Ñwaè' Matïìyoè 22
22
1Jisòs à m ker laa buu nè wowèe à mŋgàa. E m làa enɛ̂, 2“Kʉʉ Nyʉ̀ yi yu àmbò ŋkʉʉ ce e m gèe ŋkǎ' bgùu nè muu yì. 3E m tuu yi ŋgǎa mfà' enɛ a du laa nè bèe ce a m be à ŋkà' anà enɛ wowèe a vʉ̂. A ka' dù làa, wowèe a kanì efa rvʉ̀. 4E ker tuu ŋgǎa mfà' mò', a laa nè wowèe enɛ̂, ‘Dù nè suŋ bèe ce mɛ̀ be nà enɛ mɛ̀ fɛ̀r buu ŋkà' wɛɛ. Mɛ̀ shɛshi ya nà', ba ya njèe ce yi kù'ŋger a ce foo, a fɛr buu ŋkà' a misî. Wowèe a vʉ lɛ ŋkǎ' bgùu ca.’ 5Wowèe a ka' dù cep, bèe anà a lor yap yu ntuu anà àtɛ̀r, a du ba à rgèe yàp ntà'tè, bèe mo' à du à mŋkʉ̀, bèe mo' a du à rkap yàp ntaa. 6Bɛr bèe ce a m be nà, a koo ŋgǎa mfà' anà, a fa ŋgɛ' nè wowèe, a yʉshi wowèe. 7Ntee yi yaŋ ŋkʉʉ sê, e tuu vi bsoogɛ̀, wowèe a du a yʉshi bèe ce a m yʉshi yi ŋgǎa mfà' nà, a too lap rla'. 8A ka' gèe wa' wɛɛ, e laa nè yi ŋgǎa mfà' enɛ̂, ‘Mɛ̀ fɛ̀r buu ŋkà' a misî, bèe ce mɛ̀ be a ghɛɛtè à bèe ce a ba vʉ̀ ŋkà' anà ka'. 9Dù nè à btase, be ŋwɛ̀ wɛɛwɛ ce wèe à ka' yɛ.’ 10Ŋgǎa mfà' anà a fʉʉ a jɛr à mnduunjì, a vʉ nè bèe wɛɛwɛ ce a m yɛ. Wowèe a m vʉ̀ nè běe bbebep, ba běe bbòŋboŋ, ndap ŋkà' à ruu nè bèe.
11“Ŋkʉʉ à ka' niŋ mbe ndàp à ryɛ ŋgǎa ŋkà' ce e m be nà, a yɛ ŋwɛ̀ mò' mbo ce e m yar cɛ̀' ŋkà' ka'. 12E laa nè ye enɛ̂, ‘Ŋkarà, wɛ̀ yar cɛ̀' ŋkà' ka', a gee wɛkɛ a ka' niŋ tǎa?’ Ŋwɛ̀ anà à tʉr yuu làa ka'. 13Ŋkʉʉ à laa nè yi ŋgǎa mfà' enɛ̂, ‘Kur nè ye mkoo ba mkùu ma' à dì' ce ku ba ba tʉ̀'nji. Bèe a be kèe ce warse ce kʉr msòŋ àfo.’ 14Yi yu enɛ Nyʉ̀ à kɛ' bèe magòr, a ce ce ba bèe mʉcàr.”
15Bèe Farìsi a m nàti a du a cu mcʉ̀ àmbò a be gèe tɛ Jisòs ka' fàa nlàa. 16Wowèe a tuu ŋgǎa yɛ'ni yàp buu, ker ba bèe mo' efa mʉ̀ bèe vi Hɛròd enɛ wowèe a du laa enɛ̂, “Ŋwɛ̀ ryɛ'nì, wèr rìŋ wernɛ à yu ŋwɛ̀ mini, a ce yɛ'ni bèe mnduunjì Nyʉ̀ nè mini-ŋwɛ̀. Wɛ ke lòr ŋwɛ̀ mò' jɛɛ ka'. 17Suŋ ka wèr yuu ce à ce kwà'shi. Ncir yi byemi enɛ sèe ma' mbǎa bàrà' nè ŋkwe Rum kɛ̀ sèe ma' ka'?” 18Jisòs à m rìŋ yuu ce wowèe a m tʉr à mbʉ̀, a laa enɛ̂, “Wèe ce wèe yu ŋgǎa mbo'ni, wèe ce mòoshi mɛ̀ njokɛ? 19Nàa nè mbʉ̀ mbàa ce a ke mà' mbǎa bàrà' àgho.” Wowèe a vʉ nè mbʉ̀ mbàa, a fa nè ye. 20E laa nè wowèe enɛ̂, “Tu ŋwɛ̀ embo a yǐ nda, rlii ce a saŋ mbo à ba li nda?” 21Wowèe a beesì enɛ̂, “Tu embo a yǐ ŋkwe Rûm, rlii embo à ba li foŋ.” E laa nè wowèe enɛ̂, “Banɛ wèe fa buu ŋkʉʉ nè ŋkʉʉ, fa vǐ Nyʉ̀ nè Nyʉ̀.” 22Wowèe a ka' yu' wa'a, a bɛɛŋger sê, a ma'shi ye, a duse.
