Ñwaè' Matïìyoè 25
25
1“Be ba à nfè' anà tɛ kʉʉ Nyʉ̀ yi ba àmbò nfè' ce boo mŋgòŋgò mo' bèe nrʉʉ a m lòr wap blâm, a du à rkoni nduu-gùu. 2Bee nta efa wǎp mʉ a m ba blʉr, bèe nta a tʉr bfee. 3Bèe ce a m ba blʉr nà a m lòr blâm, a lor kɛ̀ròsin ka', 4bèe ce a m rìŋ buu nà a lɛ kɛ̀ròsin à mʉ bgalòn, a tʉr àgee wâp blâm. 5Nduu-gùu a cu sê, mmirlò mi koo wowèe, wowèe a buumì. 6À ka' ba nè ntee-tʉ', ŋwɛ̀ à fuŋ, a laa enɛ̂, ‘A nduu-gùu e ce vʉ̀ nà, Fʉʉ nè koni ye.’ 7Boo mŋgòŋgò anà a lɛ'sè efa mmirlò, a ko'si wâp blâm. 8Bèe ce a m ba blʉr nà, a laa nè bèe ce a m tʉr bfee nà enɛ̂, ‘Fa nè wèr yè kɛ̀ròsin anà mò' njobè' wêr blam vi ce liiti.’ 9Bèe ce a m tʉr bfee nà a beesì enɛ̂, ‘Wèr à ka' gee wa'a, e ghɛɛtè nè sèe wɛɛwɛ ka'. Dù nè yɛ bèe ce a ce fyèni, yuu yè.’ 10Wowèe a ka' dù à ryuu, nduu-gùu à ba'sì, bèe ce a m tami nyor nà a du a nduu-gùu wèe mbe ndàp à rye Ŋkǎ' bgùu, a cete kèŋ. 11Boo mŋgòŋgò mo' cà a lo a vʉ̂, a laa enɛ̂, ‘Masà Masà, mʉ̀' kèŋ nè wèr.’ 12E beesì yi yu enɛ̂, ‘M ce làa nè wèe nè mini-ŋwɛ̀ enɛ m rìŋ wèe ka'.’ 13Banɛ wèe fa ce buumi ka' njobè' wèe rìŋ nòŋ kɛ̀ awà ka'.
14“Kʉʉ Nyʉ̀ yi be ba foŋ àmbò à nfè' ce ŋwɛ̀ mò' à m ba à rdù à mbè, a kɛ' yi ŋgǎa mfà', a lɛ yì buu nè wowèe. 15E m fa buu nè ŋwɛ̀ àmbò ŋger ŋgàŋ yi m ba. E m fa mò' ncʉ̀kì tâ, a fa mò' ncʉ̀kì baa, a fa mò' ncʉ̀kì mò'sir. E ka' fa, a du à mbè. 16Ŋwɛ̀ ce e m koo ncʉ̀kì ta nà à lòr mbàa anà a ku kɛ' a ce gèe ntaa àgho, a ye sɛ' à ncʉ̀kì tâ. 17Ŋwɛ̀ ce e m koo ncʉ̀kì baa nà à gee ntaa foŋ, a ye sɛ' à ncʉ̀kì baa. 18Ŋwɛ̀ ce e m koo yi ncʉ̀kì mò'sir nà à du a tuŋ bè'tè a sʉti