Ñwaè' Matïìyoè 26
26
1Jisòs à ka' làa buu ca mìsi, a laa nè ŋgǎa yɛ'ni yì buu enɛ̂, 2“Wèe rìŋ weenɛ ku bɛti mnǒŋ bbaa tɛ a ye ŋkǎ' càasi-mndap. A be koo Muu Ŋwɛ̀ fa nè bèe tɛ a taa mbe kìntaa.” 3Běe bgòrgòr efa mʉ̀ ŋgǎa taŋshi taŋshì ba bleebèe, a tartè mbe ndàp mbe Kaifàs ce e m ba tu nè ŋgǎa taŋshi taŋshì, 4a seesi àmbò a be gèe ka' koo Jisòs à bfee, yʉ. 5Wowèe a m làa enɛ̂, “Sèe fa koo ye ba à mʉ̀ ŋkà' ka', fà dì' bèe a lo lapni, rè bkòr ka'.”
6Jisòs à m ba à rla' Bɛtanì, mbe ndàp Saimʉ̀n ŋwɛ̀ msàasì. 7Njeŋwɛ̀ mò' à vʉ̂, a yɛ ye, a tʉr mʉ ntʉŋ blùr, njɛ̀ɛ mgʉr mo' ce mi lùu ntaa sê, mi ba njo, e cu'nì ye mbe tù à nfè' ce e m ce ye byee. 8Ŋgǎa yɛ'ni yì buu a ka' yɛ, nyor à bep wowèe, wowèe a laa enɛ̂, “A jarsi mgʉr ca à cicì wa'a njokɛ? 9A ba fyèni à mbàa gòr sê, lòr mbàa efa gho fa nè ŋgǎa fùp.” 10Jisòs à m rìŋ yuu ce wowèe a m ce làa, a laa enɛ̂, “Wèe ce fa njeŋwɛ̀ ca ŋgɛ' wa' njokɛ? E gèe ba yuu bòŋboŋ nè mɛ̀. 11Ŋgǎa fùp a ku ba wèe wowèe à nfè' sìp, à ka' ba yi àmbò mɛ̀, sèe be ba à nfè' sìp ka'. 12E cù'ni mɛ̀ mgʉr ca à nyòr wa'a, a ce kupshi yà nyor, tɛ a ka' tuŋ mɛ̀. 13M ce suŋ wèe nè mini-ŋwɛ̀ enɛ fàdì' wɛɛwɛ ce a ka' fe'shi Nsuŋ Mbòŋmboŋ ca njep ŋgòŋ na, a be suŋ yuu ce e gèe na, ce kuushi ye.”
14Ca yi ka' mì, ŋwɛ̀ mò' efa mʉ̀ bèe ce ncòp-baa-à-rrʉ̀ʉ, ce a m ce too enɛ Judas Ìskarìyòt, à du a yɛ běe bgòrgòr efa mʉ̀ ŋgǎa taŋshi taŋshì, 15a laa nè wowèe enɛ̂, “M ka' fa Jisòs mba wěe mmbò, wèe fa mɛ̀ kɛ?” Wowèe a be' mbàa mntaar a fa nè ye. 16E kɛ' ese à nfè' anà a ce ròo nduunjì à rfyèni Jisòs.
17À ka' ba à nòŋ entombì efa ŋkà' ce a m ce ye brɛ̌d ce a lɛ̀ yis njo ka', ŋgǎa yɛ'ni buu Jisòs a vʉ a yɛ ye, a bipshi nè ye enɛ̂, “À ce kòŋ enɛ wèr fɛr byee ba fɛ tɛ à bo ye ŋkǎ' càasi-mndap àgho?” 18E beesì enɛ̂, “Dù nè du yɛ ŋwɛ̀ mò' à mʉ̀ rla', laa nè ye enɛ̂, ‘ŋwɛ̀ ryɛ'nì à làa enɛ̂, “Yà nfè' à ghɛɛ. M be ye ŋkǎ' càasi mndap wèr ŋgǎa yɛ'ni yà buu mbe wɛ̌ ndàp.” ’ ” 19Ŋgǎa yɛ'ni yì buu a ku gee àmbò e m làa, a fɛr byee ŋkà' anà.
