Ñwaè' Matïìyoè 21
21
1Wowèe a ka' vʉ̀ bà' àtʉtʉ rla' Jɛ̀rusalɛ̀m, ba sè'ni ba à rla' Bɛtɛfɛ̀ ce li m ba àgee rtùu Olèf. Jisòs à tuu ŋgǎa yɛ'ni yì buu bèe a mmbaa, 2a laa nè wowèe enɛ̂, “Dù nè nje rla' enje wěe cùu na. Wèe be bà' njo tɛ wèe ku yɛ àmbò a cʉʉ jàaki', muu à tɛɛ àgee mo. Fyɛ̀ɛ nè vʉ àgho fa nè mɛ̀. 3Ŋwɛ̀ mò' à ka' laa yuu mo' nè wèe, wèe suŋ ye enɛ̂, ‘Tata ce tà' gèe yuu àgho,’ tɛ e ku mà'shi tɛ wèe vʉ àgho.”
4Ca yi m koni wa'a, tɛ yuu ce Nyʉ̀ à m làa njì enjep yì ŋwɛ̀ ncep ntuu yi bo ghɛɛte njo. 5E m làa enɛ̂,
“Suŋ nè běe à rla' Sayòn enɛ̂,
‘Yɛ̂, yè ŋkʉʉ ce vʉ̀ à ryɛ wèe,
a ba nè rbornì-ŋwɛ̀, a cu mbendù muu jàaki'.’ ”
6Ŋgǎa yɛ'ni buu Jisòs, a dû, a gee yuu ce Jisòs à m làa nè wowèe. 7Wowèe a m vʉ̀ nè jàaki', ba muu, a co'ni bcɛ̀' a laashi mbendù mo, Jisòs à ko' a cu mbo. 8Ku' bèe magòr se a laashì bcɛ̀' njep nduunjì, bèe mo' a gwar mnta' ce, a laashi njo. 9Ku' bèe ce a m ce dù entombì, ker ba ku' bèe ce a m ce vʉ̀ embe yě njì, a kɛ' a ce yòp enɛ̂, “Sèe ku'si Muu Dɛvìd! Nyʉ̀ ghoni ŋwɛ̀ ce e vʉ̀ à rlii Tatâ! Sèe ku'si Nyʉ̀ embe bùu!”
10Jisòs à ka' niŋ à rla' Jɛ̀rusalɛ̀m, rla' wɛɛwɛ li ci'tì, bèe a ce bipshi enɛ̂, “Ŋwɛ̀ ca yu nda?” 11Bèe ce a wowèe a m ba nà a beesì enɛ̂, “Ŋwɛ̀ ca yu Jisòs, ŋwɛ̀ ncep ntuu Nyʉ̀ ce à rla' Nasarɛ̌t à ŋgǒŋ Galèlê.”
12Jisòs à m niŋ mbe Ndàp Nyʉ̀ a juu bèe wɛɛwɛ ce a m ce fyèni buu, ba bèe ce a m ce yuu buu mbo, a bute btɛbùr ese bèe ce a m ce kupse mbàa, a bute mnta' ese bèe ce a m ce fyèni bbèŋ. 13E m làa nè wowèe enɛ̂, “A saŋ mbe Ŋwǎ' Nyʉ̀ enɛ̂, ‘A be too yà ndap enɛ ndap rloo.’ Ka' yi yu wa'a, wèe à gèe yà ndap à kʉtì ba à mbʉ̀' byɛ̀ɛ.”
14Bèe ce a m ba mnfèp, ba bèe ce a m ba mntɛ̀ŋ a m vʉ̀ a yɛ ye mbe Ndàp Nyʉ̀ anà, e gee wowèe a lûŋ. 15Běe bgòrgòr efa mʉ̀ ŋgǎa taŋshi taŋshì, ba ŋgǎa ryɛ'ni mncir, a ka' yɛ buu bbɛ̀ɛ ce e m gèe na, kèr yu' àmbò bghàrbèe a ce yòp mbe Ndàp Nyʉ̀ enɛ̂, “Sèe ku'si Muu Dɛvìd”, ntee yi yaŋ wowèe sê. 16Wowèe a laa nè ye enɛ̂, “À ce yu' yuu ce boo ca a ce yòp a?” Jisòs à beesì enɛ̂, “Ɛ̀no, àmbò wèe à be be' dì' mo' embe Ŋwǎ' Nyʉ̀ ce yi ce làa enɛ̂, ‘Wèe à yɛ'ni bghàrbèe, ba boo ce a bii nyoŋ mmbee, wowèe a ce kù'si Nyʉ̀ bòŋboŋ se’ nà a?” 17E ma'shì wowèe a fʉʉ efa rla' Jɛ̀rusalɛ̀m a du à rla' Bɛtanì, a noŋ àfo.
