Yoohani 16

1ɄYeesu ahajendeelela ayanje na bhasundwe bhaakwe ahaga, “Ɨmbabhʉzɨɨzye gonti ɨga huje, mugandi hululeshe ʉlwɨtɨho lwenyu. 2Abhantu bhahayibha bhahubhadaga amwɨ mu nyumba ɨzya‑apuutile na‑amanyiilile. Nantele, ahabhaazyo hahwɨnza ɨho abhantu bhahayihubhagoga amwɨ, bhahayibha bhasɨɨbha huje bhahumʼmombela yʉ Ngʉlʉbhɨ. 3Abhantu bhahayihubhabhombela gonti ɨgo, pɨpo saga bhamʼmɨɨnye ʉDaada waanɨ, nantele saga bhamɨɨnye anɨ.

4Leelo ɨmbabhʉzɨɨzye ɨgo huje ahabhaazyo haabho aha‑abhombe ɨgo lwa haafiha, mwizuhaje ɨgo nahabhabhʉzɨɨzye.”

Ɨmbombo ya Mʼpepo ʉMʼfinjile

“Saga nahabhabhʉzɨɨzye gonti ɨgo afume hu wandilo, pɨpo nahali peeka naamwɨ. 5Leelo ɨshi anɨ ɨweela hwa Daada waanɨ ʉyo ahansonteleziizye huliimwɨ. Hwope ɨsho nʉʉmo wowonti paahati yeenyu wa‑ahumbʉzɨɨlɨzya huje, ‘Wɨlɨ, ʉbhala hwoshi?’ 6Muzugumiiye tee mu mooyo geenyu hu nongwa ya‑aje ɨmbabhʉzɨɨzye huje ɨmbala hwa Daada waanɨ. 7Leelo ɨhubhabhʉʉzya ɨlyoli, shinza huliimwɨ huje anɨ ɨmbale hwa Daada waanɨ, pɨpo nkashele saga ɨmbale, ʉMwavwi ʉla saga abhajiiye ahwɨnze. Leelo nkashele ɨmbale, nahayihunʼsonteelezya huliimwɨ. 8ɄMwavwi ʉyo lwa wɨnza, ahayihubhalolesya abhantu bhonti huje bhabhomba mbiibhi, na huje anɨ ɨndi nʼgolosu, nantele huje ʉNgʉlʉbhɨ ahayɨnza hubhalonje. 9Ahayihubhalolesya abheene pa pazelu huje bhabhomba mbiibhi, pɨpo saga bhahunɨɨtɨha anɨ. 10Ahayihubhalolesya pa pazelu huje anɨ ɨndi nʼgolosu, pɨpo ɨmbala hwa Daada waanɨ, na huje saga mwahayihundola nantele. 11Ahayihubhalolesya pa pazelu huje ʉNgʉlʉbhɨ ahayihubhalonga, pɨpo anʼnonjile ʉSeetano ʉyo nʼgoosi wa bhabhomba mbiibhi bhonti.

12Ɨnsɨɨle ɨndi nago minji aga hubhabhʉʉzye, leelo hu habhaazyo ɨha saga mubhajiiye hugaaganye. 13Leelo ʉMʼpepo wa Ngʉlʉbhɨ ʉyo lwa‑ahayɨnza, ahayihubhalongozya huyimanye ɨlyoli yonti. Saga ahayiyanga hwi‑ikhone lyakwe yʉʉyo, lyoli ahayiyanga ɨgo ahwʉmvwa, na hubhabhʉʉzye ɨgo gahayiloleha. 14ɄMʼpepo ʉyo ahayibha ahubhalolesya ʉmwamu waanɨ, pɨpo ahayihubhabhʉʉzya gonti ɨgo ahayibha ahwambɨɨlɨla afume huliinɨ. 15Ɨvintu vyonti ɨvyo ʉDaada waanɨ ali navyo vya huliinɨ. Sha shɨɨsho ɨnjanjile huje ʉMʼpepo ʉyo ahayibha ahubhabhʉʉzya gonti ɨgo ahayibha ahugambɨɨlɨla afume hwaliinɨ.”

Ʉzugumizu wahayigaluuhana abhe luseshelo

16ɄYeesu ahajendeelela hubhabhʉʉzye ahaga, “Hasyalile habhaazyo hashe saga mwahayihundola, nantele hasyalile habhaazyo hashe mwahayihundola.” 17Ɨpo abhasundwe bhaakwe bhamo bhahabhʉzɨlɨzanya bheene hu bheene bhahaga, “Wɨlɨ, hwa huje wɨlɨ ɨsho ayanga, ‘Hasyalile habhaazyo hashe saga mwahayihundola, nantele hasyalile habhaazyo hashe mwahayihundola,’ na huje, ‘Ɨmbala hwa Daada waanɨ’?” 18Ɨpo bhahajendeelela abhʉzɨlɨzanye bheene hu bheene bhahaga, “Wɨlɨ, ‘habhaazyo hashe’ hwa huje wɨlɨ? Atɨ saga tihuzyaganya ɨzyo ayanga.”

