OODEZHECHEGAWINEWAH 18
18
1Kahishquah‐ahyaugin oonoo Paul keöonjemahjah emuh Athensing, keëzhah dush emuh Corinthing.
2Oogemekahwaun dush pazhik Jew‐enenewun Aquila azhenekahzoonejin, emuh Pontusing kahoondahdezenejin, noomuhyuh emuh Italying kahpeöonjebahnid kuhya enewh wewun Priscilla; (Claudius muh oogeënahbuneen kuhkenuh enewh Jewyun cheöonjemahjahnid emun Romeïng:) mesuh enewh kahnaunzekahwahjin.
3Tatebishkoo keënuhnookenid kahoonjeweedegamaud, keähnookee dush: kepuhpuhgewuhyauneguhmigookawug muh.
4Kekuhgequa emuh ahnuhmeä‐weguhmigoong andussoo‐aunwabe‐kezheguk, chekuhgaunzoomaud enewh Jewyun kuhya Greekun.
5Uhpe dush Silas kuhya Timotheus kahoonjetuhgwishenoowaud ewede Macedoniaïng, Paul kekeche‐aunwahje emuh oojechaugoong, oogedebahjemootahwaun enewh Jewyun ewh Jesus ahwid owh Christ.
6Uhpe dush kahahgoonwatuhmenid, kuhya mujje‐kezhwanid, oogepuhpuhwaginaun oodahgwewin, oo‐oo dush keënaud, Kemisqueemewah tahduhgoomahgud emuh tebenuhwa kishtequaunewaung; nepeeniz suh neen: noongoom dush ningahezhahnug egewh mayuggezejig.
7Ewede dush keöonjesahguhum, kepeendega emuh oowegewauming pazhik enene Justus azhenekahzood, kahbuhmeetuhwaud enewh Kesha‐Muhnedoon, cheguhyeëe kahdaud emuh ahnuhmeä‐weguhmigoong.
8Kuhya dush owh Crispus, kahnegahnezid emuh ahnuhmeä‐weguhmigoong oogedabwayanemaun enewh Tabaninganejin, kuhya kuhkenuh emuh oowegewauming ayahjig; nebewah dush egewh Corinthianug kahnoonduhmoowaud kedabwayanduhmoog, kebaptizooähwug dush.
9Oo‐oo dush keënaud owh Tabaningad enewh Paulun nebah‐tebekudenig emuh enahbunduhmoowining, Kagoo sagezekan, kekedoon dush, kagoo pezaunuhbekan:
10Keweejewin suh, kah dush ahweyah kegahodissegoose chemujje‐doodook; nebewah muh nindahyahwaug nindahnishenahbamug oomah keche‐oodanaung.
11Ningoo‐kekenoonoowin kuhya ningoodwahsoo‐keezis keduhzheka ewede, kekekenooähmahgad ewh oodekedoowin owh Kesha‐Muhnedoo emuh anduhzhe‐ahyahwaud.
12Uhpe dush owh Gallio keöogemahkundung Achaia, egewh Jewyug mahmahwe oogemegahnahwaun enewh Paulun, oogeëzheweenahwaun emuh tebahkoonega‐weguhmigoong,
13Oo‐oo keëkedoowaud, Mahbuh oowekoojeäun enewh enenewun cheëzheähnuhmeätuhwahnid enewh Kesha‐Muhnedoon ewh azhesinsenook tebahkoonegawin.
14Uhpe dush Paul wahkekedood, Gallio oogeënaun enewh Jewyun, Kishpin mujje‐doodahdewin ahwungebun gamuh gagoo mujjeëzhechegawin, Oh kenuhwah Jew‐weyag, nindahgenundahwandahgooz chebezindoonenuhgoog;
15Kishpin dush kuhquajindeyag enewh ekedoowinun kuhya ezhenekahzoowinun kuhya kenuhwah ketebahkoonegawinewah, kenuhwah bahbahmanduhmook: kahween neen nindahtebahkoonunsenun oonoo uhyeëen.