18À ka' ba à mʉ ŋgàptʉ', e ka' nàti ce kʉti à rla' Jɛ̀rusalɛ̀m, njè à ce yaŋ ye. 19E m yɛ ce fik àwǎa nduunjì, a du a fyɛ' mbo, a yɛ yuu mo' mbo caa efa bfù cà'cà' ka'. E laa nè yi enɛ̂, “Àde' à ke yʉ mbàŋ à nfè' mò' ka'.” Ce fik anà yi ku yopri. 20Ŋgǎa yɛ'ni yì buu a ka' yɛ wa'a, a bɛɛŋger sê, a laa enɛ̂, “Ce fik ca yi ba yopri cɛrcɛr wa'a ba à njɛ̌ɛ kɛ?” 21Jisòs à beesì a laa nè wowèe enɛ̂, “M ce suŋ wèe nè mini-ŋwɛ̀ enɛ, wèe à ka' byemi ke' ce tarni ka', àde' wèe ku gee ba yuu ce mɛ̀ gèe nè ce fik na cà'cà' ka', àde' wèe ku laa nè rtùu ca foŋ enɛ, ‘Co'ti embo nà du gwe njep rdip rgòr’, yi ku ba wa'a. 22Wèe à ka' byemi, banɛ wèe be koni buu wɛɛwɛ ce wèe à ka' bipshi nè Nyʉ̀ à rloo.”
23E ka' bà' à rla' Jɛ̀rusalɛ̀m a niŋ mbe Ndàp Nyʉ̀, a ce yɛ'ni bèe mbo. Běe bgòrgòr efa mʉ̀ ŋgǎa taŋshi taŋshì, ba bleebèe, a vʉ a yɛ ye, a bipshi nè ye enɛ̂, “Ŋger ce à ce gèe buu ca àgho yi lò efɛ, ŋwɛ̀ ce e fa wɛ̀ ŋger ca à fa nda?” 24Jisòs à beesì a laa nè wowèe enɛ̂, “M be bipshi yuu mo' nè wèe foŋ. Wèe à ka' beesî, banɛ m be suŋ wèe ŋwɛ̀ ce e fa mɛ̀ ŋger à rgèe buu ca. 25Ŋger ce Jǒn à m tʉr à rbàptir bèe nà yi m lò ba efɛ? Yi m lò ba ese Nyʉ̀ kɛ̀ ese bèe?” Wowèe a du mcʉ̀, a seesi a laa enɛ̂, “Sèe à ka' laa seenɛ̂, yi ŋger anà yi m lò ese Nyʉ̀, banɛ e be bipshi nè sèe enɛ̂, ‘Wèe à m ka' ba byemi yuu ce e m làa ka' njokɛ?’ 26Sèe ka' laa ba seenɛ̂, ‘Yi m lò ese ŋwɛ̀’, banɛ bèe a be bàa sèe njobè' bèe wɛɛwɛ a byemi enɛ Jǒn à m ba ŋwɛ̀ ncep ntuu Nyʉ̀.” 27Wowèe a kʉtì a laa nè Jisòs enɛ̂, “Wèr rìŋ ka'.” E laa nè wowèe enɛ̂, “Banɛ mɛ mɛ̀ be suŋ wèe ŋwɛ̀ ce e fa mɛ̀ ŋger à rgèe buu ca ka'.
