လူႉၵႃႇ 18
18
လွင်ႈမႄႈမၢႆႈတင်းၶုၼ်ဢၼ်ၸီႇယၢင်ႇတြႃး
1လွင်ႈၼင်ႇႁိုဝ်ၵူၼ်းတင်းလၢႆႁႅင်းယင်းဢမ်ႇဢူၼ်ႈလႄႈ တၵ်းလႆႈၵျူဝ်းၸႃးသူးတွင်းယူႇသေႇသေႇၸိုင်၊ မၼ်းၸဝ်ႈလၢတ်ႈၵႂၢမ်းဢူႉပမႃႇလႄႈဝႃႈၸမ်ႉ၊- 2ၼႂ်းဝဵင်းၼိုင်ႈမီးၶုၼ်ဢၼ်ၸီႇယၢင်ႇတြႃး၊ ဢၼ်ဢမ်ႇၵူဝ်ၽြႃးပဵၼ်ၸဝ်ႈလႄႈ ဢမ်ႇၸၢင်ႈဢႃးၼႃႇၵူၼ်းၼၼ်ႉၵေႃႉၼိုင်ႈဢေႃႈ။- 3မႄႈမူၵ်းမႄႈမၢႆႈဢၼ်မီးယူႇၵႃႈၼႂ်းဝဵင်းၼၼ်ႉၵေႃႉၼိုင်ႈၵႂႃႇတီႈၶုၼ်ဢၼ်ၸီႇယၢင်ႇတြႃးၼၼ်ႉလႄႈ တွင်းပၢၼ်ႇဝႃႈ၊ ၶႅၼ်းတေႃႈယူႇၽၢႆႇၶႃႈၸဝ်ႈႁဝ်းၸီႇယၢင်ႇတြႃး ႁႂ်ႈလွင်ႈဢၼ်ၵေႃႉဢၼ်ၽိတ်းၶႃႈၸဝ်ႈႁဝ်းၼၼ်ႉယဝ်ႉတူဝ်ႈသေၵမ်းၶႃႈ၊ ဝႃႈၼင်ႇၼႆသေၵေႃႈ၊- 4မၼ်းၼၼ်ႉယင်းဢမ်ႇၸီႇယၢင်ႇတြႃးလႄႈယူႇႁိုင်ၼႃႇဢေႃႈ။ လိုၼ်းၼၼ်ႉ မၼ်းမီးတၢင်းၵျၢမ်ႇတၢင်းပွင်ၼႂ်းၸႂ်လႄႈဝႃႈ၊ ပိၵ်ႉသမ်ႉၵဝ်ဢမ်ႇၵူဝ်ၽြႃးပဵၼ်ၸဝ်ႈလႄႈ ပဵၼ်ၵေႃႉဢၼ်ဢမ်ႇၸၢင်ႈဢႃးၼႃႇၵူၼ်းသေၵေႃႈ၊- 5ပိူဝ်ႈဢၼ်မႄႈမူၵ်းမႄႈမၢႆႈၼႆႉ မႃးယႃႉယူၵ်ႉၵဝ်ယူႇလႄႈၵဝ်တၵ်းၸီႇယၢင်ႇတြႃးၽၢႆႇမၼ်းဢေႃႈ။ ပေႃးဢမ်ႇၼၼ် မၼ်းတၵ်းမႃးၶိူဝ်းၶိူဝ်းယႂ်းယႂ်းလႄႈ ႁႂ်ႈၵဝ်ယၢပ်ႇၸႂ်ယူႇဢေႃႈ၊ ဝႃႈၼင်ႇၼႆဢေႃႈ။
6မၢတ်ႈတွင်းတၢင်းၵျၢမ်ႇတၢင်းပွင် ၶုၼ်ဢၼ်ဢမ်ႇတြႃးဢၼ်ၸီႇယၢင်ႇတြႃးၼၼ်ႉတႃႉ။- 7တီႈၶဝ်ၸိူဝ်းဢၼ်မၼ်းၸဝ်ႈလိူၵ်ႈၵဵပ်းဢဝ်၊ ဢၼ်ႁွင်ႉသႅၼ်ႇလႄႈယွၼ်းတီႈမၼ်းၸဝ်ႈယူႇတင်းဝၼ်းတင်းၶိုၼ်းၼၼ်ႉ၊ ပိၵ်ႉသမ်ႉၽြႃးပဵၼ်ၸဝ်ႈယိူၼ်ႉၶၢမ်ႇၶဝ်ႁိုင်ၼႃႇသေၵေႃႈ၊ မၼ်းၸဝ်ႈယင်းဢမ်ႇၸီႇယၢင်ႇတြႃးလႄႈတၵ်းယူႇႁိုဝ်။- 