Ñwaè' Matïìyoè 27
27
1À ka' ba à mʉ ŋgàptʉ', běe bgòrgòr efa mʉ̀ ŋgǎa taŋshi taŋshì, ba bleebèe a cutè, a seesi àmbò a be gèe ka' yʉ Jisòs. 2Wowèe a kur ye, a lor ye a du àgho, a fa nè Pailɛ̀t ce e m ba govanò. 3Judàs ce e m fyèni ye nà, à ka' yɛ enɛ a teni mnsa' enɛ a yʉ Jisòs, a kupse yi ntee, a lor mbàa mntaar cà, a du àgho, a kʉsi nè běe bgòrgòr ba bleebèe cà, 4a laa enɛ̂, “Mɛ̀ gèe yuu bebep, a fyeni ŋwɛ̀ ce e gèe yuu mo' bebep ka'.” Wowèe a laa enɛ̂, “Yì anà yi tʉr yuu mo' à rgèe nè wèr ka'. A yò nsa'.” 5Judàs à ma' mbàa anà mbe Ndàp Nyʉ̀, a fʉʉ, a du a kɛrnî. 6Běe bgòrgòr ca, a kwɛ' mbàa anà, a laa enɛ̂, “Ncir yi byemi enɛ a lɛ mbàa ca à mʉ̀ mbàa embe Ndàp Nyʉ̀ ka' njobè' yu mbàa blɛɛ.” 7Wowèe a seesì, a lor mbàa anà, a du a yuu ŋkʉ̀ ŋwɛ̀ mboo mkìŋ àgho tɛ a bo ce tuŋ bkìlò àfo. 8A mbùu ce a ce too ŋkʉ̀ anà enɛ ŋkʉ̀ blɛɛ, caar ba' ntìni na. 9Ca yi ka' ba wa'a, yuu ce Jɛ̀rìmiyà, ŋwɛ̀ ncep ntuu à m làa nà yi ghɛɛtè njo. E m làa enɛ̂, “Wowèe a m lòr mbàa mntaar ce à m ba mbàa ce bèe Isrɛ̀l a m byemi enɛ a be là' yi tu àgho, 10a yuu ŋkʉ̀ ŋwɛ̀ mboo mkìŋ, àmbò Tata Nyʉ̀ à m làa nè mɛ̀.”
11Jisòs à ka' tɛɛ njeptii govanò, govanò à bipshì nè ye enɛ̂, “A wɛ̀ ŋkʉʉ Jus a?” Jisòs à laa enɛ̂, “À làa wɛ̀ wa'a.” 12Běe bgòrgòr efa mʉ̀ ŋgǎa taŋshi taŋshì, ba bleebèe a ka' toshi ye à buu mò', e beesì yuu ka'. 13Pailɛ̀t à laa nè ye enɛ̂, “Mbò à ce yu' ku' buu ce a làa enɛ wɛ̀ gèe na a?” 14Jisòs à laa yuu ka' koo mʉcàr, govanò à bɛɛŋgèr sê.
