လူႉၵႃႇ 19

ၸဝ်ႈယေႇသူႉတင်းၸၢၵ်ႈၶႄး

1မၼ်းၸဝ်ႈၶဝ်ႈၵႃႈၼႂ်းဝဵင်းယေႇရီႉၶူဝ်းလႄႈ ၸွမ်းတၢင်းၵႂႃႇယူႇဢေႃႈ။- 2မိူဝ်ႈၼၼ်ႉမီးၵူၼ်းဢၼ်လႆႈၸိုဝ်ႈၸၢၵ်ႈၶႄးၼၼ်ႉၵေႃႉၼိုင်ႈဢေႃႈ။ မၼ်းၼၼ်ႉပဵၼ်ၵႄႇၵူၼ်းၵဵပ်းၶွၼ်ႇလႄႈ ၸၢင်ႈမၢၵ်ႈၸၢင်ႈမီးဢေႃႈ။- 3မၼ်းၶႂ်ႈတူၺ်းၶႂ်ႈႁၼ်လွင်ႈဢၼ် ယေႇသူႉပဵၼ်ၵူၼ်းၸိူဝ်ႉၼင်ႇႁိုဝ်ၼၼ်ႉလႄႈ၊ ပိူဝ်ႈဢၼ်ၵူၼ်းဢၼ်ၸူႉဢၼ်တုမ်ၼမ်ၼႃႇ၊ မၼ်းၵေႃႈပဵၼ်ၵူၼ်းဢၼ်ပွၵ်းဢၼ်ဢႅၵ်းၼၼ်ႉလႄႈဢမ်ႇႁၼ်လႆႈ။- 4ၵွပ်ႈႁွႆးၼႆႉ ပိူဝ်ႈဢၼ်မၼ်းၸဝ်ႈၸမ်တၵ်းမႃးသဵၼ်ႈတၢင်းၼၼ်ႉလႄႈ မၼ်းလႅၼ်ႈၵႂႃႇၵႃႈတီႈၽၢႆႇၼႃႈသေယဝ်ႉ၊ ၶိုၼ်ႈယူႇၵႃႈၼိူဝ်တူၼ်ႈမၢၵ်ႇလိူဝ်ႇတူၼ်ႈၼိုင်ႈ ႁႂ်ႈလႆႈႁၼ်မၼ်းၸဝ်ႈဢေႃႈ။- 5မိူဝ်ႈဢၼ်ယေႇသူႉႁွတ်ႈထိုင်ၵႃႈတီႈၼၼ်ႈၸိုင်၊ မၼ်းၸဝ်ႈႁႅၼ်တူၺ်းလႄႈႁၼ်မၼ်းသေယဝ်ႉ၊ လၢတ်ႈလႄႈဝႃႈ၊- 6ၸၢၵ်ႈၶႄးဢိူၺ်း၊ လူင်းၶၼ်ၶၼ်ၽႂ်းၽႂ်းတႃႉ။ ဝၼ်းမိူဝ်ႈၼႆႉ ၵဝ်တၵ်းၵိုတ်းသဝ်းယူႇၵႃႈတီႈႁိူၼ်းမႂ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။ မၼ်းၼၼ်ႉလူင်းၶၼ်ၶၼ်ၽႂ်းၽႂ်းသေလႄႈ မီးၸႂ်ဢၼ်သိူဝ်းပျေႃႇၼႃႇႁပ်ႉၶၢမ်ႇၶႅၵ်ႇမၼ်းၸဝ်ႈၵႃႈၼႂ်းႁိူၼ်းမၼ်းဢေႃႈ။- 7ၵူၼ်းတင်းသဵင်ႈတင်းလူင် ႁၼ်လွင်ႈတီႈႁဵင်းၼၼ်ႉသေယဝ်ႉ၊ သႄႉသွမ်းတၢင်ႇဢပႅတ်ႈလႄႈဝႃႈ၊ မၼ်းၸဝ်ႈၶဝ်ႈၵႃႈၼႂ်းႁိူၼ်းၵေႃႉဢၼ်ႁုၵ်းဢၼ်ႁၢႆႉသေလႄႈ ၶၢမ်ႇတၢင်းႁဵတ်းလဵင်ႉႁဵတ်းလူလူင်ပႄႇ၊ ဝႃႈၼင်ႇၼႆဢေႃႈ။

