Ñwaè' Matïìyoè 24
24
1Jisòs à m fʉʉ embe Ndàp Nyʉ̀, a ka' ce dù, ŋgǎa yɛ'ni yì buu a du a yɛ ye, a duŋshi ye Ndap Nyʉ̀. 2E laa nè wowèe enɛ̂, “Mbò wèe ce yɛ ndap ca a? M ce suŋ wèe nè mini-ŋwɛ̀ enɛ lùr mò' be cu nje Ndap Nyʉ̀ ca ka'. A be kɛ̀ɛshi vi wɛɛwɛ.”
3E du a cu mbe rtùu Olèf, ŋgǎa yɛ'ni yì buu a du a yɛ ye, a ku ba a wowèe mbo cà'cà'. Wowèe a laa nè ye enɛ̂, “Suŋ wèr nfè' ce buu ca vi be koni. Yuu ce yi be dùŋshi enɛ à ce vʉ̀, ŋgòŋ yi ce mì foŋ yu kɛ?” 4Jisòs à beesì a laa nè wowèe enɛ̂, “Wèe lor nfè' fà dì' ŋwɛ̀ mò' bo' wèe ka'. 5Bèe magòr a be vʉ̀ a mɛ̌ rlii ce làa enɛ̂, ‘A mɛ̀ Krǎis anà’, bo' bèe magòr tɛ a da'. 6Wèe be yu' enɛ a ce mà' bìr, kèr yu' à mŋoo enɛ a ce mà' bìr à bdì' mo' foŋ. Wèe ka' yu' wa'a, mlù mi fa koo wèe ka'. Buu ca vi be kù koni, vi koni wa'a, yi ke' ba ba enɛ nfè' ce ŋgòŋ yi be mì à ghɛɛ ka'. 7To' yi be mà' bìr a to' mo', ŋkʉʉ ma' bìr a ŋkʉʉ mò'. Njè be koo, tɛ ŋgòŋ yi ci'ti à bdì' jɛɛ jɛ̀ɛ jɛɛ. 8Buu ca be ba nè bèe àmbò à nfè' ce njeŋwɛ̀ e ke kɛ̀' ce luuti muu nà. 9A be koo wèe fa mbe mmbo bèe mo' tɛ a fa wèe ŋgɛ', yʉshi wèe. Bèe wɛɛwɛ a be bàa wèe njo' mɛ̀. 10Bèe magòr a be kʉti njìnjì, bàa wap btu, fyèni wap btu, 11tɛ bèe ce a ce nya' mnde' enɛ wowèe a yu ŋgǎa ncep ntuu Nyʉ̀ a nyɛɛ, bo' bèe magòr tɛ a da'. 12Buu bbebep vi be kù' gòr, tɛ rkòŋnì bèe magòr li wɛnî. 13Ŋwɛ̀ ce e ka' ku tɛɛ tatap du ba' à lʉ̀simbùu banɛ ŋgàŋ be lùŋ. 14A be fè'shi Nsuŋ Mbòŋmboŋ àmbò kʉʉ Nyʉ̀ ca à ŋgòŋ wɛɛwɛ tɛ bto' wɛɛwɛ a yu', tɛ ŋgòŋ yi ka' mì.
