လူႉၵႃႇ 21
21
လွင်ႈတႃႇၼႃႉတၢင်းလူႇမႄႈမၢႆႈ
(တူၺ်း၊ မႃႇ 12:41-44)
1လိုၼ်းၼၼ်ႉ မၼ်းၸဝ်ႈမုင်ႈတူၺ်းလႄႈႁၼ်ၶဝ်ၸိူဝ်းဢၼ်ၸၢင်ႈမၢၵ်ႈၸၢင်ႈမီးတင်းလၢႆ ဢဝ်တႃႇၼႃႉတၢင်းလူႇသႂ်ႇၵႃႈၼႂ်းတိူၵ်ႈၽၼ်ႇတႃႇၸဝ်ႈၼၼ်ႉယူႇဢေႃႈ။- 2မၼ်းၸဝ်ႈႁၼ်မႄႈမူၵ်းမႄႈမၢႆႈဢၼ်ၽၢၼ်ၵေႃႉၼိုင်ႈ ဢဝ်တွင်းလႅင်သွင်ၶႅပ်းသႂ်ႇၼၼ်ႉလႄႈ၊- 3လၢတ်ႈဝႃႈ၊ ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ မႄႈမူၵ်းမႄႈမၢႆႈဢၼ်ၽၢၼ်ၼႆႉ ယဵင်ႈၶႅၼ်းသႂ်ႇၼမ်ၼႃႇသေပိူၼ်ႈတၢင်ႇၵေႃႉတင်းသဵင်ႈတင်းလူင်ၸိူဝ်းၼၼ်ႉယဝ်ႉ။- 4လွင်ႈမၼ်းၸမ်ႉ ၶဝ်တင်းသဵင်ႈတင်းလူင်ၸိူဝ်းၼၼ်ႉ ၼုၵ်ႈဢဝ်ၵႃႈၼႂ်းၸေးၸိမ်ႇဢၼ်ၶဝ်မီးၼမ်ၼႃႇၼၼ်ႉသေလႄႈ သႂ်ႇၵႃႈၼႂ်းတၢင်းလူႇၽြႃးပဵၼ်ၸဝ်ႈဢေႃႈ။ မႄႈယိင်းၼႆႉၸမ်ႉ၊ ၼုၵ်ႈဢဝ်ၵႃႈၼႂ်းတၢင်းၽၢၼ်မၼ်းသေလႄႈ ဢဝ်ပုၼ်ႈဢၼ်တၵ်းလဵင်ႉဢသၢၵ်ႈၵႃႈဢၼ်မၼ်းမီးၼၼ်ႉသႂ်ႇယဝ်ႉ၊ ဝႃႈၼင်ႇၼႆဢေႃႈ။
လွင်ႈၼီႉမိၵ်ႈလၢၵ်ႈၶၼႃႇၶိင်ႇၵႃႇလႃႉလိုၼ်းသုတ်း
(တူၺ်း၊ မၢတ်ႈ 24:1-14။ မႃႇ 13:1-13)
5ၼႂ်းမိူဝ်ႈဢၼ် ၵူၼ်းၵမ်ႈၽွင်ႈလၢတ်ႈလွင်ႈပိၵ်ႈမၢၼ်ႇၸဝ်ႈသေလႄႈလဝ်ႊဝႃႈ၊ ပိၵ်ႈမၢၼ်ႇၸဝ်ႈၼႆႉ မီးတၢင်းဢၼ်ဢဝ်မၢၵ်ႇႁိၼ်ၽႅပ်ႉဢၼ်ႁၢင်ႈလီတင်းလၢႆ ဢိၵ်ႇတင်းတၢင်းပုၵ်ႈၸေႃႇတင်းလၢႆ ႁၢင်ႈၶိူင်ႈမႄးဝႆႉၶႃႈဢေႃႈ၊ ဝႃႈၼင်ႇၼႆယူႇၼၼ်ႉၸိုင်။- 6မၼ်းၸဝ်ႈၵေႃႈလၢတ်ႈလႄႈဝႃႈ၊ တေႃႈလဵဝ်ၼႆႉ သူလႆႈႁၼ်ၶိူင်ႈပိူင်ၸိူဝ်းၼႆဢေႃႈ။ ၶိင်ႇၵႃႇလႃႉဢၼ်ၵႃႈၼိူဝ်မၢၵ်ႇႁိၼ်လုၵ်ႈၼိုင်ႈဢမ်ႇလႆႈၵိုတ်းလႆႈၵျၢၼ်ႇဝႆႉ မၢၵ်ႇႁိၼ်ဢၼ်ယင်းဢမ်ႇလႆႈၶၢမ်ႇတၢင်းဢၼ်ၶျႃးတူၵ်းလႄႈမီးယူႇၼၼ်ႉသေလုၵ်ႉၼၼ်ႉ တၵ်းႁွတ်ႈမႃးဢေႃႈ၊ ဝႃႈၼင်ႇၼႆဢေႃႈ။