8 ၸၢၵ်ႈၶႄးၵေႃႈၸုၵ်းယူႇသေလႄႈ လဝ်ႊလၢတ်ႈတီႈၸဝ်ႈၽြႃးလႄႈဝႃႈ၊ ၸဝ်ႈႁဝ်း၊ ၵဝ်ၶႃႈဢဝ်ဢုၵ်ႉၸႃႇၶူဝ်းလဵင်းၵဝ်ၶႃႈၶိုင်ႈၼိုင်ႈ ပၼ်တီႈၶဝ်ၸိူဝ်းဢၼ်ယၢၵ်ႈဢၼ်ၽၢၼ်တင်းလၢႆၼၼ်ႉၶႃႈဢေႃႈ။ ဢုၵ်ႉၸႃႇၶူဝ်းလဵင်းၽူႈလႂ်သေဢမ်ႇဝႃႈ၊ ပေႃးၵဝ်ၶႃႈလႆႈဢဝ်မႅၼ်ႈသေဢိတ်းၸိုင်၊ ၵဝ်ၶႃႈသမ်ႉၶိုၼ်းပၼ်သီႇပုၼ်ႈၶႃႈဢေႃႈ၊ ဝႃႈၼင်ႇၼႆဢေႃႈ။- 9ယေႇသူႉၵေႃႈလၢတ်ႈတီႈမၼ်းလႄႈဝႃႈ၊ ပိူဝ်ႈဢၼ်ၵေႃႉၼႆႉပဵၼ်လုၵ်ႈဢႃႇပြႃႇႁၢမ်ႇလႄႈ၊ ၼႂ်းဝၼ်းမိူဝ်ႈၼႆႉၵျေးၸူးတၢင်းဢၼ်ၵႄႇၶျွတ်ႈဢဝ် ႁွတ်ႈထိုင်ၵႃႈၼိူဝ်ႁိူၼ်းၼႆႉဢေႃႈ။- 10လုၵ်ႈၵူၼ်းမႃး ႁႂ်ႈလႆႈႁႃလႄႈၵႄႇၶျွတ်ႈဢဝ်ၶဝ်ၸိူဝ်းဢၼ်ႁၢႆၵႂႃႇၼၼ်ႉဢေႃႈ၊ ဝႃႈၼင်ႇၼႆဢေႃႈ။

ၵႂၢမ်းဢူႉပမႃႇလွင်ႈၶႅပ်းၶမ်း

(တူၺ်း၊ မၢတ်ႈ 25:14-30)

11မိူဝ်ႈဢၼ်ၶဝ်လႆႈငိၼ်းလွင်ႈတၢင်းၸိူဝ်းၼၼ်ႉယဝ်ႉၼၼ်ႉၸိုင်၊ ပိူဝ်ႈဢၼ်မၼ်းၸဝ်ႈႁွတ်ႈၸမ်ၵႃႈတီႈႁိမ်းဝဵင်းယေႇရူႉသလႅမ်ႇ ဢိၵ်ႇတင်းပိူဝ်ႈဢၼ်ၵူၼ်းတင်းလၢႆထၢင်ႇလႄႈဝႃႈ၊ မိူင်းၽြႃးပဵၼ်ၸဝ်ႈတၵ်းပေႃႇမႃးၵမ်းလဵဝ်၊ ဝႃႈၼင်ႇၼႆၼၼ်ႉလႄႈ၊ မၼ်းၸဝ်ႈသမ်ႉလၢတ်ႈၵႂၢမ်းဢူႉပမႃႇ ၵႃႈၼႂ်းပရဵၵ်ႈသၢတ်ႈၸိူဝ်းၼၼ်ႉထႅင်ႈလႄႈဝႃႈၸမ်ႉ၊- 12ဢမၢတ်ႈၵေႃႉၼိုင်ႈ မီးတၢင်းၵျၢမ်ႇတၢင်းပွင်တၵ်းၵႂႃႇၵႃႈတီႈမိူင်းဢၼ်ၵႆပုၼ်ႉသေလႄႈ ၶၢမ်ႇဢဝ်ဢရႃႇၶုၼ်လူင်ယဝ်ႉၸင်ႇ သမ်ႉၶိုၼ်းမႃးၵႃႈတီႈမိူင်းတူဝ်ၸဝ်ႈၵဝ်ႇဢေႃႈ။- 13မၼ်းၼၼ်ႉႁွင်ႉဢဝ်ၵူၼ်းဢွၼ်ႇတူဝ်ၸဝ်ႈၵဝ်ႇသိပ်းၼိုင်ႈသေယဝ်ႉ၊ ဢဝ်ငိုၼ်းဢၢပ်ႈပၼ်ယေႈၵေႃႉယေႈၸွႆႉလႄႈ သင်ႇလၢတ်ႈဝႆႉလႄႈဝႃႈ၊ ၸူဝ်ႈဢၼ်ၵဝ်ဢမ်ႇပႆႇၶိုၼ်းမႃးၼၼ်ႉၸိုင်၊ ဢဝ်ႁဵတ်းတၢင်းၵႃႉတၢင်းၶၢႆထႃႈတႃႉ၊ ဝႃႈၼင်ႇၼႆဢေႃႈ။