20À ka' ba à mbùuŋkùr, e cu a yì bèe ce ncòp-baa-à-rrʉ̀ʉ, tɛ a bo ye byee. 21Wowèe a ka' ce ye byee, e laa enɛ̂, “M ce suŋ wèe nè mini-ŋwɛ̀ enɛ mò' efa wèe be fyèni mɛ̀.” 22Wowèe a koosimnse sê, a kɛ' a ce bipshi à mò'sir à mò'sir enɛ̂, “Tatâ, wà' a mɛ̀ a?” 23E beesì enɛ̂, “Ŋwɛ̀ ce yi bo yi be tarte a ya njep kaŋ, yu ŋwɛ̀ ce e be fyèni mɛ̀. 24Muu ŋwɛ̀ be kù dù àmbò a saŋ mbe Ŋwǎ' Nyʉ̀ nà. Ka' yi yu wa'a, ndòo be co' ŋwɛ̀ ce e be fyèni ye. Yi yu àndèe nè ŋwɛ̀ anà enɛ a m ba bi ye ka'.” 25Judàs ce e m ba à rfyèni ye nà, à laa enɛ̂, “Ŋwɛ̀ ryɛ'nì, wà' a mɛ̀ a?” Jisòs à laa nè ye enɛ̂, “À làa yo cùu.”
26Wowèe a ka' ce ye byee, Jisòs à lor brɛ̂d, a yoŋshi Nyʉ̀, a bɛ'shi, a fa nè ŋgǎa yɛ'ni yì buu a laa enɛ̂, “Kò nè ye, ca yu yà nyor.” 27E lor ndoŋ, a yoŋshi Nyʉ̀, a fa nè wowèe, a laa enɛ̂, “Ŋwɛ̀ wɛɛwɛ no mrù' enjep ndoŋ na. 28Ca yu wa blɛɛ ce vi kur lě' Nyʉ̀, ce vi be fʉʉ, sùu àtu bèe magòr, tɛ Nyʉ̀ bo fòosi wowèe efa buu bbebep ce wowèe a gèe. 29M ce suŋ wèe mɛnɛ m be kèr no mrù' ce a gèe nè mbàŋ ce na ka' caar bà' à nòŋ ce m be no mǐ mfi wèe sèe wèe mbe dǐ' kʉʉ yà Tâ.” 30Wowèe a yop yɛɛ, a nati a ce dù mbe rtùu Olèf.
31A ka' ce dù mbo Jisòs à laa nè wowèe enɛ̂, “Be ba nètʉ' e ntìni na, tɛ wèe wɛɛwɛ caŋse ma' mɛ̀. Ŋwǎ' Nyʉ̀ yi làa enɛ̂, ‘M be lìp ŋwɛ̀ ncìŋ njèe tɛ njèe yi da'se.’ 32Ka' yi yu wa'a, m be fʉʉ efa rkwe dù à ŋgǒŋ Galèle tɛ wèe vʉ koni mɛ̀ àfo.” 33Pità à laa enɛ̂, “Bèe ca wɛɛwɛ a ka' ma' wɛ̀, m ma' wɛ̀ ka'.” 34Jisòs à laa nè ye enɛ̂, “M ce suŋ wɛ̀ nè mini-ŋwɛ̀ enɛ tɛ nduŋgʉp ka' toŋ nètʉ' e ntìni na, à be kani ŋkàrà' taar enɛ à rìŋ mɛ̀ ka'.” 35Pità à beesì enɛ̂, “Yi ka' ku ba ba enɛ sò kwe àbee, m kanì ka'.” Bɛr ŋgǎa yɛ'ni yì buu wɛɛwɛ a ku laa wa' foŋ.
36Jisòs a ŋgǎa yɛ'ni yì buu wèe a du mbe dì' mo' embe rtùu anà ce a m ce too enɛ Gɛ̀tsɛmanì, e laa nè wowèe enɛ̂, “Cu nè mbena tɛ m du nje na dù gèe rloo.” 37E lor Pità ba boo Sɛbɛ̀di a baa, a du a wowèe. E m kɛ̀' a ce seŋ buu, mlù mi ce koo ye sê, 38e laa nè wowèe enɛ̂, “Ŋkoosimnse ce e yu njep mɛ̌ ntee yu ba yì ce àde' e ku yʉ mɛ̀. Cu nè mbena tɛ sèe ce kè'ni.” 39E lo embo a du à njìsàp ka', a gwe kʉkʉ̀p a loo a laa enɛ̂, “Yà Tâ, yi ka' ba àtɛ̀r, à gee tɛ ndoŋ ŋgɛ' ca caa embe mɛ̌ tù. Geewa'a, ke' ba enɛ à gee ba àmbò m ce kòŋ ka', gèe ba àmbò wɛ̀ kòŋ.” 40E ka' nàti embe dì' ce e ba ce gèe rloo nà kʉti, a yɛ ŋgǎa yɛ'ni yì buu a ce buumi. E laa nè Pità enɛ̂, “Banɛ àde' wèe à ke' ba cu mbekì tɛ sèe ce kè'ni àmbò awà mò'sir ka' a? 41Ke'ni nè ce loo, fà dì' wèe gwe rmòoshì ka'. Ntee njep rbʉ̀, bsɛ̀ nje nyòr.” 42Jisòs à ker dû, a loo a laa enɛ̂, “Yà Tâ, yi ka' ba enɛ àde' ndoŋ ca caa embe mɛ̌ tù ka', banɛ à gee tɛ yuu ce à ce kòŋ yi geetî.” 43E ka' kʉti, a ker yɛ wowèe a ce buumi, mmirlò mi ku ce dù nè wowèe dù. 44E ker ma'shi wowèe mbo, a ker du a ker loo, a ku laa àmbò e ba laa nà. 45E ka' mìsi, a kʉti a yɛ ŋgǎa yɛ'ni yì buu a laa nè wowèe enɛ̂, “Wèe ku bii ce buumi, a ce lʉ̀shi a? Yɛ̂, nfè' à ghɛɛ. A be fa Muu Ŋwɛ̀ mbe mmbo ŋgǎa ŋgèe buu bbebep. 46Lò nè tɛ sèe ce dù. Ŋwɛ̀ ce e fyeni mɛ̀ nà yu àtʉtʉ.”
