လူႉၵႃႇ 17
17
လွင်ႈဢပႅတ်ႈ၊ တၢင်းယုမ်ႇမၢတ်ႈ၊ ဝၢတ်ႈတြႃးလုၵ်ႈၸၢင်ႈ
(တူၺ်း၊ မၢတ်ႈ 18:6-7၊21-22။ မႃႇ 9:42)
1မၼ်းၸဝ်ႈသမ်ႉလၢတ်ႈတီႈတပႄးၸဝ်ႈတင်းလၢႆထႅင်ႈလႄႈဝႃႈၸမ်ႉ၊ လွင်ႈတၢင်းဢၼ်ၶီႈလိုတ်းလႄႈ လူမ်ႉတင်းလၢႆၼၼ်ႉ တၵ်းလႆႈမီးဢေႃႈ။ ၼႂ်းဝႃႈၼၼ်သေၵေႃႈ ၵေႃႉဢၼ်ႁႂ်ႈလွင်ႈတၢင်းဢၼ်ၶီႈလိုတ်းလႄႈလူမ်ႉပဵၼ်ၼၼ်ႉမီးဢႃႉမင်ႇၵလႃႇဢေႃႈ။- 2ၵေႃႉဢၼ်ႁႂ်ႈလုၵ်ႈဢွၼ်ႇၸိူဝ်းၼႆႉသေၵေႃႉသေၵူၼ်း ၶီႈလိုတ်းလႄႈလူမ်ႉၼၼ်ႉ၊ တီႈၵေႃႉၼၼ်ႉပေႃးမၼ်းလႆႈၶၢမ်ႇတၢင်းဢၼ်ဢဝ်မၢၵ်ႇႁိၼ်လူၺ် ႁွႆႈသႂ်ႇၵႃႈတီႈၶေႃးသေလႄႈ ပွႆႇၸူမ်လူင်းၵႃႈၼႂ်းၼမ်ႉပၢင်ႇလၢႆႇတီႈဢၼ်လိုၵ်ႉၼၼ်ႉၸိုင်၊ ယဵင်ႈၶႅၼ်းတၵ်းလီဢေႃႈ။
3သူႁဵတ်းသတီႉတီႈတူဝ်ၸဝ်ႈၵဝ်ႇတႃႉ။ ပေႃးပီႈၼွင်ႉမႂ်းၽိတ်းပိူင်ႈမႂ်းၸိုင်၊ သင်ႇသွၼ်ပၼ်မၼ်းတႃႉ။ ပေႃးမၼ်းလႆႈတၢင်းဢၼ်ၶုၵ်းၸႂ်လႆႈမႆႈၸႂ်ၸိုင်၊ ပွႆႇလွတ်ႈဢပႅတ်ႈမၼ်းတႃႉ။- 4ၼႂ်းဝၼ်းၼိုင်ႈ ပေႃးမၼ်းၽိတ်းပိူင်ႈမႂ်း တေႃႇထိုင်ႁွတ်ႈၸဵတ်းပွၵ်ႈလႄႈ သမ်ႉၶိုၼ်းမႃးတီႈမႂ်းတေႃႇထိုင်ႁွတ်ႈၸဵတ်းပွၵ်ႈလႄႈဝႃႈ၊ ၵဝ်ၶႃႈၶုၵ်းၸႂ်လႆႈမႆႈၸႂ်ၶႃႈယဝ်ႉ၊ ဝႃႈၼင်ႇၼႆၸိုင်၊ ပွႆႇလွတ်ႈဢပႅတ်ႈမၼ်းၼၼ်ႉတႃႉ၊ ဝႃႈၼင်ႇၼႆဢေႃႈ။- 5တမၢၼ်ႇၸဝ်ႈတင်းလၢႆၵေႃႈ တွင်းပၢၼ်ႇတီႈၸဝ်ႈၽြႃးလႄႈဝႃႈ၊ ႁႂ်ႈတၢင်းယုမ်ႇမၢတ်ႈႁဝ်းၶႃႈယႂ်ႇမႃးသေၵမ်းၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 