15“Banɛ wèe ka' ke yɛ yuu bsàrbuu ce yi bepsi Ndap Nyʉ̀ e tɛɛ mbòmmbo ce Danìyɛ̀l ce e m ba ŋwɛ̀ ncep ntuu Nyʉ̀ à m làa àmbò yi nà, àmbò yi tɛɛ mbe dǐ' rara embe Ndàp Nyʉ̀ (Ŋwɛ̀ ce e ce bè' ŋwà' ca rîŋ), 16banɛ bèe ce a yu à ŋgǒŋ Jùdiyà a caŋ duse à mtùu. 17Ŋwɛ̀ ce e ka' ba mbe tu-ndap, ŋgàŋ fa kèr sùu embo à rlòr yì buu embe yě ndap ka' caŋ ka'. 18Ŋwɛ̀ ce e ka' ba à mŋkʉ̀, ŋgàŋ fa kèr kʉti à rlòr yi cɛ̀' ka' caŋ ka'. 19Be ba à mnòŋ anà tɛ mlù mi koo bbyèŋge ce a yu nè mmbʉ̀, ba bbyèŋge ce a ce nyoŋsi boo. 20Loo nè enɛ wèe fa caŋse à cùu saa kɛ̀ nyʉ̀ mmbomntaa Nyʉ̀ ka'. 21Be ba à nfè' anà tɛ ŋgɛ' ba gòr sê, ba ba njɛ̀ɛ ŋgɛ' ce e m be ba ka', kɛ̌' à nfè' ce Nyʉ̀ à m gèe ŋgòŋ, ba' sè'ni na, tɛ ŋgɛ' mò' ke ba wa' ka'. 22Nyʉ̀ à m gèe nfè' ŋgɛ' e ba nlʉ̀'shi. E m tɛ bà gèe wa' ka', mbʉ̀ ŋwɛ̀ à m ba lùŋ ka'. Nyʉ̀ à m gèe e ba nlʉ̀'shi wa'a njobè' yì bèe ce e m ce.
23“Ŋwɛ̀ à ka' ke laa nè wèe à nfè' anà enɛ̂, ‘Yɛ̂, a Krǎis anà’ na, kɛ̀ enɛ ‘A ye nà’, wèe fa byemi ka'. 24Bèe ce a be bo'shi enɛ a wowèe Krâis, kɛ̀ enɛ a wowèe ŋgǎa ncep ntuu Nyʉ̀, a be nyɛɛ, dùŋshi mncòo, gèe buu bghagha' ce bèe a bɛ̂ɛ, enɛ njì yi ka' ba tɛ wowèe a bo bo' ka' nè bèe ce Nyʉ̀ à m ce nà-ŋwɛ̀. 25Yɛ̂, mɛ̀ suŋ wèe buu ca tɛ nfè' ka' ghɛɛ. 26Banɛ wowèe a ka' laa nè wèe enɛ̂, ‘Yɛ̂, e yu à ntee rìŋ’, wèe fa dù àfo ka'. Wowèe a ka' laa enɛ̂, ‘Yɛ̂, e yu mbà mʉ̀ ndap’, wèe fa byemi ka'. 27Àmbò mbèŋ e ke bàp ekù mbùuntii ŋgòŋ yi raa ba' mbà mbùuntii nà, a mbò Muu Ŋwɛ̀ be vʉ̀ à njɛ̌ɛ wa'a. 28E ke ba fàdì' ce gʉ̌ʉ yuu yi yu, banɛ bjìkaawà vi be kaari àfo.
29“Ŋgɛ' à mnòŋ anà be càa tɛ nfè' tuuse ka', tɛ nyʉ̀ liiti, tɛ ŋwɛɛ yi ker saŋ ka', tɛ mkàŋsì mi gweŋger embe bùu, tɛ buu ŋger embe bùu ci'tî. 30Vi cì'ti wa'a, tɛ ncòo ce e ce dùŋshi enɛ Muu Ŋwɛ̀ ce vʉ̀ yɛɛti mbe bùu tɛ bto' enjep ŋgòŋ na wɛɛwɛ vi warse. Wowèe a be yɛ Muu Ŋwɛ̀ àmbò e ce vʉ̀ mbe mʉ̀ mmbà' embe bùu nè ŋger-ŋwɛ̀, ker ba nè ku' fòo-ŋwɛ̀. 31Ma rsòŋ li be làa, tɛ e tuu vi bcìndap à mmbuu ŋgòŋ kyèe tɛ wowèe a baashi yì bèe ce e m ce efa bdì' wɛɛwɛ.