15A m ce ye Ŋkǎ' càasi-mndap à bfè' wɛɛwɛ banɛ govanò be fʉr ŋwɛ̀ shaŋ mò' embe shaŋ. E m ce fʉr ba ŋwɛ̀ ce à làa bèe enɛ e fʉr. 16À m ba à nfè' anà, ŋwɛ̀ mò' ce bèe wɛɛwɛ a m rìŋ ye, à ba mbe shaŋ. A m too ye enɛ Bàrabàs. 17Bèe a ka' kaari àbee, Pailɛ̀t à bipshì nè wowèe enɛ̂, “Ŋwɛ̀ ce wèe ce kòŋ enɛ m fʉr embe shaŋ fa nè wèe yu nda? M fʉr ba Bàrabàs kɛ̀ Jisòs ce a too enɛ Krǎis nà?” 18E m rìŋ enɛ wowèe a m ce ko'ndoŋ nè Jisòs, a ka' koo ye a vʉ àgho a fa nè ye. 19Yi m ba foŋ enɛ à m ba à nfè' Pailɛ̀t à m ce sa' mnsa' ca, ŋgwa yì à cep ntuu nè ye, a laa enɛ̂, “Fa gèe yuu mo' nè ŋwɛ̀ ce e gèe yuu bebep ka' nà ka', njobè' mɛ̀ yɛ rlo ntìni àmbò ye, li fa mɛ̀ ŋgɛ' sê.” 20Běe bgòrgòr ba bleebèe ca, a barsì bèe enɛ wowèe a laa nè Pailɛ̀t enɛ e laa tɛ a fʉr Bàrabàs, yʉ Jisòs. 21Govanò à bipshì nè wowèe enɛ̂, “Ŋwɛ̀ efa bèe a mmbaa ca ce wèe ce kòŋ weenɛ m fʉr embe shaŋ fa nè wèe yu nda?” Wowèe a beesì enɛ̂, “Bàrabàs.” 22Pailɛ̀t à bipshì nè wowèe enɛ̂, “Banɛ m be gèe mɛ kɛ nè Jisòs ce a too enɛ Krǎis na?” Wowèe wɛɛwɛ a beesì enɛ̂, “Taa yi mbe kìntaa.” 23E ker bipshi nè wowèe enɛ̂, “M taa ye mbe kìntaa njokɛ? Yuu bebep ce ŋwɛ̀ ca à gèe seesê, yu ba kɛ?” Wowèe a ku ce waani, a ce làa enɛ̂, “Taa lɛ ye mbe kìntaa.” 24Pailɛ̀t à ka' yɛ enɛ yuu gèe yi ker ba ka', bghaa vi ce ròo ko' à mʉ̀ bèe, e lor mdip a su'si mi mmbo àgho à bsii bèe, a laa enɛ̂, “Ya bo yi yu njep rkwe ŋwɛ̀ ca ka', kwà' wèe.” 25Bèe wɛɛwɛ a beesì a laa enɛ̂, “Mà'shi tɛ vi blɛɛ vi ba mbe wěr tù kèr ba mbe tu boo wer.” 26E fʉr Bàrabàs embe shaŋ, a fa nè wowèe, a lâa, a lip Jisòs nè yɛɛnsò. A ka' lìp wɛɛ, a fa enɛ a taa ye mbe kìntaa.
27Bsoogɛ̀ vǐ govanò, a lor Jisòs a du àgho mbe dì' mnsa' embe nto' ce govanò à m ce cu mbo, bɛr bsoogɛ̀ wɛɛwɛ a niŋ mbo, a sir ye a tarte, 28a co'ni ye bcɛ̀' efa nyòr, a lor cɛ̌' beer a yarsi ye à nyòr, 29a gee rtaa kʉʉ nè bsòpsì a sop ye mbe tù, a lor mbàŋ a fa nè ye mbà bo mà'. A ka' gèe wa'a, a gʉ'shi njep yě tìi, a vʉshi ye, a kɛ' a ce bùu ye àmbò ŋkʉʉ wa'a, a ce làa enɛ̂, “Nyàr, ŋkwe Jûs.” 30Wowèe a ce ye nè mce, a koo mbàŋ cà ese ye, a lip ye àgho mbe tù. 31Wowèe a ka' vʉ̀shi ye wɛɛ, a co' cɛ̌' beer cà efa yě nyòr, a lor vi bcɛ̀', a kʉsi ye à nyòr, a lor ye a du àgho à rtaa mbe kìntaa.