16Oogeöonjesahgeje‐nahzhahwaun emuh tebahkoonega‐weguhmigoong.
17Medush kuhkenuh egewh Greekug keöodahpenahwaud enewh Sosthenesun nahgahnezenejin emuh ahnuhmeä‐weguhmigoong, kepukketaöowahwaud dush emuh anahsuhme‐ahyahnig tebahkoonega‐weguhmig. Kah dush Gallio oogebahmanduhsenun oonoo uhyeëen.
18Oo‐oo kahishquah‐ezhewabuk kinooazh keduhneze owh Paul, me dush kenuhguhnaud enewh wejekewaëmaun, kemahjeyahshe dush ewede keënahshid emuh Syriaïng, keühneweejewaud enewh Priscillaün kuhya Aquilaün; uhpe dush kahkaushkebahdung ooshtequaun ewede Cenchreaïng: oonje kewahweenduhmahwaud enewh Kesha‐Muhnedoon cheëzhechegad.
19Ketuhgwishin dush emuh Ephesusing, me dush ewede kahnuhguhnaud enewh kahweejewahpuneen; ween dush kepeendega emuh ahnuhmeä‐weguhmigoong, keguhnoonaud dush enewh Jewyun.
20Uhpe dush kenunduhwanemegood enewh kayahbe kenooazh cheähyaud emuh, kahween kedabwatunse.
21Me dush keähnemekahwaud, oo‐oo keënaud, Nenunduhwandahgooz ahbetakummig cheguhnuhwanduhmaun maunduh wekoondewin zhuhyegwah wahdebishkoosamahguk ewede Jerusaleming; kebiskahbeyaun dush kegahbenaunzekoonenim kishpin enandung owh Kesha‐Muhnedoo. Keöonjemahjeyahshe emuh Ephesusing.
22Uhpe dush kahkuhbaud emuh Cesareaïng, kahkoopeed dush, kahahweähnuhmekahwaud enewh anuhmeähnejin, keëzhah emuh Antioching.
23Wanebik kahduhnezid emuh, keühnemahjah, keëzhah dush emuh anegookookummegaug Galatia kuhya Phrygia, kemushkahwanduhmooäud kuhkenuh enewh kekenooähmahgunun.
24Pazhik dush Jew Apollos azhenekahzood kahduhzhe‐negid emuh Alexandriäïng, natuh‐kekedood, kuhya mashkahwezid emuh kechetwah‐oozhebeëguning, kepeëzhah emuh Ephesusing.
25Mahbuh enene kekekenooähmahgooze emuh oomeekunaung owh Tabaningad: keäunwahdandung dush emuh oojechaugoong, keduhzhindung kuhya kekekenooähmahgad oodezhetwahwinun owh Tabaningad, kekekandung atuh ewh oobaptizooëwawin owh John.
26Mezheshuh dush kemahje‐kekedoo emuh ahnuhmeä‐weguhmigoong: Uhpe dush Aquila kuhya Priscilla kahnoonduhwahwaud enewh oogeöodahpenahwaun, kuhya nahwuj wawane oogekekenooähmahwaun ewh oodezhetwahwin owh Kesha‐Muhnedoo.
27Uhpe dush enandung cheëzhaud emuh Achaiaïng, keöozhebeëgawug egewh wejekewaëmaug, keënahwaud enewh kekenooähmahgunun cheöodahpenahnid: uhpe dush tagwishing, oogekeche‐weedookahwaun enewh kahdabwayanduhmenejin oonje shahwanjegawine‐wedookahgoowining:
28Emuh mushkahwezewining oogeëzheguhnoonaun enewh Jewyun, mezheshuh suh kewahbunduhewad oonje kechetwah‐oozhebeëguning owh Jesus ahwid Christ.
Pilihan Saat Ini:
OODEZHECHEGAWINEWAH 18: OTW
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Psalms published by the Canadian Bible Society 1856. New Testament and Pentateuch published by the Society for Promoting Christian Knowledge (SPCK) 1861-1874.
