Actes 9
9
Sɔɔl fōō Yeesu ki kíí
(Atuun 22.6-16, 26.12-18)
1Ŋyunti gbantee, Sɔɔl kaa cāntì ti-Dindaan boonnooliibi nnikpaakoon. U nìn cūtì usaraaŋakpil cee 2ki mēē-u yii ú tīī-u tigbɔn ú cáá cùnnì Damaasi kpafidiiŋŋi kpilib cee, án nín làá ŋá pu u yaa ká biba niin bin nóó nsan gbantee, uninjeeee, unimpueeee#9.2 Dūú ŋmàntī nì Yees 30.21, Ilan 27.11., ú cúú-u kí bóob́ kí cáań Jeerusaleemee. 3U yíkì u-saŋkindi pu ki tóob́ Damaasee, kpalaayee, ŋwalifi ŋubɔ nyánní yilpu ki māntìi tú-u ki jìliŋkī, 4ní u lítì kitiŋ. Niinee ní u gbìl̄ nneen ŋubɔ bí-u yii: «Sɔɔl, Sɔɔl, ba ŋá ní a páb́-mi míǹ?» 5Ní u bālifì yii: «An sá sii ŋma ní, m-Dindaan?» Ní ti-Dindaan kíí-u yii: «An sá man Yeesu un a páb̀ee. 6Yīkìí kɔ́ kitiŋin. Niin ní bi làá tùkù-si min sá á ŋée.» 7Tifaandi kɔ́ bininjab u nì bin nìn nóóyee. Bi yúl̀, kaa ti ŋūǹ kí wàan̄ kí lì tiba, kun puee bi gbìl̄ nneen pu ki mun kaa wāĺ báà ubɔ. 8Ní Sɔɔl yáatìi yúl̀ ki ŋúbitì u-nimbiliŋee kaa ti wāĺ. Ní bi cúú u-ŋal ki dātì-u ki cáa cūnnì Damaasi. 9Ní u kāl̀ iwiin ita, kaa wál̀, kaa jíń, kaa nyùn̄ mun.
10Ama Yeesu boonnooliu ubɔ nìn bí Damaasi, bi yíì-u yii Ananiyasi. Ti-Dindaan nyántì u-ba ki dàkā-u, ní ki yíiń-u yii: «Ananiyasi!» Ní u kíí yii: «M sèé, m-Dindaan.» 11Ní ti-Dindaan bí-u yii: «Yīkìí dī didandi din bi yíì didancancaalee kí nyàab̀ Juuda dumpu un bi yíì Sɔɔl u sá Taarsee. Sɔɔl gbanti bíi mèé ŋwimmeem 12ní m yāntì u ká sii Ananiyasi kóoń ki dū a-ŋalii ki páaǹ u-pu ú ŋmā kí wāl̀.» 13Ní Ananiyasi kíí-u yii: «M-Dindaan, m gbìl̄ binib tikpil cee tikpitil tin uninja nee ŋá a-yab bin bí Jeerusaleemee pu. 14U dɔ́miń doo ki cáá mpɔn ŋun bisaraaŋakpilib tīiń-u ú nīn cáa bōob̀ bin kɔkɔwoooo nóó-see.» 15Ní ti-Dindaan bí-u yii: «Nín̄ cá, kun puee uninja gbanti di sá un m lēē ú lēē seera m-pu bin kaa sá Juuda yabee nì bi-bɔtiibi, nì Isirayeel yab kɔkɔ nimbiinee. 16Ní man m-ba ń dāá dàkà-u falaa un u làá jī m-yindi puee.» 17Niinee, Ananiyasi búntì ki bàn̄ ki kɔ́ kudicaŋuee ni, ki dū u-ŋalii ki páaǹ Sɔɔl pu, ní ki bí yii: «M-nabiki Sɔɔl, ti-Dindaan di túnní-mi. Úǹ di sá Yeesu un a nìn ká nsanni a nín nìn dòoń puee. U là á wāl̀, kí gbí Circir Fam.» 18Dicilpu niin ní tiba nyánní u-nimbiliŋin ki lítì kii ijɔmpɔkɔee, ní u wál̀. Ní u yíkì bi fùl̄-u Unimbɔti nyim. 19Ní u jíń tijin ki fātìi ká mpɔn.
Sɔɔl sòon̄ Unimbɔti bɔti Damaasi
Ní Sɔɔl kāl̀ Damaasi iwiŋkaaŋkaa Yeesu boonnooliibi cee, 20ní ki kpáàa kíĺ ki sòoǹ Yeesu pu akpafidiinni, yii u sá Unimbɔti Jipɔɔn. 21An nìn ŋá bin kɔkɔwoooo nìn bíi pílifíǹ-uee bitii, ní bi lì yii: «Kaa sá un nìn bí Jeerusaleem ki páb̀ bin nóó Yeesuee deeee? Waa tí dɔ́miń doo kí cūtì-bi kí bóob́-bi kí cáá-bi bisaraaŋakpilib nimbiin deeee?» 22Ŋyunti gbantee, Sɔɔl nìn mɔ̀tīi kāntí mpɔn, ki sòoǹ ki pɔ́ɔkíǹ Juuda yab bin bí Damaasee, ki dàkà-bi yii Yeesu lafun sá Meesiya.