mbàa anà njo. 19Yàp masà à m cu à mbè sê, a ka' kʉti, a fyɛ' enɛ wowèe a m di' gee ekɛ nè mbàa ce e m fa nè wowèe nà lɛ. 20Ŋwɛ̀ ce e m koo ncʉ̀kì ta nà, à vʉ nè ncʉ̀kì ta mò', a laa enɛ̂, ‘Masà, wɛ̀ m fa mɛ̀ ncʉ̀kì tâ. Yɛ̂, mɛ̀ gèe ntaa àgho a ye sɛ' à ncʉ̀kì tâ.’ 21Yì masà à laa nè ye enɛ̂, ‘Yà ŋwɛ̀ rfǎ' mbòŋmboŋ, à yu ŋwɛ̌ mini. Wɛ̀ gèe yɛɛnì sê. Wɛ̀ fyɛ' à yuu ce yi yu mʉcàr bòŋboŋ, banɛ m be fa wɛ̀ ŋger mbendù yǐ gòr. Vʉ̀ tɛ wèe yò masà lʉshi àbee.’ 22Ŋwɛ̀ ce e m koo ncʉ̀kì baa nà, à vʉ foŋ, a laa enɛ̂, ‘Masà, wɛ̀ m fa mɛ̀ ncʉ̀kì baa. Yɛ̂, mɛ̀ gèe ntaa àgho a ye sɛ' à ncʉ̀kì baa.’ 23Yì masà à laa nè ye enɛ̂, ‘Yà ŋwɛ̀ rfǎ' mbòŋmboŋ, à yu ŋwɛ̌ mini. Wɛ̀ gèe yɛɛnì sê. Wɛ̀ fyɛ' à yuu ce yi yu mʉcàr bòŋboŋ, banɛ m be fa wɛ̀ ŋger mbendù yǐ gòr. Vʉ̀ tɛ wèe yò masà lʉshi àbee.’ 24Ŋwɛ̀ ce e m koo ncʉ̀kì mò'sir nà à vʉ foŋ, a laa enɛ̂, ‘Masà, mɛ̀ m rìŋ mɛnɛ à yu ŋwɛ̌ ntatap sê. Wɛ̌ ke kep yuu ce wɛ̀ m byè ka', kap yuu ce wɛ̀ m ŋwaŋ ka'. 25Mɛ̀ m wɛp, a du a tuŋ bè'tè a sʉti yo mbàa njo. Yɛ̂, a yo mbàa na.’ 26Yì masà à laa nè ye enɛ̂, ‘À yu ŋwɛ̀ rfǎ' mbembep, a ba mbor. Wɛ̀ m rìŋ wɛnɛ mɛ̌ ke kep yuu ce mɛ̀ m byè ka', kap yuu ce mɛ̀ m ŋwaŋ ka'. 27Banɛ wɛ̀ m ba lɛ̀ ya mbàa mbe bâŋ, mɛ̌ kʉti, tɛ m bo koo ya mbàa nè sɛ'-ŋwɛ̀. 28Banɛ wèe koo ncʉ̀kì anà ese ye, fa nè ŋwɛ̀ ce e tʉr ncʉ̀kì rʉʉ nà. 29Yi yu enɛ ŋwɛ̀ ce e ka' tʉr yuu, banɛ a be kèr fa ye buu mò', tɛ e misi tʉr buu gòr. Ŋwɛ̀ ce e ka' tɛ tʉr yuu ka', banɛ a be koo ka' mʉ yì ce e tʉr nà ese ye. 30Koo nè ŋwɛ̀ rfà' ce e yu ŋwɛ̌ cicì nà, ma' à dì' ce ku ba ba tʉ̀'nji ce bèe a be ce warse ce kʉr msòŋ àfo.’
