လူႉၵႃႇ 22

လွင်ႈယူႉတႃႉဢီႉသၵႃႇရေႇဢုတ်ႈၶၢႆၸဝ်ႈယေႇသူႉ

(တူၺ်း၊ မၢတ်ႈ 26:14-16။ မႃႇ 14:10-11)

1မိူဝ်ႈၼၼ်ႉၸမ်ၶိင်ႇဢၼ်တၵ်းၶၢမ်ႇပွႆးၶဝ်ႈမုၼ်း ဢၼ်ဢမ်ႇပႃးၸိူဝ်ႉပႅင်ႈဢၼ်လႆႈၸိုဝ်ႈပႃႉသၶႃႇၼၼ်ႉဢေႃႈ။- 2ယိတ်ႈပရေႃးႁဵၵ်ႈလူင် ဢိၵ်ႇတင်းၵူၼ်းထုတ်ႇၵျၢမ်းတင်းလၢႆ ၵျၢမ်ႇႁႃလွင်ႈဢၼ်တၵ်းလႆႈဢဝ်မၼ်းၸဝ်ႈတၢႆၸိူဝ်ႉၼင်ႇႁိုဝ်ၼၼ်ႉယူႇဢေႃႈ။ ႁဵတ်းသင်လႄႈၶဝ်ၵျၢမ်ႇႁႃလွင်ႈမၼ်းယူႇဝႃႈၼႆၸမ်ႉ၊ ၶဝ်ၵူဝ်ၵူၼ်းတင်းလၢႆဢေႃႈ။- 3မိူဝ်ႈၼၼ်ႉ ၸႃႇတၢၼ်ႇ ၶဝ်ႈၼႂ်းယူႉတႃႉ ဢၼ်ႁွင်ႉႁဵၵ်ႈဢီႉသၵႃႇရေႇဢုတ်ႈ ဢၼ်ပႃးၼႂ်းသိပ်းသွင်ပႃးၼၼ်ႉဢေႃႈ။- 4မၼ်းၼၼ်ႉၵႂႃႇၵႃႈတီႈယိတ်ႈပရေႃးႁဵၵ်ႈလူင် ဢိၵ်ႇတင်းၵႄႇပိၵ်ႈမၢၼ်ႇၸဝ်ႈတင်းလၢႆသေယဝ်ႉ၊ တိူင်ႇပၢင်ႇလၢတ်ႈၸႃၵၼ် လူၺ်ႈလွင်ႈဢၼ်တၵ်းလႆႈဢဝ်ယေႇသူႉဢၢပ်ႈပၼ်ၸိူဝ်ႉၼင်ႇႁိုဝ်ၼၼ်ႉတီႈၶဝ်ၼၼ်ႉဢေႃႈ။- 5ၶဝ်ၼၼ်ႉၸူမ်းသိူဝ်းလႄႈတၵ်းပၼ်ငိုၼ်းဝႃႈၼႆ ႁပ်ႉတုင်းဢဝ်ဢေႃႈ။- 6မၼ်းၵေႃႈႁပ်ႉတုင်းဢဝ်ယဝ်ႉၸင်ႇ ၵျၢမ်ႇႁႃၶိင်ႇၵႃႇလႃႉဢၼ်ထုၵ်ႇႁႂ်ႈလႆႈဢဝ်မၼ်းၸဝ်ႈဢၢပ်ႈပၼ်တီႈၶဝ် ၼႂ်းၶိင်ႇမိူဝ်ႈဢၼ်ၵူၼ်းဢၼ်ၸူႉဢၼ်တုမ်ဢမ်ႇမီးၼၼ်ႉယူႇဢေႃႈ။

ၸဝ်ႈယေႇသူႉမႄးႁႅၼ်းပွႆးပႃႉသၶႃႇ

(တူၺ်း၊ မၢတ်ႈ 26:17-25။ မႃႇ 14:12-21။ ယူဝ်း 13:21-30)

7ဝၼ်းပွႆးၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈ၊ ဝၼ်းဢၼ်တၵ်းလႆႈဢဝ်သူဝ်းဢွၼ်ႇပႃႉသၶႃႇတၢႆၼၼ်ႉႁွတ်ႈထိုင်မႃးသေယဝ်ႉ၊- 8မၼ်းၸဝ်ႈပွႆႇၸႂ်ႉ ပေႇတရူႉတင်းယူဝ်းႁၢၼ်ႇလႄႈဝႃႈ၊ သူၵႂႃႇလႄႈမႄးႁႅၼ်းဝႆႉပွႆးပႃႉသၶႃႇပုၼ်ႈဢၼ်ႁဝ်းတၵ်းၵိၼ်တႃႉ၊ ဝႃႈၼင်ႇၼႆဢေႃႈ။- 9ၶဝ်ၵေႃႈလဝ်ႊထၢမ်လႄႈဝႃႈ၊ ၸဝ်ႈႁဝ်းမီးဢလူဝ်ႇၶႂ်ႈႁႂ်ႈႁဝ်းၶႃႈမႄးႁႅၼ်းဝႆႉၵႃႈတီႈလႂ်ၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 10မၼ်းၸဝ်ႈၵေႃႈလၢတ်ႈလႄႈဝႃႈ၊ တူၺ်းလူး၊ မိူဝ်ႈဢၼ်သူၶဝ်ႈၵႂႃႇၵႃႈၼႂ်းဝဵင်းပုၼ်ႉၼၼ်ႉ၊ သူတၵ်းထူပ်းႁၼ်ၵေႃႉဢၼ်ပႃးမေႃႈၼမ်ႉယူႇဢေႃႈ။ ၸွမ်းပႃႈလင်ၵေႃႉၼၼ်ႉၵႂႃႇလႄႈ ၶဝ်ႈၵႃႈၼႂ်းႁိူၼ်းဢၼ်မၼ်းၶဝ်ႈၼၼ်ႉသေယဝ်ႉ၊ လၢတ်ႈတီႈၸဝ်ႈႁိူၼ်းၼၼ်ႉလႄႈဝႃႈ၊ သြႃႇထၢမ်ဝႃႈ၊- 11လုၵ်းၶႅၵ်ႇဢၼ်ၵဝ်ဢိၵ်ႇတင်းတပႄးၵဝ်တင်းလၢႆတၵ်းၵိၼ်ပွႆးပႃႉသၶႃႇၼၼ်ႉၸမ်ႉ၊ မီးၵႃႈလႂ်၊ ဝႃႈၼင်ႇၼႆတႃႉ။- 12ၵေႃႉၼၼ်ႉတၵ်းၼႄပၼ်လုၵ်းလူင်ႁၢၼ်ႉၼိူဝ် ဢၼ်မႄးႁႅၼ်းဝႆႉယဝ်ႉၼၼ်ႉဢေႃႈ။ မႄးႁႅၼ်းဝႆႉၵႃႈတီႈၼၼ်ႈတႃႉ၊ ဝႃႈၼင်ႇၼႆဢေႃႈ။- 13တပႄးၸဝ်ႈၸိူဝ်းၼၼ်ႉ ၵႂႃႇသေယဝ်ႉ၊ ထူပ်းႁၼ်ၸိူဝ်ႉၼင်ႇဢၼ်မၼ်းၸဝ်ႈလၢတ်ႈၼၼ်ႉလႄႈ မႄးႁႅၼ်းပွႆးပႃႉသၶႃႇဝႆႉဢေႃႈ။

