Lukas 4
4
Yesus 'o sanga bo-baja toma 'Iblisi
(Mat. 4:1-11; Mrk. 1:12-13)
1Ma Ngagara 'Ofi-'Ofi 'u ḏegoro Yesus wakutu Unanga 'a sisoi'i tala Ḇanyo Yordan. Ma Ngagara 'Ofi-'Ofi 'u gasa Unanga toma daeraha baulaco. 2Toma ngi'i gena-ge, Yesus 'o sanga bo-baja toma 'Iblisi ma di'ara wangere nyagi rata. Toma wangere nyagi rata ma dara, Unanga kama oromo ua. Dadi ma ḏo-ḏogumu tala Unanga 'o basono sawini.
3'Iblisi 'i kanau ra Unanga, “Ngana nena-ne Ma Jou'ongu Madutu 'ai Ngowa'a Nau'u. Dadi, no soma'a maḏi nena-ne 'i dadi roti.”
4Yesus 'a sangoro, “Toma Boku 'Ofi-'Ofi 'i silefo so'o ne: ‘Manusia wo 'ahu pa'i wo oromo roti ḇato ua.’ ”#Dad. 8:3
5Gena ḏua, 'Iblisi 'i gasa Yesus moju toma kie kau'u rimoi ma tubu. Tado la'o ua, 'Iblisi 'i sijumu ra Yesus dungia ma pareta mo-moini. 6'Iblisi 'i kanau i'a ra Yesus, “Ngoi nyengara to sipula'a ra Ngana dungia ma pamarenta di'a Ngana na parenta re 'ori i'a rana toma dungia ma dara mo-moini. Sababu mo-moini nena-ne to sipula'a ḏua ra ngoi re ngoi nyengara to pula'a ra guna ḇato mete'e ngoi 'ari 'akala re sinyingara ma mau. 7Mo-moini gena-ge ḏuanga i'a di'a Ngana na'o Ngana no silamo'o re siḏubuso ngoi.”
8Yesus 'a sangoro, “Toma Boku 'Ofi-'Ofi ma dara 'i silefo so'o ne: ‘Silamo'o re siḏubuso Ma Jou'ongu Madutu, 'ani Jou, re de-de'oso pa'i Unanga ḇato.’ ”#Dad. 6:13
9Ḏua 'Iblisi 'i gasa Yesus toma limau Yerusalem re 'U side'oso Unanga ra Ma Jou'ongu Madutu 'ai Wala ma wanata. Gena ḏua, 'Iblisi gena-ge 'i kanau ra Unanga, “Ngana nena-ne Ma Jou'ongu Madutu 'ai Ngowa'a Nau'u. Dadi No masipoini tala. 10Sababu toma Boku 'Ofi-'Ofi 'i silefo so'o ne:
‘Ma Jou'ongu Madutu ḏuanga i'a 'o soma'a 'ai mala'ekata-mala'ekata 'aḏi jaga Ngana la-la.#Nya. 91:11
11Re ḏi'i, ananga 'aḏi 'alo Ngana, la 'Ani rou 'i nga'unu toma maḏi awa.’ ”#Nya. 91:12
12Yesus 'a sangoro, “Toma Boku 'Ofi-'Ofi ma dara 'i silefo so'o ne: ‘Awa no tai'i Ma Jou'ongu Madutu, 'ani Jou.’ ”#Dad. 6:16
13'Iblisi 'i tai'i Yesus rema bo-baja gena-ge togumu i'a, enanga 'i sisoi'i tala Yesus re 'i totoma donga ma lelegu.
Yesus mulaingi 'o singadolo Habari Roanga toma daeraha Galilea
(Mat. 4:12-17; Mrk. 1:14-15)
14Gena ḏua, Yesus 'o maḏibo toma daeraha Galilea re Ma Jou'ongu Madutu 'ai Ngagara 'Ofi-'Ofi 'u ḏegoro Unanga. Habari mangale Unanga 'i rera re walata toma daeraha mo-moini. 15Unanga 'o doto'o toma wala-wala puji re ngowa'a mo-moini 'aḏi puji re silamo'o Unanga.
