Lukas 2
2
Sibuoro Yesus
(Mat. 1:18-25)
1Wakutu sibuoro 'a Yohanes pasala i'a, Kaisar Agustus 'o sisupu 'ai parenta, la ngowa'a mo-moini toma Roma ma pareta matengo re matengo 'aḏi silefo manga lomanga. 2Lefo lomanga nena-ne 'i si'a'a waro ma mulaingi wakutu 'a Kirenius 'o dadi gubernur toma daeraha Siria. 3Toma 'orasa gena-ge, ngowa'a mo-moini matai ḏibo tamanga limau masiretene di'a silefo manga lomanga.
4,5'A Yusuf 'o sisoi'i tala limau Nazaret toma daeraha Galilea re ngo Maria unanga 'ai ga-ganau mo mete'e, toma 'orasa gena-ge munanga rami lese ḏua. Ananga 'aḏi tagi toma daeraha Yudea toma limau Betlehem, 'Olana Daud 'ai dola'a ututu ma ngi'i. Yusuf balasu 'a silefo 'ai lomanga toma limau Betlehem sababu unanga 'ai 'asala ra 'Olana Daud ino. 6Wakutu ananga toma limau Betlehem moju ngo Maria mi 'orasa maḏe-ḏegoro i'a ri ngadolo. 7Munanga mo sibuoro ngowa'a nau'u matengo ngowa ma jomolo, 'u sao reo ḇa'a kara 'u sigare toma haiwani ma ngo-ngoromo ma ngi'i, sababu 'aḏi sanga ngi'i riwara di'a 'aḏi masiḏingoto.
Sowohi-sowohi re mala'ekata-mala'ekata
8Toma utu gena-ge, 'age sowohi-sowohi 'aḏi dadanu manga doba toma daeraha rurubu. 9Kage-kage, Ma Jou'ongu Madutu 'ai mala'ekata matengo 'i masibaiti ra ananga re cahaya ra Ma Jou'ongu Madutu ino 'i 'erese ananga singadolo ananga matai mojongo. 10Mada'a mala'ekata gena-ge 'o kanau, “Mojongo awa! Sababu ngoi to sapolo to singadolo habari la-la ra ngini. Habari nena-ne ḏuanga i'a 'i gasa roanga masala toma ngowa'a mo-moini: 11Wangere nange-ne toma limau ga'a 'Olana Daud 'ai dola'a ututu ma ngi'i, sibuoro ḏua ninga Salamata ma Cimi, Unanga gena-ge 'O Kristus, Ma Jou. 12Ma didina'o nena-ne mangale ma demo 'i banari: Ngini ḏuanga i'a ni tagi re sanga i'a ngowa kiau matengo 'u sao reo ḇa'a re 'u sigare toma haiwani ma ngo-ngoromo ma ngi'i.”
13Kage-kage mala'ekata matengo 'o mamete'e reo mala'ekata lelegu ma repe, ananga 'aḏi puji re silamo'o Ma Jou'ongu Madutu, 'aḏi kanau,
14“Puji re silamo'o Ma Jou'ongu Madutu toma soroga,
re dame toma dungia toma manusia ga'a Ma Jou'ongu Madutu ya'u sanangi.”
15Togumu i'a mala'ekata-mala'ekata gena-ge ya sisoi'i tala re 'aḏi maḏibo toma soroga, kara sowohi-sowohi 'aḏi makanau matengo re matengo, “Ino, ngene wo si'a toma Betlehem, la wo oḏi'i 'oru ga'a 'i dadi ḏua ma tero sa'olo Ma Jou'ongu Madutu 'o siajele ḏua ra ngene.”
16Dadi ananga jau-jau 'aḏi tagi ḏua re 'aḏi sanga i'a ngo Maria, 'a Yusuf re ngowa kiau gena-ge ya sigare toma haiwani ma ngo-ngoromo ma ngi'i.
17Wakutu sowohi-sowohi gena-ge 'aḏi oḏi'i ngowa kiau gena-ge ḏua ya sijarita mangale 'oru ga'a mala'ekata 'o siajele ra ananga pasala ḏua 18singadolo ngowa'a mo-moini matai heranga ya 'isene sowohi-sowohi manga jarita. 19Mada'a wakutu ngo Maria ma 'isene i'a so'o gena, munanga pa'i magogono tami 'akala re sinyingara ma dara ḇato. 20Gena ḏua, sowohi-sowohi 'aḏi maḏibo i'a toma daeraha rurubu, re 'aḏi puji re silamo'o re simulia Ma Jou'ongu Madutu, sababu 'oru ga'a ya 'isene re ya oḏi'i mode-mode'e ma tero sa'olo ga'a mala'ekata ro siajele ra ananga pasala ḏua.