8ၵဝ်ဝႃႈတီႈသူၸမ်ႉ၊ မၼ်းၸဝ်ႈတၵ်းၸီႇယၢင်ႇတြႃးၽၢႆႇၶဝ်ၼၼ်ႉၶၼ်ၶၼ်ၽႂ်းၽႂ်းဢေႃႈ။ ၼႂ်းဝႃႈၼၼ်သေၵေႃႈ မိူဝ်ႈဢၼ်လုၵ်ႈၵူၼ်းမႃးၼၼ်ႉ၊ တၵ်းထူပ်းတၢင်းဢၼ်ယုမ်ႇမၢတ်ႈၵႃႈၼိူဝ်လိၼ်မိူင်းၼႆႉႁိုဝ် ဝႃႈၼႆ၊ ၸဝ်ႈၽြႃးဝႃႈၼင်ႇၼႆဢေႃႈ။
ၵူၼ်းၵိူင်းၽႃႇရီႉသႄးလႄႈၵူၼ်းၵဵပ်းၶွၼ်ႇ
9မၼ်းၸဝ်ႈလၢတ်ႈၵႂၢမ်းဢူႉပမႃႇ တီႈၶဝ်ၸိူဝ်းဢၼ်ဢိင်ပိုင်ႈၵူႉသူဝ်ႇတူဝ်ၸဝ်ႈၵဝ်ႇသေလႄႈ ႁဵတ်းဢမ်ႇပေႃးၼင်ႇႁိုဝ်တီႈပိူၼ်ႈၵမ်ႈၽွင်ႈၸိူဝ်းၼၼ်ႉလႄႈဝႃႈၸမ်ႉ၊- 10ၵူၼ်းသွင်ၵေႃႉ ၶိုၼ်ႈၵႂႃႇၵႃႈၼိူဝ်ပိၵ်ႈမၢၼ်ႇၸဝ်ႈႁႂ်ႈလႆႈႁဵတ်းသူးတွင်းပထၼႃႇဢေႃႈ။ ၵေႃႉၼိုင်ႈၸမ်ႉ၊ ပဵၼ်ၽႃႇရီႉသႄးဢေႃႈ။ ၵေႃႉၼိုင်ႈၸမ်ႉ၊ ပဵၼ်ၵူၼ်းၵဵပ်းၶွၼ်ႇဢေႃႈ။- 11ၽႃႇရီႉသႄးၼၼ်ႉ ၸုၵ်းယူႇသေလႄႈ သူးတွင်းႁဵတ်းပထၼႃႇၵူၺ်းမၼ်းလႄႈဝႃႈ၊ ဢူဝ်းၽြႃးပဵၼ်ၸဝ်ႈ၊ ၵွပ်ႈပိူဝ်ႈဢၼ်ၵဝ်ၶႃႈဢမ်ႇပဵၼ်ၸိူဝ်ႉၼင်ႇပိူၼ်ႈတင်းလၢႆ ဢၼ်ႁဵတ်းပႄႉႁဵတ်းၼႅင်ႇႁိမ်ဢဝ်၊ ဢၼ်ၵမ်ၵျၢင်ႉဢၼ်ဢမ်ႇတြႃး၊ ဢၼ်ၽိတ်းပိူင်ႈမေးပိူၼ်ႈၸိူဝ်းၼၼ်ႉယဝ်ႉဢမ်ႇၵႃး၊ ဢမ်ႇပဵၼ်ၸိူဝ်ႉၼင်ႇၵူၼ်းၵဵပ်းၶွၼ်ႇၼႆႉလႄႈ ၵျေးၸူးၸဝ်ႈႁဝ်းယႂ်ႇၼႃႇတီႈၶႃႈဢေႃႈ။- 12ၵဝ်ၶႃႈၼႆႉ ၼႂ်းၸဵတ်းဝၼ်းၵမ်တၢင်းၵိၼ်သွင်ဝၼ်းတီႈၶႃႈဢေႃႈ။ ၵဝ်ၶႃႈဢဝ်ဢုၵ်ႉၸႃႇၶူဝ်းလဵင်းၵႃႈမီးတင်းသဵင်ႈတင်းလူင် သိပ်းပုၼ်ႈပုၼ်ႈၼိုင်ႈလူႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။- 13ၵူၼ်းၵဵပ်းၶွၼ်ႇၼၼ်ႉၸမ်ႉ၊ ၸုၵ်းယူႇတီႈဢၼ်ၵႆလႄႈ ယင်းဢမ်ႇႁတ်းႁႅၼ်တူၺ်းၼိူဝ်ၽႃႉၵၢင်ႁၢဝ်၊ တူပ်းဢူၵ်းယူႇသေလႄႈသူးတွင်းလႄႈဝႃႈ၊ ဢူဝ်းၽြႃးပဵၼ်ၸဝ်ႈ၊ ၶႅၼ်းတေႃႈမီးၵရူႉၼႃႇ တၢင်းဢၼ်ဢဵတ်းလူၵဝ်ၶႃႈဢၼ်ဢပႅတ်ႈၼမ်ၼႃႇၼႆႉသေၵမ်းတီႈၶႃႈ၊ ဝႃႈၼင်ႇၼႆဢေႃႈ။- 14ၵဝ်ဝႃႈတီႈသူၸမ်ႉ၊ မၼ်းၼၼ်ႉလႆႈၶၢမ်ႇတၢင်းဢၼ် မၢတ်ႈပဵၼ်ၵူၼ်းဢၼ်သိုဝ်ႈတေႃႇၼႃႇသေၵေႃႉၼၼ်ႉလႄႈ ၶိုၼ်းမိူဝ်းၵႂႃႇၵႃႈတီႈႁိူၼ်းမၼ်းပုၼ်ႉဢေႃႈ။ လွင်ႈမၼ်းၸမ်ႉ ၵေႃႉဢၼ်ယုၵ်ႉယွင်ႈတူဝ်ၸဝ်ႈၵဝ်ႇၼၼ်ႉ၊ တၵ်းလႆႈၶၢမ်ႇတၢင်းဢၼ်ၶျႃးတူၵ်းတီႈတႅမ်ႇဢေႃႈ။ ၵေႃႉဢၼ်ၶျႃးတႅမ်ႇတူဝ်ၸဝ်ႈၵဝ်ႇၼၼ်ႉၸမ်ႉ၊ တၵ်းလႆႈၶၢမ်ႇတၢင်းဢၼ်ယုၵ်ႉယွင်ႈဢေႃႈ၊ ဝႃႈၼင်ႇၼႆဢေႃႈ။
ၸဝ်ႈယေႇသူႉပၼ်မင်ႇၵလႃႇတီႈလုၵ်ႈဢွၼ်ႇ
(တူၺ်း၊ မၢတ်ႈ 19:13-15။ မႃႇ 10:13-16)
15မိူဝ်ႈၼၼ်ႉ ၼင်ႇႁိုဝ်မၼ်းၸဝ်ႈတၵ်းဢဝ်မိုဝ်းတိူဝ်ႉၸိုင်၊ ၶဝ်ဢဝ်လုၵ်ႈဢွၼ်ႇတင်းလၢႆမႃးတီႈမၼ်းၸဝ်ႈဢေႃႈ။ ၵူၺ်းၵႃႈ တပႄးၸဝ်ႈတင်းလၢႆႁၼ်လႄႈတၢင်ႇဢပႅတ်ႈဢေႃႈ။- 16ယေႇသူႉႁွင်ႉဢဝ်လုၵ်ႈဢွၼ်ႇၸိူဝ်းၼၼ်ႉလႄႈဝႃႈ၊ ပၼ်လုၵ်ႈဢွၼ်ႇၸိူဝ်းၼၼ်ႉမႃးၵႃႈတီႈၵဝ်တႃႉ။ ယႃႇပေႁၢမ်ႈတၢပ်ႈႁႄႉၶႅၼ်ၶဝ်။ မိူင်းၽြႃးပဵၼ်ၸဝ်ႈပဵၼ်မိူင်းၶဝ်ၸိူဝ်ႉၼင်ႇၼႆၼၼ်ႉဢေႃႈ။- 17ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ ၽူႈလႂ်သေဢမ်ႇဝႃႈ၊ ၵေႃႉဢၼ်ဢမ်ႇၶၢမ်ႇဢဝ်မိူင်းၽြႃးပဵၼ်ၸဝ်ႈ မိူၼ်ၸိူဝ်ႉၼင်ႇလုၵ်ႈဢွၼ်ႇၼႆႉၼၼ်ႉ၊ ၵေႃႉၼၼ်ႉဢမ်ႇလႆႈၶဝ်ႈၵႃႈၼႂ်းမိူင်းၽြႃးပဵၼ်ၸဝ်ႈ၊ ဝႃႈၼင်ႇၼႆဢေႃႈ။
လွင်ႈသထေးၵေႃႉၼိုင်ႈ
(တူၺ်း၊ မၢတ်ႈ 19:16-30။ မႃႇ 10:17-31)
