လူႉၵႃႇ 20
20
လွင်ႈဢႃႇၼႃႇတၼ်းၶူဝ်းၸဝ်ႈယေႇသူႉ
(တူၺ်း၊ မၢတ်ႈ 21:23-27။ မႃႇ 11:27-33)
1ၼႂ်းဝၼ်းဝၼ်းၼိုင်ႈ မိူဝ်ႈဢၼ်မၼ်းၸဝ်ႈသင်ႇသွၼ်သုင်းမႃႉပၼ်တီႈၵူၼ်းတင်းလၢႆၵႃႈၼႂ်းပိၵ်ႈမၢၼ်ႇၸဝ်ႈလႄႈ ႁေႃးလၢတ်ႈတြႃးသတၢင်းသိူဝ်းပျေႃႇယူႇၼၼ်ႉၸိုင်၊ ယိတ်ႈပရေႃးႁဵၵ်ႈလူင်ဢိင်တင်းၵူၼ်းထုတ်ႇၵျၢမ်း တင်းၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆမႃးတီႈမၼ်းၸဝ်ႈလႄႈ၊- 2လဝ်ႊထၢမ်လႄႈဝႃႈ၊ ၸဝ်ႈႁဝ်းဢဝ်တင်းဢၶႂၢင်ႉဢၼ်လႂ်ႁဵတ်း လွင်ႈတၢင်းၸိူဝ်းၼႆႉၶႃႈ။ ၽူႈလႂ်ပၼ်ဢၶႂၢင်ႉၶႃႈ။ ၶႅၼ်းတေႃႈလၢတ်ႈပၼ်တီႈႁဝ်းၶႃႈသေၵမ်းၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 3မၼ်းၸဝ်ႈၵေႃႈၶိုၼ်းလၢတ်ႈလႄႈဝႃႈ၊ ၵဝ်တၵ်းထၢမ်သေၸိူဝ်ႉသေပိူင်တီႈသူလူးၵွၼ်ႇဢေႃႈ။ သူၶိုၼ်းလၢတ်ႈပၼ်တႃႉ။- 4ပပ်ႉတီႉၸမ်ႇယူဝ်းႁၢၼ်ႇၼၼ်ႉ ပဵၼ်မႃးၵႃႈတီႈၵၢင်ႁၢဝ်ႁိုဝ်။ ပဵၼ်မႃးၵႃႈတီႈၵူၼ်းႁိုဝ်။ ဝႃႈၼင်ႇၼႆဢေႃႈ။- 5ၶဝ်ၼၼ်ႉၼင်ႇၵၼ်ၵၼ်ၽွမ်ႉၵၼ်ၶႆႈၸႂ်လႄႈဝႃႈ၊ ပေႃးႁဝ်းဝႃႈ၊ ပဵၼ်မႃးၵႃႈတီႈၵၢင်ႁၢဝ်ဢေႃႈ၊ ဝႃႈၼင်ႇၼႆၸိုင်၊ မၼ်းၸဝ်ႈတၵ်းထၢမ်လႄႈဝႃႈ။ ႁဵတ်းသင်လႄႈသူဢမ်ႇယုမ်ႇမၢတ်ႈမၼ်းၼၼ်ႉၼင်ႇႁိုဝ်။ ဝႃႈၼင်ႇၼႆဢေႃႈ။- 6ပေႃးႁဝ်းဝႃႈ ပဵၼ်မႃးၵႃႈတီႈၵူၼ်းဢေႃႈ၊ ဝႃႈၼင်ႇၼႆၸိုင်၊ ၵူၼ်းတင်းသဵင်ႈတင်းလူင်တၵ်းဢဝ်မၢၵ်ႇႁိၼ်ထိမ်ႈႁဝ်းဢေႃႈ။ လွင်ႈမၼ်းၸမ်ႉ ၵူၼ်းတင်းလၢႆယုမ်ႇလွင်ႈဢၼ် ယူဝ်းႁၢၼ်ႇၼၼ်ႉပဵၼ်ပရေႃးၽႅတ်ႈဢေႃႈ၊ ဝႃႈၼင်ႇၼႆဢေႃႈ။- 7ၶဝ်ၼၼ်ႉၶိုၼ်းလၢတ်ႈလႄႈဝႃႈ၊ လွင်ႈဢၼ်ပဵၼ်မႃးၵႃႈတီႈလႂ်ၸိုင်ႁဝ်းၶႃႈဢမ်ႇႁူႉၶႃႈ၊ ဝႃႈၼင်ႇၼႆသေယဝ်ႉ၊- 8ယေႇသူႉၵေႃႈလၢတ်ႈလႄႈဝႃႈ၊ ၵဝ်ဢမ်ႇလၢတ်ႈပၼ်လွင်ႈဢၼ်ၵဝ်ဢဝ်တင်းဢၶႂၢင်ႉဢၼ်လႂ်ႁဵတ်း လွင်ႈတၢင်းၸိူဝ်းၼႆႉၼၼ်ႉတီႈသူ၊ ဝႃႈၼင်ႇၼႆဢေႃႈ။
လွင်ႈၵူၼ်းၶၢတ်ႈသူၼ်
(တူၺ်း၊ မၢတ်ႈ 21:33-46။ မႃႇ 12:1-12)
9မိူဝ်ႈၼၼ်ႉ မၼ်းၸဝ်ႈလၢတ်ႈၵႂၢမ်းဢူႉပမႃႇတီႈပရဵၵ်ႈသၢတ်ႈတင်းလၢႆလႄႈဝႃႈၸမ်ႉ၊ ၵူၼ်းၵေႃႉၼိုင်ႈၽုၵ်ႇသူၼ်မၢၵ်ႇၸပိတ်ႈသေယဝ်ႉ ၶၢတ်ႈပၼ်သူၼ်ၼၼ်ႉတီႈၶဝ်ၸိူဝ်းဢၼ်ႁဵတ်းသူၼ်တင်းလၢႆသေလႄႈ ၵႂႃႇယူႇတၢင်ႇဝၢၼ်ႈတၢင်ႇမိူင်းႁိုင်ၼႃႇဢေႃႈ။- 10မိူဝ်ႈဢၼ်ၶိင်ႇမၼ်းႁွတ်ႈထိုင်ၸိုင်၊ မၼ်းပွႆႇၸႂ်ႉၵူၼ်းဢွၼ်ႇၵႂႃႇၵႃႈတီႈဢၼ်ၶဝ်ၸိူဝ်းဢၼ်ႁဵတ်းသူၼ်မီးၼၼ်ႉ ႁႂ်ႈၶဝ်လႆႈပၼ်မၢၵ်ႇၸပိတ်ႈၵမ်ႈၽွင်ႈဢေႃႈ။ ၵူၺ်းၵႃႈၶဝ်ၸိူဝ်းဢၼ်ႁဵတ်းသူၼ်ၼၼ်ႉ ပေႃႉယႅၼ်ႉၵူၼ်းဢွၼ်ႇၼၼ်ႉသေလႄႈ ပွႆႇပႅတ်ႈတိၼ်လၢႆမိုဝ်းပဝ်ႇသေဢေႃႈ။- 11လိုၼ်းၼၼ်ႉ မၼ်းသမ်ႉပွႆႇၸႂ်ႉၵူၼ်းဢွၼ်ႇတၢင်ႇၵေႃႉၵႂႃႇသေယဝ်ႉ၊ ၶဝ်ၸိူဝ်းဢၼ်ႁဵတ်းသူၼ်ၼၼ်ႉပေႃႉယႅၼ်ႉမၼ်းလႄႈ ယႃႉသရေႇမၼ်းယဝ်ႉၸင်ႇ၊ ပွႆႇပႅတ်ႈတိၼ်လၢႆမိုဝ်းပဝ်ႇသေဢေႃႈ။- 12လိုၼ်းၼၼ်ႉ၊မၼ်းသမ်ႉပွႆႇၸႂ်ႉၵူၼ်းဢွၼ်ႇတၢင်ႇၵေႃႉၵႂႃႇသေယဝ်ႉ၊ ၶဝ်ၼၼ်ႉပေႃႉယႅၼ်ႉမၼ်းလႄႈ ႁႂ်ႈႁွႆးတၢမ်ႇႁွႆးၶွၼ်ႉမီးၼမ်ၼႃႇသေယဝ်ႉ၊ ႁေႃႈမၼ်းဢွၵ်ႇပႅတ်ႈသေဢေႃႈ။