Ngowa'a Nazaret 'aḏi dawongo Yesus ua
(Mat. 13:53-58; Mrk. 6:1-6)
16Yesus 'o tagi da'a toma limau Nazaret, ngi'i ga'a Unanga 'o ramasa. Toma Sabata ma wangere, Unanga 'o tagi toma wala puji, mete'e Unanga 'ai biasa. Unanga 'o te'oso toma ngowa'a manga biono di'a 'O baca Boku 'Ofi-'Ofi, 17re ananga 'aḏi pula'a Nabi Yesaya 'ai boku ra Unanga. Unanga 'a sela kartasi lo-lolo gena-ge 'A sanga ma balangu ma betongo so'o ne:
18“Ma Jou'ongu Madutu 'ai Ngagara 'Ofi-'Ofi marimoi ra Ngoi.
Sababu Ma Jou'ongu Madutu 'o cumutu ḏua Ngoi di'a ta singadolo
Habari Roanga toma ngowa-ngowa'a ma dinga'unu ua.
Ma Jou'ongu Madutu 'o 'utusu Ngoi di'a to singadolo habari mangale:
Ngoi ḏuanga i'a to sisupu ngowa-ngowa'a toma 'Iblisi ma pareta re si-la ngowa-ngowa'a hafu re ta'u sibebasa ngowa-ngowa'a ga'a 'aḏi sanga sikisa
19re ta singadolo ra ananga mangale ma 'orasa 'i ngadolo na'o Unanga, Ma Jou, ḏuanga i'a 'o sisalamata 'Ai ngowa-ngowa'a.”#Yes. 61:1-2
20Yesus dadunu 'a lolo kartasi gena-ge re 'a siḏibo toma boku ma gu-gu'u, kara 'O tegoro.#4:20 Ngowa'a Yahudi na'o mau 'o doto'o, unanga balasu 'o tegoro. Ngowa'a mo-moini toma wala puji ma dara 'aḏi tatamo Unanga. 21Re Unanga mulaingi 'o kanau ra ananga mangale bu-bula'a—bu-bula'a toma Boku 'Ofi-'Ofi ma betongo so'o ne: “Toma wangere nange-ne ga'a ngini na 'isene, Ngoi ta sitotomo.”
22Unanga 'ai demo re ganau 'i rousu madutu singadolo ananga 'aḏi heranga, re 'aḏi kanau, “Unanga nena-ne pa'i 'a Yusuf 'ai ngowa'a nau'u ḇato!”
23Mada'a Yesus 'o kanau ra ananga, “Tantu ḏua ngini ḏuanga i'a ni kanau dolabololo ra Ngoi: ‘Hai, dotere na si-la 'ani diri masiretene. Ma maksudu: Ngomi mi 'isene ḏua Ngana no 'a'a ga'a hera-heranga toma limau Kapernaum, na si'a'a ḏi'i Tani gamu masiretene.’ ” 24Yesus dogo kanau, “Ni ngaku mode-mode'e 'Ari demo-demo nena-ne: Sanga ua matengo 'o dadi nabi ga'a ngowa'a 'u silamo'o tai gamu masiretene.#Yoh. 4:44 25Mada'a na 'isene: wakutu Elia 'o 'ahu-'ahu moju, ngogoro ma 'orasa ma di'ara musungu ro'ange re ma jule. Sababu gena-ge ngowa-ngowa'a toma daeraha gena-ge matai sawini madutu re balo-balo ngowa'a Israel manga repe.#1'Oln. 17:1 26Kalaha so'o gena, Ma Jou'ongu Madutu 'o soma'a ua 'a Elia 'o tagi toma balo-balo gena-ge, mada'a pa'i 'O soma'a Elia 'o tagi toma balo matengo toma limau Sarfat toma daeraha Sidon.#1'Oln. 17:8-16 27So'o gena ḏi'i, toma 'orasa nabi Elisa 'age rema ngowa'a Israel manga repe 'aḏi si-siḏi 'eno'o mada'a matengo i'a mai ua 'o la - pa'i Naaman ngowa'a Siria.”#2'Oln. 5:1-14
28Ngowa'a mo-moini toma wala puji ma dara ananga 'aḏi porata madutu wakutu ya 'isene so'o gena. 29Ananga gena-ge 'aḏi te'oso kara 'aḏi dusu'u 'a Yesus sisupu toma limau ma ḏuḏunu re 'aḏi gasa Unanga toma bawata ma 'uḏu ga'a ananga ya simomi'i manga limau. Ananga manga maksudu 'aḏi itomo Unanga toma bawata gena-ge. 30Mada'a Yesus 'o tagi 'o palisi'i ngowa'a repe.