23Bèe Sadùsi ce a ce kani enɛ àde' ŋwɛ̀ kwe ker fʉʉ efa rkwe ka' nà, a vʉ a yɛ ye nyʉ̀ anà, a bipshi nè ye enɛ̂, 24“Ŋwɛ̀ ryɛ'nì, Musìs à m làa enɛ ŋwɛ̀ à ka' lor ŋgwa, a ye a bi boo ka', ŋgàŋ kwe, banɛ nfʉr yì be laasi ye, tɛ a ye a bi boo nè nfʉr yì ce e kwe anà. 25Bfʉr mo' ce wèr wowèe à m ce cu, a m ba bèe nsàambâ. Ŋwɛ̌ nlee à lòr ŋgwa, a kwe, a bi boo a ye ka', a ma'shi ŋgwa nè nfʉr yì. 26Yuu ce yi m koni ŋwɛ̌ nlee nà, yi m koni nè ŋwɛ̀ embe yě njì, a koni nè ŋwɛ̀ embe njì ŋwɛ̀ embe yě njì, a caasi mò' efa bfʉr bèe nsàamba anà ka'. 27À ka' ba à lʉ̀èsimbùu, njeŋwɛ̀ ca ye ye à kwe. 28Banɛ be kèe ba à nfè' ce bèe a fʉʉ efa rkwe, tɛ njeŋwɛ̀ ca ba ŋgwa nda, àmbò yi yu enɛ bfʉr bèe nsàamba ca wɛɛwɛ a m ba bduu vi nà?” 29Jisòs à beesì a laa nè wowèe enɛ̂, “Wèe ce làa wa'a, a ce fàa fàa njobè' wèe rìŋ yuu ce Ŋwǎ' Nyʉ̀ yi ce làa ka', a riŋ ŋger Nyʉ̀ foŋ ka'. 30Be kèe ba à nfè' ce bèe a fʉʉ efa rkwe tɛ bèe a ker lòr bbyèŋge, kɛ̀ gùusi boo ka'. Bèe a be kèe ba àmbò bcìndap Nyʉ̀ embe bùu. 31À ka' ba àmbò rfʉʉ ce bèe ce a kweŋger a be kèe fʉʉ efa rkwe, mbò wèe à be be' yuu ce Nyʉ̀ à m làa nè wèe a? E m làa enɛ̂, 32‘A mɛ̀ Nyʉ̀ Abràhâm, a ba Nyʉ̀ Aisìk, a ker ba Nyʉ̀ Jakòp.’ E yu Nyʉ̀ bgʉ̌ʉ bèe ka', e yu ba Nyʉ̀ bèe ce a cu btèe.” 33Bèe a ka' yu' wa'a, a bɛɛŋger à ryɛ'nì ce e m yɛ'ni anà sê.
34Bèe Farìsi a ka' yu' enɛ Jisòs à cipsi cùu ese bèe Sadùsî, wowèe a kuu nyor a vʉ a yɛ ye. 35Mò' efa wowèe ce e m rìŋ mncir sê, à mooshì ye, a bipshi nè ye enɛ̂, 36“Ŋwɛ̀ ryɛ'nì, ncir ce yi càa mncir wɛɛwɛ embe ŋwà' mncir yu yǐ fɛ?” 37Jisòs à beesì a laa nè ye enɛ̂, “Kòŋ Tata ce e yu yò Nyʉ̀ nè yo ntee-ŋwɛ̀, ba nè lo ryòŋ-ŋwɛ̀, ker ba nè wo bfee-ŋwɛ̀. 38Ncir ca yu ncir ce gòr, à ba ncir ce entombì. 39Ncir yì embenjì mo yi yu àmbò yi foŋ. Yi yu enɛ̂, ‘Kòŋ nfʉrò àmbò à kòŋ yò nyor.’ 40Buu wɛɛwɛ ce a saŋ mbe ŋwà' mncir ba mbe mŋwà' ŋgǎa ncep ntuu Nyʉ̀, vi tɛɛ ba mbendù mncir bbaa ca.”
41Bèe Farìsi a ka' ce vʉ̀ àbee, Jisòs à bipshì nè wowèe enɛ̂, 42“Wèe ce kwà'shi wee kɛ àmbò Krǎis anà? E yu muu nda?” Wowèe a beesì enɛ̂, “E yu muu Dɛvìd.” 43E laa nè wowèe enɛ̂, “Yi ka' ba yi kɛ ce enɛ Yʉ' Nyʉ̀ yi m gèe Dɛvìd à too ye enɛ Tatâ? E m làa enɛ̂,
44‘Tata Nyʉ̀ à m làa nè Tata yà enɛ̂,
“Cu à la rkoo mà'
caar tɛ m gee tɛ à tɛr mo mkùu mbendù bèe ce a bàa wɛ̀.”’
45Dɛvìd à ka' too ye enɛ Tatâ, banɛ àde' e ker ba muu yì à njɛ̌ɛ kɛ?” 46Ŋwɛ̀ mò' à tʉr yuu mo' à rbèesi nè ye ka'. Kɛ' e nyʉ̀ anà, ŋwɛ̀ mò' à ker tʉr cùu à rbipshi yuu mo' nè ye ka'.
Nke Ahọpụtara Ugbu A:
Ñwaè' Matïìyoè 22: LNT
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Limbum New Testament © Bible Society of Cameroon, 2003.