18ၶုၼ်ၵေႃႉၼိုင်ႈ လဝ်ႊထၢမ်လႄႈဝႃႈ၊ သြႃႇဢၼ်မျၢတ်ႈလီၶႃႈဢိူၺ်း၊ ၼင်ႇႁိုဝ်တၵ်းလႆႈၶၢမ်ႇဢမူၺ်ႇ ထႃႇဝရႃႉဢသၢၵ်ႈၸိုင်၊ ၵဝ်ၶႃႈတၵ်းလႆႈႁဵတ်းၸိူဝ်ႉၼင်ႇႁိုဝ်ၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 19ယေႇသူႉၵေႃႈလၢတ်ႈလႄႈဝႃႈ၊ ႁဵတ်းႁိုဝ်လႄႈမႂ်းႁွင်ႉဝႃႈ၊ ၵဝ်ၼႆႉမျၢတ်ႈလီၼင်ႇႁိုဝ်။ လိူဝ်သေၽြႃးပဵၼ်ၸဝ်ႈသူႇလဵဝ်ၼၼ်ႉၵူၺ်း၊ ၽူႈလႂ်ဢမ်ႇမျၢတ်ႈဢမ်ႇလီသေၵေႃႉ။- 20မႂ်းႁူႉပိင်းၺၢပ်ႈၸဝ်ႈတင်းလၢႆယူႇဢမ်ႇၸႂ်ႈႁိုဝ်။ ယႃႇပေၽိတ်းပိူင်ႈမေးပိူၼ်ႈ။ ယႃႇပေဢဝ်ဢသၢၵ်ႈၵူၼ်းတၢႆ၊ ယႃႇပေလၵ်ႉဢုၵ်ႉၸႃႇၶူဝ်းလဵင်းပိူၼ်ႈ။ ယႃႇပေၶၢမ်ႇသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈၼၼ်ႉ။ ႁဵတ်းရူဝ်ႇသေႇၵူဝ်ယမ်ပေႃႈမႄႈတႃႉ၊ မိူဝ်ႈဢၼ်ဝႃႈၼင်ႇၼႆၸိုင်၊- 21ၵေႃႉၼၼ်ႉၵေႃႈၶိုၼ်းလၢတ်ႈလႄႈဝႃႈ၊ ပိင်းၺၢပ်ႈၵႃႈမီးတင်းသဵင်ႈတင်းလူင်ၸိူဝ်းၼၼ်ႉၸိုင်၊ ၵဝ်ၶႃႈၵမ်ၵျၢင်ႉၸႃႉၸဵမ်မိူဝ်ႈဢၼ်ယင်းလဵၵ်ႉၶႃႈယဝ်ႉ၊ ဝႃႈၼင်ႇၼႆဢေႃႈ။- 22ယေႇသူႉငိၼ်းသေယဝ်ႉ၊ လၢတ်ႈလႄႈဝႃႈ၊ မႂ်းလူဝ်ႇထႅင်ႈဢၼ်ၼိုင်ႈဢေႃႈ။ ၶၢႆဢုၵ်ႉၸႃႇၶူဝ်းလဵင်းမႂ်းၵႃႈမီးတင်းသဵင်ႈတင်းလူင်သေလႄႈ ပၼ်တီႈၶဝ်ၸိူဝ်းဢၼ်ယၢၵ်ႈဢၼ်ၽၢၼ်တင်းလၢႆၼၼ်ႉတႃႉ။ ပေႃးႁဵတ်းၸိူဝ်ႉၼင်ႇၼႆၸိုင် တၵ်းလႆႈၽၼ်ႇတႃႇၵႃႈၼိူဝ်မိူင်းၵၢင်ႁၢဝ်ပုၼ်ႉဢေႃႈ။ ႁဵတ်းၸိူဝ်ႉၼင်ႇၼႆသေယဝ်ႉၸင်ႇ၊ မႃးလႄႈၸွမ်းပႃႈလင်ၵဝ်တႃႉ၊ ဝႃႈၼင်ႇၼႆဢေႃႈ။- 23ၵေႃႉၼၼ်ႉငိၼ်းၵႂၢမ်းၼၼ်ႉသေယဝ်ႉ၊ ပိူဝ်ႈဢၼ်မၼ်းပဵၼ်ၵေႃႉဢၼ်ၸၢင်ႈမီးဢုၵ်ႉၸႃႇၶူဝ်းလဵင်းၼမ်ၼႃႇလႄႈ ႁွတ်ႈထိုင်တၢင်းဢၼ်ၸႂ်လဵၵ်ႉၼႃႇလူင်လၢင်ဢေႃႈ။
