OODEZHECHEGAWINEWAH 19
19
1Kepuhgumme‐ahyahmahgud dush, magwah Apollos keähyaud emuh Corinthing, Paul kahshahbooshkung noonpeming duhzhe duhnuhkewinun kepetuhgwishin emuh Ephesusing, kemekahwaud dush ahnind kekenooähmahgunun,
2Oo‐oo dush keënaud, Kegeöodahpenahwah nuh owh Keche‐Oojechaug uhpe kahdabwayanduhmag? Wenuhwah dush oo‐oo oogeënahwaun, Kah kuhnuhga ningenoonduhsemin cheähyaud Keche‐Oojechaug.
3Oo‐oo dush oogeënaun, Ahneen dush kahezhebaptizoomegooyag? Keëkedoowug dush, John suh oobaptizooëwawin.
4Medush oo‐oo kahekedood owh Paul, John kagate keëzhebaptizooëwa ewh aunwanindezoowine‐baptizooëwawin, keënaud enewh ahnishenahban chedabwayanemahnid enewh kanoopenuhnegoojin, mesuh owh Christ Jesus.
5Uhpe dush oo‐oo kahnoonduhmoowaud, kebaptizooähwug emuh oodezhenekahzoowining owh Tabaningad Jesus.
6Uhpe dush owh Paul kahezheneenjeetuhwaud enewh oogepeöodissegoowaun enewh Keche‐Oojechaugwun; me dush keïnwawaud pakaunukin inwawinun, kuhya keäunwahjegawug.
7Kemetahchedooganug‐ahshe‐neezh kuhkenuh egewh enenewug.
8Kepuhpeendega dush emuh ahnuhmeä‐weguhmigoong, kuhya mezheshuh kekekedoo nesoo‐kezis, wahweenduhmahgad kuhya wahbunduhewad enewh uhyeëen dabandahgwukkin emuh oodoogemahwewining owh Kesha‐Muhnedoo.
9Uhpe dush ahnind kahmushkahwedaäshkahwindwah, kedabwayanduhsigwah dush, kemujje‐duhzhinduhmoowaud dush ewh ezhewabezewin anahsuhme‐ahyahnid enewh ahnishenahban, oogenuhguhnaun, kuhya oogepuhkawenaun enewh kekenooähmahgunun, anduhsoo‐kezhegudenig kekuhgequad emuh ookekenooähmahde‐weguhmigoong pazhik enene Tyrannus azhenekahzood.
10Nezhoo‐kekenoonoowinun oo‐oo kezhewabud; kuhkenuh dush anduhnuhkeejig emuh Asiaïng oogenoondahnahwah oodekedoowin owh Tabaningad Jesus, Jewyug kuhya Greekug.
11Kesha‐Muhnedoo oogeähnookeenun keche‐mahmaundahwejegunun emuh ooneenjening enewh Paulun:
12Ewh dush egoo emuh weyowening keöonjemahjetuhwindah egewh ayahkoosejig enewh mooshwanun kuhya ahkoobezoowinun, me dush kemahjahmahgudenig enewh oodenahpenawinewaun, kuhya dush enewh mujje‐muhnedoon oogesahgejenahwashkahgoowaun.
13Ahnind dush Jewyug pabahsahgedenahjig enewh mujje‐muhnedoon, keënwahzoowug chewahweenduhmoowaud oodoonoozoowin owh Tabaningad Jesus emuh anduhzhe ahyahnid enewh kahkekishkahwahnejin mujje‐muhnedoon, oo‐oo keëkedoowaud, Kekuhkaunzoomegoom oonje owh Jesus enewh dabahjemahjin owh Paul.
14Keähyahwun neezhwahswe oogwissun owh Sceva Jew‐enene, owh nahgahnezid anduhshewaud egewh sahsahgewejega‐wenenewug, oo‐oo kahezhechegajig.
