Yoohani 18

ɄYeesu akhatwa

(Mataayo 26:47-56; Maalʉko 14:43-50; Luuka 22:47-53)

1ɄYeesu lwa waamala apuute, ahasogola peeka na bhasundwe bhaakwe na‑alobhoshe ikʉʉshi ɨlyɨ Kidilooni ɨpo lyahalɨɨho itotoobhe ɨlyɨ mizeyituuni. Bhahatʉʉha ʉmwo. 2Ɨshi ʉYuuda wa‑ahali abhala hunʼsambushile ʉYeesu, ahalimɨɨnye itotoobhe ɨlyo, pɨpo ʉYeesu na bhasundwe bhaakwe bhahalʉbhɨɨye abhale ʉmwo hahinji. 3Ɨpo ʉYuuda ahayilongozya ɨmpʉga ɨya bhalwi abhɨ Shiluumi, peeka na bhabhomvi afume hwa bhalongozi bha bhasayi bha Ngʉlʉbhɨ na hwa Bhafalisaayo abhale hwi‑itotoobhe ɨlyo. Hu habhaazyo lwa bhabhala, bhaheega ɨhozyo, ɨtaala nɨ vilwɨlo. 4ɄYeesu ahali amɨɨnye gonti ɨgo gahayibhombeha hwa mwene. Ɨpo ahasogola paahati ya bhasundwe bhaakwe, ahahwilolesya pa pazelu pa mpʉga ɨla, ahabhabhʉzɨɨlɨzya ahaga, “Wɨlɨ, muhumʼmwanza weenu?” 5Bhope bhahamʼmwamula bhahaga, “Tihumʼmwanza yʉ Yeesu ʉwa hu Nazaleeti.” ɄYeesu ahabhaamula ahaga, “Anɨ nɨɨnɨ.” ɄYuuda ʉyo ahanʼsambushiiye ʉYeesu ahali ayɨmɨlɨɨye peeka nabho. 6ɄYeesu lwa‑ahabhabhʉzɨɨzye huje, “Anɨ nɨɨnɨ,” abhalwi bhaala bhahaweela hwisinda na‑agwe pa nsi. 7ɄYeesu ahabhabhʉzɨɨlɨzya nantele ahaga, “Wɨlɨ, muhumʼmwanza weenu?” Abheene bhahamʼmwamula bhahaga, “Tihumʼmwanza yʉ Yeesu ʉwa hu Nazaleeti.” 8ɄYeesu ahabhabhʉʉzya ahaga, “Ɨmbabhʉzɨɨzye huje nɨɨnɨ ʉyo muhumʼmwanza. Nkashele lyoli muhunanza anɨ, ɨshi bhaleshi abhasundwe bhaanɨ ɨbha bhabhalaje.” 9ɄYeesu ahayanjile ɨsho huje gabhombeshe ɨgo ahayanjile hu wandilo huje, “Ɨbho wahampiiye saga ɨnteziizye nkʉ‑ʉmo.”#Bhaazya Yoohani 17:12.

10ɄSiimoni Peeteli ahali ni‑imaajɨ ɨlyɨ lʉgʉ, ɨpo ahakʉʉla na hunʼdumule ikutu ɨlya hu lɨɨlo ʉnʼkalwe wa nʼsayi ʉnʼgoosi ʉwa Ngʉlʉbhɨ. Ʉnʼkalwe ʉyo itaawa lyakwe ahali yʉ Maalʉko. 11Leelo ʉYeesu ahanʼnajizya ʉPeeteli ahaga, “Wee Peeteli, weezya imaajɨ lyaho mu nyambɨ yaakwe. Wɨlɨ, saga ʉmɨɨnye huje ɨhondɨɨye ayɨmbe nanshi ɨsho ʉDaada ambɨɨshɨle huje ɨnjɨmbe?”