24 ယေႇသူႉႁၼ်ၵေႃႉၼၼ်ႉ ႁွတ်ႈထိုင်တၢင်းဢၼ်ၸႂ်လဵၵ်ႉၸိူဝ်ႉၼင်ႇၼၼ်သေယဝ်ႉ လၢတ်ႈလႄႈဝႃႈ၊ ၶဝ်ၸိူဝ်းဢၼ်ၸၢင်ႈမၢၵ်ႈၸၢင်ႈမီးၼၼ်ႉ ၶဝ်ႈၼႂ်းမိူင်းၽြႃးပဵၼ်ၸဝ်ႈယၢပ်ႇၼႃႇလူင်လၢင်ဢေႃႈ။- 25ၵလႃးဢုၵ်ႉလၼ်ႈႁူးၶဵမ်ငၢႆႈသေ ၵူၼ်းမၢၵ်ႈၵူၼ်းမီးၶဝ်ႈၵႃႈၼႂ်းမိူင်းၽြႃးပဵၼ်ၸဝ်ႈၼၼ်ႉဢေႃႈ၊ ဝႃႈၼင်ႇၼႆဢေႃႈ။- 26ၶဝ်ၸိူဝ်းဢၼ်ငိၼ်းၼၼ်ႉၵေႃႈလၢတ်ႈလႄႈဝႃႈ၊ ၽူႈလႂ်တၵ်းႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ၼၼ်ႉလႆႈၶႃႈ၊ ဝႃႈၼင်ႇၼႆဢေႃႈ။- 27မၼ်းၸဝ်ႈၵေႃႈလၢတ်ႈလႄႈဝႃႈ၊ လွင်ႈတၢင်းဢၼ်ၵူၼ်းႁဝ်း ဢမ်ႇတၢတ်ႈၼိူင်ႇလႆႈၼၼ်ႉၸိုင်၊ ၽြႃးပဵၼ်ၸဝ်ႈတၢတ်ႈၼိူင်ႇလႆႈယူႇဢေႃႈ၊ ဝႃႈၼင်ႇၼႆဢေႃႈ။
28မိူဝ်ႈၼၼ်ႉ ပေႇတရူႉလဝ်ႊလၢတ်ႈလႄႈဝႃႈ၊ ႁဝ်းၶႃႈၼႆႉ ၸုၼ်ႉပႅတ်ႈၵႃႈဢၼ်မီးတင်းသဵင်ႈတင်းလူင်သေလႄႈ ၸွမ်းပႃႈလင်ၸဝ်ႈႁဝ်းၶႃႈယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊- 29မၼ်းၸဝ်ႈၵေႃႈလၢတ်ႈလႄႈဝႃႈ၊ ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ ၽူႈလႂ်သေဢမ်ႇဝႃႈ၊ ၵေႃႉဢၼ်ၸုၼ်ႉပႅတ်ႈႁိူၼ်း၊ ပေႃႈမႄႈ၊ ပီႈၼွင်ႉ၊ မေးလုၵ်ႈလၢင်းတင်းလၢႆ ၵွပ်ႈပိူဝ်ႈမိူင်းၽြႃးပဵၼ်ၸဝ်ႈၼၼ်ႉ၊- 30ၵေႃႉၼၼ်ႉ တၵ်းလႆႈၶၢမ်ႇၼႂ်းၶိင်ႇတေႃႈလဵဝ်ၼႆႉ ဢၵျူဝ်းပုၼ်ႈၼမ်ၼႃႇလႂ်၊ ၼႂ်းၸၢတ်ႈၼႃႈၼၼ်ႉထႃႇဝရႃႉဢသၢၵ်ႈလႂ်ဢေႃႈ၊ ဝႃႈၼင်ႇၼႆဢေႃႈ။