6ၸဝ်ႈၽြႃးၵေႃႈလၢတ်ႈလႄႈဝႃႈ၊ ပေႃးသူမီးတၢင်းဢၼ်ယုမ်ႇမၢတ်ႈထၢၼ်ႇ ၽၼ်းၽၵ်းၵၢတ်ႇမဵတ်ႉၼိုင်ႈၸိုင်၊ ၼႂ်းလွင်ႈဢၼ်သူလၢတ်ႈတီႈတူၼ်ႈမၢၵ်ႇလိူဝ်ႇၼႆႉလႄႈဝႃႈ၊ မႂ်းထူၺ်ႈဢဝ်တင်းႁၢၵ်ႈမႂ်းသေလႄႈ ပၵ်းယူႇၵႃႈၼႂ်းပၢင်ႇလၢႆႇပုၼ်ႉတႃႉ၊ ဝႃႈၼင်ႇၼႆၼၼ်ႉ၊ မၼ်းတၵ်းထွမ်ႇဢဝ်ၵႂၢမ်းသူဢေႃႈ။- 7ၼႂ်းသူၼႆႉ၊ ၽူႈလႂ်မီးၵူၼ်းၸႂ်ႉၵူၼ်းသွႆဢၼ်ထိူၼ်ႇၼႃးလႂ်၊ ဢၼ်လဵင်ႉသူဝ်းလဵင်ႉဝူဝ်းလႂ်လႄႈ မိူဝ်ႈဢၼ်မၼ်းလုၵ်ႉသေၵႃႈတီႈတူင်ႈၼႃးလႄႈမႃးၶဝ်ႈၼႂ်းႁိူၼ်းၼၼ်ႉၸိုင်၊ တၵ်းလၢတ်ႈတီႈမၼ်းၼၼ်ႉလႄႈဝႃႈ၊ မႃးၵမ်းလဵဝ်လႄႈဢိင်ယူႇႁိမ်းတီႈၵိၼ်တႃႉ၊ ဝႃႈၼင်ႇၼႆ။- 8တၵ်းလၢတ်ႈတီႈမၼ်းၼၼ်ႉလႄႈဝႃႈ၊ မႄးႁႅၼ်းပုၼ်ႈဢၼ်ၵဝ်တၵ်းၵိၼ်တႃႉ။ ႁတ်ႉသၢႆဢႅဝ်သေလႄႈ ႁဵတ်းလဵင်ႉႁဵတ်းလူၵဝ် ႁႂ်ႈတေႃႇထိုင်ႁွတ်ႈၵဝ်ၵိၼ်ယဝ်ႉၶူပ်းယဝ်ႉၼၼ်ႉတႃႉ။ လိုၼ်းၼၼ်ႉ မႂ်းၸင်ႇတၵ်းလႆႈၵိၼ်ဢေႃႈ၊ ဝႃႈၼင်ႇၼႆဢမ်ႇၸႂ်ႈႁိုဝ်။- 9ပိူဝ်ႈဢၼ်မၼ်းႁဵတ်းၸွမ်းလွင်ႈတၢင်းဢၼ်ၸဝ်ႈမၼ်းၸီႇယၢင်ႇတင်းလၢႆၼၼ်ႉလႄႈ ၸဝ်ႈမၼ်းတၵ်းလၢတ်ႈတီႈၵူၼ်းၸႂ်ႉၵူၼ်းသွႆၼၼ်ႉလႄႈဝႃႈ၊ ၵျေးၸူးမႂ်းယႂ်ႇၼႃႇဢေႃႈ၊ ဝႃႈၼင်ႇၼႆႁိုဝ်။ ၵဝ်ဢမ်ႇထၢင်ႇၵူၺ်ႉ။- 10ၼႄးလဵဝ်ၵၼ်၊ သူၵမ်ၵျၢင်ႉလွင်ႈတၢင်းၵႃႈဢၼ်မၼ်းၸဝ်ႈၸီႇယၢင်ႇဝႆႉတင်းသဵင်ႈတင်းလူင်ၼၼ်ႉသေယဝ်ႉ၊ လၢတ်ႈလႄႈဝႃႈ၊ ႁဝ်းပဵၼ်ၵူၼ်းၸႂ်ႉၵူၼ်းသွႆဢၼ်ႁဵတ်းၵျေးၸူးတီႈၸဝ်ႈဢမ်ႇၸႂ်ႈ။ ႁဝ်းႁဵတ်းဝၢတ်ႈဢၼ်ႁဝ်းထုၵ်ႇလီႁဵတ်းၼၼ်ႉၵူၺ်းဢေႃႈ၊ ဝႃႈၼင်ႇၼႆလႄႈ ႁပ်ႉတုင်းဢဝ်တႃႉ၊ မၼ်းၸဝ်ႈဝႃႈၼင်ႇၼႆဢေႃႈ။