14ၵူၺ်းၵႃႈ ၵူၼ်းမိူင်းမၼ်းတင်းလၢႆၼၼ်ႉ၊ ၵွပ်ႈပိူဝ်ႈဢၼ်သီႈၵေႉႁေႈတႃမၼ်းလႄႈ ပွႆႇၸႂ်ႉၵူၼ်းၸႂ်ႉၵူၼ်းသွႆၵႂႃႇၸွမ်းပႃႈလင်မၼ်းသေလႄႈဝႃႈ၊ ႁဝ်းဢမ်ႇၶႂ်ႈၶၢမ်ႇလွင်ႈတၢင်းဢၼ်မၼ်းဢုပ်ႉပိူင်ႇႁဵတ်းႁူဝ်ႁဝ်း၊ ဝႃႈၼင်ႇၼႆဢေႃႈ။

15မၼ်းၼၼ်ႉ ၶၢမ်ႇဢဝ်ဢရႃႇၶုၼ်လူင်သေယဝ်ႉ၊ မိူဝ်ႈဢၼ်ၶိုၼ်းမႃးၼၼ်ႉၸိုင်၊ မီးဢမိင်ႉ ႁႂ်ႈႁွင်ႉဢဝ်ၵူၼ်းဢွၼ်ႇဢၼ်ၶၢမ်ႇဢဝ်ငိုၼ်းၸိူဝ်းၼၼ်ႉမႃးႁင်းၽႂ်ႁင်းမၼ်း ႁႂ်ႈလႆႈႁူႉလွင်ႈဢၼ်ၶဝ်လႆႈဢမျၢတ်ႈမၼ်းထၢၼ်ႇႁိုဝ်ယဝ်ႉၼၼ်ႉဢေႃႈ။

16ၵေႃႉပထမႃႉမႃးလႄႈလဝ်ႊလၢတ်ႈဝႃႈ၊ ၸဝ်ႈႁဝ်း၊ ငိုၼ်းၸွႆႉၼိုင်ႈဢၼ်ၸဝ်ႈႁဝ်းပၼ်ၼၼ်ႉ လႆႈဢမျၢတ်ႈမၼ်းသိပ်းၸွႆႉယဝ်ႉၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 17ၸဝ်ႈမၼ်းၵေႃႈလၢတ်ႈလႄႈဝႃႈ၊ လီယဝ်ႉ၊ ၵူၼ်းဢွၼ်ႇ ဢၼ်လီၼႆႉဢိူၺ်း၊ ၵွပ်ႈပိူဝ်ႈဢၼ်မႂ်းႁဵတ်းသဵတ်ႈၸႃႇၵႃႈတီႈၶိူင်ႈပိူင်ဢၼ်လဵၵ်ႉဢၼ်ၵေႇၼႆႉလႄႈ၊ ဢုပ်ႉပိူင်ႇဝဵင်းသိပ်းၼိုင်ႈတႃႉ၊ ဝႃႈၼင်ႇၼႆဢေႃႈ။