Bhahunʼtaaka ʉYeesu hwa Aanasi

(Mataayo 26:57-58; Maalʉko 14:53-54; Luuka 22:54)

12Ɨpo ʉnʼgoosi ʉwa bhagoosi bha bhalwi, peeka nɨ mpʉga ɨya bhalwi na bhabhomvi bha bhalongozi bha Bhayahuudi bhahanʼkhata ʉYeesu na humʼpinye. 13Ɨshi bhahanʼtwala nasʉʉti hwa Aanasi. ɄAanasi ahali yʉ yisevyala wa Kayaafa. ɄKayaafa ahali nʼsayi nʼgoosi wa Ngʉlʉbhɨ mu habhaazyo ɨho. 14Mu nsiku ɨzya hwisinda, ʉKayaafa ya yʉʉyo ahabhabhʉzɨɨzye abhalongozi bha Bhayahuudi ahajile, “Hwashi ʉmuntu weeka afwe hu nongwa ya bhantu bhonti.”#Bhaazya Yoohani 11:50.

ɄPeeteli ahunʼkhaana ʉYeesu

(Mataayo 26:69-70; Maalʉko 14:66-68; Luuka 22:55-57)

15ɄSiimoni Peeteli nʉ nʼsundwe ʉwɨnjɨ bhahali bhahunʼnondolezya ʉYeesu hwisinda. Ʉnʼsundwe ʉwɨnjɨ ʉyo ahali amanyiishe nʉ nʼsayi ʉnʼgoosi ʉwa Ngʉlʉbhɨ, ɨshi ahatʉʉha peeka nʉ Yeesu mu lubhaga lwɨ nyumba ya nʼsayi ʉnʼgoosi. 16Leelo ʉPeeteli ahɨmɨɨlɨla hwʉnzɨ hu lyango ʉnʼgoosi. Ɨpo ʉnʼsundwe ʉwɨnjɨ ʉyo ahamanyiishe nʉ nʼsayi ʉnʼgoosi, ahafuma hwʉnzɨ na‑ayanje nʉ nʼnɨndu ʉyo ahali nʼnɨndɨɨlɨli pa lyango ʉnʼgoosi. Hu habhaazyo lwa wayanga nʉ nʼnɨndu ʉla, ahamʼmwɨtɨshɨla ʉPeeteli atʉʉshe mu lubhaga. 17Ɨpo ʉnʼnɨndu ʉnʼnɨndɨɨlɨli ʉla, ahamʼmʉzɨɨlɨzya ʉPeeteli ahaga, “Wɨlɨ, naawe saga ʉli peeka mwa bhasundwe bha muntu ʉyo?” ɄPeeteli ahamʼmwamula ahaga, “Ndaadi, saga nɨɨnɨ.” 18Hu habhaazyo ɨho, abhakalwe na bhabhomvi bhahali bhahwota ʉmwoto ʉgwɨ mazimya ʉgwo bhahapembile, pɨpo hwahali ni‑isasa. Wope ʉPeeteli ahɨmɨlɨɨye peeka nabho, ahali ahwota ʉmwoto.

Ʉnʼsayi ʉnʼgoosi ahumʼmʉzɨɨlɨzya ʉYeesu

(Mataayo 26:59-66; Maalʉko 14:55-64; Luuka 22:66-71)

19Ɨpo ʉnʼsayi ʉnʼgoosi ʉwa Ngʉlʉbhɨ ʉAanasi ahamʼmʉzɨɨlɨzya ʉYeesu hu nongwa ya bhasundwe bhaakwe nɨ manyizyo zyakwe. 20ɄYeesu ahamʼmwamula ahaga, “Hu habhaazyo honti nahali ɨyanga hwa bhantu bhonti pa pazelu. Nahali ɨhubhamanyizya abhantu mu nyumba ɨzya‑apuutile na‑amanyiilile na mu lubhaga lwɨ nyumba ɨmfinjile ɨya Ngʉlʉbhɨ, ʉmwo aBhayahuudi abhinji bhahali bhakhomaana peeka. Anɨ saga ɨnjanjile hohonti hu mfiso. 21Ɨshi yeenu ʉhumbʉzɨɨlɨzya anɨ? Yeenu saga ʉhubhabhʉzɨɨlɨzya abhantu ɨbho bhahali bhahuntejeelezya hu habhaazyo ɨmanyizya? Abheene bhamɨɨnye ɨgo nahali ɨyanga na hubhamanyizye.”