ၸဝ်ႈယေႇသူႉႁႂ်ႈၵူၼ်းတုတ်ႈသိပ်းၵေႃႉမူတ်းသႂ်
11မၼ်းၸဝ်ႈၼၼ်ႉ၊ မိူဝ်ႈဢၼ်ယင်းတိုၵ်ႉၵႂႃႇၵႃႈတီႈဝဵင်းယေႇရူႉသလႅမ်ႇယူႇၼၼ်ႉၸိုင်၊ လတ်းၵႃႈၼႂ်းၶိုင်ႈၵၢင် မိူင်းသမႃႇရီႉ တင်းမိူင်းၵႃႇလီႉလႄးသေလႄႈ ၵႂႃႇဢေႃႈ။- 12ၼႂ်းမိူဝ်ႈဢၼ်မၼ်းၸဝ်ႈၶဝ်ႈၵႂႃႇၵႃႈၼႂ်းဝၢၼ်ႈဝၢၼ်ႈၼိုင်ႈၼၼ်ႉၸိုင်၊ ၵူၼ်းပဵၼ်တုတ်ႈသိပ်းၼိုင်ႈ ဢၼ်ၸုၵ်းယူႇၵႃႈတီႈဢၼ်ၵႆၼၼ်ႉႁပ်ႉႁူဝ်တၢင်းမၼ်းၸဝ်ႈသေလႄႈ၊- 13ႁွင်ႉသႅၼ်ႇလႄႈဝႃႈ၊ ယေႇသူႉ ၸဝ်ႈႁဝ်းတီႈၶႃႈ၊ ၶႅၼ်းတေႃႈဢဵတ်းလူႁဝ်းၶႃႈသေၵမ်းတီႈၶႃႈ၊ ဝႃႈၼင်ႇၼႆဢေႃႈ။- 14မၼ်းၸဝ်ႈႁၼ်ၶဝ်ၼၼ်ႉသေယဝ်ႉ၊ လၢတ်ႈလႄႈဝႃႈ၊ သူၵႂႃႇလႄႈၼႄပျႃးတူဝ်ၸဝ်ႈၵဝ်ႇ တီႈယိတ်ႈပရေႃးႁဵၵ်ႈတင်းလၢႆပုၼ်ႉတႃႉ ဝႃႈၼႆ၊ ၵႃႈၼင်ႇဢၼ်မၼ်းၸဝ်ႈဝႃႈၼၼ်ႉ၊ ၼႂ်းမိူဝ်ႈဢၼ်ၶဝ်ယင်းတိုၵ်ႉၵႂႃႇယူႇၼၼ်ႉၸိုင်၊ ၶဝ်လႆႈႁွတ်ႈထိုင်တၢင်းဢၼ်မူတ်းသႂ်ဢေႃႈ။- 15ၼႂ်းၶဝ်ၼၼ်ႉၵူၼ်းၵေႃႉၼိုင်ႈ လႆႈႁၼ်လွင်ႈဢၼ်တူဝ်ၸဝ်ႈၵဝ်ႇၵၢင်းလွတ်ႈတင်းတၢင်းၶႆႈတၢင်းပဵၼ်ၼၼ်ႉသေယဝ်ႉ၊ ၶိုၼ်းမႃးလႄႈႁဵတ်းတင်းသဵင်ဢၼ်ယႂ်ႇၼႃႇ ယွင်ႈယေႃးမုၼ်ၽြႃးပဵၼ်ၸဝ်ႈဢေႃႈ။- 16မၼ်းၶုပ်ႉမူပ်ႇႁိမ်းတိၼ်မၼ်းၸဝ်ႈသေလႄႈလဝ်ႊလၢတ်ႈလႄႈဝႃႈ၊ ၵျေးၸူးၸဝ်ႈႁဝ်းယႂ်ႇၼႃႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။ ၵေႃႉၼၼ်ႉပဵၼ်ၵူၼ်းသမႃႇရီႉဢေႃႈ။- 