Yoohani 17

ɄYeesu apuuta hwa Ngʉlʉbhɨ

1ɄYeesu lwa waamala ayanje na bhasundwe bhaakwe gonti ɨgo, aheenya hu mwanya, ahapuuta hwa Ngʉlʉbhɨ ahaga, “Wee Daada, ahabhaazyo haanɨ hafishile. Ɨhulaabha ʉbhalolesye abhantu ʉmwamu waanɨ anɨ nɨMwana waaho huje, nanɨ ɨmbalolesye ʉmwamu waaho sha wuli. 2Ʉmpiiye ikhone ɨlya hubhalongozye abhantu bhonti, huje ɨmbapeele abhantu ɨbho bhahunɨɨtɨha ʉwʉʉmi ʉwa wiila. 3Ʉwʉʉmi ʉwa wiila wa wʉʉwu, abhantu bhaʼmanye aawe huje we Ngʉlʉbhɨ wɨ lyoli, nantele bhamanye anɨ nɨYeesu ʉKilisiti, wa wahansonteleziizye hwa bheene. 4Anɨ ɨndolesiizye ʉmwamu waaho hwa bhantu bhonti, hwi‑idala ɨlya huyilʉnjɨshe ɨmbombo ɨyo wahansonteleziizye huyibhombe. 5Wee Daada, ɨhulaabha ʉlolesye ʉmwamu waanɨ, huje abhantu bhonti bhawulole ʉmwamu ʉwo nahali nawo hu habhaazyo lwa tahali peeka, hu habhaazyo lwʉ‑ʉsɨɨle apele ɨnsi.”

ɄYeesu ahubhapuutila abhasundwe bhaakwe

6ɄYeesu ahajendeelela apuute ahaga, “Wee Daada, wahampiiye abhantu ɨbha huje bhabhe bhasundwe bhaanɨ, nanɨ ɨmbamanyiziizye ɨsho aawe ʉli. Bhope bhaaho nantele bhabhombile gonti ɨgo wahabhalajiziizye huje bhabhombe. 7Ɨshi bhaamanya huje ɨvintu vyonti ɨvyo wahampiiye vifumile huliiwe, 8pɨpo ɨmbabhʉzɨɨzye amazwi gonti ɨgo wahambʉzɨɨzye, bhope bhagambɨlɨɨye. Bhaamanya lyoli huje ɨmfumile huliiwe nantele bhɨtɨɨshe huje aawe wahansonteleziizye. 9Ɨhubhapuutila ɨbha, pɨpo bhantu bhaaho. Saga ɨhubhapuutila abhantu bhonti, lyoli ɨhubhapuutila abhantu ɨbha lwene ɨbho wahampiiye. 10Abhantu bhonti bha bhali bhaanɨ, bhaaho, nantele abhantu bhonti bha bhali bhaaho, bhaanɨ. Ʉmwamu waanɨ sha wuli wulolesiiwe hwa bhantu ashilile hwa bheene. 11Ɨshi, ɨhwɨnza huliiwe, saga nahayibha nantele mu nsi ʉmu, leelo abheene bhahayijendeelela abhe mu nsi ʉmu. Wee Daada nʼsangalusu, ɨhulaabha ʉbhalɨndɨɨlɨle hwi‑ikhone lyaho ɨlyo ʉmpiiye huje, bhabhe peeka nanshi ɨsho anɨ naawe tili peeka. 12Hu habhaazyo ɨho nahali peeka nabho, nahabhalɨndɨlɨɨye hwi‑ikhone lyaho ɨlyo wahampiiye. Nahabhalɨndɨlɨɨye shinza, nʉʉmo wa‑ateejile. Lyoli mwene ʉla ʉyo yahasimbwilwe huje wa‑afwe, huje gabhombeshe ɨgo gasimbwilwe mu Nsimbo ɨMfinjile.#Bhaazya ɨNsalifyo 41:9.

13Wee Daada waanɨ, ɨshi ɨndi mwi‑idala ahwɨnze huliiwe. Ɨhubhabhʉʉzya abhasundwe bhaanɨ gonti ɨga lwɨ‑ɨndi mu nsi, huje bhabhe nʉ luseshelo tee mu mooyo gaabho, nanshi ɨsho anɨ ɨndi nʉ luseshelo. 14Ɨmbabhʉzɨɨzye izwi lyaho, leelo abhantu ɨbho bhahukhaana aawe bhahubhaviitilwa, pɨpo saga bha mu nsi, nanshi ɨsho anɨ saga ɨndi wa mu nsi ʉmu. 15Wee Daada waanɨ, saga ɨlaabha huje ʉbheefwe mu nsi ʉmu, lyoli huje ʉbhafyʉle hwa Mʼmiibhi ʉla ʉSeetano. 16Abheene saga bha mu nsi ʉmu, nanshi ɨsho anɨ saga ɨndi wa mu nsi ʉmu. 17Wee Daada, ʉbhasangalusye hwi‑idala ɨlyɨ lyoli yaaho. Izwi lyaho lyɨ lyoli. 18Nanshi ɨsho wahansonteleziizye anɨ mu nsi, shɨnɨɨsho nanɨ ɨmbasonteleziizye mu nsi. 19Ɨhwifumya ahubhombele aawe hu nongwa yaabho, huje bhope bhahwifumye huliiwe hu lyoli.”

20ɄYeesu ahajendeelela apuute ahaga, “Saga ɨhubhapuutila abhasundwe bhaanɨ bheene, leelo ɨhubhapuutila na bhanjɨ ɨbho bhahayihunɨɨtɨha hu nongwa ya‑aje abhasundwe bhaanɨ bhamanyizya. 21Ɨhulaabha huje bhonti ɨbho bhabhe hantu heeka, nanshi ɨsho anɨ naawe tili hantu heeka. Nantele ɨhubhapuutila huje bhabhe hantu heeka naatɨ, huje abhantu bhonti bhabhanje bhahwɨtɨha huje aawe weewe wahansonteleziizye anɨ. 22Ʉmwamu ʉwo wahampiiye, ɨmbapiiye abhasundwe bhaanɨ huje, bhabhe hantu heeka naanɨ nanshi ɨsho anɨ ɨndi hantu heeka naawe. 23Nanshi ɨsho anɨ ɨndi peeka nabho, nawe ʉli peeka naanɨ, shɨnɨɨsho ɨhubhapuutila bhope bhabhe hantu heeka, huje abhantu bhonti bhamanyaje huje weewe wahansonteleziizye. Nantele bhamanyaje huje ʉbhagɨɨne nanshi ɨsho ʉngɨɨne anɨ.

24Wee Daada, ɨsʉngwa huje abhantu ɨbho wahampiiye bhabhe naanɨ ɨpo nahayibha. Ɨpo bhɨnze bhawulole ʉmwamu waanɨ ʉwo wahampiiye, pɨpo wahangɨɨne anɨ hwope ɨnsi shɨ‑ɨsɨɨle apelwe. 25Wee Daada nʼgolosu, abhantu abha mu nsi saga bhaʼmɨɨnye. Leelo anɨ ɨʼmɨɨnye, nantele abhasundwe bhaanɨ bhaʼmɨɨnye huje weewe wahansonteleziizye. 26Anɨ ɨmbamanyiziizye ɨsho ʉli aawe, nantele nahayijendeelela abhombe ɨsho, huje bhagananaje nanshi ɨsho wahangɨɨne anɨ, na huje ɨmbe hantu heeka na bheene.”

Pilihan Saat Ini:

Yoohani 17: SBK

Sorotan

Berbagi

Salin