22ɄYeesu lwa wayanga ɨgo, ʉnʼnwi ʉmo ʉyo ahɨmɨlɨɨye mu pɨɨpɨ hwa mwene, ahanʼkhoma ni‑ikofi, ahamʼmʉzɨɨlɨzya ahaga, “Wɨlɨ, ʉhumʼmwamula wɨlɨ ʉnʼsayi ʉnʼgoosi?” 23ɄYeesu ahamʼmwamula ahaga, “Nkashele ɨnjanjile shibhiibhi, yanga ʉbhiibhi waanɨ. Leelo nkashele ɨnjanjile ɨlyoli, ɨshi yeenu ʉhuhoma?” 24Ɨpo ʉYeesu lwa‑ali sha‑apinyiilwe, ʉAanasi ahabhalajizya abhalwi humʼmweje ʉYeesu na‑abhale nawo hwa nʼsayi ʉnʼgoosi ʉKayaafa.

ɄPeeteli ahunʼkhaana ʉYeesu nantele

(Mataayo 26:71-75; Maalʉko 14:69-72; Luuka 22:58-62)

25Ɨpo ʉSiimoni Peeteli lwa‑ali sha‑ahwota ʉmwoto, abhantu bhamo bhahamʼmʉzɨɨlɨzya bhahaga, “Wɨlɨ, nawe ʉli peeka mu bhasundwe bha muntu ʉla?” ɄPeeteli ahakhaana ahaga, “Ndaadi, saga nɨɨnɨ.” 26Leelo ʉmo mu bhakalwe ʉwa nʼsayi ʉnʼgoosi ʉwa Ngʉlʉbhɨ, ʉyo ahali holo wa muntu ʉla ʉyo ʉPeeteli ahanʼdumuuye ikutu, ahamʼmʉzɨɨlɨzya ahaga, “Wɨlɨ, saga weewe nahaʼlolile ʉli peeka nʉ Yeesu mwi‑itotoobhe?” 27ɄPeeteli ahakhaana nantele ahaga, “Saga nɨɨnɨ.” Pɨnɨɨpo ɨhanda yahagʉgʉlɨɨga.

ɄYeesu pitagaalila lya nʼnongozi ʉPilaato

(Mataayo 27:1-2, 11-14; Maalʉko 15:1-5; Luuka 23:1-5)

28Ɨpo shampwi lwa hwasha, abhalongozi bha Bhayahuudi bhahamʼmwega ʉYeesu afume hwa Kayaafa. Bhahabhala nawo pa shinamwɨnɨ ɨsha nʼnongozi ʉwɨ Shiluumi. Leelo aBhayahuudi saga bhahatʉʉshɨle pa shinamwɨnɨ#18:28 saga bhahatʉʉshɨle pa shinamwɨnɨ Alɨngaane nɨ ndajizyo zya Bhayahuudi, nkashele ʉNʼnyahuudi atʉʉshɨle mu nyumba ya muntu ʉyo saga Nʼnyahuudi, aBhayahuudi abhanjɨ bhahali bhahumʼmaazizya huje mwavu nantele saga bhahamʼmwɨtɨshɨlaga alye ɨshalye ɨshɨ shikulukulu ɨshɨ Paasaka. huje bhasahabhe bhaavu na‑amenwe alye ɨshalye ɨshɨ shikulukulu ɨshɨ Paasaka. 29Ɨpo ʉnʼnongozi ʉwɨ Shiluumi, ʉPilaato, ahafuma hwʉnzɨ na‑abhale ʉhwo bhalɨɨho, ahabhabhʉzɨɨlɨzya ahaga, “Wɨlɨ, ʉmuntu ʉnʉ abhombile libhiibhi wɨlɨ ɨlyo muhunʼtaaka?” 30Abheene bhahamʼmwamula bhahaga, “Nkashele ʉmuntu ʉnʉ saga wabhanga nʉ bhiibhi, saga tɨnzaga nawo hwaliiwe.” 31ɄPilaato ahabhabhʉʉzya ahaga, “Ɨshi, amwɨ mumʼmweje, munʼnonje alɨngaane nɨ ndajizyo zyenyu.” Leelo abheene bhahamʼmwamula bhahaga, “Saga tili ni‑ikhone ɨlya hunʼnonje ʉmuntu wowonti huje afwe.” 32Ɨgo gahabhombɨɨshe ɨsho huje gasimishizye ɨgo ʉYeesu ahayanjile alolesye ɨsho anza‑afwe.