18ၵေႃႉတူႉတီႉယႃႉမႃးလႄႈလဝ်ႊလၢတ်ႈဝႃႈ၊ ၸဝ်ႈႁဝ်း၊ ငိုၼ်းၸွႆႉၼိုင်ႈဢၼ်ၸဝ်ႈႁဝ်းပၼ်ၼၼ်ႉ လႆႈဢမျၢတ်ႈမၼ်းႁႃႈၸွႆႉယဝ်ႉၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 19ၸဝ်ႈမၼ်းၵေႃႈလၢတ်ႈလႄႈဝႃႈ၊ မႂ်းၼႆႉဢုပ်ႉပိူင်ႇဝဵင်းႁႃႈလုၵ်ႈတႃႉ၊ ဝႃႈၼင်ႇၼႆဢေႃႈ။

20တၢင်ႇၵေႃႉမႃးလႄႈလဝ်ႊလၢတ်ႈဝႃႈ၊ ၸဝ်ႈႁဝ်း၊ တူၺ်းလူး၊ ငိုၼ်းၸဝ်ႈႁဝ်းဢၼ်ၵဝ်ၶႃႈပူၵ်ႉဝႆႉၼႂ်းၽႃႈၸဵတ်ႉ ၸွႆႉၼိုင်ႈၼႆႉမီးယူႇၶႃႈဢေႃႈ။- 21လွင်ႈမၼ်းၸမ်ႉ ပိူဝ်ႈဢၼ်ၵဝ်ၶႃႈၶုၵ်းၸႂ်လႆႈၶႆႈၸႂ်ထူပ်း လွင်ႈဢၼ်ၸဝ်ႈႁဝ်းပဵၼ်ၵေႃႉဢၼ်ၸၢင်ႈႁဵတ်းယၢပ်ႇႁဵတ်းယဵၼ်း၊ ၸၢင်ႈၸူႉၸၢင်ႈသိမ်းဢဝ် ဢၼ်တူဝ်ၸဝ်ႈၵဝ်ႇဢမ်ႇၸူႉဢမ်ႇသိမ်း၊ ၸၢင်ႈပၢတ်ႇဢဝ်ဢၼ်တူဝ်ၸဝ်ႈၵဝ်ႇ ဢမ်ႇဝၢၼ်ႇဢမ်ႇသွမ်ႈၼၼ်ႉလႄႈ၊ ၵဝ်ၶႃႈၵူဝ်ၸဝ်ႈႁဝ်းၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 22ၸဝ်ႈမၼ်းၵေႃႈလၢတ်ႈလႄႈဝႃႈ၊ ၵူၼ်းဢွၼ်ႇဢၼ်ႁၢႆႉမိူၵ်ႈၼႆႉဢိူၺ်း၊ ၵဝ်တၵ်းၸွမ်းဢဝ်ၵႂၢမ်းမႂ်းၵူၺ်းလႄႈ ၸီႇယၢင်ႇဢမူႉမႂ်းဢေႃႈ။ ပေႃးမႂ်းႁူႉလွင်ႈဢၼ်ၵဝ်ပဵၼ်ၵေႃႉဢၼ်ၸၢင်ႈႁဵတ်းယၢပ်ႇႁဵတ်းယဵၼ်း၊ ၸၢင်ႈၸူႉၸၢင်ႈသိမ်းဢဝ် ဢၼ်တူဝ်ၸဝ်ႈၵဝ်ႇဢမ်ႇၸူႉဢမ်ႇသိမ်း၊ ၸၢင်ႈပၢတ်ႇဢဝ် ဢၼ်တူဝ်ၸဝ်ႈၵဝ်ႇဢမ်ႇဝၢၼ်ႇဢမ်ႇသွမ်ႈၼၼ်ႉၸိုင်၊- 