15Owh dush mujje‐muhnedoo oogenuhquatuhwaun oo‐oo keënaud, Ninkekanemah owh Jesus, kuhya ninkekanemah owh Paul; ahwagwanewegwan dush kenuhwah?
16Owh dush enene kakishkahwaud enewh mujje‐muhnedoon oogeqwaushkoonoodahwaun, kuhya oomahmauzheäun kuhya oogeshahgoojeäun, medush emuh wegewauming keöonjeöozhemoonid pingwuhshahgedenid kuhya kemahkeëgoonid.
17Kuhkenuh dush oogekekandahnahwah oo‐oo egewh Jewyug kuhya Greekug kahoodatoojig emuh Ephesusing; kuhkenuh dush kesagezewug, kuhya oodoonoozoowin owh Tabaningad Jesus kekechetwahwanjegahdane.
18Nebewah dush egewh duhyabwayandungig kepeëzhahwug, wahweendahmahgawaud, kuhya kewahbundahewawaud enewh oodezhechegawinewah.
19Nebewah dush egewh kahmekindungig mahmaunjechegawin oogepemahwundoosetoonahwaun oomuzzeneëgunewaun, kuhya kechahgoozahmoowaud emuh anahsuhmuhbenid kuhkenuh enewh enenewun: oogeähgindahnahwah dush ewh anuhgindanig enewh muzzeneëgunun, medush kahezhemikkummoowaud nahnemeduhnuh metauswauk duswahbik shooneäug ahpeetandahgwuddenig.
20Apeeche kekeche‐mahjegemahguk Kesha‐Muhnedoo oodekedoowin kuhya keshahgoojeëwamahguk.
21Kahishquahahyaug oonoo, Paul keënandum emuh oojechaugoong, keshahbooshkung Macedonia kuhya Achaia, cheëzhaud ewede Jerusaleming, oo‐oo keëkekood, Bahnemah keïshquahtahyaun ewede, nenundahwandahgooz chewahbunduhmaun Rome.
22Medush keëzhenanzhahwaud neezh enewh wahdookahgoojin, Timotheusun kuhya Erastusun; ween dush kayahbe wanebik keduhneze emuh Asiaïng.
23Me dush uhpe kekeche‐megooshkahje‐ahyahmahguk ewh ezhetwahwin oonje.
24Pazhik muh enene Demetrius azhenekahzood, shooneähka‐wenene kahoozhetuhmoowaud enewh Dianaün shooneäh ahnuhmeä‐weguhmegoonsun, kahoonje‐keche‐oondezewaud egewh anookeejig;
25Me enewh Demetrius kahmahwunzoomahjin mahmahwe ahnooke‐wenenewun nahsaub kahenuhnookeenejin, oo‐oo dush keëkedood, Enenewedoog, kekekandahnahwah oo‐oo ahnookeewin oonjetebenuhwawezeyung.
26Menuhwah dush kewahbundahnahwah kuhya kenoondahnahwah, kahween atuh Ephesusing, kuhkenuh goo anegookookummegaug Asia, mahbuh Paul oogekushkeäun kuhya oogepukkawenaun nebewah bamahdezenejin, ekedoo chemuhnedoowesigwah wazhechegahzoojig ooneenjemaung:
27Kahween dush atuh nuhneezahnuhsenoon maunduh kedahnookewinenaun chebahnahduk; kuhya dush begoo ookeche‐ahnuhmeä‐weguhmig owh kachetwahwezid muhnedooqua Diana chenishwuhnahdudenig, kuhya chebahnahdudenig, ookechetwahwezewin owh anuhmeätuhwind emuh anegookwaug Asia kuhya anegookookummegaug uhkee.
28Uhpe dush kahnoonduhmoowaud oonoo ekedoowinun, oogemooshkenashkahgoonahwah ewh nishkahdezewin, kepepahgewug dush, oo‐oo keëkedoowaud, Kechetwahweze owh Diana Ephesianug oomuhnedooquamewaun.