လွင်ႈတၢင်းဢၼ်ၵိၼ်ပွႆးၸဝ်ႈ

(တူၺ်း၊ မၢတ်ႈ 26:26-30။ မႃႇ 14:22-26။ 1 ၵေႃး 11:23-25)

14မိူဝ်ႈဢၼ်ၶိင်ႇမၼ်းထိုင်ၸိုင်၊ မၼ်းၸဝ်ႈဢိင်ယူႇလူၺ်ႈၵၼ်တင်းတမၢၼ်ႇၸဝ်ႈသိပ်းသွင်ပႃးလႄႈ၊- 15လၢတ်ႈဝႃႈ၊ ၸူဝ်ႈဢၼ်ၵဝ်ဢမ်ႇပႆႇလႆႈၶၢမ်ႇတၢင်းတၢႆၼၼ်ႉၸိုင်၊ ၵဝ်မီးဢလူဝ်ႇၶႂ်ႈၵိၼ်ပွႆးပႃႉသၶႃႇၼႆႉလူၺ်ႈၵၼ်တင်းသူၼမ်ၼႃႇလူင်လၢင်ဢေႃႈ။- 16ၵဝ်ဝႃႈတီႈသူၸမ်ႉ၊ ၸူဝ်ႈဢၼ်ပွႆးပႃႉသၶႃႇၼႆႉ ဢမ်ႇပႆႇပျေႉၸုမ်ႇၼႂ်းမိူင်းၽြႃးပဵၼ်ၸဝ်ႈပုၼ်ႉၸိုင်၊ ၵဝ်တၵ်းဢမ်ႇၵိၼ်ထႅင်ႈ၊ ဝႃႈၼင်ႇၼႆသေယဝ်ႉ၊- 17ႁပ်ႉၶၢမ်ႇဢဝ်ၵွၵ်းလႄႈယွင်ႈယေႃးၵျေးၸူးၸဝ်ႈယဝ်ႉၸင်ႇလၢတ်ႈလႄႈဝႃႈ၊ ၵေႃႉၼိုင်ႈလႄႈၵေႃႉၼိုင်ႈ ဢဝ်ၵွၵ်းၼႆႉမႅင်ႇပၼ်ၵၼ်တႃႉ။- 18ၵဝ်ဝႃႈတီႈသူၸမ်ႉ၊ ၸႃႉၸဵမ်တေႃႈလဵဝ်ၼႆႉလႄႈတေႃႇထိုင်ႁွတ်ႈၸူဝ်ႈဢၼ်မိူင်းၽြႃးပဵၼ်ၸဝ်ႈဢမ်ႇပႆႇႁွတ်ႈထိုင်ယဝ်ႉၼၼ်ႉၸိုင်၊ ၵဝ်တၵ်းဢမ်ႇၵိၼ်ၼမ်ႉမၢၵ်ႇၸပိတ်ႈထႅင်ႈ၊ ဝႃႈၼင်ႇၼႆဢေႃႈ။