32“Yɛ'ni nè yuu efa ce fîk. E ke bà' à nfè' ce yi ka' karŋger, top, wèe riŋ weenɛ nfè' mbèŋ yu àtʉtʉ. 33Banɛ wee wèe ka' ke yɛ buu ca ce koni, wèe riŋ weenɛ nfè' anà yu àtʉtʉ sê. 34M ce suŋ wèe nè mini-ŋwɛ̀ enɛ ŋgʉ̀ bèe e sè'ni be kweŋger wɛɛ tɛ buu ca ka' ba ka'. 35Rbuu ba nshe a be kèe mì, geewa'a wa blàa vi be kèe mì à nfè' mò' ka'.
36“À ka' ba àmbò nòŋ ba nfè' ce buu ca vi be koni, ŋwɛ̀ mò' rìŋ ka', ka' bcìndap Nyʉ̀, kɛ̀ Muu Nyʉ̀ ɛ̀. Ŋwɛ̀ ce e rìŋ, ku ba ba Tàr cà'cà'. 37Nfè' ce Muu Ŋwɛ̀ be vʉ̀, be ba àmbò nfè' yì Nowa à m ba nà. 38Tɛ nfè' ce mbèŋ à m gwè mdip mi ruu a cete ŋgòŋ nà ka' ghɛɛ, bèe a m ce ye buu, a ce no buu, bbyèŋge a ce dù bgùu, mmbaŋrù a ce lòr bbyèŋge, a ku ce gèe wa'a caar a ba' nyʉ̀ ce Nowa à m niŋ mbe keŋ ŋgòr. 39Wowèe a riŋ yuu ce yi be koni ka', caar mdip mi ruu à ŋgòŋ, a yʉshi wowèe wɛɛwɛ. A mbò yi be ba wa'a, à nfè' ce Muu Ŋwɛ̀ ce vʉ̀. 40Mmbaŋrù à baa a be ba à mŋkʉ̀, tɛ a lor mò', mà'shi mò'. 41Bbyèŋge a baa a be ce gò' baa, tɛ a lor mò', mà'shi mò'. 42Banɛ wèe ce ke'ni wee btu njobè' wèe rìŋ nòŋ ce yè Tata be vʉ̀ ka'. 43Rìŋ nè enɛ ŋwɛ̀ ndap à ka' ba riŋ nfè' ce nyɛ̀ɛ be vʉ̀ nètʉ' yɛ̀ɛ yì buu, e ba ce kè'se, kè' mà'shi tɛ nyɛ̀ɛ kep yì ndap ka'. 44Banɛ wee wèe à ba tami nyor njobè' Muu Ŋwɛ̀ be vʉ̀ à nfè' ce wèe ce kwà'shi enɛ e be vʉ̀ ka'.
45“Ŋwɛ̀ rfà' ce e yu ŋwɛ̌ mini, a ba ŋwɛ̀ bfee foŋ yu nda? Mbò yu ŋwɛ̀ ce yì masà be lɛ̀ yì ndap enɛ e ce fyɛ', ce fa byee nè yi ŋgǎa mfà' mo' njep nfè' a? 46Rbǒŋtu li be ba nè ŋwɛ̀ rfà' ce yì masà à ka' kʉti, yɛ àmbò e ce gèe li rfà' à njɛ̌ɛ wa'a. 47M ce suŋ wèe nè mini-ŋwɛ̀ enɛ masà anà be fa yì buu wɛɛwɛ mbe yě mmbò. 48Ka' ba enɛ ŋwɛ̀ rfà' anà yu ŋwɛ̌ mbembep, laa nè yì nyor enɛ̂, ‘Yi be lòr nfè' sê, tɛ yà masà ka' vʉ̀’, 49kɛ' ce lìp ŋgǎa mfà' mo', ce yeŋger, ce noŋger a no ŋkoo wèe, 50banɛ yì masà be vʉ̀ à nǒŋ mo', à nfè' ce e ba riŋ ka', 51gwàte ye à btete à btete, fa ye dì' ba à mʉ̀ bèe ce a yu ŋgǎa bo' wap btu. Bèe a be ce warse ce kʉr msòŋ àfo.
Nke Ahọpụtara Ugbu A:
Ñwaè' Matïìyoè 24: LNT
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Limbum New Testament © Bible Society of Cameroon, 2003.