13မိူဝ်ႈၼၼ်ႉ ၸဝ်ႈသူၼ်ၵေႃႈလၢတ်ႈလႄႈဝႃႈ၊ ၵဝ်တၵ်းလႆႈႁဵတ်းၸိူဝ်ႉၼင်ႇႁိုဝ်။ ၵဝ်တၵ်းပွႆႇၸႂ်ႉလုၵ်ႈၸၢႆးဢၼ်ၵဝ်ႁၵ်ႉၼႃႇၼၼ်ႉၵႂႃႇဢေႃႈ။ မိူဝ်ႈဢၼ်ၶဝ်ႁၼ်မၼ်းၸိုင် ၶဝ်ၸၢင်ႈၶႄးတၵ်းဢႃးၼႃႇမၼ်းဢေႃႈ၊ ဝႃႈၼင်ႇၼႆဢေႃႈ။- 14ၶဝ်ၸိူဝ်းဢၼ်ႁဵတ်းသူၼ်ၼၼ်ႉ မိူဝ်ႈဢၼ်ႁၼ်မၼ်းၼၼ်ႉမႃးၸိုင် ၵေႃႉၼိုင်ႈလႄႈၵေႃႉၼိုင်ႈ တိူင်ႇပၢင်ႇလၢတ်ႈၸႃၵၼ်လႄႈဝႃႈ၊ ၵေႃႉၼႆႉပဵၼ်ၵေႃႉဢၼ်ၶၢမ်ႇဢမူၺ်ႇဢေႃႈ။ မႃးလႄႈဢဝ်မၼ်းတၢႆတႃႉႁဝ်း။ ပေႃးႁဵတ်းၸိူဝ်ႉၼင်ႇၼၼ်ၸိုင် ႁဝ်းတၵ်းလႆႈဢမူၺ်ႇမၼ်းဢေႃႈ၊ ဝႃႈၼင်ႇၼႆသေယဝ်ႉ၊- 15ဢဝ်မၼ်းၼၼ်ႉႁေႃႈဢွၵ်ႇၵႃႈတီႈၼွၵ်ႈသူၼ်သေလႄႈ ဢဝ်တၢႆပႅတ်ႈသေဢေႃႈ။ ပေႃးပဵၼ်ၸိူဝ်ႉၼင်ႇၼႆၸိုင်၊ ၸဝ်ႈသူၼ်တၵ်းႁဵတ်းတီႈၶဝ်ၸိူဝ်းဢၼ်ႁဵတ်းသူၼ်ၼၼ်ႉၸိူဝ်ႉၼင်ႇႁိုဝ်။- 16မၼ်းတၵ်းမႃးလႄႈယႃႉပႅတ်ႈၽဵဝ်ႈပႅတ်ႈ ၶဝ်ၸိူဝ်းဢၼ်ႁဵတ်းသူၼ်ၼၼ်ႉသေယဝ်ႉ၊ တၵ်းဢဝ်သူၼ်ၼၼ်ႉ ပၼ်တီႈပိူၼ်ႈတၢင်ႇၵေႃႉဢေႃႈ၊ မၼ်းၸဝ်ႈဝႃႈၼင်ႇၼႆဢေႃႈ။ ပရဵၵ်ႈသၢတ်ႈၼၼ်ႉငိၼ်းသေယဝ်ႉ၊ လဝ်ႊလၢတ်ႈလႄႈဝႃႈ၊ ယႃႇႁႂ်ႈပဵၼ်ၸိူဝ်ႉၼင်ႇၼၼ်သေၵမ်းၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 17မၼ်းၸဝ်ႈတူၺ်းၶဝ်သေလႄႈလၢတ်ႈဝႃႈ၊ ၵျၢမ်းလိၵ်ႈဢၼ်ဝႃႈ မၢၵ်ႇႁိၼ် ဢၼ်ၶဝ်ၸိူဝ်းဢၼ်ႁဵတ်းတိူၵ်ႈပႅတ်ႈဝႆႉၼၼ်ႉ ၵမ်းလိုၼ်းပဵၼ်ႁူဝ်ၸဵင်ႇတိူၵ်ႈဢေႃႈ၊ ဝႃႈၼင်ႇၼႆၼၼ်ႉၶႂ်ႈဝႃႈၸိူဝ်ႉၼင်ႇႁိုဝ်။- 18ၽူႈလႂ်သေဢမ်ႇဝႃႈ၊ ၵေႃႉဢၼ်တူၵ်းသႂ်ႇၵႃႈၼိူဝ်မၢၵ်ႇႁိၼ်ၼႆႉၼၼ်ႉ၊ ၵေႃႉၼၼ်ႉတၵ်းႁၵ်းဢေႃႈ။ ၵႃႈၼိူဝ်ၽူႈလႂ်သေဢမ်ႇဝႃႈ၊ ဢၼ်မၢၵ်ႇႁိၼ်ၼႆႉတူၵ်းသႂ်ႇၼၼ်ႉ၊ ၵေႃႉၼၼ်ႉတၵ်းလႅဝ်ပဵၼ်မုၼ်ႈပဵၼ်ၽွင်ၵႂႃႇဢေႃႈ၊ ဝႃႈၼင်ႇၼႆဢေႃႈ။
လွင်ႈထၢမ်းၶွၼ်ႇ
(တူၺ်း၊ မၢတ်ႈ 22:15-22။ မႃႇ 12:13-17)
19မိူဝ်ႈၼၼ်ႉ ယိတ်ႈပရေႃးႁဵၵ်ႈလူင်ဢိၵ်ႇတင်းၵူၼ်းထုတ်ႇၵျၢမ်းတင်းလၢႆၼၼ်ႉ ၵွပ်ႈပိူဝ်ႈဢၼ်ၶဝ်ႁူႉလွင်ႈဢၼ်မၼ်းၸဝ်ႈဢဝ်ၵႂၢမ်းဢူႉပမႃႇၼႆႉႁေႃးလၢတ်ႈၶိတ်ႈၶဝ်ၼၼ်ႉလႄႈ ၵျၢမ်ႇႁႃႁႂ်ႈလႆႈတီႉဢဝ်မၼ်းၸဝ်ႈယူႇဢေႃႈ။ ၼႂ်းဝႃႈၼၼ်သေၵေႃႈ ၶဝ်ၵူဝ်ၵူၼ်းတင်းလၢႆလႄႈယူႇဢေႃႈ။- 20မိူဝ်ႈၼၼ်ႉ ၶဝ်လွမ်တူၺ်းမၼ်းၸဝ်ႈယူႇလႄႈ ပွႆႇၸႂ်ႉၵူၼ်းၽၢႆႇၼႂ်းဢၼ်ႁဵတ်းၼင်ႇႁၢင်ႈပဵၼ်ၵူၼ်းသိုဝ်ႈတေႃႇတင်းလၢႆၼၼ်ႉ ၵႂႃႇတီႈမၼ်းၸဝ်ႈႁႂ်ႈလႆႈႁႃဢပႅတ်ႈၼႂ်းၵႂၢမ်းမၼ်းၸဝ်ႈလႄႈ ဢဝ်မၼ်းၸဝ်ႈဢၢပ်ႈပၼ်ၵႃႈၼႂ်းမိုဝ်းၶုၼ်ဝဵင်းတင်းၶုၼ်မိူင်းတင်းလၢႆၼၼ်ႉဢေႃႈ။- 21ၶဝ်ၼၼ်ႉၵေႃႈလဝ်ႊလၢတ်ႈလႄႈဝႃႈ သြႃႇၸဝ်ႈ။ ႁဝ်းၶႃႈႁူႉလွင်ႈဢၼ်ၸဝ်ႈႁဝ်းသင်ႇသွၼ်သုင်းမႃႉပၼ်သိုဝ်ႈသိုဝ်ႈတေႃႇတေႃႇ လွင်ႈဢၼ်ၸဝ်ႈႁဝ်းယင်းဢမ်ႇထွၵ်ႈလူၺ်ႈၼႃႈၵူၼ်းလႄႈ ၼႄပျႃးသဵၼ်ႈတၢင်းၽြႃးပဵၼ်ၸဝ်ႈၸိုဝ်ႈၸိုဝ်ႈၸႂ်ႈၸႂ်ႈၼၼ်ႉယူႇၶႃႈဢေႃႈ။- 