Ñwaè' Matïìyoè 20
20
1“Kʉʉ Nyʉ̀ yi yu àmbò ŋwɛ̀ mò' ce e m fʉʉ à mʉ ŋgàptʉ' mò' a du a ròo bèe tɛ a bo fà' yi nsuu. 2A wowèe a m kapni ntaa rfà', a byemì enɛ e be là' wowèe mbʉ̀ mbàa à nòŋ, e tuu wowèe enɛ a du fa' yi nsuu. 3À ka' ba àmbò nyʉ̀ bʉ̀'ʉ wa'a, e ker fʉʉ a dû, a yɛ bèe mo' a tɛɛtè à ntaa, a tʉr yuu gèe ka', 4e laa nè wowèe enɛ̂, ‘Dù nè foŋ du fa' ya nsuu tɛ m la' wèe à ntaa yɛɛnì.’ 5E ka' làa wa'a, wowèe a dû. À ka' ba à nyʉ̀ ncòp-baa ker ba à nyʉ̀ taar, e ker dû, a yɛ bèe mo', a ker laa nè wowèe wa'a. 6À ka' ba àmbò à nyʉ̀ ta wa'a, e ker fʉʉ a dû, a ker yɛ bèe mo' àmbò a tɛɛte à ntaa, e laa nè wowèe enɛ̂, ‘Wèe ku tɛɛte mbena, nyʉ̀ à ce coo, a ce gèe yuu ka' njokɛ?’ 7Wowèe a beesì enɛ̂, ‘Ŋwɛ̀ mò' à lòr wèr à rfà' ka'.’ E laa nè wowèe enɛ̂, ‘Dù nè foŋ du fa' ya nsuu.’ 8À ka' ba à mbùuŋkùr, ŋwɛ̀ nsuu à laa nè yì ŋwɛ̀ rfà' ce e m ba tu nè ŋgǎa mfà' enɛ̂, ‘Kɛ' ŋgǎa mfà', la' wowèe. Kɛ̀' la' bèe ce mɛ̀ ba lor elʉ̀simbùu nà, ka' la' bɛr bèe, misi nè bèe ce mɛ̀ ba lor entombì nà.’ 9Bèe ce a m lòr wowèe à rfà' àmbò à nyʉ̀ ta nà, a vʉ̂, a la' ŋwɛ̀ wɛɛwɛ mbʉ̀ mbàa. 10Bèe ce a m lòr wowèe à rfà' entombì nà, a ka' vʉ̀, a ce kwà'shi enɛ a be là' wowèe gòr càa bèe wɛɛwɛ, a ku la' wowèe foŋ ba mbʉ̀ mbàa àmbò a m là' bɛr bèe nà. 11Wowèe a ka' koo, a sʉsʉ a kuu ŋwɛ̀ nsuu, 12a laa enɛ̂, ‘Bèe ce wɛ̀ ba lor elʉ̀simbùu nà a ba ku fa' ba à awà mò'sir, wɛ̀ ku la' wèr ce wèr à fà' à nòŋ bìi, nyʉ̀ à too wèr na wèr wowèe yɛɛnì.’ 13E beesì a laa nè mò' efa wowèe enɛ̂, ‘Ŋkarà, mɛ̀ gèe ba yuu mo' bebep nè wɛ̀ ka'. Mbò wɛ̀ ba byemi enɛ à be koo mbʉ̀ mbàa à nòŋ a? 14Koo yo mbàa dû. À kwà'shi ba mɛ̀ à rlà' wèe ŋwɛ̀ ce e ba vʉ rfà' elʉ̀simbùu yɛɛnì. 15Mbò m tʉr ŋger à rgèe yuu ce m ce kòŋ nè ya mbàa a? Kɛ̀ à ce ko'ndoŋ njobè' m yu mmbo-mtoo lɛ̂?’ 16Yi yu enɛ bèe ce a yu entòmbì a be kèe ba elʉ̀simbùu, tɛ bèe ce a yu elʉ̀simbùu a ba entombì.”