19မိူဝ်ႈၼၼ်ႉ မၼ်းၸဝ်ႈဢဝ်ၶဝ်ႈမုၼ်းလႄႈယွင်ႈယေႃးၵျေးၸူးၸဝ်ႈယဝ်ႉၸင်ႇ၊ ဝိတ်းၶဝ်ႈမုၼ်းလႄႈလၢတ်ႈတီႈၶဝ်ၼၼ်ႉလႄႈဝႃႈ၊ ၶဝ်ႈမုၼ်းၼႆႉၸမ်ႉ၊ ပဵၼ်တူဝ်ၵဝ်ဢၼ်ၸုၼ်ႉပႅတ်ႈပုၼ်ႈသူဢေႃႈ။ ပုၼ်ႈဢၼ်တၵ်းလႆႈၶုၵ်းၸႂ်လႆႈၶႆႈၸႂ်ထူပ်းၵဝ်ၸိုင်၊ ဢွၼ်ၵၼ်ႁဵတ်းၸိူဝ်ႉၼင်ႇၼႆတႃႉ၊ ဝႃႈၼင်ႇၼႆဢေႃႈ။- 20ပိူင်လဵဝ်ၵၼ်၊ ၵိၼ်ၶဝ်ႈၶမ်ႈသေယဝ်ႉ၊ ၵွၵ်းၵေႃႈမၼ်းၸဝ်ႈဢဝ်လႄႈလၢတ်ႈဝႃႈ၊ ၵွၵ်းၼႆႉၸမ်ႉ၊ ပဵၼ်ပတီႉၺိၺ်ႇတြႃးဢၼ်မႂ်ႇ ဢၼ်တႄႇယူႇၼႂ်းလိူတ်ႈၵဝ် ဢၼ်သွၼ်းလေႃႇပုၼ်ႈသူဢေႃႈ။- 21ၼႂ်းဝႃႈၼၼ်သေၵေႃႈ တူၺ်းလူး၊ မိုဝ်းၵေႃႉဢၼ်ဢဝ်ၵဝ်ဢၢပ်ႈၼၼ်ႉမီးယူႇလူၺ်ႈၵၼ်တင်းၵဝ်ၵႃႈၼိူဝ်ၶူင်ႇတီႈၵိၼ်ၼႆႉဢေႃႈ။- 22လုၵ်ႈၵူၼ်းတၵ်းလႆႈၵႂႃႇၵႃႈၼင်ႇဢၼ်မၼ်းၸဝ်ႈမၵ်းၶၢၼ်းဝႆႉၼၼ်ႉဢေႃႈ။ ၼႂ်းဝႃႈၼၼ်သေၵေႃႈ ၵေႃႉဢၼ်ဢဝ်လုၵ်ႈၵူၼ်းဢၢပ်ႈၼၼ်ႉ မီးဢႃႉမင်ႇၵလႃႇဢေႃႈ၊ ဝႃႈၼင်ႇၼႆဢေႃႈ။- 23ၶဝ်ၵေႃႈ၊ ၵေႃႉၼိုင်ႈလႄႈၵေႃႉၼိုင်ႈတွင်ႈထၢမ်ၵၼ်လွင်ႈဢၼ်ၼႂ်းၶဝ်ၼၼ်ႉ ၽူႈလႂ်တၵ်းႁဵတ်းလွင်ႈတီႈႁဵင်းၼႆႉၼၼ်ႉဢေႃႈ။

24လိူဝ်သေၼၼ်ႉ၊ ၵွပ်ႈပိူဝ်ႈဢၼ်ၶဝ်ၵေႃႉၼိုင်ႈလႄႈၵေႃႉၼိုင်ႈ မီးတၢင်းဢၼ်လၢတ်ႈၵၼ်ထဵင်ၵၼ်လူၺ်ႈလွင်ႈဢၼ်ၼႂ်းၶဝ်ၼၼ်ႉ ၽူႈလႂ်တၵ်းပဵၼ်ၵေႃႉဢၼ်ယဵင်ႈၶႅၼ်းယႂ်ႇမျၢတ်ႈၼႃႇၼၼ်ႉယူႇလႄႈ၊- 25မၼ်းၸဝ်ႈလၢတ်ႈလႄႈဝႃႈ၊ ၶုၼ်ႁေႃၶမ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၼၼ်ႉ ၸၢင်ႈဢုပ်ႉၸၢင်ႈပိူင်ႇဢေႃႈ။ ၶဝ်ၸိူဝ်းဢၼ်ဝႆႉဢႃႇၼႃႇတင်းလၢႆၼၼ်ႉၵေႃႈ လႆႈၶၢမ်ႇတၢင်းဢၼ်ပိူၼ်ႈႁွင်ႉဝႃႈၸဝ်ႈၵျေးၸူးဢေႃႈ။- 26သူၸမ်ႉ၊ဢမ်ႇလႆႈႁဵတ်းၸိူဝ်ႉၼင်ႇၼၼ်။ ၼႂ်းသူၼႆႉႁႂ်ႈၵေႃႉဢၼ်ႁဵတ်းၵူၼ်းယႂ်ႇပိူၼ်ႈၼၼ်ႉ ပဵၼ်ၸိူဝ်ႉၼင်ႇၵူၼ်းဢွၼ်ႇတႃႉ။ ၵေႃႉဢၼ်ဢုပ်ႉပိူင်ႇၵေႃႈ ႁႂ်ႈပဵၼ်ၸိူဝ်ႉၼင်ႇၵူၼ်းၸႂ်ႉၵူၼ်းသွႆတႃႉ။- 27ၽူႈလႂ်ယဵင်ႈၶႅၼ်းယႂ်ႇမျၢတ်ႈၼႃႇသေပိူၼ်ႈ။ ၵေႃႉဢၼ်ဢိင်ယူႇၵႃႈတီႈႁိမ်းၶူင်ႇတီႈၵိၼ်ယႂ်ႇမျၢတ်ႈႁိုဝ်။ ၵေႃႉဢၼ်ႁဵတ်းလဵင်ႉႁဵတ်းလူယႂ်ႇမျၢတ်ႈႁိုဝ်။ ၵေႃႉဢၼ်ဢိင်ယူႇၵႃႈႁိမ်းၶူင်ႇတီႈၵိၼ်ယႂ်ႇမျၢတ်ႈဢမ်ႇၸႂ်ႈႁိုဝ်။ ၼႂ်းဝႃႈၼၼ်သေၵေႃႈ ၵဝ်ပဵၼ်ၸိူဝ်ႉၼင်ႇၵေႃႉဢၼ်ႁဵတ်းလဵင်ႉႁဵတ်းလူၼၼ်ႉၵႃႈတီႈၼႂ်းသူၼႆႉဢေႃႈ။- 28သူပဵၼ်ၵေႃႉဢၼ်ႁူမ်ႈလူၺ်ႈၵၼ်တင်းၵဝ်ယူႇ ၼႂ်းမိူဝ်ႈဢၼ်ၵဝ်လႆႈၶၢမ်ႇတၢင်းဢၼ်ၸၢမ်းတူၺ်းယႃႉယူၵ်ႉၼၼ်ႉဢေႃႈ။- 29ၸိူဝ်ႉၼင်ႇဢၼ်ၸဝ်ႈပေႃႈၵဝ်ပၼ်မိူင်းတီႈၵဝ်ၼၼ်ႉ၊- 30ၵဝ်တၵ်းပၼ်ဢၶႂၢင်ႉဢၼ်သူတၵ်းလႆႈၵိၼ်ၵႃႈတီႈၶူင်ႇတီႈၵိၼ်ၵဝ်ၼႂ်းမိူင်းၵဝ်ၼၼ်ႉ ဢိၵ်ႇတင်းဢၶႂၢင်ႉဢၼ်တၵ်းလႆႈၼင်ႈၵႃႈၼိူဝ်ပလၢင်ႇတြႃးသေလႄႈ ၸီႇယၢင်ႇၵူၼ်းဢီႉသရေႇလႃႉသိပ်းသွင်မဵဝ်းၼၼ်ႉတီႈသူဢေႃႈ။