23Iyunti tikpil jítèe, ní Juuda yab kpáfì kinyɔkɔ ki là kí kpɔ̀-u. 24Ama Sɔɔl béè tin bi là kí ŋée. Bi nìn dòoń ki nākantí ki cīití-u Damaasi tiŋki gundi punyɔmmu nyɔkɔpui ŋwiimpu nì kunyeeu kí ŋmā kí kpɔ̀-u. 25Kunyeeuee, bin dī Sɔɔlee dū ŋŋmii ki kúĺ kukabiku ki dū Sɔɔl ki tākaǹ, ki dū-u ki nāatì digundi, ní u tin tīiǹ kitiŋ ki nyáń ki búntì#9.25 B. 23-25: dūú ŋmàntī nì 2 Kɔra 11.32-33..
Sɔɔl bí Jeerusaleem tiŋkin
26Niinee, Sɔɔl cūtì Jeerusaleem ki bàà là kí dū u-ba kí kɔ́ǹ Yeesu boonnooliibin. Ama bi-kɔkɔ nìn fàŋkí-u, kaa nyí yii u kpántì Yeesu boonnooliu. 27Ní Baarnaabaasi cáá-u ki cūnnì Yeesu kpambaliŋ cee ki máafì-bi Sɔɔl nín nìn ká ti-Dindaan nsanni, u sòon̄ nì u puee, nì min Sɔɔl nìn sòon̄ Damaasi ki cántì ki pɔ̀n̄ Yeesuee. 28U nì bi nìn kíǹ ki yìiǹ Jeerusaleem, ní u sòoǹ ti-Dindaan pu, kaa fàŋkí. 29Ní u nì Juuda yab bin gbìl̀ Greeki sooŋyee sòoǹ ki kpākantí tɔb, ní bíǹ nìn kíǹ ki nyàab̀ kí kpɔ̀-u. 30Nnabiyaamu mun kíǹee gbìl̄ mimmee, ní ki yōoǹ-u ki cūnnì Seesaaree, ní ki yāntì u búntì Taarsi.
31Kriisitoo nikitil din nìn bí Juudee nì Galiilee nì Samaariiyee nìn kíǹ ki bí nsɔŋfin ki báaǹ inyaan ki fàŋkí ti-Dindaan, kaa là kí yìntīǹ-u. Ní bi-wíiŋŋu nìn gbēentí mun, kun puee Circir Fam nìn bí bi-cee.
Eenee cáaǹtam
32Peetroo nìn yìiǹ niin timmu kɔkɔn ki màntī Kriisitoo yab pu, ní ki kpáàa sīntì bin nìn kóò Liida tiŋkinee cee, 33ní ki tin ká uninja ubɔ, bi yíì-u Eenee. U nìn sá ufaliŋfaan ki dɔ̄ u-lambaŋki pu abin anii. 34Ní Peetroo bí-u yii: «Eenee, Yeesu Kriisitoo cáaǹ-si! Yīkìí kpáb́ a-lambaŋki.» Ní u yáatìi yúl̀ dicilpu niin. 35Bin kɔkɔwoooo nìn kóò Liida nì Saarɔnee nìn ká-u, ní ki kpántì bi-ba ki kíǹ ki nóó ti-Dindaan.
Tabiita fìkititam
36Unimpu ubɔ nìn bí Joopee ki nóó Yeesu, bi yíì-u Tabiita, - greeki sooŋyi poonee bi yíì-u Dɔɔrkaasi#9.36 Dɔɔrkaasi taapu di sá yii ucaŋkpalim.. - U nìn ŋáań binib tiŋan tikpil, ní ki pūǹ biwɔfib animbil mun. 37Ŋyunti gbantee, u búŋkì ní ki kpíì. Bi fùl̄-u ki dóòyee, ki cáá-u ki jɔ́m̀ diditɔntɔkɔl pu ki bíl̀. 38Joopee nì Liida kaa nìn dátiǹ tɔb. Yeesu boonnooliibi gbìl̄ yii Peetroo bí Liida, ní bi tú bininjab bili u-cee bí cùú gbàamìń-u yii ú dāan̄ bi-cee malaa malaa. 39Ní Peetroo yíkì dicilpu, u nì bininjabee kɔkɔ búntì. Bi bàn̄ee, ní bi cáá-u ki jɔ́m̀ diditɔntɔkɔl pu. Bikpiipusoodambi kɔkɔ nìn dɔ́miń ki māntì ki gɔ́ń Peetroo ki sūǹ ki dàkà Peetroo Dɔɔrkaasi nín nìn dáá bí ki lù abɔkuti nì satab biŋyee. 40Ní Peetroo nyántì binib kɔkɔ ní ki gbāaǹ ki bíi mèé, ní ki fātì utaŋkpiil pu ki bí yii: «Tabiita, yīkìm̄!» Ní u ŋúbitì u-nimbiliŋ ki kpēē Peetroo, ní ki yáatìi kāl̀. 41Ní Peetroo tāntì u-ŋal ki cúú-u ki yáatì-u ki yóoǹ, ní ki yíiń Kriisitoo yab nì bikpiipusoodambee, ki dū un fīkitèe ki dūu dàkā-bi. 42Joopee yab kɔkɔ gbìl̄ an bɔtee, ní binib tikpil fōō ti-Dindaan ki kíí. 43Peetroo nìn kāl̀ Joopee ki yúntì ugbanjɔb un bi nìn yíì Siimɔŋyee cee.
Nke Ahọpụtara Ugbu A:
Actes 9: BASSARDC
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
BIBLE EN N'TCHAM (Bassar) © Alliance Biblique du Togo, 2013.