32Wowèe a ka' ce dù, a tarte a ŋwɛ̀ mǒ' à rla' Sàirên, ce a m ce too enɛ Saimʉ̀n. A koo ye à ŋger enɛ e byɛ' kìntaa. 33Wowèe a ka' bà' mbe dì' ce a m ce too enɛ Golgotà, ce mbùu efa rlii ca yu enɛ̂, “Dǐ' kèkèp tu.”, 34a fa ye mrù' ce a m fìŋshi nè ŋgʉ̀-cece' enɛ e no. E ka' yu'shi, a kani efa rno. 35Wowèe a ka' taa ye mbe kìntaa, a lor vi bcɛ̀' a ma' kàŋ àgho tɛ a bo yɛ àmbò a be gàp. A ka' gàp wɛɛ, 36a cu à nshè a ce kè'ni ye. 37A saŋ mbùu ce a taa ye mbe kìntaa, a la' mbe tu kìntaa. A m saŋ mbo enɛ̂, “Ŋwɛ̀ ca yu Jisòs ce ŋkʉʉ Jûs.” 38A m taa byɛ̀ɛ a baa a Jisòs wèe mbe bkìntaa, mò' à ba à bo mà', mò' à ba a yě bo ŋkòp. 39Bèe ce a m ce càa yap càa, a kor btu, a su' ye nè mcɛp, 40a laa enɛ̂, “Wɛ̀ ce àde' à sa'sì Ndap Nyʉ̀, bà'ri à mnǒŋ btaar, jà' là yo tu. Yi ka' ba enɛ à yu Muu Nyʉ̀, sùu là embe kìntaa.” 41Běe bgòrgòr efa mʉ̀ ŋgǎa taŋshi taŋshì, ba ŋgǎa ryɛ'ni mncir, ba bleebèe, a ku vʉshi ye à njɛ̌ɛ wa' foŋ. 42Wowèe à m làa enɛ̂, “E m jà' bèe mo', a moo à rjà' yi tu làr. E yu ŋkʉʉ bèe Isrɛ̀l; e suu là embe kìntaa sè'ni na, tɛ sèe bo byemi nè ye. 43E lɛ̀ ntee njep Nyʉ̀, banɛ Nyʉ̀ ka' koŋ ye, e fʉr là ye efa ŋgɛ', njobè' e m làa enɛ a ye Muu Nyʉ̀.” 44Byɛ̀ɛ ce a m taa a Jisòs wèe mbe bkìntaa nà, a su' ye nè mcɛp à njɛ̌ɛ wa' foŋ.
45Nyʉ̀ à ka' kùu ŋgòŋ, tʉ̀' à sii. 46À ka' ba àmbò à nyʉ̀ taar wa'a, Jisòs à waa, a laa enɛ̂, “Ɛ̀lôi, Ɛ̀lôi, Lama Sàbàtanì?” ce mbùu efa gho yu enɛ̂, “Yà Nyʉ̀, Yà Nyʉ̀, wɛ̀ lèse mɛ̀ njokɛ?” 47Bèe mo' ce a m tɛɛte àfo, a ka' yu', a laa enɛ̂, “Ŋwɛ̀ ca ce kɛ' Àlajà.” 48Mò' efa wowèe à ka' yu' wa'a, a caŋ a lor kʉ̀sha, a fʉʉ njep mrù' ce mi ce baŋshi, a fapte à ŋke', a fa nè ye enɛ e bo nyoŋ. 49Bɛr bèe a laa yap enɛ̂, “Bè tɛɛ ka wa' lɛ̂; sèe yɛ ka enɛ wà' Àlajà be vʉ̀ jà' ye lɛ.” 50Jisòs à ker waa, a ma'shi li ryòŋ nè Nyʉ̀. 