23ႁဵတ်းႁိုဝ်လႄႈ ဢမ်ႇဢဝ်ငိုၼ်းၵဝ်ၼႆႉ ဢၢပ်ႈပၼ်ၼႂ်းမိုဝ်းၶဝ်ၸိူဝ်းဢၼ်လႅၵ်ႈငိုၼ်းတင်းလၢႆၼၼ်ႉၼင်ႇႁိုဝ်။ ပေႃးဢဝ်ဢၢပ်ႈပၼ်ၸိူဝ်ႉၼင်ႇၼၼ်ၸိုင်၊ မိူဝ်ႈဢၼ်ၵဝ်ၶိုၼ်းမႃးၼႆႉ၊ ၵဝ်တၵ်းလႆႈဢရၢင်းမၼ်းတင်းၶီႈမၼ်းဢေႃႈ၊ ဝႃႈၼင်ႇၼႆဢေႃႈ။- 24သမ်ႉလၢတ်ႈတီႈၶဝ်ၸိူဝ်းဢၼ်ၸုၵ်းယူႇၵႃႈတီႈႁိမ်းမၼ်းတင်းလၢႆၼၼ်ႉလႄႈဝႃႈ၊ ၼုၵ်ႈဢဝ်ငိုၼ်းၸွႆႉၼိုင်ႈဢၼ်မီးၼႂ်းမိုဝ်းမၼ်းၼၼ်ႉတႃႉ။ ပၼ်တီႈၵေႃႉဢၼ်မီးသိပ်းၼိုင်ႈၼၼ်ႉတႃႉ၊ ဝႃႈၼင်ႇၼႆဢေႃႈ။- 25ၶဝ်ၼၼ်ႉၵေႃႈလဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ၵႃႈတီႈၵေႃႉၼၼ်ႉမီးသိပ်းၸွႆႉယဝ်ႉၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 26ၸဝ်ႈၼၼ်ႉလၢတ်ႈလႄႈဝႃႈ၊ ၵဝ်ဝႃႈတီႈသူၸမ်ႉ၊ ၽူႈလႂ်သေဢမ်ႇဝႃႈ၊ ၵေႃႉဢၼ်ၸၢင်ႈမီးၼၼ်ႉ၊ တီႈၵေႃႉၼၼ်ႉတၵ်းပၼ်ထႅင်ႈလူးၵွၼ်ႇဢေႃႈ။ ၽူႈလႂ်သေဢမ်ႇဝႃႈ၊ ၵေႃႉဢၼ်ဢမ်ႇမီးၵႃႈသင်ၼၼ်ႉ၊ တီႈၵေႃႉၼၼ်ႉတၵ်းၼုၵ်ႈဢဝ်ၵႃႈဢၼ်မၼ်းမီးတင်းသဵင်ႈတင်းလူင်ၼၼ်ႉလူးၵွၼ်ႇဢေႃႈ။- 27လိူဝ်သေၼၼ်ႉ ႁွင်ႉဢဝ်ရၢၼ်ႇသူႇၵဝ်ဢၼ်ဢမ်ႇၶႂ်ႈၶၢမ်ႇတၢင်းဢၼ်ၵဝ်ဢုပ်ႉပိူင်ႇတင်းလၢႆၸိူဝ်းၼၼ်ႉမႃးတႃႉ။ ဢဝ်ၶဝ်တၢႆၵႃႈတီႈၽၢႆႇၼႃႈၵဝ်ၼႆႉတႃႉ၊ ဝႃႈၼင်ႇၼႆဢေႃႈ။

