Actes 8
8
1Sɔɔl úǹ nìn ká yii Eetiyeen lafun máaǹ ŋkúm gbanti.
Sɔɔl sāaǹ Kriisitoo nikitil
Ŋwiin gbantee, dinimbinaamaŋkpaandi nìn jéetì Kriisitoo nikitil din bí Jeerusaleemee pu. Bi-kɔkɔ yàl̄ ki búntì Juudee nì Samaarii tiŋgbammun, see Yeesu kpambaliŋ baba di nìn kíǹ. 2Bininjab bin nìn nóó Unimbɔti deedeeyee di nìn síb́ Eetiyeen ní ki súń u-pu tikpil.
3Sɔɔl úǹ là kí kúntí Kriisitoo nikitilee, ní ki kóò adiinni ki cútí bininjab nì binimpoobi kɔkɔ ki cáǹ ki tòó sarkan.
Fiiliipi sòon̄ Unimbɔti bɔti Samaarii tiŋkin
4Bin nìn yàl̄ee nìn cá ajan sá kamaa ki sòoǹ Meesiya bɔmɔntiiti. 5Fiiliipi nìn sīntì Samaarii tiŋkin ki bíi sòoǹ Kriisitoo bɔti. 6Ŋyunti ŋun bi gbìl̄ Fiiliipi nyɔɔbundi, ki wāĺ maamaacib bin u nìn ŋáańee, samaa kɔkɔ nìn pílifí tin u sòoǹee tiŋan. 7Kun puee arasiniibi nìn gbáà ibiil ki nyēē biwaatiibi tikpil pu, ní bifaliŋfaambi nì bideembi tikpil kántì dicáaǹdi. 8Ní dipɔɔpiŋkpaandi nìn jéetì kitiŋ gbanti poon.
9Uninja ubɔ nìn bí kitiŋ gbantin, bi yíì-u Siimɔn. Kijapaayee nìn sá ukpaŋkpanti ki yāntì an ŋáań Samaarii yab maamaaci u-kpaŋkpantiiku pu, ki yíì u-ba yii unikpaan. 10Binikpaambi nì mbiyaamu kɔkɔ nìn pílifíǹ-u tiŋan, ní ki lì yii: «Unil nee di sá Unimbɔti pɔŋŋu ŋun bi yíì mpɔŋkpaanee.» 11Bi nìn pílifíǹ-u tiŋan kun puee u nìn cáá u-kpaŋkpantiiku ki ŋáań maamaacib an yúntì. 12Fiiliipi nìn sòon̄ tibɔmɔntiil tin sá Unimbɔti Beel nì Yeesu Kriisitoo bɔtee, ní bi fōō u-bɔti ki kíí, ní bininjab nì binimpoobi yāntì bi fùl̄-bi Unimbɔti nyim. 13Siimɔn u-ba fōō ki kíí. Bi fùl̄-u ki dóòyee, waa ti là kí sútí kí wàatī Fiiliipi. U nín ká Fiiliipi ŋáań tidaandi nì maamaacikpaŋkpaambee, ní u bākatì tikpil.
14Yeesu kpambaliŋ bí Jeerusaleem ki gbìl̄ yii Samaarii yab fōō Unimbɔti bɔti ki kííyee, ní bi lēē Peetroo nì Yoowaneesi ki túnní bi-cee. 15Bi bāań Samaarii yab ceeyee, ní ki mēē ki tīī-bi bí ŋmā kí fōō Circir Fam, 16kun puee Circir Fam kaa nìn dáá kpákatìń Samaarii yab báà ubɔ pu. Bi nìn pée fùl̄-bi nnyim ti-Dindaan Yeesu yindi ŋmaniŋma pu ní. 17Ní Peetroo nì Yoowaneesi dū bi-ŋalii ki páaǹ Samaarii yab pu, ní bi fōō Circir Fam. 18Siimɔn nín ká yii akpambal dū bi-ŋalii ki páaǹ bi-pu bi fōō Circir Famee, ní u tīī Peetroo nì Yoowaneesi animbil, 19ní ki bí-bi yii: «Tīīmaan ma mun an pɔŋŋu, un pu ní m yaa dū m-ŋalii ki páaǹee, ú fōō Circir Fam.» 20Ní Peetroo fātìi kíí-u yii: «A nín dākafì yii bi dù animbil kí dā Unimbɔti pɔl puee, si nì a-nimbiliŋee kɔkɔ ń ŋá fám! 21Aa pée cáá tiba nì tiba tin bíi jītí nee poon. Kun puee a-pɔbil kaa bí deedee Unimbɔti nimbiin. 22Fá a-landɔkɔkpitii kí mèè ti-Dindaan, an yaa yíì min min a dākafì a-pɔbilinee u làá dūú pɔ̄-si, 23kun puee m wāĺ a-poon tū kii tiloolee ní ikpiti kusakai bá-si.» 24Ní Siimɔn kíí-bi yii: «Gbàam̀maan ti-Dindaan ni-ba kí tīī-mi, án nín làá ŋá pu tin kɔkɔwoooo ni sòon̄ nee tiba ń taa bàń-mee!» 25Peetroo nì Yoowaneesi lēekì seerab ki sòon̄ Unimbɔti bɔti ki dóò Samaariiyee, ní ki fātìi nín gítí Jeerusaleem ki sòoǹ Tibɔmɔntiil Samaarii timbilimmu tikpil poon.