ၸဝ်ႈယေႇသူႉႁေႃးထႃႈလွင်ႈတၢင်းတၢႆၸဝ်ႈထႅင်ႈ
(တူၺ်း၊ မၢတ်ႈ 20:17-19။ မႃႇ 10:32-34)
31မိူဝ်ႈၼၼ်ႉ မၼ်းၸဝ်ႈႁွင်ႉဢဝ်သိပ်းသွင်ပႃးၼၼ်ႉသေလႄႈ လၢတ်ႈလႄႈဝႃႈ၊ တေႃႈလဵဝ်ၼႆႉႁဝ်းၵႂႃႇၵႃႈတီႈဝဵင်း ယေႇရူႉသလႅမ်ႇယူႇဢေႃႈ။ ၵႃႈဢၼ်ပရေႃးၽႅတ်ႈတင်းလၢႆတႅမ်ႈဝႆႉၼၼ်ႉ တၵ်းလႆႈပျေႉၸုမ်ႇတီႈလုၵ်ႈၵူၼ်းဢေႃႈ။- 32မၼ်းတၵ်းလႆႈၶၢမ်ႇတၢင်းဢၼ်ဢၢပ်ႈၵႃႈၼႂ်းမိုဝ်းၵူၼ်းတၢင်ႇၸိူဝ်ႉတၢင်ႇၶိူဝ်းလႂ်၊ တၢင်းဢၼ်ႁဵတ်းပျၢၵ်ႈလႂ်၊ တၢင်းဢၼ်ၼိၵ်ႈၸၢၵ်ႈငႅၼ်းသႄးလႂ်၊ တၢင်းဢၼ်ဢဝ်တင်းၼမ်ႉလၢႆး ထူမ်ႇသႂ်ႇလႂ်ဢေႃႈ။- 33ၶဝ်ၼၼ်ႉတၵ်းယႅၼ်ႉထုပ်ႉမၼ်းလႄႈ ဢဝ်မၼ်းတၢႆဢေႃႈ။ ၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉ မၼ်းတၵ်းလုၵ်ႉၶိုၼ်းလိပ်းဢေႃႈ၊ ဝႃႈၼင်ႇၼႆဢေႃႈ။- 34တပႄးၸဝ်ႈတင်းလၢႆ ဢမ်ႇႁူႉလွင်ႈတၢင်းၸိူဝ်းၼၼ်ႉသေဢိတ်း။ ပိူဝ်ႈဢၼ်လပ်ႉဝႆႉသိူင်ႇဝႆႉၵႃႈတီႈၶဝ်လႄႈ ၶဝ်ဢမ်ႇႁူႉဢမ်ႇၸႅင်ႈလွင်ႈဢၼ်မၼ်းၸဝ်ႈဝႃႈၼၼ်ႉ။
ၸဝ်ႈယေႇသူႉႁဵတ်းႁႂ်ႈၵူၼ်းတႃမွတ်ႇႁၼ်
(တူၺ်း၊ မၢတ်ႈ 20:29-34။ မႃႇ 10:46-52)
35ၼႂ်းမိူဝ်ႈဢၼ်မၼ်းၸဝ်ႈမီးၸမ်ၵႃႈတီႈႁိမ်း ဝဵင်းယေႇရီႉၶူဝ်းယူႇၼၼ်ႉၸိုင်၊ ၵူၼ်းတႃမွတ်ႇၵေႃႉၼိုင်ႈ ၼင်ႈယူႇၵႃႈႁိမ်းတၢင်းလႄႈယွၼ်းၵိၼ်ယူႇဢေႃႈ။- 36မၼ်းၼၼ်ႉ မိူဝ်ႈဢၼ်ငိၼ်းသဵင်ၵူၼ်းၼမ်ၼႃႇ ၵႂႃႇၵႃႈတီႈၼႂ်းသဵၼ်ႈတၢင်းယူႇၼၼ်ႉၸိုင်ထၢမ်လႄႈဝႃႈ၊ ပဵၼ်ၵႃႈသင်၊ ဝႃႈၼင်ႇၼႆဢေႃႈ။- 37ပိူၼ်ႈလၢတ်ႈလွင်ႈဢၼ်ယေႇသူႉၵူၼ်းဝဵင်းၼႃႇၸရႅတ်ႈ ၸွမ်းတၢင်းၵႂႃႇႁိမ်းမၼ်းၼၼ်ႉတီႈမၼ်းလႄႈ၊- 