လွင်ႈၸဝ်ႈယေႇသူႉပဵၼ်ၸဝ်ႈၶရိၸ်ႈ

(တူၺ်း၊ မၢတ်ႈ 21:1-11။ မႃႇ 11:1-11။ လူႉ 12:12-19)

28မၼ်းၸဝ်ႈဝႃႈၸိူဝ်ႉၼင်ႇၼၼ်သေယဝ်ႉ၊ ဢွၼ်ႁူဝ်ၵႂႃႇဢွၼ်တၢင်းတပႄးၸဝ်ႈတင်းလၢႆလႄႈ ၸွမ်းတၢင်းၵႂႃႇၸူး ၵႃႈတီႈဝဵင်းယေႇရူႉသလႅမ်ႇပုၼ်ႉယူႇဢေႃႈ။- 29မိူဝ်ႈဢၼ်မၼ်းၸဝ်ႈႁွတ်ႈၸမ် ၵႃႈတီႈဝၢၼ်ႈပႅတ်ႉၽႃႇၵေး တင်းဝၢၼ်ႈပေႇထၼီႉ ၵႃႈတီႈလွႆ ဢၼ်လႆႈႁွင်ႉႁဵၵ်ႈလွႆသၢၼ်ႇလုၼ်ႇၼၼ်ႉၸိုင်၊ မၼ်းၸဝ်ႈပွႆႇၸႂ်ႉတပႄးၸဝ်ႈသွင်ၵေႃႉၵႂႃႇလႄႈ၊- 30သင်ႇလၢတ်ႈဝႃႈ၊ သူၵႂႃႇၵႃႈတီႈဝၢၼ်ႈဢၼ်မီးပႃႈၼႃႈသူပုၼ်ႉတႃႉ။ မိူဝ်ႈဢၼ်ႁွတ်ႈထိုင်ၵႃႈတီႈဝၢၼ်ႈၼၼ်ႉၸိုင်၊ သူတၵ်းထူပ်းႁၼ်လီႈဢွၼ်ႇ ဢၼ်ၽူႈလႂ်ဢမ်ႇပႆႇၶီႇသေပွၵ်ႈၼၼ်ႉမတ်ႉဝႆႉလႄႈမီးယူႇၼၼ်ႉဢေႃႈ။ ၵႄႈလႄႈဢဝ်မႃးတႃႉ။- 31ပေႃးပိူၼ်ႈထၢမ်သူလႄႈဝႃႈ၊ ႁဵတ်းႁိုဝ်လႄႈၵႄႈဢဝ်လီႈဢွၼ်ႇၼႆႉၼင်ႇႁိုဝ်။ ဝႃႈၼင်ႇၼႆၸိုင်၊ ၶိုၼ်းလၢတ်ႈလႄႈဝႃႈ၊ ၸဝ်ႈမီးဢလူဝ်ႇဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။- 32ၶဝ်ၸိူဝ်းဢၼ်မၼ်းၸဝ်ႈပွႆႇၸႂ်ႉၵႂႃႇၼၼ်ႉၵႂႃႇလႄႈ ထူပ်းႁၼ်ၸိူဝ်ႉၼင်ႇၵႂၢမ်းမၼ်းၸဝ်ႈၼၼ်ႉဢေႃႈ။- 33ၼႂ်းမိူဝ်ႈဢၼ်ၶဝ်ယင်းတိုၵ်ႉၵႄႈလီႈဢွၼ်ႇယူႇၼၼ်ႉၸိုင်၊ ၸဝ်ႈလီႈဢွၼ်ႇၼၼ်ႉဢွၼ်ၵၼ်ထၢမ်လႄႈဝႃႈ၊ ႁဵတ်းႁိုဝ်လႄႈၵႄႈလီႈဢွၼ်ႇၼႆႉၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊- 34ၶဝ်ၶိုၼ်းလၢတ်ႈလႄႈဝႃႈ၊ ၸဝ်ႈမီးဢလူဝ်ႇဢေႃႈ၊ ဝႃႈၼင်ႇၼႆဢေႃႈ။ ၶဝ်ဢဝ်လီႈဢွၼ်ႇၼၼ်ႉၵႂႃႇၵႃႈတီႈယေႇသူႉလႄႈ၊- 35ဢဝ်ၶူဝ်းၼုင်ႈတူဝ်ၸဝ်ႈၵဝ်ႇတၢင်ႇသႂ်ႇၵႃႈၼိူဝ်လင်မၼ်းယဝ်ႉၸင်ႇ ႁႂ်ႈမၼ်းၸဝ်ႈၶီႇဢေႃႈ။- 36ၼႂ်းမိူဝ်ႈဢၼ်မၼ်းၸဝ်ႈယင်းတိုၵ်ႉၵႂႃႇတၢင်းယူႇၼၼ်ႉၸိုင် ၵူၼ်းတင်းလၢႆဢဝ်ၶူဝ်းၼုင်ႈၶဝ်သိူဝ်ႇဝႆႉပူဝႆႉၵႃႈၼႂ်းသဵၼ်ႈတၢင်းဢေႃႈ။- 37မိူဝ်ႈဢၼ်မၼ်းၸဝ်ႈႁွတ်ႈၸမ် ၵႃႈတီႈႁိမ်းတီႈဢၼ်လူင်းၵႃႈၼိူဝ်လွႆသၢၼ်ႇလုၼ်ႇမႃးၼၼ်ႉၸိုင်၊ တပႄးၸဝ်ႈတင်းသဵင်ႈတင်းလူင်ၼၼ်ႉ ၵွပ်ႈပိူဝ်ႈတၼ်းၶူဝ်းၸဝ်ႈဢၼ်ၶဝ်လႆႈႁၼ်မႃးယဝ်ႉတင်းလၢႆၼၼ်ႉလႄႈ မီးတင်းၸႂ်ဢၼ်သိူဝ်းသႂၢင်ႇဢွၼ်ၵၼ် ႁွင်ႉသႅၼ်ႇႁဵတ်းထေႃးပၼႃႇ တီႈၽြႃးပဵၼ်ၸဝ်ႈလႄႈဝႃႈ၊- 38ႁႂ်ႈၸဝ်ႈဢၼ်ပႃးတင်းဢၶႂၢင်ႉၽြႃးပဵၼ်ၸဝ်ႈသေလႄႈမႃးၼႆႉ မီးမင်ႇၵလႃႇသေၵမ်းလူၺ်ႈ။ ႁႂ်ႈတၢင်းၼိမ် မီးၵႃႈၼိူဝ်မိူင်းၵၢင်ႁၢဝ်ပုၼ်ႉသေၵမ်းလူၺ်ႈ။ ႁႂ်ႈမုၼ်ၽုင်းယႂ်ႇၵႃႈၼိူဝ်ၸိၵ်းၸွမ်ၵၢင်ႁၢဝ်ပုၼ်ႉသေၵမ်းလူၺ်ႈ၊ ဝႃႈၼင်ႇၼႆဢေႃႈ။