7ၶဝ်ၼၼ်ႉၵေႃႈလဝ်ႊထၢမ်လႄႈဝႃႈ၊ သြႃႇၸဝ်ႈ၊ လွင်ႈတၢင်းၸိူဝ်းၼႆႉတၵ်းပဵၼ်မႃးၶိင်ႇမိူဝ်ႈလႂ်ၶႃႈ၊ မိူဝ်ႈဢၼ်လွင်ႈတၢင်းၸိူဝ်းၼႆႉၸမ်ႉ ၶိင်ႇဢၼ်တၵ်းပဵၼ်မႃးၼၼ်ႉၸိုင်၊ တၵ်းမီးၼီႉမိၵ်ႈလၢၵ်ႈၶၼႃႇဢၼ်လႂ်ၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 8မၼ်းၸဝ်ႈၵေႃႈလၢတ်ႈလႄႈဝႃႈ၊ ၼင်ႇႁိုဝ်သူတၵ်းဢမ်ႇလႆႈၵႂႃႇလႆႈၸွမ်းတၢင်းဢၼ်ပႅတ်ႉဢၼ်လႅၼ်ၸိုင်၊ ႁဵတ်းသတီႉတႃႉ။ ၵူၼ်းၼမ်ၼႃႇတၵ်းႁိမ်ဢဝ်ၸိုဝ်ႈသဵင်ၵဝ်သေလႄႈ ပေႃႇမႃးလႄႈလၢတ်ႈဝႃႈ၊ ၵဝ်ၼႆႉပဵၼ်ၸဝ်ႈၼၼ်ႉဢေႃႈ။ ၶိင်ႇၵႃႇလႃႉၵေႃႈႁွတ်ႈမႃးယဝ်ႉ၊ ဝႃႈၼင်ႇၼႆဢေႃႈ။ ယႃႇပေၸွမ်းပႃႈလင်ၶဝ်ၼၼ်ႉ။- 9မိူဝ်ႈဢၼ်သူလႆႈငိၼ်းလွင်ႈဢၼ်တိုၵ်းသိုၵ်းလႂ်၊ လွင်ႈဢၼ်ပုင်ႇၵၢၼ်ႇလႂ်ၼၼ်ႉၸိုင်၊ ယႃႇပေမီးၸႂ်ဢၼ်ၶွၼ်းၶႅၼ်း။ လွင်ႈတၢင်းၸိူဝ်းၼႆႉတၵ်းပဵၼ်မႃးဢွၼ်တၢင်းဢေႃႈ။ ၼႂ်းဝႃႈၼၼ်သေၵေႃႈ ဢမ်ႇပႆႇပဵၼ်တီႈသုတ်းတီႈၵွႆၵမ်းလဵဝ်။
10လိူဝ်သေၼၼ်ႉ ၵူၼ်းမဵဝ်းၼိုင်ႈလႄႈမဵဝ်းၼိုင်ႈ၊ မိူင်းၼိုင်ႈလႄႈမိူင်းၼိုင်ႈတၵ်းၶတ်းတႃႉၵၼ်ဢေႃႈ။- 11တၢင်းဢၼ်ဢိင်ႇသၼ်ႇလူင်လႂ်၊ တၢင်းဢၼ်ဢိုပ်းတၢင်းၵိၼ်လႂ်၊ တၢင်းဢၼ်ပဵၼ်ၵႃႇလႃႉႁႃႈလႅင်မိူင်းလႂ်၊ တၵ်းပဵၼ်ၵူႈတီႈၵူႈလႅၼ်ဢေႃႈ။ ၵႃႈၼိူဝ်ၽႃႉၵၢင်ႁၢဝ်ၵေႃႈ၊ လွင်ႈတၢင်းဢၼ်လီၵူဝ်လီႁႄလႂ်၊ ၼီႉမိၵ်ႈလၢၵ်ႈၶၼႃႇဢၼ်ယႂ်ႇၼႃႇလႂ် တၵ်းပေႃႇမႃးဢေႃႈ။- 12ၸူဝ်ႈဢၼ်လွင်ႈတၢင်းၸိူဝ်းၼႆႉဢမ်ႇပႆႇပဵၼ်မႃးၼၼ်ႉၸိုင်၊ ၵွပ်ႈပိူဝ်ႈၸိုဝ်ႈသဵင်ၵဝ်လႄႈ ၶဝ်တၵ်းတီႉဢဝ်သူၼိၵ်ႈၸၢၵ်ႈငႅၼ်းသႄးလႄႈ ဢၢပ်ႈပၼ်ၵႃႈတီႈၼႂ်းၸရွပ်ႈႁေႃးတြႃးလႂ်၊ ၵႃႈတီႈၼႂ်းထွင်ႇလႂ်ဢေႃႈ။ တီႈၶုၼ်ႁေႃၶမ်းလႂ်ဢိၵ်ႇတင်းဢမၢတ်ႈၽွင်းမိူင်းလႂ်ၵေႃႈ တၵ်းဢဝ်ၵႂႃႇသူင်ႇဢေႃႈ။- 13ၵွပ်ႈပိူဝ်ႈၸိူဝ်ႉၼင်ႇၼၼ်လႄႈ တီႈသူတၵ်းမီးဢၶႂၢင်ႉတၢင်းဢၼ်လႆႈၶၢမ်ႇသၢၵ်ႈသေႇဢေႃႈ။- 14ပိူဝ်ႈၼႆလႄႈ ၼင်ႇႁိုဝ်သူတၵ်းဢမ်ႇလႆႈၶႆႈၸႂ်ဝူၼ်ႉၸႂ်ဢွၼ်တၢင်း လွင်ႈဢၼ်တၵ်းလႆႈၶိုၼ်းလၢတ်ႈၸိူဝ်ႉၼင်ႇႁိုဝ်ၼၼ်ႉၸိုင်ဝႆႉသတီႉတႃႉ။- 15လွင်ႈမၼ်းၸမ်ႉ ၵဝ်တၵ်းပၼ်သူပ်းၵႂၢမ်းတင်းၺၢၼ်ႇပိင်ႇၺႃႇဢၼ်ရၢၼ်ႇသူႇသူတင်းသဵင်ႈတင်းလူင် ဢမ်ႇလၢတ်ႈဢမ်ႇထဵင်၊ ဢမ်ႇႁႄႉဢမ်ႇၶႅၼ်လႆႈၼၼ်ႉတီႈသူဢေႃႈ။- 16ပေႃႈမႄႈ၊ ပီႈၼွင်ႉၵေႃႉသေႈ၊ ၸိူဝ်ႉၶိူဝ်းသူတၵ်းဢဝ်သူဢၢပ်ႈဢေႃႈ။ ၵမ်ႈၽွင်ႈၵေႃႈတၵ်းဢဝ်သူတၢႆဢေႃႈ။- 17ၵူၼ်းတင်းသဵင်ႈတင်းလူင်ၵေႃႈတၵ်းၸင်းသူ ၵွပ်ႈပိူဝ်ႈၸိုဝ်ႈသဵင်ၵဝ်ဢေႃႈ။- 18ၼႂ်းဝႃႈၼၼ်သေၵေႃႈ ၶူၼ်ႁူဝ်သူသေသဵၼ်ႈဢမ်ႇလႆႈလူႉလႆႈလႅဝ်။- 19ၵွပ်ႈပိူဝ်ႈတၢင်းဢၼ်သူယိူၼ်ႉၶၢမ်ႇမၼ်ႈမၼ်ႈၶိူင်ႇၶိူင်ႇလႄႈ သူတၵ်းႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ႁူဝ်ၸႂ်သူဢေႃႈ။
ၸဝ်ႈယေႇသူႉႁေႃးလၢတ်ႈလွင်ႈဢၼ်ဝဵင်းယေႇရူႉသလႅမ်ႇတၵ်းလူႉလႅဝ်
(တူၺ်း၊ မၢတ်ႈ 24:15-21။ မႃႇ 13:14-19)
