab 'ai ngowa'a nau'u, Aminadab: Admin 'ai ngowa'a nau'u,
Admin: Arni 'ai ngowa'a nau'u, Arni: Hesron 'ai ngowa'a nau'u,
Hesron: Peres 'ai ngowa'a nau'u, Peres: Yehuda 'ai ngowa'a nau'u,
34Yehuda: Yakub 'ai ngowa'a nau'u, Yakub: Ishak 'ai ngowa'a nau'u, Ishak: Abraham 'ai ngowa'a nau'u, Abraham: Terah 'ai ngowa'a nau'u,
Terah: Nahor 'ai ngowa'a nau'u,
35Nahor: Serug 'ai ngowa'a nau'u, Serug: Rehu 'ai ngowa'a nau'u,
Rehu: Peleg 'ai ngowa'a nau'u, Peleg: Eber 'ai ngowa'a nau'u,
Eber: Salmon 'ai ngowa'a nau'u,
36Salmon: Kenan 'ai ngowa'a nau'u, Kenan: Arpakhsad 'ai ngowa'a nau'u,
Arpakhsad: Sem 'ai ngowa'a nau'u, Sem: Nuh 'ai ngowa'a nau'u,
Nuh: Lamekh 'ai ngowa'a nau'u,
37Lamekh: Metusalah 'ai ngowa'a nau'u, Metusalah: Henokh 'ai ngowa'a nau'u,
Henokh: Yared 'ai ngowa'a nau'u, Yared: Mahalaleel 'ai ngowa'a nau'u,
Mahalaleel: Kenan 'ai ngowa'a nau'u,
38Kenan: Enos 'ai ngowa'a nau'u,
Enos: Set 'ai ngowa'a nau'u, Set: Adam 'ai ngowa'a nau'u,
Adam: Ma Jou'ongu Madutu 'ai ngowa'a nau'u.
Nke Ahọpụtara Ugbu A:
Lukas 3: SNT
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
2015 © Indonesian Bible Society