ɄPilaato ahumʼmʉzɨɨlɨzya ʉYeesu

33Ɨpo ʉPilaato ahatʉʉha nantele pa shinamwɨnɨ, ahabhalajizya huje bhanʼneete ʉYeesu hwa mwene, ahamʼmʉzɨɨlɨzya ʉYeesu ahaga, “Aawe ʉli Mwɨnɨ wa Bhayahuudi?” 34Leelo ʉYeesu ahamʼmwamula ahaga, “Wɨlɨ, ɨgo gʉ‑ʉhumbʉzɨɨlɨzya, gafuma mu nsɨɨbho zyaho awe hu bhantu abhanjɨ ɨbho bhaʼbhʉzɨɨzye ɨnongwa zyanɨ?” 35ɄPilaato ahamʼmwamula ahaga, “Wɨlɨ, anɨ ɨndi Nʼnyahuudi? Abhantu abhɨ shikholo shaaho peeka na bhalongozi bha bhasayi bha bhɨɨbho bhɨnzɨle naawe hwaliinɨ huje ɨʼlonje. Wɨlɨ, ʉbhombile bhiibhi wɨlɨ?” 36ɄYeesu ahamʼmwamula ahaga, “Ʉwumwɨnɨ waanɨ saga wa mu nsi ʉmu. Nkashele wabhanga wa mu nsi ʉmu, handɨ abhasundwe bhaanɨ bhɨnzaga hunɨɨmɨle huje ɨngandi akhatwe na Bhayahuudi. Leelo, ʉwumwɨnɨ waanɨ saga wa mu nsi ʉmu.” 37Ɨpo ʉPilaato ahamʼmʉzɨɨlɨzya ahaga, “Wɨlɨ, aawe ʉli mwɨnɨ lyoli?” ɄYeesu ahamʼmwamula ahaga, “Weewe wayanga huje anɨ ɨndi mwɨnɨ. Anɨ nahapapwilwe mu nsi huje ɨmbamanyizye abhantu ɨlyoli. Ʉmuntu wowonti ʉyo alondolezya ɨlyoli, ahwʉmvwa amazwi gaanɨ.” 38ɄPilaato ahamʼmʉzɨɨlɨzya ahaga, “Ɨlyoli hwa huje wɨlɨ?” ɄPilaato lwa wayanga ɨgo, ahafuma hwʉnzɨ nantele, ahabhabhʉʉzya abhalongozi bha Bhayahuudi ahaga, “Anɨ saga ɨndolile ʉbhiibhi wowonti hwa muntu ʉnʉ. 39Leelo muli na miiho aga hundaabhe huje ɨmbigulile ʉnʼkʉngwe weeka mu habhaazyo ahɨ shikulukulu ɨshɨ Paasaka shila mwaha. Wɨlɨ, muhwanza ɨmbigulile ʉMwɨnɨ wa Bhayahuudi?” 40Leelo abhantu bhonti bhahabwaga ibwago bhahaga, “Ndaadi! Ʉgandi hutigulile ʉmuntu ʉyo, leelo ʉtigulile ʉBalaaba.” ɄBalaaba ahakʉngwɨlwe hu nongwa ya huje ahali nʼnyambuda.

Pilihan Saat Ini:

Yoohani 18: SBK

Sorotan

Salin