Fiiliipi nì Ueetiiyoopiija ubɔ bɔti
26Ní ti-Dindaan tuuŋŋu ŋubɔ tùkū Fiiliipi yii: «Yīkì kí túĺ ŋgan pú kí dī nsan ŋun sìntī Jeerusaleem ki cá Gaasaayee, nsan ŋun baa ti dèe.» 27Ní u yíkìi búntì. Niinee, Ueetiiyoopiija ubɔ u sá ufaal ki bí Eetiiyoopii nimpubɔtiu Kandaasi cee ki sá ukàlinjakpaan. Úǹ di nìn kpèé unimpubɔtee pijawanti kɔkɔ. 28U nìn dɔ́miń Jeerusaleem ki jáam̀ Unimbɔti ki dóòyee ki fàtīi kùǹ. U nìn kā u-tɔrɔkuu pu itaamu dátí-u ní ki kàaǹ Unimbɔti bɔnaatiliu Yeesaya gbɔŋku poon. 29Ní Unimbɔti Fam tùkū Fiiliipi yii: «Còom̀ kí kíntí tɔrɔku nee!» 30Ní Fiiliipi sáǹ ki bàn̄ee, ki gbìl̄ kijapaayee bíi kàaǹ Yeesaya Unimbɔti bɔnaatiliu gbɔŋku poon. Ní u bālifì-u yii: «A gbìl̀ a nín kàaǹ puee taapuɔɔɔ?» 31Ní u kíí-u yii: «M yaa kaa ká ubɔ ń tùkù-mi taapu, m làá ŋá mana kí gbìl̄?» Ní u mēē Fiiliipi ń jɔ̄m̀ kí kàl̄ u-cee tɔrɔkun. 32Unimbɔti gbɔŋku jandi din u nìn bíi kàaǹee nín tùkù-ti puee sèé:
«Bi cáá-u ki cūnnì kii bi nín cáǹ upii kí kpɔ̀ puee,
kii bi nín cēē dipibil kuti di ŋmí kaa sūǹ puee,
míǹ ní waa nìn wāaǹ ki lī tiba.
33U sīntì u-ba taapu, baa pɔ̀n̄-u.
Ŋma di làá dāá ŋmā kí tùkù u-maaliŋu yab tin jítèe,
kun puee bi lēē u-maŋfal duulinyan#8.33 B. 32-33: Yees 53.7-8..»
34Ní ukàlinjee bí Fiiliipi yii: «M gbàam̄-si, ŋma pu ní Unimbɔti bɔnaatiliu sòon̄ míǹ ní? Úǹ u-ba pu ní u sòon̄ mimmaaa, ubɔ pu ní?» 35Niinee ní Fiiliipi yōoǹ dinyɔɔbundi ki kíĺ ki bíi sòoǹ ki tɔ́kɔ́ǹ dijandi din u kàan̄ee pu ki bíi tùkù-u Yeesu Bɔmɔntiiti. 36Bi còom̄ ki cée, ki bàn̄ laaba ki ká nnyim, ní ukàlinjee bí yii: «Kpèè, nnyim sèé nee. Ba di gíti lìkintí-mi bí taa fàl̀-mi Unimbɔti nyim?» [ 37Ní Fiiliipi kíí-u yii: «An cáá nsan bí fàl̀-si Unimbɔti nyim a yaa fōō ki kíí nì a-pɔbil kɔkɔ». Ní ukàlinjee kíí-u yii: «M fōō ki kíí yii Yeesu Kriisitoo sá Unimbɔti Jipɔɔn#8.37 Biyakatikaabi 37 kaa bí tigbɔŋkpikil tikpil poon..»] 38Ní u bí yii bí yóoń tɔrɔku, ní u nì Fiiliipi liitil nín sìntī ŋkpinni, ní Fiiliipi tin fùl̄-u Unimbɔti nyim. 39Bi nyánní nnyiminee, Unimbɔti Fam yōoǹ Fiiliipi. Ní ukàlinjee kaa ti ká-u, ama ní ki nìkī u-saŋŋu nì dipɔɔpindin. 40Fiiliipi, úǹ tin nyáń Asooti#8.40 Asooti ní bi nìn yíì Asidoodi (kpèè 1 Sami 5.1-7).. Niinee u sòon̄ tibɔmɔntiil ki kpáaǹ ntimbilimu mun poon u jītée ki tin bàn̄ Seesaaree.
Nke Ahọpụtara Ugbu A:
Actes 8: BASSARDC
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
BIBLE EN N'TCHAM (Bassar) © Alliance Biblique du Togo, 2013.