19ɄYeesu ahamanya huje bhahwanza humʼmʉzɨɨlɨzye ɨgo ayanga, ɨpo ahabhabhʉʉzya ahaga, “Wɨlɨ, mubhʉzɨlɨzanya ɨgo ɨnjanjile huje, ‘Hasyalile habhaazyo hashe saga mwahayihundola, nantele hasyalile habhaazyo hashe mwahayihundola’? 20Lyoli ɨhubhabhʉʉzya huje, amwɨ mwahayibha mulila na‑azugumile, leelo abhantu abha mu nsi ʉmu bhahayibha bhaseshela. Mwahayizugumila, leelo ʉzugumizu weenyu wahayigaluuhana abhe luseshelo. 21Ʉnʼshɨ lwa‑apaapa, abha nʉ zugumizu, pɨpo ahabhaazyo ahɨ bhaavi hafishile. Leelo nkashele wapaapa, saga ahwizuha nantele ʉbhaavi ʉwo hu nongwa yɨ luseshelo huje ʉmwana apapwilwe mu nsi. 22Shɨnɨɨsho namwɨ muli nʉ zugumizu hu habhaazyo hashe. Leelo nahayɨnza nantele huliimwɨ, ɨpo pa mwahayibha nʉ luseshelo mu mooyo geenyu. Nʉʉmo ʉmuntu ʉyo ahayeefwa ʉluseshelo ʉlwo afume mu mooyo geenyu. 23Nantele ahabhaazyo ɨho lwa haafiha, saga mwahayihundaabha hohonti. Lyoli ɨhubhabhʉʉzya huje, hohonti ɨho muhunʼnaabha ʉDaada waanɨ ashilile hwi‑itaawa lyanɨ, wope anza hubhapeele. 24Afishe ɨshi saga mulaabhile hohonti hwa Ngʉlʉbhɨ ashilile hwi‑itaawa lyanɨ. Laabhaji hwa Ngʉlʉbhɨ, namwɨ munza hwambɨɨlɨle, huje ʉluseshelo lwenyu lubhombeshe.”

ɄYeesu alitolile ikhone ibhiibhi ɨlya mu nsi

25ɄYeesu ahajendeelela ayanje ahaga, “Ɨmbabhʉzɨɨzye zyonti ɨzyo hwi‑idala ɨlyɨ vifwani. Ahabhaazyo hahwɨnza ɨho saga nahayiyanga naamwɨ nantele hwi‑idala ɨlyɨ vifwani, leelo nahayihubhabhʉʉzya pa pazelu hu nongwa zya Daada waanɨ. 26Hu habhaazyo ɨho, mwahayilaabha hwi‑itaawa lyanɨ. Saga ɨnjiga anɨ nahayihubhalaabhila hwa Daada waanɨ, leelo mwahayibha mulaabha amwɨ mwɨmwɨ. 27Ʉmwene ʉDaada waanɨ abhagɨɨne amwɨ, hu nongwa ya huje amwɨ mungɨɨne anɨ, nantele mwɨtɨɨshe huje nahafumile hwa Daada waanɨ. 28Ɨnɨnzɨle mu nsi ʉmu afume hwa Daada waanɨ, leelo ɨshi ɨsogola mu nsi ʉmu na‑aweele hwa Daada waanɨ.”

29Ɨpo abhasundwe bhaakwe bhahamʼmʉʉzya bhahaga, “Wee Mʼmanyizyi, ɨshi ʉyandile ayanje naatɨ pa pazelu sinta ayanje hu vifwani! 30Ɨshi taamanya huje aawe ʉmɨɨnye gonti, nantele saga ɨhwanziwa ʉmuntu hubhʉzɨɨlɨzye lyolyonti. Ɨgo gatibhombile huje tɨɨtɨshe huje aawe ʉfumile hwa Ngʉlʉbhɨ.” 31ɄYeesu ahabhabhʉʉzya ahaga, “Wɨlɨ, ɨshi mwandile ahwɨtɨshe? 32Ahabhaazyo hapalamiiye nantele hali pa pɨɨpɨ tee, ɨpo mwenti munza‑anyampaane. Mwenti munza‑abhale humwenyu, na hundeshe nɨmwene. Leelo saga ɨnza‑abhe nɨmwene, pɨpo ʉDaada waanɨ ali peeka naanɨ. 33Amwɨ mubhakʉndwe, ɨmbabhʉzɨɨzye gonti ɨgo huje mubhe nʉ tengaanu mu mooyo geenyu, pɨpo munɨtɨɨshe anɨ. Mu nsi ʉmu mwahayambɨɨlɨla amayɨmba aminji, leelo mugandi hwogope, pɨpo anɨ ɨmenile ikhone ibhiibhi ɨlya mu nsi.”

Pilihan Saat Ini:

Yoohani 16: SBK

Sorotan

Berbagi

Salin