29Kekeche‐oombuhzhekummegud emuh keche‐oodanaung: kahtuhkoonahwaud enewh Gaiusun kuhya enewh Aristarchusun, Macedoniaïng duhzhe enenewun, kahweejewahpuneen Paul pabahmahdezid, mahmahwe keähpahedewug emuh mahwunjeëde‐weguhmigoong.
30Uhpe dush Paul keënandung chepeendegad emuh anduhzhe‐ahyahnid enewh muhyahwunjeëdenejin, enewh wejekewaëmaun kahween oogepuhgedenemahgooseen.
31Ahnind dush egewh Asiarchug, kahminwanemahjig Paulun kemejejedwawug chepeendegasenid emuh mahwunjeëde‐weguhmigoong.
32Papukkaun keëkedoowug kekeche‐kezhewawaud: kekeche‐oombuhzhekummegud emuh anduhzhe‐mahwunjeëdenid enenewun? nahwuj kemeshenoowug dush egewh kakanduhsigoog wagoodoogwan wanjemahwunjeëdewahgwan.
33Ahnind dush oogeöonjewekoobenahwaun enewh Alexanderun emuh ahyahnid enewh mahyahwunjeëdenejin, egewh Jewyug keähsahwaud cheguhnoodahmahganid. Alexander dush kewahwahtuhquahegad ewh ooneenj, keënandum dush weguhnoonaud enewh mahyahwunjeëdenejin guhnooduhmahgad.
34Uhpe dush kahkekanemahwaud cheJew‐enenewenid, kuhkenuh mahmahwe kepepahgewug kuhnuhbuj neezhoo‐tebahegunag, oo‐oo keëkedoowaud, Keche‐ahpetandahgooze owh Diana Ephesianug oomuhnedooquamewaun.
35Uhpe dush owh kahoozhebeëga‐wenenewid emuh oodanaung kahpezaunezeäud enewh mahyahwunjeëdenejin, oo‐oo keëkedoo, Kenuhwah Ephesusing duhzhe‐enenewedoog, ahwanan kakanduhsig ewh chebuhmeetahgamahguk Ephesus keche‐oodanah emuh oodahnuhmeä‐weguhmigoong owh kachetwahwezid muhnedooqua Diana, kuhya muzzenene owh Jupiter kahoonjepungeshing?
36Kekanduhmag dush ahweyah kushketoosig cheahgoonwatung oonoo uhyeëen, kedahpezaunuhbeem, kah dush gagoo wuhnishquauj kedahezhechegaseem.
37Kegepeenahwaug oogoo enenewug, kahkemoodesigoog gagoo emuh ahnuhmeä‐weguhmigoong, kah kuhya oogemujje‐duhzhemahsewaun enewh kemuhnedooquamewah.
38Kishpin dush Demetrius kuhya egewh anookeejig wahjewahjig, gagoo weënahmemahwaud ahweyah enenewun duhgoomahgud ewh tebahkoonegawin, kuhya ahyahwug tebahkoonega‐wenenewug: mahnoo tahtebahkoonedewug.
39Kishpin dush pukkaun weëzhekuhgwadwayag, tahenahkoonegahda emuh quuhyuk mahwunjeëdewining.
40Nenuhneezahnezemin muh chekuhgwajemegooyaung oo‐oo noongoom kezheguk azhewabuk, kahween gagoo duhgoosenoon kaëkedooyaung wanje‐kechemegooshkahje-ahyahyag.
41Uhpe dush oo‐oo kahekedood, oogemahjenahzhahwaun enewh kahmahwunjeëdenejin.
Pilihan Saat Ini:
OODEZHECHEGAWINEWAH 19: OTW
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Psalms published by the Canadian Bible Society 1856. New Testament and Pentateuch published by the Society for Promoting Christian Knowledge (SPCK) 1861-1874.