ၸဝ်ႈယေႇသူႉႁေႃးထႃႈလွင်ႈပေႇတရူႉတေထဵင်ပႅတ်ႈ

(တူၺ်း၊ မၢတ်ႈ 26:31-35။ မႃႇ 14:27-31။ ယူဝ်း 13:36-38)

31 သီႉမုၼ်ႇဢိူၺ်း၊ သီႉမုၼ်ႇဢိူၺ်း၊ ပိူဝ်ႈဢၼ်ၸႃႇတၢၼ်ႇ ယွၼ်းဢၶႂၢင်ႉႁႂ်ႈလႆႈၶိုင်သူတူၵ်း ၸိူဝ်ႉၼင်ႇဢၼ်ၶိုင်သၢၼ်ၶဝ်ႈၵျုင်ႇတူၵ်းၼၼ်ႉလႄႈ၊- 32ၼင်ႇႁိုဝ်တၢင်းယုမ်ႇမၢတ်ႈမႂ်းတၵ်းဢမ်ႇလူႉၸိုင်၊ ၵဝ်သူးတွင်းပုၼ်ႈမႂ်းယဝ်ႉ။ မိူဝ်ႈဢၼ်မႂ်းၶိုၼ်းလႆႈသတီႉၼၼ်ႉ၊ ႁႂ်ႈပီႈၼွင်ႉမႂ်းတင်းလၢႆမၼ်ႈၶိူင်ႇတႃႉ၊ မိူဝ်ႈဢၼ်မၼ်းၸဝ်ႈဝႃႈၼင်ႇၼႆၸိုင်၊- 33မၼ်းၵေႃႈလဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ၵဝ်ၶႃႈၼႆႉ၊ ၼင်ႇႁိုဝ်တၵ်းလႆႈၸွမ်းလူၺ်ႈၵၼ်တင်းၸဝ်ႈႁဝ်းၵႂႃႇ ၵႃႈတီႈထွင်ႇလႂ်၊ ၵႃႈတီႈတၢင်းဢၼ်ဢဝ်တၢႆလႂ်ၼၼ်ႉၸိုင်၊ တၼ်းဝႆႉယဝ်ႉၶႃႈယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊- 34မၼ်းၸဝ်ႈၵေႃႈလၢတ်ႈလႄႈဝႃႈ၊ ပေႇတရူႉဢိူၺ်း၊ ၵဝ်ဝႃႈတီႈမႂ်းၸမ်ႉ၊ ၼႂ်းဝၼ်းမိူဝ်ႈၼႆႉ ၸူဝ်ႈဢၼ်ၵႆႇဢမ်ႇပႆႇၶၼ်ၼၼ်ႉၸိုင်၊ မႂ်းတၵ်းတွပ်ႇထဵင်လွင်ႈဢၼ်မႂ်းႁူႉၵဝ်ၼၼ်ႉပႅတ်ႈ ထူၼ်ႈထိုင်သၢမ်ပွၵ်ႈဢေႃႈ၊ ဝႃႈၼင်ႇၼႆဢေႃႈ။- 35မၼ်းၸဝ်ႈသမ်ႉလၢတ်ႈထႅင်ႈလႄႈဝႃႈၸမ်ႉ၊ မိူဝ်ႈဢွၼ်တၢင်းၼၼ်ႉ၊ မိူဝ်ႈဢၼ်ၵဝ်ပွႆႇၸႂ်ႉသူ ယင်းဢမ်ႇပႃးထူင်ငိုၼ်း၊ ထူင်ပႃး၊ ၶႅပ်းတိၼ်လႄႈၵႂႃႇၼၼ်ႉၸိုင်၊ သူလူဝ်ႇထႅင်ႈသေၸိူဝ်ႉသေပိူင်ႁိုဝ်။ မိူဝ်ႈဢၼ်ထၢမ်ဝႃႈၼင်ႇၼႆၸိုင်၊ ၶဝ်ၼၼ်ႉၵေႃႈလဝ်ႊလၢတ်ႈလႄႈဝႃႈ၊ ဢမ်ႇလူဝ်ႇသေၸိူဝ်ႉသေပိူင်ၶႃႈ၊ ဝႃႈၼင်ႇၼႆသေယဝ်ႉ၊- 36မၼ်းၸဝ်ႈၵေႃႈလၢတ်ႈလႄႈဝႃႈ၊ တေႃႈလဵဝ်ၼႆႉၸမ်ႉ၊ ႁႂ်ႈၵေႃႉဢၼ်မီးထူင်ငိုၼ်းၼၼ်ႉ ပႃးဢဝ်သေၵမ်းလူၺ်ႈ။ ႁႂ်ႈၵေႃႉဢၼ်မီးထူင်ပႃးၼၼ်ႉ ပႃးဢဝ်သေၵမ်းလူၺ်ႈ။ ႁႂ်ႈၵေႃႉဢၼ်ဢမ်ႇမီးလၢပ်ႇၼၼ်ႉ ၶၢႆၶူဝ်းၼုင်ႈတၢင်းမႆမၼ်းသေလႄႈ သိုဝ်ႉဢဝ်သေၵမ်းလူၺ်ႈ။- 37လွင်ႈမၼ်းၸမ်ႉ တီႈၼႂ်းၵျၢမ်းလိၵ်ႈဢၼ်ဝႃႈ၊ ၵေႃႉၼၼ်ႉလႆႈၶၢမ်ႇတၢင်းဢၼ်ၼပ်ႉဢၢၼ်ႇၶဝ်ႈပႃးလူၺ်ႈၵၼ်တင်းၶဝ်ၸိူဝ်းဢၼ်ဢမ်ႇတြႃးၼၼ်ႉဢေႃႈ၊ ဝႃႈၼင်ႇၼႆၼၼ်ႉ တၵ်းလႆႈပျေႉၸုမ်ႇၵႃႈတီႈၵဝ်တေႃႈလဵဝ်ၼႆႉဢေႃႈ။ လွင်ႈတၢင်းဢၼ်ၸၢပ်ႈသႅင်ႇၵၼ်တင်းၵဝ်ၸိုင်၊ ႁွတ်ႈထိုင်တၢင်းဢၼ်ယဝ်ႉတူဝ်ႈယဝ်ႉဢေႃႈ၊ မၼ်းၸဝ်ႈဝႃႈၼင်ႇၼႆဢေႃႈ။- 38ၶဝ်ၼၼ်ႉၵေႃႈလဝ်ႊလၢတ်ႈလႄႈဝႃႈ၊ ၸဝ်ႈႁဝ်းတူၺ်းလူသေၵမ်းၶႃႈ။ လၢပ်ႇမီးသွင်မၢၵ်ႈၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၸဝ်ႈၵေႃႈလၢတ်ႈလႄႈဝႃႈ၊ ပေႃးယဝ်ႉ၊ ဝႃႈၼင်ႇၼႆဢေႃႈ။