38မၼ်းၼၼ်ႉႁွင်ႉသႅၼ်ႇလႄႈဝႃႈ၊ ယေႇသူႉလုၵ်ႈတႃႇဝိတ်ႈတီႈၶႃႈ၊ ဢဵတ်းလူၵဝ်ၶႃႈသေၵမ်းၶႃႈ၊ ဝႃႈၼင်ႇၼႆယူႇဢေႃႈ။- 39ပိၵ်ႉသမ်ႉၶဝ်ၸိူဝ်းဢၼ်ၵႂႃႇပႃႈၼႃႈမၼ်းၸဝ်ႈၼၼ်ႉ ႁိုတ်းဝႃႈ၊ ႁႂ်ႈမၼ်းယူႇတဵတ်ႇတဵတ်ႇယဵၼ်ယဵၼ်သေၵေႃႈ၊ မၼ်းၼၼ်ႉယဵင်ႈၶႅၼ်းႁွင်ႉသႅၼ်ႇလႄႈဝႃႈ၊ လုၵ်ႈတႃႇဝိတ်ႈတီႈၶႃႈ၊ ဢဵတ်းလူၵဝ်ၶႃႈသေၵမ်းၶႃႈ၊ ဝႃႈၼင်ႇၼႆယူႇဢေႃႈ။- 40ယေႇသူႉၵေႃႈၸုၵ်းၵိုတ်းယူႇသေလႄႈ မီးဢမိင်ႉႁႂ်ႈဢဝ်မၼ်းမႃးၵႃႈတီႈႁိမ်းမၼ်းၸဝ်ႈဢေႃႈ။ မၼ်းၼၼ်ႉ သုတ်ႉၸပ်းသုတ်ႉၸူးၵႃႈတီႈမၼ်းၸဝ်ႈသေယဝ်ႉ၊ မၼ်းၸဝ်ႈၵေႃႈထၢမ်မၼ်းလႄႈဝႃႈ၊ ၶႂ်ႈႁႂ်ႈၵဝ်ႁဵတ်းတီႈမႂ်းၸိူဝ်ႉၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊- 41မၼ်းၼၼ်ႉၵေႃႈလဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ႁဵတ်းႁႂ်ႈမၢၵ်ႇတႃၵဝ်ၶႃႈ ႁၼ်မႃးသေၵမ်းၶႃႈ၊ ဝႃႈၼင်ႇၼႆသေယဝ်ႉ၊- 42ယေႇသူႉၵေႃႈလၢတ်ႈလႄႈဝႃႈ၊ ႁႂ်ႈမၢၵ်ႇတႃမႂ်းႁၼ်တႃႉ။ တၢင်းယုမ်ႇမၢတ်ႈမႂ်းၼႆႉၵႄႇၶျွတ်ႈဢဝ်မႂ်းယဝ်ႉ၊ ဝႃႈၼင်ႇၼႆဢေႃႈ။- 43မိူဝ်ႈၼၼ်ႉၵမ်းလဵဝ်၊ မၼ်းၼၼ်ႉမၢၵ်ႇတႃႁၼ်မႃးသေယဝ်ႉ၊ ယွင်ႈယေႃးမုၼ်ၽြႃးပဵၼ်ၸဝ်ႈယူႇသေလႄႈ ၸွမ်းပႃႈလင်မၼ်းၸဝ်ႈၵႂႃႇဢေႃႈ။ ၵူၼ်းတင်းသဵင်ႈတင်းလူင်ႁၼ်သေယဝ်ႉ၊ ဢွၼ်ၵၼ်ယွင်ႈယေႃးၽြႃးပဵၼ်ၸဝ်ႈဢေႃႈ။
Pilihan Saat Ini:
လူႉၵႃႇ 18: CBMS
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Copyright © 2021 by OMF International, Shan Baptist Churches Fellowship