17ယေႇသူႉၵေႃႈထၢမ်လႄႈဝႃႈ၊ ၵူၼ်းဢၼ်ႁွတ်ႈထိုင်တၢင်းဢၼ်မူတ်းသႂ်မီးသိပ်းၼိုင်ႈ ဢမ်ႇၸႂ်ႈႁိုဝ်။ ၶဝ်ၵဝ်ႈၵေႃႉၼၼ်ႉမီးၵႃႈလႂ်။- 18လိူဝ်သေၵူၼ်းတၢင်ႇၸိူဝ်ႉတၢင်ႇၶိူဝ်းၼႆႉ၊ ၵေႃႉဢၼ်ၶိုၼ်းမႃးႁႂ်ႈလႆႈယွင်ႈယေႃးမုၼ်ၽြႃးပဵၼ်ၸဝ်ႈဢမ်ႇမီးသေၵေႃႉသေၵူၼ်းႁိုဝ်။ ဝႃႈၼင်ႇၼႆသေယဝ်ႉ၊- 19မၼ်းၸဝ်ႈသမ်ႉလၢတ်ႈတီႈၵေႃႉၼၼ်ႉထႅင်ႈလႄႈဝႃႈ၊ မႂ်းလုၵ်ႉလႄႈၵႂႃႇတႃႉ။ တၢင်းယုမ်ႇမၢတ်ႈမႂ်းႁႂ်ႈတၢင်းၶႆႈတၢင်းပဵၼ်မႂ်းႁၢႆယဝ်ႉ၊ ဝႃႈၼင်ႇၼႆဢေႃႈ။
မိူင်းၽြႃးပဵၼ်ၸဝ်ႈတၵ်းတႄႇပဵၼ်မႃး
(တူၺ်း၊ မၢတ်ႈ 24:23-28၊37-41)
20ၵမ်းၼၼ်ႉ ၽႃႇရီႉသႄးတင်းလၢႆလဝ်ႊထၢမ်လႄႈဝႃႈ၊ မိူင်းၽြႃးပဵၼ်ၸဝ်ႈတၵ်းတႄႇပဵၼ်ၶိင်ႇၵႃႇလႃႉမိူဝ်ႈလႂ်ၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ ယေႇသူႉၵေႃႈၶိုၼ်းလၢတ်ႈလႄႈဝႃႈ၊ မိူင်းၵၢင်ႁၢဝ်ၸဝ်ႈၼၼ်ႉ ဢမ်ႇတႄႇၵႃႈတီႈဢၼ်တႃၵူၼ်းႁၼ်။- 21တူၺ်းၵႃႈတီႈၼႆႈတႃႉ၊ တူၺ်းၵႃႈတီႈၼၼ်ႈတႃႉ၊ ဝႃႈၼႆ၊ တီႈဢၼ်တၵ်းလၢတ်ႈဢမ်ႇမီး။ လွင်ႈမၼ်းၸမ်ႉ မိူင်းၽြႃးပဵၼ်ၸဝ်ႈမီးယူႇၼႂ်းသူဢေႃႈ၊ ဝႃႈၼင်ႇၼႆဢေႃႈ။
22မၼ်းၸဝ်ႈသမ်ႉလၢတ်ႈတီႈတပႄးၸဝ်ႈတင်းလၢႆထႅင်ႈလႄႈဝႃႈၸမ်ႉ၊ ၶိင်ႇၵႃႇလႃႉဢၼ်သူတၵ်းၶႂ်ႈထူပ်းၶႂ်ႈႁၼ် ဝၼ်းလုၵ်ႈၵူၼ်းဝၼ်းၼိုင်ႈလႄႈ ဢမ်ႇလႆႈထူပ်းလႆႈႁၼ်ၼၼ်ႉ တၵ်းႁွတ်ႈမႃးဢေႃႈ။