17Jisòs à m ce dù à rla' Jɛ̀rusalɛ̀m, a ka' ce dù, a lor ŋgǎa yɛ'ni yì buu ce ncòp-baa-à-rrʉ̀ʉ, a wowèe a lɛ'sì nyor, e laa nè wowèe enɛ̂, 18“Yɛ nè, Sèe ce dù à rla' Jɛ̀rusalɛ̀m, tɛ a du fa Muu Ŋwɛ̀ mbà mmbo běe bgòrgòr efa mʉ̀ ŋgǎa taŋshi taŋshì, ba ŋgǎa ryɛ'ni mncir. Wowèe a be sa' ye, teni enɛ a yʉ ye, 19kèr lòr ye fa ye mbà mmbo bèe enje jɛɛ tɛ wowèe a bo coosi ye, lìp ye nè byɛɛnsò, taa ye mbe kìntaa, mnòŋ vi ba btaar, e fʉʉ efa rkwe.”
20Ma boo vi Sɛbɛ̀di à m vʉ̀ a boo vi wèe, a yɛ Jisòs. E m gwè njep yě tìi, a laa enɛ e gee yuu nè ye. 21Jisòs à laa nè ye enɛ̂, “Wɛ̌ kòŋ enɛ m gee ba kɛ nè wɛ̀?” E beesì enɛ̂, “M ce kòŋ mɛnɛ à laa tɛ mò' efa boo wa ke cu à yo bo mà', tɛ mò' cu à yo bo ŋkòp, à nfè' ce à ce sa' yo kʉʉ.” 22Jisòs à beesì enɛ̂, “Wèe yi yuu ce wèe ce bipshi ka'. Àde' wèe no enjep ndoŋ ce m be no enjo a?” Wowèe a beesì enɛ̂, “Àde' wèr no enjo.” 23E laa nè wowèe enɛ̂, “Wèe be no enjep ndoŋ ce m be no enjo ghup. Ka' yi yu wa'a, mɛ̀ tʉr ŋger à rlàa enɛ ŋwɛ̀ cu a mɛ̌ bo mà' kɛ̀ a mɛ̌ bo ŋkòp ka'. Bdì' anà vi yu ba nè bèe ce yà Ta à m kupshi a lɛ nè wowèe.”
24Bɛr ŋgǎa yɛ'ni yì buu ce bèe nrʉʉ a ka' yu' yuu ce a bipshi na, yi bep wowèe sê. 25Jisòs à kɛ'shì wowèe àbee, a laa enɛ̂, “Wèe rìŋ weenɛ ŋgǎa rsa' bèe enje jɛɛ a ke sa' yap bèe nè ŋger-ŋwɛ̀ sê, běe bgòrgòr mo' a lor yap ŋger, nyʉ' bèe àgho foŋ. 26Njɛ̀ɛ ŋgèe ca yi fa kèe ba fa wěe mʉ ka'. Yi yu ba enɛ ŋwɛ̀ efa wěe mʉ ce e ka' ce kòŋ à rba ŋwɛ̌ ŋgòr, banɛ ŋgàŋ ba ŋwɛ̀ rfà' nè wèe, 27tɛ ŋwɛ̀ ce e ce kòŋ à rba entombì ba ye ŋkwàa. 28Muu Ŋwɛ̀ ye ye à m vʉ̀ enɛ bèe a bo fà' nè ye ka'. E m vʉ̀ yi tɛ e bo fà', kèr fa li ryòŋ, tee bèe magòr efa rkwe.”
29Wowèe a m lǒ à rla' Jɛ̀rikù a ce dù, bèe magòr a ce dù a yě mbùu. 30Ka' cu, mmbaŋrù mo' bèe a mmbaa ce a m ba mnfèp a cu àwǎa nduunjì. A ka' yu' enɛ Jisòs ce càa, wowèe a waa, a laa enɛ̂, “Tatâ, Muu Dɛvìd, koosimnse nè wèr.” 31Bèe cà a lapnì wowèe, a laa enɛ wowèe a cu nyaŋ. Wowèe a ker misi a waa, a laa enɛ̂, “Tatâ, Muu Dɛvìd, koosimnse nè wèr.” 32Jisòs à tɛɛ, a kɛ' wowèe, a laa enɛ̂, “Wèe ce kòŋ weenɛ m gee mɛ kɛ nè wèe?” 33Wowèe a beesì enɛ̂, “Tatâ, wèr ce kòŋ enɛ à gee tɛ wèr yɛ buu.” 34Jisòs à koosimnse nè wowèe, a joo map mmir, wowèe a ku kɛ' a ce yɛ buu, a nati a du a yě mbùu.
Nke Ahọpụtara Ugbu A:
Ñwaè' Matïìyoè 20: LNT
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Limbum New Testament © Bible Society of Cameroon, 2003.