Ngowa kiau gena-ge silomanga Yesus
21Wakutu ngowa kiau gena-ge 'Ai 'umuru wangere tu'angere, ananga 'U suna re 'U silomanga Yesus. Lomanga gena-ge ga'a mala'ekata ro siajele siḏa wakutu ma ngina ngo Maria 'ami po'olo tegoro nyangu.#Luk. 1:31; Im. 12:3
Gasa Yesus ra Ma Jou'ongu Madutu 'ai Wala ma soana
22Ma 'orasa enanga 'i ngadolo 'a Yusuf re ngo Maria ya siḏagi Yahudi manga 'atoranga di'a sigofi manga lese 'i mete'e Musa 'ai hukumu. Dadi ananga 'aḏi gasa ngowa kiau gena-ge toma limau Yerusalem di'a sidoa'a ra Ma Jou'ongu Madutu. 23Sababu ra Ma Jou'ongu Madutu 'ai Hukumu toma boku ma dara 'i silefo so'o ne: “Ngowa'a nau'u ma jomolo mo-moini balasu sidoa'a ra Ma Jou'ongu Madutu.”#Sup. 13:2, 12 24Re ananga 'aḏi gasa manga jou-jou namo dara sabi moi bolo namo pombo ma ngowa romoḏiḏi mete'e 'oru ga'a 'i silefo ḏua ra Ma Jou'ongu Madutu 'ai Hukumu gena-ge.#Im. 12:6-8
25'Orasa gena-ge toma limau Yerusalem 'age rema ngowa'a matengo 'ai lomanga Simeon, ngowa'a loasa re banari ga'a 'o 'ahu di'a sisanangi Ma Jou'ongu Madutu 'ai 'akala re sinyingara re Ma Ngagara 'Ofi-'Ofi 'i nyanyasele unanga. Unanga gena-ge 'o totoma Ma Jou'ongu Madutu 'o sisalamata 'Ai ngowa-ngowa'a Israel enanga ma 'orasa. 26Ma Ngagara 'Ofi-'Ofi gena-ge 'i siajele ra unanga pasala ḏua mangale na'o unanga 'o oḏi'i 'O Kristus nyangu, Unanga gena-ge ga'a Ma Jou'ongu Madutu 'o sijaji 'ua re 'au wali, unanga 'o sengene nyangu. 27Toma 'orasa gena-ge, Ma Ngagara 'Ofi-'Ofi 'i sigaraki Simeon 'ai 'akala re sinyingara singadolo 'o osama ra Ma Jou'ongu Madutu 'ai Wala ma soana. Toma 'orasa gena-ge ḏi'i, wakutu 'a Yesus 'o ki-kiau moju 'a Yusuf re ngo Maria 'aḏi gasa unanga re 'aḏi osama ra Ma Jou'ongu Madutu 'ai Wala ma soana, la ya mete'e Musa 'ai hukumu. 28Simeon 'o toti'i ngowa kiau gena-ge re 'o puji re silamo'o Ma Jou'ongu Madutu. Unanga 'o kanau,
29“Ma Jou'ongu Madutu 'ani jaji enanga 'i sitotomo.
Nange-ne ḏua, ngoi ga'a 'Ani budaka,#2:29 Toma demo Yunani, “budaka.” Mada'a toma konteks gena-ge ma ngale: ngoi ga'a ta Ma Jou'ongu Madutu ma tero sa'olo 'Ani budaka. Oḏi'i demo budaka toma kamus. na siḏo-ḏogumu 'ari co'ongu.
30Sababu 'ari la'o masiretene ri oḏi'i Salamata ma Cimi ra Ma Jou'ongu Madutu ino,
31Unanga gena-ge ga'a Ma Jou'ongu Madutu 'o sidodahe pasala ḏua di'a ngowa'a mo-moini.
32Salamata ma Cimi gena-ge sa'olo tarangi rimoi ga'a sitarangi ngo'omo di'a ngowa'a Yahudi ua, la ananga nga'unu 'aḏi sapolo ra Ma Jou'ongu Madutu.
Tarangi gena-ge 'i gasa lomanga gau'u toma ngowa'a Israel, 'Ani ngowa-ngowa'a.”#Yes. 42:6, 49:6, 52:10
33Wakutu ma ḇaḇa re ma ngina ('a Yusuf re ngo Maria) ya 'isene 'a Simeon 'o kanau mangale ngowa kiau gena-ge, ananga 'aḏi heranga. 34Ḏua Simeon sibarakati ananga re 'o kanau i'a ra ngo Maria, “Ngowa kiau nena-ne Ma Jou'ongu Madutu ro cumutu ḏua di'a sihukumu re sisalamata ngowa'a repe toma Israel re 'O dadi didina'o rimoi ra Ma Jou'ongu Madutu ino mada'a Unanga ḏuanga i'a ngowa'a repe 'U lawana, 35singadolo 'O sisupu ananga manga 'ulungu ma jira tamanga 'akala re sinyingara ma dara. Mada'a, Maria, 'ani 'akala ḏuanga i'a sanga kangela ma tero sa'olo siruju reo golowa mango-mangono.”
36'Age ḏi'i rema nabi we-were'a matengo munanga remo piri'i ḏua, 'ami lomanga ngo Hana, 'a Fanuel 'ai ngowa'a were'a, ra Asyer 'ai ju'uda ino. Nabi we-were'a gena-ge mo molo'ara musungu tumudingi, ḏua 'ami nau'u 'o sengene. 37Dadi munanga remo balo re nange-ne 'ami 'umuru musungu nyagi tu'angere re rata ḏua. Lobi'i re wangere, munanga ma sidaioranga ua mo sapolo ra Ma Jou'ongu Madutu 'ai Wala di'a mo manyiata re mo puasa. 38Toma 'orasa gena-ge, munanga ḏi'i mo sapolo, mo pula'a murasa ma la ra Ma Jou'ongu Madutu re mo siajele mangale ngowa kiau gena-ge toma ngowa'a mo-moini ga'a totoma enanga ma 'orasa Ma Jou'ongu Madutu 'o sibebasa ngowa'a Israel tamanga lawana.
Maḏibo toma limau Nazaret
39'A Yusuf re ngo Maria ya si'a'a ḏua 'ori i'a mo-moini mete'e Ma Jou'ongu Madutu 'ai Hukumu. Gena ḏua, ananga 'aḏi maḏibo toma limau Nazaret, toma daeraha Galilea.#Mat. 2:23 40Ngowa 'olo gena-ge ganapu lamo'o re te'e, Unanga 'ai 'akala soro'unu re Ma Jou'ongu Madutu 'o sibarakati Unanga.
Yesus ra Ma Jou'ongu Madutu 'ai Wala
41Ma musungu ma jelele i'a 'a Yusuf re ngo Maria 'aḏi tagi toma limau Yerusalem di'a 'aḏi silamo'o Paskah ma Wangere.#Sup. 12:1-27; Dad. 16:1-8 42Wakutu Yesus 'ai 'umuru musungu nyagi moi re romoḏiḏi, 'o mete'e Yusuf re Maria, ananga 'aḏi tagi di'a silamo'o Paskah ma Wangere sa'olo biasa. 43Wangere gena-ge palisi'i i'a, ananga 'aḏi maḏibo mada'a Yesus masiretene unanga maḏibo nyangu, 'o tegoro moju toma limau Yerusalem. Mada'a Yusuf re Maria ya waro ua. 44Ananga 'aḏi ta'ajiri Unanga ro mamete'e reo ngowa'a repe. Tamanga ḏo-ḏagi wange moi ma dara pasala i'a, ananga 'aḏi disa Unanga tamanga ioro re nongoḏu re ḏagilomu sabi manga sigolona. 45Mada'a 'aḏi sanga Unanga ua. Dadi ananga 'aḏi maḏibo i'a moju toma limau Yerusalem, la 'aḏi disa unanga. 46Ananga 'aḏi disa ma di'ara wange ro'ange, kara 'aḏi sanga Unanga ra Ma Jou'ongu Madutu 'ai Wala ma soana. Unanga 'o tegoro 'O sigi-gisene re 'O sano toma guru-guru 'agama. 47Ngowa'a mo-moini 'aḏi matai heranga ga'a 'aḏi 'isene Unanga 'o kanau. Sababu Unanga ngowa 'olo moju, mada'a 'Ai 'akala lai soro'unu singadolo 'Ai sa-sangoro kama rapu ua. 48'A Yusuf re ngo Maria masiretene 'aḏi heranga wakutu 'aḏi sanga Unanga toma ngi'i gena-ge. 'Ai ngina mo kanau i'a ra Unanga, “I'a sa'olo no 'a'a ngomi so'o gena-ge? 'Ani ḇaḇa re 'Ani ngina, ngomi minga 'akala kangela masala mi disa Ngana!”
49Yesus 'a sangoro, “I'a sa'olo baba re meme ni disa Ngoi toma ngi'i lelegu? Baba re meme ni waro ua mangale Ngoi balasu to tegoro Tari Ḇaḇa 'ai wala?” 50Mada'a ananga ya sahe ua Yesus 'ai sa-sangoro ma ngale.
51Togumu i'a, Yesus 'o tagi mamete'e ra ananga 'aḏi maḏibo toma limau Nazaret, re 'o mete'e manga mau. 'Ori i'a mo-moini ga'a 'i dadi gena-ge, ngo Maria ma gogono tami 'akala re sinyingara ma dara. 52Yesus 'o lamo'o dere i'a, 'Ai 'akala re sinyingara ganapu soro'unu re 'O sisanangi Ma Jou'ongu Madutu re manusia manga 'akala re sinyingara.#1Sam. 2:26; Dol. 3:4
Nke Ahọpụtara Ugbu A:
Lukas 2: SNT
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
2015 © Indonesian Bible Society