39 ၽႃႇရီႉသႄး ဢၼ်ပႃးၼႂ်းၵူၼ်းဢၼ်ၸူႉဢၼ်တုမ်ၼၼ်ႉၵမ်ႈၽွင်ႈၵေႃႈလဝ်ႊလၢတ်ႈလႄႈဝႃႈ၊ သြႃႇၸဝ်ႈ၊ သင်ႇသွၼ်တပႄးၸဝ်ႈႁဝ်းၸိူဝ်းၼႆႉသေၵမ်းၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 40မၼ်းၸဝ်ႈၵေႃႈၶိုၼ်းလၢတ်ႈလႄႈဝႃႈ၊ ၵဝ်ဝႃႈတီႈသူၸမ်ႉ၊ ပေႃးၶဝ်ၸိူဝ်းၼႆႉယူႇတဵတ်ႇတဵတ်ႇယဵၼ်ယဵၼ်ယူႇၸိုင်၊ မၢၵ်ႇႁိၼ်တင်းလၢႆတၵ်းႁွင်ႉသႅၼ်ႇဢေႃႈ၊ ဝႃႈၼင်ႇၼႆဢေႃႈ။

ၸဝ်ႈယေႇသူႉႁွင်ႉႁႆႈပုၼ်ႈဝဵင်းယေႇရူႉသလႅမ်ႇ

41မိူဝ်ႈဢၼ်မၼ်းၸဝ်ႈႁွတ်ႈၸမ်ၵႃႈတီႈႁိမ်းဝဵင်းယေႇရူႉသလႅမ်ႇၼၼ်ႉၸိုင်၊ မၼ်းၸဝ်ႈမုင်ႈႁၼ်ဝဵင်းၼၼ်ႉသေယဝ်ႉ၊ ႁွင်ႉႁႆႈလူၺ်ႈလွင်ႈမၼ်းလႄႈဝႃႈ၊- 42ၼႂ်းၸူဝ်ႈပၢၼ်မႂ်းၶိင်ႇၵႃႇလႃႉတေႃႈလဵဝ်ၼႆႉ ပေႃးမႂ်းလႆႈႁူႉလွင်ႈတၢင်းဢၼ်ၸၢပ်ႈသႅင်ႇၵၼ်တင်းတၢင်းၼိမ်မႂ်းတင်းလၢႆၼၼ်ႉၸိုင်၊ မႂ်းမီးမင်ႇၵလႃႇဢေႃႈ။ တေႃႈလဵဝ်ၼႆႉၸမ်ႉ၊ လွင်ႈတၢင်းၸိူဝ်းၼၼ်ႉ သိူင်ႇဝႆႉလပ်ႉဝႆႉၵႃႈတီႈမၢၵ်ႇတႃမႂ်းယဝ်ႉ။- 43လွင်ႈမၼ်းၸမ်ႉ ပိူဝ်ႈဢၼ်မႂ်းဢမ်ႇႁူႉဢမ်ႇတွင်း ၵျေးၸူးဢၼ်မၼ်းၸဝ်ႈပႂ်ႉလူပႂ်ႉတူၺ်းပွင်ႁဵတ်းတီႈမႂ်းယူႇၼၼ်ႉလႄႈ၊ ၶိင်ႇၵႃႇလႃႉဢၼ်ရၢၼ်ႇသူႇမႂ်း တၵ်းတႄႇတပ်ႉတင်ႈတပ်ႉၵႃႈတီႈႁိမ်းႁွမ်းမႂ်းသေလႄႈ လွမ်ႉႁွပ်ႈသီႇၼႃႈသီႇၽၢႆႇလႄႈၶင်ဝႆႉသေယဝ်ႉ၊- 44တၵ်းႁႂ်ႈမႂ်းဢိၵ်ႇတင်းလုၵ်ႈလၢင်းၵႃႈတီႈၼႂ်းမႂ်းတင်းလၢႆ တူၵ်းလူင်းပဵင်းၵၼ်တင်းလိၼ်လႄႈ ၵႃႈတီႈမႂ်းၼိူဝ်မၢၵ်ႇႁိၼ်လုၵ်ႈၼိုင်ႈ ဢမ်ႇပၼ်သေလုၵ်ႈၵိုတ်းၵျၢၼ်ႇဝႆႉၼၼ်ႉ၊ တၵ်းႁွတ်ႈမႃးတီႈမႂ်းဢေႃႈ၊ ဝႃႈၼင်ႇၼႆဢေႃႈ။