47E ka' kù bii mìsi efa cùu, Judàs ce e m ba mò' efa bèe ce ncòp-baa-à-rrʉ̀ʉ, à tosè. E m ba a ku' bèe ce běe bgòrgòr efa mʉ̀ ŋgǎa taŋshi taŋshì ba bleebèe a m tuu. Wowèe a m tʉr bsà' ba mmbàŋ. 48Judàs ce e m fyèni ye nà à m suŋ wowèe wɛɛ enɛ̂, “Ŋwɛ̀ ce m ka' baa nje nyòr, banɛ a ye; wèe koo.” 49E ka' tose, a ko'shi àgee Jisòs, a laa nè ye enɛ̂, “Mɛ̀ cà'ni wɛ̀, Rabài.” E ka' làa wa'a, a baa ye nje nyòr. 50Jisòs à laa nè ye enɛ̂, “Ŋkarà, gèe yuu ce wɛ̀ ba vʉ àfa à rgèe.” Bèe anà a vʉ̂, a koo ye a ba'ni. 51Yi ka' koni wa'a, mò' efa bèe ce a m ba a Jisòs wèe, à co' yì sà' a tee tù' ese ŋkwàa ŋwɛ̀ ce e m ba tu nè ŋgǎa taŋshi taŋshì. 52Jisòs à laa yi yu nè ye enɛ̂, “Kʉsi sà' mbà rùu njobè' ŋwɛ̀ ce e co' sà', be kèe kù kwe à sà'. 53À ce kwà'shi wɛnɛ àde' m ke' laa nè yà Ta tɛ e ku tuusi mɛ̀ vi bcìndap bkʉr àŋgoo ka' a? 54Yà Ta ka' gee wa'a, banɛ yuu ce Ŋwǎ' Nyʉ̀ yi ce làa àmbò buu ca yi ghɛɛtè njo à njɛ̌ɛ kɛ?” 55Jisòs à laa nè bèe à nfè' anà enɛ̂, “Wèe à vʉ̀ à rkoo mɛ̀, a tʉr bsà' ba mmbàŋ àmbò m yu lɛ nyɛ̀ɛ wa'a njokɛ? Mɛ̀ m ce vʉ̀ mbe Ndàp Nyʉ̀ à mnòŋ wɛɛwɛ ce cu à nshè ce yɛ'ni bèe, wèe à ke' koo mɛ̀ ka'. 56Ka' yi yu wa'a, buu ca wɛɛwɛ vi koni tɛ yuu ce ŋgǎa ncep ntuu Nyʉ̀ a m saŋ yi bo ghɛɛte njo.” Ŋgǎa yɛ'ni yì buu wɛɛwɛ a ma' ye, a caŋse.