ၸဝ်ႈယေႇသူႉသူးတွင်းၵႃႈၼိူဝ်လွႆသၢၼ်ႇလုၼ်ႇ

(တူၺ်း၊ မၢတ်ႈ 26:36-46။ မႃႇ 14:32-42)

39လိုၼ်းၼၼ်ႉ မၼ်းၸဝ်ႈဢွၵ်ႇသေယဝ်ႉ၊ ၵႂႃႇၸူးၵႃႈတီႈလွႆသၢၼ်ႇလုၼ်ႇ ၵႃႈၼင်ႇဢၼ်ထုင်းၸၢမ်ႇမၼ်းၸဝ်ႈမီးၼၼ်ႉလႄႈ တပႄးၸဝ်ႈတင်းလၢႆၸွမ်းပႃႈလင်မၼ်းၸဝ်ႈယူႇဢေႃႈ။- 40မၼ်းၸဝ်ႈႁွတ်ႈထိုင်ၵႃႈတီႈၼၼ်ႈသေယဝ်ႉ၊ လၢတ်ႈလႄႈဝႃႈ၊ ၼင်ႇႁိုဝ်သူတၵ်းဢမ်ႇလႆႈၶၢမ်ႇတၢင်းဢၼ်ၸၢမ်းတူၺ်းယႃႉယူၵ်ႉၸိုင်၊ ဢွၼ်ၵၼ်သူးတွင်းတႃႉ၊ ဝႃႈၼင်ႇၼႆယဝ်ႉ၊- 41ၸင်ႇၽၢတ်ႇယၢၼ်ၵၼ်တင်းၶဝ်ၼၼ်ႉၵႂႃႇသေ ၸူဝ်ႈမၢၵ်ႇႁိၼ်ထိမ်ႈၼိုင်ႈလႄႈ ၶုပ်ႉၶဝ်ႇသေယဝ်ႉ၊သူးတွင်းလႄႈဝႃႈ၊- 42ဢူဝ်းပေႃႈ၊ ပေႃးဢလူဝ်ႇၸဝ်ႈႁဝ်းမီးၸိုင်၊ ႁႂ်ႈၵွၵ်းၼႆႉပိူင်ႈသေၵဝ်ၶႃႈသေၵမ်းၶႃႈ။ ၼႂ်းဝႃႈၼၼ်သေၵေႃႈ ယႃႇႁႂ်ႈပဵၼ်ၵႃႈၼင်ႇဢၼ်ဢလူဝ်ႇၵဝ်ၶႃႈမီးသေၵမ်းတီႈၶႃႈ၊ ႁႂ်ႈပဵၼ်ၵႃႈၼင်ႇဢၼ်ဢလူဝ်ႇၸဝ်ႈႁဝ်းမီးသေၵမ်းတီႈၶႃႈ၊ ဝႃႈၼင်ႇၼႆဢေႃႈ။