20မိူဝ်ႈဢၼ်သူႁၼ်ၵူၼ်းသိုၵ်းတင်းလၢႆ လွမ်ႉႁွပ်ႈဝဵင်းယေႇရူႉသလႅမ်ႇသေလႄႈ မီးယူႇၼၼ်ႉၸိုင်၊ ဝဵင်းၼၼ်ႉၸမ်ႉ တၵ်းလူႉတၵ်းလႅဝ်ယဝ်ႉ၊ ဝႃႈၼႆ၊ ႁူႉတႃႉ။- 21မိူဝ်ႈၼၼ်ႉ ႁႂ်ႈၶဝ်ၸိူဝ်းဢၼ်မီးၼႂ်းမိူင်းယူႉတႃႉၼႆႉ ပၢႆႈၶိုၼ်ႈၵႂႃႇၵႃႈၼိူဝ်လွႆပုၼ်ႉတႃႉ။ ႁႂ်ႈၶဝ်ၸိူဝ်းဢၼ်မီးၼႂ်းဝဵင်းၼႆႉဢွၵ်ႇၵႂႃႇၵႃႈၼွၵ်ႈဝဵင်းသေ။ ယႃႇႁႂ်ႈၶဝ်ၸိူဝ်းဢၼ်မီးၼႂ်းထိူၼ်ႇၼႂ်းၶိူဝ်းတင်းလၢႆၼၼ်ႉၶဝ်ႈၵႃႈၼႂ်းဝဵင်း။- 22လွင်ႈမၼ်းၸမ်ႉ ၶိင်ႇမိုဝ်ႉဝၼ်းၼၼ်ႉပဵၼ်ၶိင်ႇဝၼ်းတၢင်းဢၼ်ၸီႇယၢင်ႇတၢမ်ႇ ႁႂ်ႈၵႃႈဢၼ်တႅမ်ႈဝႆႉၼႂ်းၵျၢမ်းလိၵ်ႈလႆႈပျေႉၸုမ်ႇဢေႃႈ။- 23ဝၼ်းမိူဝ်ႈၼၼ်ႉ တီႈမႄႈယိင်းဢၼ်တူဝ်ဢမ်ႇသႃႇ ဢိၵ်ႇတင်းမႄႈယိင်းဢၼ်မီးလုၵ်ႈဢွၼ်ႇဢၼ်ဢမ်ႇပႆႇၽၢတ်ႇၼူမ်းတင်းလၢႆၼၼ်ႉ တၵ်းမီးဢႃႉမင်ႇၵလႃႇဢေႃႈ။ လွင်ႈမၼ်းၸမ်ႉ တုၵ်ႉၶႃႉတၢင်းၽၢၼ်ဢၼ်ယႂ်ႇၼႃႇတၵ်းပဵၼ်ၵႃႈၼိူဝ်လိၼ်မိူင်းၼႆႉလႄႈ တေႃးသႃႉတၢင်းၸႂ်မႆႈတၵ်းႁွတ်ႈမႃးၵႃႈၼိူဝ်ၵူၼ်းမဵဝ်းၼႆႉဢေႃႈ။- 24ၶဝ်တၵ်းႁွတ်ႈထိုင်တၢင်းလူႉတၢင်းလႅဝ်လူၺ်ႈၽေးလၢပ်ႇၽေးလႅဝ်းဢေႃႈ။ တၵ်းတီႉဢဝ်ၶဝ်ၵႂႃႇၵႃႈတီႈတၢင်ႇဝၢၼ်ႈတၢင်ႇမိူင်းၵူႈတီႈၵူႈလႅၼ်ပုၼ်ႉဢေႃႈ။ ၸူဝ်ႈဢၼ်ၶိင်ႇၵႃႇလႃႉ ၵူၼ်းတၢင်ႇၸိူဝ်ႉတၢင်ႇၶိူဝ်းဢမ်ႇပႆႇပျေႉၸုမ်ႇၼၼ်ႉၸိုင် ၵူၼ်းတၢင်ႇၸိူဝ်ႉတၢင်ႇၶိူဝ်းၸိူဝ်းၼၼ်ႉ တၵ်းဢဝ်တိၼ်ယဵပ်ႇယမ်ႈဝဵင်းယေႇရူႉသလႅမ်ႇဢေႃႈ။
လွင်ႈတၢင်းဢၼ်လုၵ်ႈၵူၼ်းတၵ်းႁွတ်ႈမႃး
(တူၺ်း၊ မၢတ်ႈ 24:29-31။ မႃႇ 13:24-27)