57Bèe ce a m koo Jisòs nà a m lòr ye a du àgho mbe ndàp Kaifàs ce e m ba tu nè ŋgǎa taŋshi taŋshì. Ŋgǎa ryɛ'ni mncir ba bleebèe a m kaari mbo. 58Pità à du a yě mbùu, a ba yi encàŋ. E du a ba' mbe cùu mambe ŋwɛ̀ ce e m ba tu nè ŋgǎa taŋshi taŋshì, a niŋ mbo, a cu à nshè a bèe ce a m ce kè'ni Ndap Nyʉ̀, tɛ e bo yɛ yuu ce yi be ba. 59Běe bgòrgòr efa mʉ̀ ŋgǎa taŋshi taŋshì ba ŋgǎa kansùr, a roo bèe tɛ a bo vʉ̀ tɛɛ njìnsa' mnàŋ, tɛ a koo ye yʉ. Geewa'a, a yɛ fàa ka'. 60Ku' bèe a vʉ̂, a ke' laa yuu mo'sir ka'. À ka' ba à lʉ̀simbùu, bèe mo' bèe a mmbaa a vʉ̂, 61a laa enɛ̂, “Byɛ ca à m làa enɛ àde' e ku sa'sì Ndap Nyʉ̀ ca, ker ba'ri à mnǒŋ btaar.” 62Ŋwɛ̀ ce e m ba tu nè ŋgǎa taŋshi taŋshì à natì mbekì, a laa nè ye enɛ̂, “Wɛ̀ tʉr yuu à rbèesi kuu buu ce bèe ca a làa a kuu wɛ̀ na ka' a?” 63Jisòs à laa yuu ka'. Ŋwɛ̀ ce e m ba tu nè ŋgǎa taŋshi taŋshì à laa nè ye enɛ̂, “M ce làa nè wɛ̀ enɛ à kaa à rlii Nyʉ̀ ce e yu ntèe, suŋ ka wèr enɛ à yu Krǎis anà, ce e yu Muu Nyʉ̀ nà lɛ̂.” 64Jisòs à laa nè ye enɛ̂, “À làa yo cùu. M ce suŋ wèe wɛɛwɛ mɛnɛ kɛ' e sè'ni na, wèe be yɛ Muu Ŋwɛ̀ àmbò e cu à rkoo mà' Nyʉ̀ ce e tʉr ŋger wɛɛwɛ, kèr yɛ foŋ àmbò e ce sùu mbendù mmbà' embe bùu.” 65E ka' làa wa'a, ŋwɛ̀ ce e m ba tu nè ŋgǎa taŋshi taŋshì à sasì bcɛ̀' efa nyòr, a laa enɛ̂, “E bepsi rlii Nyʉ̀. Mbùu mò' ker ba nè sèe à rlàa enɛ ŋwɛ̀ mò' ker laa yuu kuu ŋwɛ̀ ca ka'. To wèe à yu' àmbò e bepsi rlii Nyʉ̀. 66Wèe à làa wee kɛ?” Wowèe a beesì enɛ̂, “Yi yu enɛ a yʉ ye.” 67A ka' làa wa'a, a ce ye nè mce nje mmìr, a tʉʉshi ye nè bdʉ̀'. Bèe mo' a lip ye nè mmbo, 68a laa enɛ̂, “Wɛ̀ ce à yu Krǎis anà, to' ka enɛ à lìp nda wɛ̀ lɛ.”
69Pità à m cu njep mambe, muunje mò' ce e m ba ŋwɛ̀ rfà' à vʉ̂, a yɛ ye, a laa enɛ̂, “Wɛ wɛ̀ à m ba wèe Jisòs ce à ŋgǒŋ Galèlê.” 70E kanì à bsii bèe wɛɛwɛ, a laa enɛ̂, “M rìŋ yuu ce à ce làa ka'.” 71E ka' làa wa'a, a du a tɛɛ njep cùu ŋka' embe mambe anà, muunje mò' ce e m ba ŋwɛ̀ rfà' à ker yɛ ye, a laa nè bèe ce a m ba àfo enɛ̂, “Ŋwɛ̀ ca à m ba a Jisòs ce à rla' Nasarɛ̀t.” 72Pità à ker kani, a kâa, a laa enɛ̂, “Mɛ̀ rìŋ ŋwɛ̀ anà ka'.” 73Mʉ nfè' mò' à ka' tuuse, bèe ce a m ba àfo a ko'shì àgee Pità, a laa nè ye enɛ̂, “À yu mò' efa wowèe ghup njobè' njɛ̀ɛ njì ce à ce làa yi ce dùŋshi wa'a.” 74Pità à ye lè', a laa enɛ̂, “Ndòo co' mɛ̀ ce ka' tɛ ba enɛ m ce làa ba yuu mini ka'. M rìŋ ŋwɛ̀ anà ka'.” Nduŋgʉp à ku toŋ à nfè' anà. 75Pità à kuushì yuu ce Jisòs à m làa nè ye enɛ̂, “Tɛ nduŋgʉp ka' toŋ, à be kani ŋkàrà' taar enɛ à rìŋ mɛ̀ ka'.” E ka' kuushi wa'a, a fʉʉ njep mbè, a bʉ' rwar.
Nke Ahọpụtara Ugbu A:
Ñwaè' Matïìyoè 26: LNT
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Limbum New Testament © Bible Society of Cameroon, 2003.