Ngowa'a ga'a roh ma jira 'u dungosama
(Mrk. 1:21-28)
31Gena ḏua, Yesus 'o tagi toma limau Kapernaum toma daeraha Galilea. Toma limau gena-ge Unanga 'o doto'o ngowa-ngowa'a toma Sabata ma wangere. 32Ananga ga'a 'aḏi isene Unanga 'Ai doto'o 'aḏi matai heranga sababu Unanga 'o kanau rai kuasa.#Mat. 7:28-29 33Toma wala puji gena-ge 'age rema ngowa'a matengo roh ma jira 'u dungosama. Ngowa'a gena-ge 'o maboa-boa'a, 34“Hei Yesus ngowa'a Nazaret! Ngana mau no 'a'a 'oru ra ngomi? Ngana no sapolo di'a no singi-ngiranga ngomi? Ngoi to waro Ngana gena-ge 'a guna: Ngana ne Ngowa'a 'Ofi-'Ofi ra Ma Jou'ongu Madutu ino!”
35Yesus 'o ḇangata roh ma jira gena-ge re 'o kanau, “Masiogoro! Supu toma ngowa'a nena-ne.” Ḏua roh ma jira gena-ge 'i sibau'u ngowa'a gena-ge ra ananga mo-moini manga biono, kara 'i supu toma ngowa'a gena-ge, mada'a unanga 'a basono ua masi-siḏi.
36Ngowa-ngowa'a mo-moini 'aḏi heranga re 'aḏi ma'u kanau matengo re matengo, “Wa sipari ua 'Ai demo-demo. Rai kuasa 'o parenta roh-roh ma jira 'i supu, toma 'orasa gena ḏua enanga 'i supu!” 37Dadi habari mangale Yesus enanga ganapu 'i rera re walata toma daeraha gena-ge mo-moini.
Yesus 'o si-la ngowa'a siḏi manga repe
(Mat. 8:14-17; Mrk. 1:29-34)
38Yesus 'a sisoi'i tala wala puji gena-ge re 'O tagi ra Simon 'ai wala. Toma wala gena-ge 'age Simon 'ai dedono we-were'a mo gagama lai siḏi. Dadi ngowa-ngowa'a 'aḏi golo'o Yesus si-la munanga. 39Yesus 'o tagi sebanga i'a ra munanga 'ami jingi'i re 'a soma'a 'ami si-siḏi gagama 'i mawoi'i. Dadi gagama gena-ge ri iranga re munanga mo la, kara mo momi'i re mo de-de'oso ananga.
40Wakutu wangere sa'i ri soḏu, ngowa-ngowa'a 'aḏi gasa ino ra Yesus ngowa'a ga'a 'aḏi sanga si-siḏi fara muḏuo i'a. Yesus 'a siteru 'Ai giama ra ananga matengo re matengo, ḏua ananga raḏi la mo-moini. 41Sidogo ḏi'i, ngowa'a manga repe ga'a roh ma jira ya'u dungosama, manga roh gena-ge 'i supu re 'i maboa-boa'a, “Ngana nena-ne Ma Jou'ongu Madutu 'ai Ngowa'a Nau'u.” Mada'a Yesus 'o ḇangata enanga re simaha ua enanga 'i kanau, sababu enanga 'i waro Unanga nena-ne 'O Kristus.#4:41 bolo 'O Mesias
Yesus 'o doto'o toma wala-wala puji
(Mrk. 1:35-39)
42Wakutu wangere ma la'o sa'i pilata, Yesus 'a sisoi'i tala limau gena-ge 'O tagi toma ngi'i garura rimoi. Ngowa-ngowa'a ananga 'aḏi tagi disa Unanga. Wakutu raḏi ma'u sanga ra Yesus, ananga 'aḏi golo'o simau-mau Unanga 'o sisoi'i tala ananga awa. 43Mada'a Unanga 'o kanau, “Ngoi balasu ta singadolo Habari Roanga toma limau-limau ma lelegu ḏi'i mangale Ma Jou'ongu Madutu 'ai Pareta sababu di'a gena-ge Ma Jou'ongu Madutu 'o 'utusu Ngoi toma dungia.”
44Sababu gena-ge, Yesus 'o doto'o toma wala-wala puji ma dara toma gamu-gamu toma daeraha Yudea mo-moini.
Nke Ahọpụtara Ugbu A:
Lukas 4: SNT
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
2015 © Indonesian Bible Society