22ႁဝ်းၶႃႈထုၵ်ႇလီပၼ်ၶွၼ်ႇတီႈၶုၼ်ႁေႃၶမ်းၵေႇသႃႇၶႃႈႁိုဝ်။ ဢမ်ႇထုၵ်ႇလီပၼ်ၶႃႈႁိုဝ်။ ဝႃႈၼင်ႇၼႆဢေႃႈ။- 23မၼ်းၸဝ်ႈႁူႉႁၼ်ပရီႉယႄႇၶဝ်ၼၼ်ႉယူႇလႄႈလၢတ်ႈလႄႈဝႃႈ၊ ႁဵတ်းသင်လႄႈ သူၸၢမ်းတူၺ်းယႃႉယူၵ်ႉၵဝ်ၼင်ႇႁိုဝ်။- 24ၼႄပျႃးတေႇၼႃႇရီႇၶႅပ်းၼိုင်ႈတႃႉ။ ႁၢင်ႈၼႆႉ၊လိၵ်ႈၼႆႉၸမ်ႉပဵၼ်ႁၢင်ႈၽူႈလႂ်။ ပဵၼ်လိၵ်ႈၽူႈလႂ်၊ မိူဝ်ႈဢၼ်ဝႃႈၼင်ႇၼႆၸိုင်၊ ၶဝ်ၼၼ်ႉလဝ်ႊလၢတ်ႈလႄႈဝႃႈ၊ ပဵၼ်ႁၢင်ႈပဵၼ်လိၵ်ႈ ၶုၼ်ႁေႃၶမ်းၵေႇသႃႇၶႃႈဢေႃႈ၊ ဝႃႈၼင်ႇၼႆဢေႃႈ။- 25မၼ်းၸဝ်ႈၵေႃႈလၢတ်ႈလႄႈဝႃႈ၊ ဢဝ်ၶွင်ၶုၼ်ႁေႃၶမ်းၵေႇသႃႇ ပၼ်တီႈၶုၼ်ႁေႃၶမ်း ၵေႇသႃႇတႃႉ။ ၶွင်ၽြႃးပဵၼ်ၸဝ်ႈၵေႃႈဢဝ်ပၼ်တီႈၽြႃးပဵၼ်ၸဝ်ႈတႃႉ၊ ဝႃႈၼင်ႇၼႆဢေႃႈ။- 26ၶဝ်ၼၼ်ႉ ဢမ်ႇထူပ်းဢပႅတ်ႈၼႂ်းၵႂၢမ်းမၼ်းၸဝ်ႈၵႃႈတီႈၽၢႆႇၼႃႈၵူၼ်းတင်းလၢႆၼၼ်ႉလႆႈလႄႈ၊ ဢၢမ်းလွင်ႈၵႂၢမ်းဢၼ်မၼ်းၸဝ်ႈ ၶိုၼ်းလၢတ်ႈၼၼ်ႉသေလႄႈ ယူႇတဵတ်ႇတဵတ်ႇယဵၼ်ယဵၼ်ယူႇဢေႃႈ။
လွင်ႈလုၵ်ႉၶိုၼ်းလိပ်း
(တူၺ်း၊ မၢတ်ႈ 22:23-33။ မႃႇ 12:18-27)
27 ၸတ်ႉတူႉၵႄး ဢၼ်ၸၢင်ႈထဵင်လႄႈဝႃႈ၊ တၢင်းဢၼ်လုၵ်ႉၶိုၼ်းလိပ်းဢမ်ႇမီး၊ ဝႃႈၼင်ႇၼႆၼၼ်ႉ ၵမ်ႈၽွင်ႈၵေႃႈ သုတ်ႉၸပ်းသုတ်ႉၸူးတီႈမၼ်းၸဝ်ႈသေလႄႈ၊- 28လဝ်ႊထၢမ်လႄႈဝႃႈ၊ သြႃႇၸဝ်ႈ၊ မူဝ်းသေႇၸီႇယၢင်ႇတႅမ်ႈဝႆႉတီႈႁဝ်းၶႃႈလႄႈဝႃႈ၊ ပေႃးၵေႃႉဢၼ်ပဵၼ်ပီႈၸၢႆးမီးမေးလႄႈ ဢမ်ႇမီးလုၵ်ႈမီးလၢင်းတၢႆၵႂႃႇၸိုင်၊ ၼွင်ႉၸၢႆးမၼ်းတၵ်းလႆႈသိမ်းဢဝ်မေးမၼ်းၼၼ်ႉသေလႄႈ ႁႂ်ႈၸိူဝ်ႉၶိူဝ်းပီႈၸၢႆးမၼ်းသိုပ်ႇၵႂႃႇဢမ်ႇၶၢတ်ႇဢေႃႈ၊ ဝႃႈၼင်ႇၼႆဝႆႉယဝ်ႉၶႃႈယဝ်ႉ။- 29မီးပီႈၼွင်ႉၸဵတ်းၵေႃႉၶႃႈဢေႃႈ။ ပီႈၸၢႆးၵေႃႉယႂ်ႇဢဝ်မေးလႄႈ ဢမ်ႇမီးလုၵ်ႈမီးလၢင်းတၢႆၵႂႃႇၶႃႈဢေႃႈ။- 30ၼွင်ႉၸၢႆးမၼ်းၵေႃႉယႂ်ႇ သိမ်းဢဝ်မေးမၼ်းၼၼ်ႉလႄႈဢမ်ႇမီးလုၵ်ႈမီးလၢင်းသမ်ႉတၢႆၵႂႃႇၶႃႈဢေႃႈ။- 31မိူၼ်ၼင်ႇၼၼ် ၸႃႉၸဵမ်ၵေႃႉတႃႉတီႉယႃႉလႄႈၵေႃႉၼိုင်ႈယဝ်ႉၵေႃႉၼိုင်ႈ ၶဝ်ပီႈၼွင်ႉၸဵတ်းၵေႃႉဢဝ်မႄႈယိင်းၼၼ်ႉလႄႈ လုၵ်ႈလၢင်းယင်းဢမ်ႇၵိုတ်းဝႆႉလႄႈ တၢႆၵႂႃႇၶႃႈဢေႃႈ။- 32လိုၼ်းၼၼ်ႉ မႄႈယိင်းၼၼ်ႉၵေႃႈတၢႆၵႂႃႇၶႃႈဢေႃႈ။- 33ပိူဝ်ႈၼႆလႄႈ ၼႂ်းၶိင်ႇၵႃႇလႃႉဢၼ်လုၵ်ႉၶိုၼ်းၼၼ်ႉ၊ မႄႈယိင်းၼၼ်ႉတၵ်းပဵၼ်မေးၽူႈလႂ်ၶႃႈ။ ၶဝ်ၸဵတ်းၵေႃႉၼၼ်ႉလႆႈဢဝ်မႄႈယိင်းၼၼ်ႉယဝ်ႉၶႃႈဢေႃႈ၊ ဝႃႈၼင်ႇၼႆဢေႃႈ။
34 ယေႇသူႉၵေႃႈလၢတ်ႈလႄႈဝႃႈ၊ ၵူၼ်းၽဝႃႉတေႃႈလဵဝ်ၸိူဝ်းၼႆႉ ၸၢင်ႈႁဵတ်းတၢင်းဢၼ်ဢဝ်မေး၊ တၢင်းဢၼ်ဢဝ်ဢၢပ်ႈပၼ်ၵၼ်ဢေႃႈ။- 35ၶဝ်ၸိူဝ်းဢၼ်ထိူၵ်ႈလႆႈၶၢမ်ႇၸၢတ်ႈၼႃႈ ဢိၵ်ႇတင်းတၢင်းဢၼ်လုၵ်ႉၵႃႈတၢင်းတၢႆၶိုၼ်းလိပ်းၸိူဝ်းၼၼ်ႉ ဢမ်ႇၸၢင်ႈႁဵတ်းတၢင်းဢၼ်ဢဝ်မေး၊ တၢင်းဢၼ်ဢဝ်ဢၢပ်ႈပၼ်ၵၼ်။- 36ၶဝ်ၼၼ်ႉၵၢင်းလွတ်ႈတင်းတၢင်းတၢႆယူႇတႃႇသေႇလႄႈ ပဵၼ်ၸိူဝ်ႉၼင်ႇတမၢၼ်ႇၵၢင်ႁၢဝ်ဢမ်ႇၵႃး ပိူဝ်ႈဢၼ်ပဵၼ်ၵူၼ်းတၢင်းဢၼ်လုၵ်ႉၶိုၼ်းၼၼ်ႉလႄႈ၊ ပဵၼ်လုၵ်ႈၽြႃးပဵၼ်ၸဝ်ႈဢေႃႈ။