28“Wèe ce kwà'shi wee kɛ àmbò ca? Ŋwɛ̀ mò' à m tʉr boo a baa. E m dù, a yɛ ŋwɛ̌ nlee a laa nè ye enɛ̂, ‘Muu wà, dù fa' nsuu ntìni.’ 29E beesì a laa enɛ̂, ‘Yà tâ, m be dù ka',’ a ka' làa wa'a, a ker lo a kwa'shi a kupse yi ntee, a dû. 30E du a yɛ ŋwɛ̀ embenjì ŋwɛ̌ nlee, a laa yuu ce e ba laa nè ŋwɛ̌ nlee nà nè ye. E beesì a laa enɛ̂, ‘M be dù.’ A ka' làa wa'a, a du ka'. 31Banɛ ŋwɛ̀ efa boo a baa ca ce e m gèe yuu ce yì ta à m kòŋ à m ba nda?” Wowèe a beesì enɛ̂, “Muu nlee.” Jisòs à laa nè wowèe enɛ̂, “M ce suŋ wèe nè mini-ŋwɛ̀ enɛ ŋgǎa ŋkùu mbǎa bàrà' ba bkwàrà a ce dù mbe dǐ' kʉʉ Nyʉ̀ entombì nè wèe. 32Jǒn à m vʉ̀ a yɛ wèe a ce dùŋshi wèe nduunjǐ yɛɛnì, wèe à byemì yuu ce e m ce làa ka', ŋgǎa ŋkùu mbǎa bàrà' ba bkwàrà, a byemì yap yu. Wèe à ka' yɛ wa'a, a ke' kupse, byemi ka'.
33“Yu' nè ŋgàa mò'. Ŋwɛ̀ mò' à m fà' yi nsuu, a bye njɛ̀ɛ msini ce a ke gèe mrù' àgho mbo, a bee ŋka' a sir nsuu anà àgho, a tuŋ dì' ce a bo gèe mrù' mbo a boo tà'tà' mbo foŋ. E ka' gèe wa' wɛɛ, a lɛ nsuu anà nè bèe mo', a du à mbè. 34Nfè' ce a ke tee msini anà à ka' ghɛɛ, e tuu yi ŋgǎa mfà' enɛ a du yɛ bèe ce e m lɛ̀ nsuu nè wowèe nà, koo msini mi. 35Bèe anà a koo ŋgǎa mfà' anà a lip mò' a yʉ mò', a tʉʉshi mò' nè blùr. 36E ker tuu ŋgǎa mfà' mo' àŋgoo a caa bèe ce e m tuu entombì nà, bèe anà a koo wowèe a ku gee nè wowèe àmbò a m gèe nè ŋgǎa mfà' ce entombì nà. 37E lo a tuu muu yì à lʉ̀simbùu, a laa enɛ̂, ‘Wowèe a be yu'ni nè muu wà.’ 38Bèe anà a ka' yɛ muu anà, a laa a wǎp mʉ enɛ̂, ‘A ŋwɛ̀ ce e be ye bti' na, vʉ̀ nè tɛ sèe yʉ ye, ye vi bti' anà.’ 39Wowèe a koo ye, a fʉr embe mʉ̀ nsuu, a yʉ. 40Banɛ ŋwɛ̀ nsuu à ka' kʉti, e gee ekɛ nè bèe ce e m lɛ̀ nsuu nè wowèe anà?” 41Wowèe a beesì enɛ̂, “E be yʉshi běe bbebep ca à njǐ mbembep sê, lɛ̀ yi nsuu anà nè běe jɛɛ ce nfè' ce a ke tee msini à ka' ghɛɛ tɛ wowèe a bo tee mi fa nè ye.” 42Jisòs à laa nè wowèe enɛ̂, “Mbò wèe à be be' mbe Ŋwǎ' Nyʉ̀ enɛ̂,
‘Lùr ce ŋgǎa mboo mndap a m mà',
à m kʉti ba lùr rbuu ndap’ a?
‘Ca à m gèe Tata Nyʉ̀,
à ba yuu bɛ̀ɛ nè sèe.’
43Banɛ m ce suŋ wèe enɛ a be koo kʉʉ Nyʉ̀ ese wèe, fa nè to' ce yi be gèe ndèe kʉʉ anà. 44[Ŋwɛ̀ ce e ka' gwe mbendù lùr ca, banɛ ŋgàŋ be ceeŋger à btete à btete. Ŋwɛ̀ ce lùr ca à ka' gwe ba mbe yě ndù, banɛ e be bʉ'shi ye.]”
45Běe bgòrgòr efa mʉ̀ ŋgǎa taŋshi taŋshì ba bèe Farìsi a ka' yu' mŋgàa ce e mà', a riŋ enɛ e mà' mŋgàa anà ba àmbò wowèe. 46Wowèe a m ce ròo à rkoo ye, a ce wɛp bèe njobè' bèe a m byemi enɛ e yu ŋwɛ̀ ncep ntuu Nyʉ̀.
Nke Ahọpụtara Ugbu A:
Ñwaè' Matïìyoè 21: LNT
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Limbum New Testament © Bible Society of Cameroon, 2003.