25မိူဝ်ႈၼၼ်ႉ ပုၵ်ႉပႃႉၼီႉမိၵ်ႈလၢၵ်ႈၶၼႃႇ တၵ်းပေႃႇမႃးၼႂ်းၵၢင်ဝၼ်း၊ လိူၼ်၊ လၢဝ်တင်းလၢႆဢေႃႈ။ ၵႃႈၼိူဝ်လိၼ်မိူင်းၼႆႉၵေႃႈ တၵ်းပဵၼ်တၢင်းဢၼ်ၵူၼ်းၵူႈၸိူဝ်ႉၵူႈမဵဝ်းဢမ်ႇတႄႇဢမ်ႇၼိမ်လႄႈ မႆႈၸႂ်ၶီၸႂ်၊ တၢင်းဢၼ်သဵင်လႅင်းၼမ်ႉပိူပ်ႈၼမ်ႉသမ်ႇမုၵ်ႉတြႃႇဢူၼ်ဢဵၼ်မေႃးမႄးၼႃႇလူင်လၢင်၊- 26တၢင်းဢၼ်ၵူၼ်းတင်းလၢႆၸႂ်လူႉ ၵွပ်ႈပိူဝ်ႈဢၼ်ၵူဝ်ႁႄလႄႈမုင်ႈတူၺ်းၽေးဢၼ်တၵ်းပဵၼ်မႃးၵႃႈၼိူဝ်လိၼ်မိူင်းၼႆႉၼၼ်ႉၸိူဝ်းၼၼ်ႉဢေႃႈ။ လွင်ႈမၼ်းၸမ်ႉ တၼ်းၶူဝ်းၵၢင်ႁၢဝ်တင်းလၢႆတၵ်းသၼ်ႇၶွၼ်းဝႆဢေႃႈ။- 27မိူဝ်ႈၼၼ်ႉ ၵူၼ်းတင်းလၢႆတၵ်းလႆႈႁၼ်လုၵ်ႈၵူၼ်းပႃးတင်းမုၼ်တၼ်းၶူဝ်းဢႃႇၼူႉၽေႃႇမၼ်းၸဝ်ႈဢၼ်ယႂ်ႇၼႃႇၼၼ်ႉသေလႄႈ မႃးၵႃႈၼိူဝ်မွၵ်ႇၵုမ်ႈဢေႃႈ။- 28မိူဝ်ႈဢၼ်လွင်ႈတၢင်းၸိူဝ်းၼႆႉၸႃႉပဵၼ်မႃးၼၼ်ႉၸိုင်၊ ၵွပ်ႈပိူဝ်ႈၶိင်ႇဢၼ်တၵ်းထုတ်ႇဢဝ်သူၼၼ်ႉၸမ်တၵ်းႁွတ်ႈမႃးယဝ်ႉလႄႈ၊ မုင်ႈတူၺ်းလႄႈငွၵ်ႈႁူဝ်တႃႉ၊ ဝႃႈၼင်ႇၼႆဢေႃႈ။
ၵႂၢမ်းဢူႉပမႃႇလွင်ႈတူၼ်ႈမၢၵ်ႇလိူဝ်ႇ
(တူၺ်း၊ မၢတ်ႈ 24:32-35။ မႃႇ 13:28-31)
29မၼ်းၸဝ်ႈသမ်ႉ ဢဝ်ၵႂၢမ်းဢူႉပမႃႇလၢတ်ႈထႅင်ႈလႄႈဝႃႈၸမ်ႉ၊ တူၺ်းၸႃႉၸဵမ်တူၼ်ႈမၢၵ်ႇလိူဝ်ႇသၢင်းၽေႃး ဢိၵ်ႇတင်းတူၼ်ႈမႆႉတင်းသဵင်ႈတင်းလူင်တႃႉ။- 30မိူဝ်ႈဢၼ်မႂ်မၼ်းဢွၵ်ႇမႃးၼၼ်ႉၸိုင် သူႁူႉႁၼ်လွင်ႈဢၼ်ၸမ်တၵ်းႁွတ်ႈထိုင်ၶိင်ႇႁႅင်ႈဢေႃႈ။- 31မိူၼ်ၼင်ႇၼၼ် မိူဝ်ႈဢၼ်သူလႆႈႁၼ်လွင်ႈတၢင်းၸိူဝ်းၼႆႉပဵၼ်မႃးယူႇၼၼ်ႉၸိုင်၊ ႁူႉလွင်ႈဢၼ်မိူင်းၽြႃးပဵၼ်ၸဝ်ႈၸမ်တၵ်းတႄႇပဵၼ်ယဝ်ႉၼၼ်ႉတႃႉ။- 32ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ လွင်ႈတၢင်းတင်းသဵင်ႈတင်းလူင်ၸိူဝ်းၼႆႉတၵ်းပဵၼ်မႃး ၸူဝ်ႈဢၼ်ၵူၼ်းဢၼ်မီးယူႇတေႃႈလဵဝ်ၸိူဝ်းၼႆႉဢမ်ႇပႆႇသဵင်ႈပႆႇမူတ်းဢေႃႈ။- 