43မိူဝ်ႈၼၼ်ႉ တမၢၼ်ႇၵၢင်ႁၢဝ်ပေႃႇမႃးလႄႈ လႆႈပၼ်ႁႅင်းတီႈမၼ်းၸဝ်ႈဢေႃႈ။- 44မၼ်းၸဝ်ႈၶၢမ်ႇဝူၺ်ႇတၼႃႇၼမ်ၼႃႇလူင်လၢင်သေလႄႈ ယဵင်ႈၶႅၼ်းၵျူဝ်းၸႃးသူးတွင်းယူႇဢေႃႈ။ ႁိူဝ်ႇမၼ်းၸဝ်ႈဢၼ်ဢွၵ်ႇၼၼ်ႉၸမ်ႉ၊ ပဵၼ်ၸိူဝ်ႉၼင်ႇယွတ်ႇလိူတ်ႈလူင်ဢၼ်တူၵ်းၵႃႈၼိူဝ်လိၼ်ၼၼ်ႉဢေႃႈ။- 45သူးတွင်းၸိူဝ်ႉၼင်ႇၼၼ်သေယဝ်ႉ၊ မၼ်းၸဝ်ႈလုၵ်ႉသေလႄႈ မိူဝ်ႈဢၼ်ၶိုၼ်းမႃးၸူးၵႃႈတီႈဢၼ်တပႄးၸဝ်ႈတင်းလၢႆမီးၼၼ်ႉၸိုင်၊ ထူပ်းႁၼ်ၶဝ်ၼွၼ်းလပ်းယူႇ ၵွပ်ႈပိူဝ်ႈဢၼ်ၶဝ်မီးတၢင်းၸႂ်ဢၼ်လဵၵ်ႉဢၼ်ဢူၼ်ႈၼႃႇၼၼ်ႉလႄႈ၊- 46လၢတ်ႈတီႈၶဝ်လႄႈဝႃႈ၊ ႁဵတ်းႁိုဝ်လႄႈသူၼွၼ်းလပ်းယူႇၼင်ႇႁိုဝ်။ ၼင်ႇႁိုဝ်တၵ်းဢမ်ႇလႆႈၶၢမ်ႇတၢင်းဢၼ်ၸၢမ်းတူၺ်းယႃႉယူၵ်ႉၸိုင်၊ လုၵ်ႉလႄႈဢွၼ်ၵၼ်သူးတွင်းတႃႉ၊ ဝႃႈၼင်ႇၼႆဢေႃႈ။

တၢင်းဢၼ်တီႉဢဝ်ၸဝ်ႈယေႇသူႉ

(တူၺ်း၊ မၢတ်ႈ 26:47-56။ မႃႇ 14:43-50။ ယူဝ်း 18:3-11)

47ၼႂ်းမိူဝ်ႈဢၼ်မၼ်းၸဝ်ႈလၢတ်ႈၸိူဝ်ႉၼင်ႇၼႆယူႇၼၼ်ႉၸိုင်၊ ၵူၼ်းဢၼ်ၸူႉဢၼ်တုမ်ၼမ်ၼႃႇမႃးလႄႈ ယူႉတႃႉဢီႉသၵႃႇရေႇဢုတ်ႈ ဢၼ်ပႃးၼႂ်းသိပ်းသွင်ပႃးၼၼ်ႉဢွၼ်ႁူဝ်ၶဝ်ယူႇသေလႄႈ သုတ်ႉၸပ်းသုတ်ႉၸူးတီႈယေႇသူႉလႄႈ ႁႂ်ႈလႆႈၼူမ်မၼ်းၸဝ်ႈဢေႃႈ။- 48ယေႇသူႉၵေႃႈထၢမ်လႄႈဝႃႈ၊ ယူႉတႃႉဢိူၺ်း၊ မႂ်းႁဵတ်းတၢင်းဢၼ်ၼူမ်သေလႄႈဢဝ်လုၵ်ႈၵူၼ်းဢၢပ်ႈႁိုဝ်။ ဝႃႈၼင်ႇၼႆဢေႃႈ။- 49ၶဝ်ၸိူဝ်းဢၼ်ပႃးလူၺ်ႈၵၼ်တင်းမၼ်းၸဝ်ႈၼၼ်ႉ ႁၼ်လွင်ႈတၢင်းဢၼ်တၵ်းပဵၼ်မႃးၼၼ်ႉသေယဝ်ႉ၊ လဝ်ႊထၢမ်လႄႈဝႃႈ၊ ၸဝ်ႈႁဝ်း၊ ႁဝ်းၶႃႈတၵ်းလႆႈဢဝ်လၢပ်ႇၽၼ်းၶႃႈႁိုဝ်။ ဝႃႈၼင်ႇၼႆသေယဝ်ႉ၊- 50ၵေႃႉၼိုင်ႈၽၼ်းၶႃႈယိတ်ႈပရေႃးႁဵၵ်ႈလူင်လႄႈ ဝၢၼ်ႁူမၼ်းၽၢႆႇၶႂႃၶၢတ်ႇၵႂႃႇဢေႃႈ။- 51ယေႇသူႉၵေႃႈၶိုၼ်းလၢတ်ႈလႄႈဝႃႈ၊ ပေႃးတႃႉ၊ ဝႃႈၼင်ႇၼႆလႄႈ ဢဝ်မိုဝ်းမၼ်းၸဝ်ႈတိူဝ်ႉသႂ်ႇဝၢၼ်ႁူမၼ်းၼၼ်ႉသေယဝ်ႉ၊ ႁႂ်ႈၶိုၼ်းလီမႃးသေဢေႃႈ။- 52မိူဝ်ႈၼၼ်ႉ ယေႇသူႉလၢတ်ႈတီႈယိတ်ႈပရေႃးႁဵၵ်ႈလူင် ဢိၵ်ႇတင်းၵႄႇပိၵ်ႈမၢၼ်ႇၸဝ်ႈတင်းၵူၼ်းပဵၼ်ၵႄႇပဵၼ်ႁူဝ် ဢၼ်ႁွတ်ႈမႃးၵႃႈတီႈမၼ်းၸဝ်ႈတင်းလၢႆၸိူဝ်းၼၼ်ႉလႄႈဝႃႈ၊ သူပႃးဢဝ်တင်းလၢပ်ႇတင်းၶွၼ်ႉမႃး ႁႂ်ႈလႆႈတီႉဢဝ်ၵဝ်မိူၼ်ၸိူဝ်ႉၼင်ႇဢၼ်တီႉဢဝ်ၸူၼ်ၼၼ်ႉလူင်ပႄႇ။- 53မိူဝ်ႈဢၼ်ၵဝ်မီးယူႇလူၺ်ႈၵၼ်တင်းသူၵႃႈၼႂ်း ပိၵ်ႈမၢၼ်ႇၸဝ်ႈၵူႈဝၼ်းၼၼ်ႉၸိုင်၊ သူဢမ်ႇယိုၼ်ႈမိုဝ်းလႄႈတီႉၵဝ်ယိပ်းၵဝ်။ ၼႂ်းဝႃႈၼၼ်သေၵေႃႈ ၶိင်ႇတေႃႈလဵဝ်ၼႆႉၸမ်ႉ၊ ပဵၼ်ၶိင်ႇသူဢေႃႈ။ တၼ်းၶူဝ်းဢၼ်လပ်းသိင်ႇၵေႃႈပဵၼ်ဢေႃႈ၊ ဝႃႈၼင်ႇၼႆဢေႃႈ။