ၸဝ်ႈယေႇသူႉႁႂ်ႈၵျွင်းပိၵ်ႈမၢၼ်ႇၸဝ်ႈမူတ်းၸၢင်ႇ

(တူၺ်း၊ မၢတ်ႈ 21:12-17။ မႃႇ 11:15-19။ ယူဝ်း 2:13-22)

45မၼ်းၸဝ်ႈၶဝ်ႈၵႃႈၼႂ်းပိၵ်ႈမၢၼ်ႇၸဝ်ႈသေယဝ်ႉ၊ ႁေႃႈၶဝ်ၸိူဝ်းဢၼ်သိုဝ်ႉဢၼ်ၶၢႆ ၵႃႈၼႂ်းပိၵ်ႈမၢၼ်ႇၸဝ်ႈတင်းလၢႆၼၼ်ႉဢွၵ်ႇပႅတ်ႈလႄႈ၊- 46လၢတ်ႈဝႃႈ၊ ႁိူၼ်းၵဝ်ၸိုင် ပဵၼ်ႁိူၼ်းတီႈဢၼ်သူးတွင်းဢေႃႈ။ ၼႂ်းဝႃႈၼၼ်သေၵေႃႈ သူႁႂ်ႈမၼ်းပဵၼ်ထမ်ႈၸူၼ်ယူႇလူင်ပႄႇဝႃႈၼႆ၊ တႅမ်ႈဝႆႉၼႂ်းၵျၢမ်းလိၵ်ႈၸိူဝ်ႉၼင်ႇၼႆယဝ်ႉ၊ ဝႃႈၼင်ႇၼႆဢေႃႈ။

47မၼ်းၸဝ်ႈသင်ႇသွၼ်သုင်းမႃႉပၼ် ၼႂ်းပိၵ်ႈမၢၼ်ႇၸဝ်ႈယူႇၵူႈဝၼ်းဢေႃႈ။ ပိၵ်ႉသမ်ႉ ယိတ်ႈပရေႃးႁဵၵ်ႈလူင်ဢိၵ်ႇတင်းၵူၼ်းထုတ်ႇၵျၢမ်း တင်းၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းတင်းလၢႆၸိူဝ်းၼၼ်ႉ ၵျၢမ်ႇႁႃႁႂ်ႈလႆႈဢဝ်မၼ်းၸဝ်ႈတၢႆသေၵေႃႈ၊- 48ပိူဝ်ႈဢၼ်ၵူၼ်းတင်းသဵင်ႈတင်းလူင်ထွမ်ႇၵႂၢမ်းမၼ်းၸဝ်ႈၸေးၸေးယူႇလႄႈ ၶဝ်ဢမ်ႇထူပ်းဢမ်ႇလႆႈဢၶႂၢင်ႉဢၼ်တၵ်းလႆႈဢဝ်မၼ်းၸဝ်ႈတၢႆၼၼ်ႉ။

Pilihan Saat Ini:

လူႉၵႃႇ 19: CBMS

Sorotan

Berbagi

Salin