33ပိၵ်ႉသမ်ႉၽႃႉၵၢင်ႁၢဝ်တင်းလိၼ်မိူင်းၼႆႉ တၵ်းႁၢႆလၢႆသေၵေႃႈ၊ ၵႂၢမ်းၵဝ်ၼႆႉတၵ်းဢမ်ႇႁၢႆလၢႆ။- 34သူႁဵတ်းသတီႉတီႈတူဝ်သူတႃႉ။ ပေႃးဢမ်ႇၼၼ် ၼႂ်းမိူဝ်ႈဢၼ်ႁူဝ်ၸႂ်ယင်းတိုၵ်ႉယၢပ်ႇၸႂ်ယုင်ႈၸႂ် ၵွပ်ႈပိူဝ်ႈတၢင်းဢၼ်ၵိၼ်ဢၼ်ၶူပ်းပူၼ်ႉလိူဝ်၊ တၢင်းဢၼ်ၶႆႈၸႂ်ဝူၼ်ႉၸႂ်လူၺ်ႈလွင်ႈလေႃးၵီႇၸိူဝ်းၼၼ်ႉယူႇၼၼ်ႉၸိုင်၊ သူယင်းဢမ်ႇႁူႉဢမ်ႇႁၼ်လႄႈ ဝၼ်းၼၼ်ႉတၵ်းထူပ်းမႅၼ်ႈသူဢေႃႈ။- 35ဝၼ်းၼၼ်ႉတၵ်းႁူမ်ႇမႅၼ်ႈၶဝ်ၸိူဝ်းဢၼ် ယူႇၵႃႈၼိူဝ်လိၼ်မိူင်းတင်းသဵင်ႈတင်းလူင် မိူၼ်ၸိူဝ်ႉၼင်ႇၶႄတမ်ႇငႃႈၼၼ်ႉဢေႃႈ။- 36ၼင်ႇႁိုဝ်သူတၵ်းပႄႉၼႅင်ႇ ႁႂ်ႈလႆႈမီးတၢင်းဢၼ်ၵၢင်းလွတ်ႈတင်းလွင်ႈတၢင်းဢၼ်တၵ်းပဵၼ်မႃးၸိူဝ်းၼၼ်ႉလႄႈ ႁွတ်ႈထိုင်ၵႃႈတီႈၽၢႆႇၼႃႈလုၵ်ႈၵူၼ်းၸိုင် သူးတွင်းတႃႇသေႇလႄႈ ပႂ်ႉထႃႈယူႇတႃႉ၊ ဝႃႈၼင်ႇၼႆဢေႃႈ။
37မၼ်းၸဝ်ႈၼၼ်ႉ၊ ၶိင်ႇၵၢင်ဝၼ်းသင်ႇသွၼ်သုင်းမႃႉပၼ်ၵႃႈၼႂ်းပိၵ်ႈမၢၼ်ႇၸဝ်ႈယူႇဢေႃႈ။ မိူဝ်ႈဢၼ်ႁွတ်ႈထိုင်ၶိင်ႇၵၢင်ၶမ်ႈၸိုင်၊ မၼ်းၸဝ်ႈၵႂႃႇၵႃႈတီႈလွႆဢၼ်လႆႈၸိုဝ်ႈသၢၼ်ႇလုၼ်ႇၼၼ်ႉလႄႈ ႁႂ်ႈပူၼ်ႉၶိုၼ်းဢေႃႈ။- 38ၵၢင်ၼႂ်ၸဝ်ႉၸဝ်ႉ ၵူၼ်းတင်းသဵင်ႈတင်းလူင်ၵႂႃႇၸူးတီႈမၼ်းၸဝ်ႈၵႃႈၼႂ်းပိၵ်ႈမၢၼ်ႇၸဝ်ႈ ႁႂ်ႈလႆႈထွမ်ႇလႆႈငိၼ်းၵႂၢမ်းမၼ်းၸဝ်ႈဢေႃႈ။
Pilihan Saat Ini:
လူႉၵႃႇ 21: CBMS
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Copyright © 2021 by OMF International, Shan Baptist Churches Fellowship