ပေႇတရူႉထဵင်ပႅတ်ႈၸဝ်ႈယေႇသူႉ

(တူၺ်း၊ မၢတ်ႈ 26:57-58၊69-71။ မႃႇ 14:53-54၊66-72။ ယူဝ်း 18:12-18၊25-27)

54ၶဝ်ၼၼ်ႉတီႉၵမ်ဢဝ်မၼ်းၸဝ်ႈသေလႄႈ ဢဝ်ၵႂႃႇသူင်ႇၵႃႈတီႈႁိူၼ်းၶုၼ်ယိတ်ႈပရေႃးႁဵၵ်ႈဢေႃႈ။- ပေႇတရူႉၵေႃႈယူႇၵႆၵႆၸွမ်းၵႂႃႇဢေႃႈ။- 55ၶဝ်သႂ်ႇၽႆးၵႃႈၼႂ်းၵၢင်တလၢင်း ဢၼ်မီးၵႄႈႁိူၼ်းၼၼ်ႉလႄႈ ၸူႉၵၼ်တုမ်ၵၼ်ၼင်ႈယူႇလူၺ်ႈၵၼ်သေယဝ်ႉ၊ ပေႇတရူႉၵေႃႈၼင်ႈယူႇၵႃႈၼႂ်းၶဝ်ၼၼ်ႉဢေႃႈ။- 56မႄႈယိင်းဢၼ်ပဵၼ်ၵူၼ်းၸႂ်ႉၵူၼ်းသွႆၵေႃႉၼိုင်ႈ ႁၼ်မၼ်းၼင်ႈယူႇၵႃႈတီႈႁိမ်းၽႆးၼၼ်ႉသေယဝ်ႉ၊ ယႅၵ်ႉတူၺ်းမၼ်း ၸေးၸေးၸွတ်ႇၸွတ်ႇသေလႄႈလၢတ်ႈဝႃႈ၊ ၵေႃႉၼႆႉပဵၼ်ၵေႃႉဢၼ်လႆႈယူႇလူၺ်ႈၵၼ်တင်းယေႇသူႉၼၼ်ႉယဝ်ႉဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 57မၼ်းၵေႃႈထဵင်ပႅတ်ႈလႄႈဝႃႈ၊ မႄႈယိင်းဢိူၺ်း၊ ၵဝ်ဢမ်ႇႁူႉၵေႃႉၼၼ်ႉ၊ ဝႃႈၼင်ႇၼႆဢေႃႈ။

58လိုၼ်းၼၼ်ႉ ဢမ်ႇပေႃးႁိုင်၊ ၵူၼ်းတၢင်ႇၵေႃႉႁၼ်မၼ်းသေယဝ်ႉ၊ လၢတ်ႈလႄႈဝႃႈ၊ မႂ်းၼႆႉၵေႃႈၶဝ်ႈပႃးၼႂ်းၶဝ်ၼၼ်ႉဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ ပေႇတရူႉၵေႃႈလၢတ်ႈလႄႈဝႃႈ၊ ၵူၼ်းဢိူၺ်း၊ ၵဝ်ဢမ်ႇပႃးၵူၺ်ႉ၊ ဝႃႈၼင်ႇၼႆဢေႃႈ။

59လိုၼ်းၼၼ်ႉ ႁိုင်သေၼႃႇရီႇၼိုင်ႈယဝ်ႉ၊ ၵူၼ်းတၢင်ႇၵေႃႉၵေႃႈလၢတ်ႈတႄႉတႄႉဝႃႈဝႃႈလႄႈဝႃႈ၊ ၸႂ်ႈတႄႉ၊ ၵေႃႉၼႆႉပဵၼ်ၵေႃႉဢၼ်လႆႈယူႇလူၺ်ႈၵၼ်တင်းၵေႃႉၼၼ်ႉဢေႃႈ။ လွင်ႈမၼ်းၸမ်ႉ မၼ်းပဵၼ်ၵူၼ်းၵႃႇလီႉလႄးဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 60ပေႇတရူႉၵေႃႈလၢတ်ႈလႄႈဝႃႈ၊ ၵူၼ်းဢိူၺ်း၊ ၵဝ်ဢမ်ႇႁူႉလွင်ႈဢၼ်မႂ်းလၢတ်ႈၼႆႉ၊ ဝႃႈၼင်ႇၼႆဢေႃႈ။ ၼႂ်းမိူဝ်ႈဢၼ်မၼ်းယင်းတိုၵ်ႉလၢတ်ႈၵႂၢမ်းၸိူဝ်ႉၼင်ႇၼႆယူႇၼၼ်ႉၸိုင်၊ ၵႆႇၶၼ်ၵမ်းလဵဝ်ဢေႃႈ။- 61မိူဝ်ႈၼၼ်ႉ ၸဝ်ႈၽြႃးဝၢႆႇၶိုၼ်းလႄႈတူၺ်းပေႇတရူႉဢေႃႈ။ ပေႇတရူႉၶုၵ်းၸႂ်လႆႈၶႆႈၸႂ်ထူပ်း ၵႂၢမ်းဢၼ်မၼ်းၸဝ်ႈလၢတ်ႈဝႆႉလႄႈဝႃႈ၊ ၸူဝ်ႈဢၼ်ၵႆႇဢမ်ႇပႆႇၶၼ်ၼၼ်ႉၸိုင်၊ မႂ်းတၵ်းထဵင်ပႅတ်ႈၵဝ် ထူၼ်ႈထိုင်သၢမ်ပွၵ်ႈဢေႃႈ၊ ဝႃႈၼင်ႇၼႆၼၼ်ႉသေယဝ်ႉ၊- 62ဢွၵ်ႇၵႂႃႇၵႃႈၼွၵ်ႈလႄႈ ႁွင်ႉႁႆႈၼႃႇလူင်လၢင်ဢေႃႈ။