37လိူဝ်သေၼၼ်ႉ၊ လွင်ႈဢၼ်ၶဝ်ၸိူဝ်းဢၼ်တၢႆယဝ်ႉတင်းလၢႆ တၵ်းလုၵ်ႉၶိုၼ်းၼၼ်ႉၸိုင်၊ မူဝ်းသေႇၽုၺ်ႇဢွၵ်ႇၼႄပျႃးၼႂ်းပုၵ်ႈလွင်ႈဢၼ်လၢတ်ႈလူၺ်ႈယုမ်းမႆႉ တီႈဢၼ်မၼ်းႁွင်ႉထႃႇဝရႃႉၽြႃးလႄႈဝႃႈ၊ ၽြႃးဢႃႇပြႃႇႁၢမ်ႇ၊ ၽြႃးဢီႉၸၢၵ်ႈ၊ ၽြႃးယႃႇၵုပ်ႈဢေႃႈ၊ ဝႃႈၼင်ႇၼႆၼၼ်ႉမႃးယဝ်ႉ။- 38မၼ်းၸဝ်ႈပဵၼ်ၽြႃးၶဝ်ၸိူဝ်းဢၼ်တၢႆယဝ်ႉဢမ်ႇၸႂ်ႈ၊ ပဵၼ်ၽြႃးၶဝ်ၸိူဝ်းဢၼ်ဢသၢၵ်ႈလိပ်းယူႇဢေႃႈ။ ၵူၼ်းတင်းသဵင်ႈတင်းလူင်ဢသၢၵ်ႈလိပ်းယူႇ တီႈၽြႃးပဵၼ်ၸဝ်ႈဢေႃႈ၊ ဝႃႈၼင်ႇၼႆဢေႃႈ။
39ၵူၼ်းထုတ်ႇၵျၢမ်းၵမ်ႈၽွင်ႈၵေႃႈၶိုၼ်းလဝ်ႊလၢတ်ႈလႄႈဝႃႈ၊ သြႃႇၸဝ်ႈ။ ၵႂၢမ်းၸဝ်ႈႁဝ်းၼႆႉလီၼႃႇၶႃႈဢေႃႈ၊ ဝႃႈၼင်ႇၼႆဢေႃႈ။- 40ၵမ်းလိုၼ်း ၶဝ်ဢမ်ႇႁတ်းလဝ်ႊႁတ်းထၢမ်တီႈမၼ်းၸဝ်ႈသေၸိူဝ်ႉသေပိူင်။
ၸဝ်ႈၶရိၸ်ႈပဵၼ်ၸဝ်ႈၸိူဝ်ႉၼင်ႇႁိုဝ်
(တူၺ်း၊ မၢတ်ႈ 22:41-46။ မႃႇ 12:35-37)
41မၼ်းၸဝ်ႈၵေႃႈလၢတ်ႈလႄႈဝႃႈ၊ ၸဝ်ႈၶရိၸ်ႈပဵၼ်လုၵ်ႈ တႃႇဝိတ်ႈဢေႃႈဝႃႈၼႆ၊ ႁဵတ်းႁိုဝ်လႄႈ ၶဝ်ဝႃႈၼင်ႇႁိုဝ်။- 42တႃႇဝိတ်ႈလၢတ်ႈ ၼႂ်းၵျၢမ်းသႃႇလၢမ်ႇလႄႈဝႃႈၸမ်ႉ၊ ထႃႇဝရႃႉၽြႃးလၢတ်ႈတီႈၸဝ်ႈၵဝ်ၶႃႈလႄႈဝႃႈ၊- 43ၸူဝ်ႈဢၼ်ၵဝ်ဢမ်ႇပႆႇဢဝ်ရၢၼ်ႇသူႇမႂ်းတင်းလၢႆၶျႃးဝႆႉ ႁႂ်ႈပဵၼ်တီႈတၢင်ႇတိၼ်မႂ်းၼၼ်ႉၸိုင်။ ၼင်ႈယူႇၵႃႈတီႈၽၢႆႇၶႂႃၵဝ်တႃႉ၊ ဝႃႈၼင်ႇၼႆဢေႃႈ။- 44ပိူဝ်ႈၼႆလႄႈ ၸဝ်ႈၶရိၸ်ႈၼၼ်ႉ၊ ပေႃးတႃႇဝိတ်ႈႁွင်ႉဝႃႈ၊ ၸဝ်ႈႁဝ်း၊ ဝႃႈၼင်ႇၼႆၸိုင်၊ ပဵၼ်လုၵ်ႈမၼ်းၸိူဝ်ႉၼင်ႇႁိုဝ်။ ဝႃႈၼင်ႇၼႆဢေႃႈ။