23ပိၵ်ႉသမ်ႉၶဝ်လၢတ်ႈတီႈသူလႄႈဝႃႈ၊ တူၺ်းၵႃႈတီႈၼႆႈတႃႉ၊ တူၺ်းၵႃႈတီႈၼၼ်ႈတႃႉ၊ ဝႃႈၼင်ႇၼႆသေၵေႃႈ၊ ယႃႇပေၸွမ်း၊ ယႃႇပေၵႂႃႇ။- 24လုၵ်ႈၵူၼ်းတၵ်းပဵၼ်ၼႂ်းဝၼ်းတူဝ်ၸဝ်ႈၵဝ်ႇ မိူၼ်ၸိူဝ်ႉၼင်ႇၽႃႉမႅပ်ႈဢၼ်လုၵ်ႉသေၵႃႈတီႈၽၢၵ်ႇၼိုင်ႈၼိူဝ်ၽႃႉၵၢင်ႁၢဝ် ႁိူဝ်ႈလႅင်းတေႃႇထိုင်ႁွတ်ႈၽၢၵ်ႇၼိုင်ႈၼၼ်ႉဢေႃႈ။- 25ၸူဝ်ႈဢၼ်ဢမ်ႇပႆႇပဵၼ်ၸိူဝ်ႉၼင်ႇၼၼ်ၼၼ်ႉၸိုင်၊ မၼ်းၸဝ်ႈတၵ်းလႆႈၶၢမ်ႇတုၵ်ႉၶႃႉတၢင်းၽၢၼ်ၼမ်ၼႃႇ ဢိၵ်ႇတင်းတၢင်းဢၼ်ၵူၼ်းမဵဝ်းတေႃႈလဵဝ်ၼႆႉ ပႄႇပႅတ်ႈၼၼ်ႉဢေႃႈ။- 26ၸိူဝ်ႉၼင်ႇဢၼ်ပဵၼ်ၼႂ်းၸူဝ်ႈပၢၼ်ၼူဝ်းဢႃႇၼၼ်ႉ၊ တၵ်းပဵၼ်ၼႂ်းၸူဝ်ႈပၢၼ်လုၵ်ႈၵူၼ်းၼၼ်ႉဢေႃႈ။- 27ၶဝ်ၼၼ်ႉၵိၼ်ယူႇ၊ ၶူပ်းယူႇ၊ ဢဝ်ၽူဝ်ယူႇ၊ ဢၢပ်ႈပၼ်ၵၼ်ယူႇတေႃႇထိုင်ႁွတ်ႈဝၼ်းဢၼ်ၼူဝ်းဢႃႇ ၶဝ်ႈၵႃႈၼႂ်းႁိူဝ်းသၢင်းၽေႃးလႄႈ၊ တၢင်းဢၼ်ၼမ်ႉထူမ်ႈမိူင်း မႃးၽဵဝ်ႈပႅတ်ႈၶဝ်တင်းသဵင်ႈတင်းလူင်ၼၼ်ႉဢေႃႈ။- 28ပိူင်လဵဝ်ၵၼ် ၸိူဝ်ႉၼင်ႇဢၼ်ပဵၼ်မႃးၼႂ်းၸူဝ်ႈပၢၼ်လေႃးတႃႉၼၼ်ႉ၊ ၶဝ်ၼၼ်ႉၵိၼ်ယူႇ၊ ၶူပ်းယူႇ၊ သိုဝ်ႉယူႇ၊ ၶၢႆယူႇ၊ ၽုၵ်ႇသွမ်ႈယူႇ၊ ႁဵတ်းႁိူၼ်းယူႇဢေႃႈ။- 29ၵူၺ်းၵႃႈ ၼႂ်းဝၼ်းဢၼ်လေႃးတႃႉ ဢွၵ်ႇသေၵႃႈၼႂ်းဝဵင်းသေႃးတုမ်ႇၼၼ်ႉ ၽူၼ်ၽႆးဢၼ်လေႃးၵၼ်တင်းၵၢၼ်ႉ တူၵ်းသေၵႃႈၼိူဝ်ၽႃႉၵၢင်ႁၢဝ်မႃးလႄႈ ၽဵဝ်ႈပႅတ်ႈၶဝ်တင်းသဵင်ႈတင်းလူင်ဢေႃႈ။- 30မိူၼ်ၸိူဝ်ႉၼင်ႇၼၼ်တၵ်းပဵၼ်ၼႂ်းဝၼ်းဢၼ်လုၵ်ႈၵူၼ်းပေႃႇမႃးၼၼ်ႉဢေႃႈ။