31“Be kèe be à nfè' ce Muu Ŋwɛ̀ à vʉ̀ nè yi fòo-ŋwɛ̀ a bcìndap Nyʉ̀ wɛɛwɛ nà, tɛ e cu mbe yi kàbàrà' fòo, 32tɛ běe à bto' wɛɛwɛ a kaari, tɛɛ njep yě tìi, tɛ e gapse wowèe nto' baa àmbò gày e ke fʉr njèe efa mʉ̀ mbʉ-ndoŋ nà. 33E be tɛr njèe à yi bo mà', tɛr mbʉ-ndoŋ à yi bo ŋkòp. 34Ŋkʉʉ e gèe wa' wɛɛ, laa nè běe à yi bo mà' enɛ̂, ‘Wèe yu bèe ce yè ta à ghòni. Vʉ̀ nè koo bti', niŋ mbe dǐ' kʉʉ ce Nyʉ̀ à m kupshi a lɛ nè wèe kɛ̌' à nfè' ce a m gèe ŋgòŋ, 35njobè' njè à m ce yaŋ mɛ̀, wèe à fa mɛ̀ byee. Ntee yi m yuushi mɛ̀, wèe à fa mɛ̀ yuu no. Mɛ̀ m ba kìlò, wèe à konì mɛ̀. 36Mɛ̀ m ba mbùuriŋ, wèe à fa mɛ̀ bcɛ̀'. Mɛ̀ m ce yaŋ, wèe à vʉ a ca'ni mɛ̀. Mɛ̀ m ba mbe shaŋ, wèe à vʉ a ca'ni mɛ̀.’ 37E ce làa wa'a, běe byɛɛnì cà a laa nè ye enɛ̂, ‘Tatâ, wèr à m yɛ wɛ̀ ba à se'kɛ, njè à ce yaŋ wɛ̀, wèr à fa wɛ̀ byee, kɛ̀ ntee yi ce yuushi wɛ̀ wèr à fa wɛ̀ yuu no? 38Wèr à m yɛ wɛ̀ ba à se'kɛ, wɛ̀ ba kìlò, wèr à konì wɛ̀, kɛ̀ wɛ̀ ba mbùuriŋ, wèr à fa wɛ̀ bcɛ̀'? 39Wèr à m yɛ wɛ̀ ba à se'kɛ, wɛ̀ ce yaŋ, kɛ̀ a ba mbe shaŋ ɛ̀, wèr à ca'ni wɛ̀?’ 40Wowèe a ce làa wa'a, ŋkʉʉ beesi nè wowèe enɛ̂, ‘M ce suŋ wèe nè mini-ŋwɛ̀ enɛ àmbò wèe à m gèe buu ca nè ŋwɛ̌ ŋkɛ' efa mʉ̀ bfʉr wa ca na, wèe à m gèe ba nè mɛ̀.’ 41E làa wa' mìsi, laa nè běe à bo ŋkòp enɛ̂, ‘Ndòo à co' wèe, lò nè efa mɛ̌ geŋ, du njep mor ce àde' yi liitì ka', ce a tòo nè Satàn ba vi bcìndap, 42njobè' njè à m ce yaŋ mɛ̀, wèe à fa mɛ̀ byee ka'. Ntee yi m ce yuushi mɛ̀, wèe à fa mɛ̀ yuu no ka'. 43Mɛ̀ m ba kìlò, wèe à konì mɛ̀ ka', a ba mbùuriŋ, wèe à fa mɛ̀ bcɛ̀' ka', a ce yaŋ a ker ba mbe shaŋ, wèe à ca'nì mɛ̀ ka'.’ 44E làa wa'a, wowèe a bipshi nè ye enɛ̂, ‘Tatâ, wèr à m yɛ wɛ̀ à se'kɛ, njè à ce yaŋ wɛ̀, kɛ̀ ntee yi ce yuushi wɛ̀, kɛ̀ wɛ̀ ba kìlò, kɛ̀ wɛ̀ ba mbùuriŋ, kɛ̀ wɛ̀ ba mbe shaŋ ɛ̀, a ke' ja' wɛ̀ ka'?’ 45Wowèe a bipshi wa'a, tɛ e beesi enɛ̂, ‘M ce suŋ wèe nè mini-ŋwɛ̀ enɛ àmbò wèe à m jà' ka' mʉ ŋwɛ̌ ŋkɛ' efa mʉ̀ bfʉr wa ca ka' na, banɛ wèe à m jà' mɛ̀ ka'.’ 46E làa wa'a, tɛ wowèe a du niŋ njep ŋgɛ' ce nfesè, tɛ běe byɛɛnì a du cu rcu ce nfesè.”
Nke Ahọpụtara Ugbu A:
Ñwaè' Matïìyoè 25: LNT
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Limbum New Testament © Bible Society of Cameroon, 2003.