ၸဝ်ႈယေႇသူႉလႆႈၶၢမ်ႇပိူၼ်ႈႁဵတ်းပျၢၵ်ႈၶူဝ်

(တူၺ်း၊ မၢတ်ႈ 26:67-68။ မႃႇ 14:65)

63ၶဝ်ၸိူဝ်းဢၼ်ယိပ်းၵမ်မၼ်းၸဝ်ႈယူႇၼၼ်ႉ ႁဵတ်းပျၢၵ်ႈၶူဝ်မၼ်းၸဝ်ႈသေလႄႈ ယႅၼ်ႉတူပ်ႇမၼ်းၸဝ်ႈဢေႃႈ။- 64ၶဝ်ႁူမ်ႇသုမ်ႇၼႃႈမၼ်းၸဝ်ႈသေယဝ်ႉ၊ လၢတ်ႈလႄႈဝႃႈ၊ ၶႅၼ်းတေႃႈႁဵတ်းပရေႃးၽႅတ်ႈသေလႄႈ ႁေႃးလၢတ်ႈလွင်ႈဢၼ်ၽူႈလႂ်ပေႃႉယႅၼ်ႉၸဝ်ႈႁဝ်းၼၼ်ႉသေၵမ်းတီႈၶႃႈ၊ ဝႃႈၼင်ႇၼႆဢေႃႈ။- 65လိူဝ်သေၼၼ်ႉ ၶဝ်ဢဝ်တင်းၵႂၢမ်းတၢင်ႇၸိူဝ်ႉတၢင်ႇဢၼ်ၼမ်ၼႃႇ သႄႉသွမ်းမၼ်းၸဝ်ႈသေလႄႈလၢတ်ႈဝႃႈဢေႃႈ။

ၸဝ်ႈယေႇသူႉလႆႈၶၢမ်ႇၸႅတ်ႈထၢမ်ၽၢႆႇၼႃႈၶုၼ်လုမ်း

(တူၺ်း၊ မၢတ်ႈ 26:57-66။ မႃႇ 14:55-64။ ယူဝ်း 18:19-24)

66မိူဝ်ႈဢၼ်မိူင်းလႅင်းၸိုင်၊ ၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းတင်းလၢႆ ဢိၵ်ႇတင်းယိတ်ႈပရေႃးႁဵၵ်ႈလူင်တင်းၵူၼ်းထုတ်ႇၵျၢမ်းတင်းလၢႆၸူႉၵၼ်တုမ်ၵၼ်လႄႈ ဢဝ်မၼ်းၸဝ်ႈၵႂႃႇၵႃႈတီႈလုမ်းလူင်ယဝ်ႉၸင်ႇလၢတ်ႈလႄႈဝႃႈ၊- 67ပေႃးမႂ်းပဵၼ်ၸဝ်ႈၶရိၸ်ႈၸိုင်၊ လၢတ်ႈပၼ်တီႈႁဝ်းတႃႉ၊ ဝႃႈၼင်ႇၼႆဢေႃႈ။ မၼ်းၸဝ်ႈၵေႃႈလၢတ်ႈလႄႈဝႃႈ၊ ပေႃးၵဝ်လၢတ်ႈၸိုင်၊ သူဢမ်ႇယုမ်ႇ။- 68ပေႃးၵဝ်ထၢမ်ၸိုင်၊ သူဢမ်ႇၶိုၼ်းလၢတ်ႈ။- 69ၸႃႉၸဵမ်တေႃႈလဵဝ်ၼႆႉလႄႈ လုၵ်ႈၵူၼ်းတၵ်းၼင်ႈယူႇၵႃႈတီႈၽၢႆႇၶႂႃတၼ်းၶူဝ်းၽြႃးပဵၼ်ၸဝ်ႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 70ၶဝ်တင်းသဵင်ႈတင်းလူင်ၵေႃႈလၢတ်ႈလႄႈဝႃႈ၊ ပေႃးပဵၼ်ၸိူဝ်ႉၼင်ႇၼႆၸိုင်၊ မႂ်းပဵၼ်လုၵ်ႈၽြႃးပဵၼ်ၸဝ်ႈႁိုဝ်။ ဝႃႈၼင်ႇၼႆသေယဝ်ႉ၊ မၼ်းၸဝ်ႈၵေႃႈလၢတ်ႈလႄႈဝႃႈ၊ သူလၢတ်ႈၸွမ်းၵႃႈၼင်ႇဢၼ်ၵဝ်ပဵၼ်ၼၼ်ႉဢေႃႈ၊ ဝႃႈၼင်ႇၼႆဢေႃႈ။- 71ၶဝ်ၼၼ်ႉၵေႃႈလၢတ်ႈလႄႈဝႃႈ၊ ႁဝ်းတၵ်းလူဝ်ႇသၢၵ်ႈသေႇဢၼ်လႂ်ထႅင်ႈလူးၵွၼ်ႇ။ ႁဝ်းၼႆႉတူဝ်ၸဝ်ႈၵဝ်ႇလႆႈငိၼ်းၵႂၢမ်းဢၼ်ဢွၵ်ႇသူပ်းမၼ်းယဝ်ႉဢေႃႈ၊ ဝႃႈၼင်ႇၼႆဢေႃႈ။

Pilihan Saat Ini:

လူႉၵႃႇ 22: CBMS

Sorotan

Berbagi

Salin