31ၼႂ်းဝၼ်းၼၼ်ႉ ယႃႇပေႁႂ်ႈၵေႃႉဢၼ်မီးယူႇၵႃႈၼိူဝ်ၸွမ်ႁိူၼ်းလႄႈ ဢုၵ်ႉၸႃႇၶူဝ်းလဵင်းမၼ်းမီးၵႃႈၼႂ်းႁိူၼ်းၼၼ်ႉလူင်းႁႂ်ႈလႆႈဢဝ်ၶူဝ်းလဵင်းမၼ်းၼၼ်ႉၵႂႃႇ။ မိူၼ်ၼင်ႇၼၼ် ယႃႇပေႁႂ်ႈၵေႃႉဢၼ်မီးယူႇၵႃႈၼႂ်းတူင်ႈၼႃးၼၼ်ႉ ဝၢႆႇၶိုၼ်းမိူဝ်းတၢင်းလင်။- 32ၶုၵ်းၸႂ်လႆႈၶႆႈၸႂ်ထူပ်း မေးလေႃးတႃႉၼၼ်ႉတႃႉ။- 33ၽူႈလႂ်သေဢမ်ႇဝႃႈ၊ ၵေႃႉဢၼ်ၵျၢမ်ႇႁႃ ႁႂ်ႈလႆႈၵႄႇသႄႇဢဝ်ဢသၢၵ်ႈတူဝ်ၸဝ်ႈၵဝ်ႇၼၼ်ႉ၊ ၵေႃႉၼၼ်ႉတၵ်းသုမ်းဢသၢၵ်ႈဢေႃႈ။ ၽူႈလႂ်သေဢမ်ႇဝႃႈ၊ ၵေႃႉဢၼ်သုမ်းဢသၢၵ်ႈၼၼ်ႉ တၵ်းၵႄႇသႄႇဢဝ်ဢသၢၵ်ႈတူဝ်ၸဝ်ႈၵဝ်ႇဢေႃႈ။
34ၵဝ်ဝႃႈတီႈသူၸမ်ႉ၊ ၼႂ်းၶိုၼ်းၼၼ်ႉ ၵူၼ်းသွင်ၵေႃႉ တၵ်းမီးယူႇၵႃႈၼိူဝ်ၵူႇတီႈၼွၼ်းဢၼ်ၼိုင်ႈဢေႃႈ။ တၵ်းသိမ်းဢဝ်ၵေႃႉၼိုင်ႈလႄႈ၊ ၵေႃႉၼိုင်ႈၸမ်ႉ တၵ်းလႆႈၵိုတ်းဝႆႉယူႇဢေႃႈ။- 35ၵူၼ်းယိင်းသွင်ၵေႃႉတၵ်းလူၺ်ၶဝ်ႈယူႇဢေႃႈ။ တၵ်းသိမ်းဢဝ်ၵေႃႉၼိုင်ႈလႄႈ၊ ၵေႃႉၼိုင်ႈၸမ်ႉ တၵ်းလႆႈၵိုတ်းဝႆႉယူႇဢေႃႈ၊ မိူဝ်ႈဢၼ်မၼ်းၸဝ်ႈဝႃႈၼင်ႇၼႆၸိုင်၊- 36-37ၶဝ်ၼၼ်ႉၶိုၼ်းလဝ်ႊထၢမ်လႄႈဝႃႈ၊ ၸဝ်ႈႁဝ်း တၵ်းပဵၼ်ၸိူဝ်ႉၼင်ႇၼၼ်ၵႃႈတီႈလႂ်ၶႃႈ၊ ဝႃႈၼင်ႇၼႆသေယဝ်ႉ၊ မၼ်းၸဝ်ႈၵေႃႈလၢတ်ႈလႄႈဝႃႈ၊ တီႈဢၼ်တူဝ်တၢႆမီးၼၼ်ႉ လၢင်းတႃႉၶမ်းတင်းလၢႆတၵ်းၸူႉၵၼ်တုမ်ၵၼ်ဢေႃႈ၊ ဝႃႈၼင်ႇၼႆဢေႃႈ။
Pilihan Saat Ini:
လူႉၵႃႇ 17: CBMS
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Copyright © 2021 by OMF International, Shan Baptist Churches Fellowship