51Cɛ̀' ce a m teni dǐ' mo' embe Ndàp Nyʉ̀ àgho yi ku sati à nfè' anà tìtìyɛɛ, kɛ' embe tù, ba' njep mbùu, ŋgòŋ yi ci'tì, myɛɛ mi waŋgèr, 52mshè mi mʉ'ŋgèr, bèe Nyʉ̀ magòr ce a m kweŋger a fʉʉ, a ba btèe. 53Jisòs à ka' lò fʉʉ efa rkwe, wowèe a fʉʉsè enjep mshè, a niŋ à Rla' Rrara, a duŋshi yàp nyor nè bèe magòr. 54Ŋwɛ̀ ce e m ba tu nè bsoogɛ̀ rjèe, ba bsoogɛ̀ ce a wowèe a m ce kè'ni Jisòs à ka' yɛ àmbò ŋgòŋ yi cì'ti, kèr yɛ buu ce vi koni, a wɛp sê, a laa enɛ̂, “Ŋwɛ̀ ca à m ba Muu Nyʉ̀ ghup.” 55Bbyèŋge a m ba àfo àŋgoo, a tɛɛ à njìsàp a ce fyɛ'. À m ba bbyèŋge ce a m lǒ à ŋgǒŋ Galèlê, a du a Jisòs wèe, tɛ a bo jà' ye à buu. 56Bèe mo' efa wowèe à m ba Mɛ̀ɛri ce à rla' Makdalà, ba Mɛ̀ɛri ce e m ba ma yì Jɛ̂ms ba Josɛ̀f, ker ba ma boo vǐ Sɛbɛ̀dî.
57À ka' ba à mbùuŋkùr, ŋwɛ̀ mbàa mò' ce à rla' Àrimàtiyà à vʉ̂. A m too ye enɛ Josɛ̀f, ye ye à ba mò' efa ŋgǎa yɛ'ni buu Jisòs. 58E m dù a yɛ Pailɛ̀t, a laa nè ye enɛ e fa gʉ̌ʉ ŋwɛ̀ nè ye tɛ e tuŋ. Pailɛ̀t à byemì. 59Josɛ̀f à koo gʉ̀ʉ ŋwɛ̀, a kur njep ma cɛ̌' bòŋboŋ, 60a lɛ njep li rshě rfi ce e m sò' nje ryɛɛ, a biŋsi ma lùr, a cete ncǔu rshè àgho, a nati a dû. 61Mɛ̀ɛri ce à rla' Makdalà, ba Mɛ̀ɛri mò' cà, a m cu à ncǔu rshè.
62Tʉ̀' à ka' raa, ce nòŋ ce a m ce fɛ̀r buu mmbomntaa Nyʉ̀ yi m càa yi wɛɛ, běe bgòrgòr efa mʉ̀ ŋgǎa taŋshi taŋshì ba bèe Farìsi a du a yɛ Pailɛ̀t, 63a laa enɛ̂, “Masà, wèr ce kuushi enɛ à m ba à nfè' ce ŋwɛ̀ mbo' bèe ca à m bii ntèe, e m làa enɛ̂, ‘Mnòŋ vi be cǎa btaar, tɛ m fʉʉ efa rkwe.’ 64Banɛ wɛ̀ ba làa tɛ a ke'ni rshè anà bòŋboŋ caar tɛ mnòŋ vi cǎa btaar, fà dì' ŋgǎa yɛ'ni yì buu a vʉ yɛ̀ɛ gʉ̌ʉ ŋwɛ̀, suŋ bèe enɛ e fʉʉ efa rkwe, tɛ mnde' ce a nya' elʉ̀simbùu na mi caa mì entòmbì ka'.” 65Pailɛ̀t à laa nè wowèe enɛ̂, “Lòr nè ŋgǎa rkè'nì ca tɛ wèe wowèe dû, du yɛ enɛ wowèe a kè'ni rshè anà bòŋboŋ.” 66Wowèe a dû, a fa ncòo à lùr embe ndù ncǔu rshè, fà dì' ŋwɛ̀ mò' bo jòo ka', a lɛ ŋgǎa rkè'nì cà àfo.
Nke Ahọpụtara Ugbu A:
Ñwaè' Matïìyoè 27: LNT
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Limbum New Testament © Bible Society of Cameroon, 2003.