ၸဝ်ႈယေႇသူႉပၼ်သတီႉႁႂ်ႈဝႄႈသြႃႇမေႃၵျၢမ်း
(တူၺ်း၊ မၢတ်ႈ 23:1-36။ မႃႇ 12:38-40)
45ၼႂ်းမိူဝ်ႈဢၼ် ပရဵၵ်ႈသၢတ်ႈၸိူဝ်းၼၼ်ႉယင်းတိုၵ်ႉထွမ်ႇငိၼ်းယူႇၼၼ်ႉၸိုင်၊ မၼ်းၸဝ်ႈသမ်ႉလၢတ်ႈတီႈတပႄးၸဝ်ႈတင်းလၢႆထႅင်ႈလႄႈဝႃႈၸမ်ႉ၊- 46ဝႄႈပႅတ်ႈၵူၼ်းထုတ်ႇၵျၢမ်းတင်းလၢႆတႃႉ။ ၶဝ်ၼၼ်ႉမီးဢလူဝ်ႇၶႂ်ႈၼုင်ႈသိူဝ်ႈဢၼ်ယၢဝ်းသေလႄႈ ၵႂႃႇလႄႇၵႂႃႇလၢဝ်းလႄႈ၊ ထုၵ်ႇၸႂ်ၵျိူၵ်ႈၸႂ်တၢင်းဢၼ်ပိူၼ်ႈႁဵတ်းရူဝ်ႇသေႇၵူဝ်ယမ်လႄႈ တၵ်ႉလၢတ်ႈၵႃႈၼႂ်းၵၢတ်ႇလႂ်၊ တီႈၼင်ႈဢၼ်သုင်ဢၼ်မျၢတ်ႈ ၼႂ်းၸရွပ်ႈႁေႃးတြႃးလႂ်၊ တီႈဢိင်ဢၼ်လီဢၼ်မျၢတ်ႈ ၵႃႈႁိမ်းတီႈၵိၼ်ၵႃႈၼႂ်းပွႆးလႂ်ၸိူဝ်းၼၼ်ႉဢေႃႈ။- 47ၶဝ်ၼၼ်ႉ ၸၢင်ႈႁိမ်ႁူင်သိမ်းပႅင်းၵိၼ်ႁိူၼ်းမႄႈမူၵ်းမႄႈမၢႆႈတင်းလၢႆ ႁဵတ်းၼင်ႇႁၢင်ႈပဵၼ်ဢၼ်လီဢၼ်ငၢမ်းသေလႄႈ ဢဝ်တင်းၵႂၢမ်းဢၼ်ယၢဝ်းၼႃႇလူင်လၢင်သူးတွင်းဢေႃႈ။ ၶဝ်ၼၼ်ႉယဵင်ႈၶႅၼ်းတၵ်းလႆႈၶၢမ်ႇတၢမ်ႇဢၼ်ယႂ်ႇၼႃႇဢေႃႈ၊ ဝႃႈၼင်ႇၼႆဢေႃႈ။
Pilihan Saat Ini:
လူႉၵႃႇ 20: CBMS
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Copyright © 2021 by OMF International, Shan Baptist Churches Fellowship
