Matyu 8
8
To panangpalaing ne̍ Je̍sus ito nakutel
Mar. 1:40-45; Luk. 5:12-16
1Ket ito nanagus nge̍ Je̍sus ito tageytey yin, adu nga unay diya toley nga nibulubulun igina. 2Ket itun, uwed isa nga lalaki nga nakutel nga nawe̍ iya edyan ne̍ Je̍sus. Nagparintumeng met nga sidadayaw iya sangu ne̍ Je̍sus, nga kinunen na, “Apu, emmuc nga mapalaing nac met, no gabay mu,” kunen na.
3Ket inicman ngarud ne̍ Je̍sus nga kinunen na, “Gabay ku met. Malaingan ka ngarudin,” kunen na. Ket sigida met nga pimaw-isin ya latlat nito lalaki, nga awan to kutel nan. 4Ket kinunen ne̍ Je̍sus igina, “Madi ka ibagbaga ya maipanggep idi iya orey nagan na. Mawe̍ ka ipasingen ya beggim iya agsirsirbi iya Te̍mplu, se̍ agidatun ka ka sagut nga maikanatad iya bilin nito Muyse̍s, tasun maipanecnec kadiya toltoley ya pannakapalaing mu,” kunen na.
To panangpalaing ne̍ Je̍sus ito eb-ebbonen
Luk. 7:1-10
5Ket ito nakadateng nge̍ Je̍sus ka Kape̍rnaum, uwed simabet igina nga isa nga kapitan suldadu niya gubiye̍rnu Ruma. Ket nagpacpakaasi to kapitan nga kinunen na, 6“Apu, ya eb-ebbonec, nakaida ngas iya baley nga madi na met makiwa ya beggi na, ket marigatan nga unay,” kunen na.
7Ket kinunen ne̍ Je̍sus igina, “Mawe̍ yac ngarud palaingen,” kunen na.
8Ngem to kapitan, kinunen na igina, “Ay, bekken nin, Apu, ta madi yac met maikari nga mangsangaili ikew iya baley ku. Basta ikagim kuma ngasin ya bilin mu, tasun malaingan kuma ngin ya eb-ebbonec. 9Emmuc nga mabalin ya agten iyan, ta orey iyaken, uwed pe̍ mangituray iyaken, se̍ uwed da met iturayac nga suldadu. Ket no ibon ku ya isa, ket mawe̍ met. Se̍ no ‘Umbe̍t ka idi,’ kunec iya isa, ket umbe̍t met. Se̍ no ‘Idi ya wanglem,’ kunec iya tagabuc, ket tungpalen na met,” kunen na.
10Ket nasdaaw nge̍ Je̍sus ito nagicna na ya kinunen nito kapitan. Ket kinunen ne̍ Je̍sus kadito nibulubulun igina, “Tutu met yani nga ibagac dakayu: Orey kadiya iIsrae̍l, awan pekkem naaskurac nga agten idi nga nabileg ya panamati na. 11Tutu met nga adu nad diya gayat iya daya se̍ ellod nga makisangu nga mangan kade̍ Abraham, Isaac se̍ e̍ Hakub iya pagiturayan niya Nailangitan. 12Ngem dito sigud nga nangibilang iya beggi da nga kameng iya panangituray niya Nailangitan, mailaskig da nad nga gennung nga maitemsit iya kagicbettan enna deyyu. Ket diya uwed antuni nga lugar, agberrit se̍ agngaretnget da ngarud,” kunen na.
13Ket kinunen ne̍ Je̍sus ito kapitan suldadu, “Agawir ka ngas ngarudin. Ta ya pinatim nga maariman, ket naarimanin,” kunen na.
Ket iyan mettas nga kanitu, nalaingan nga tutu to eb-ebbonen nito kapitan.
To panangpalaing ne̍ Je̍sus ito katugangan ne̍ Pe̍dru,
se̍ kadiya duduma pekkem
Mar. 1:29-34; Luk. 4:38-41
14Ket ito nawe̍ nge̍ Je̍sus iya baley de̍ Pe̍dru, nadateng na ya katugangan ne̍ Pe̍dru nga babey nga nakaida, ta madagang met. 15Ket e̍ Je̍sus, inicman na ya ima nito babey, ket nalaingan mettin to dagang na. Ket to babey, bimangunin, ket nagistimar pe̍ ka para e̍ Je̍susin.
16Ket ito gidamin iyan mettas nga algew, ne̍lbe̍t diya toltoley iya edyan ne̍ Je̍sus diya adu nga naluganan ka sairu. Ket pinagtalew na dito sairu gapu was iya kinagi na. Ket diya agsakit, pinalaing na da met pe̍ nga amin. 17Ket agten iyan ngarud ya napasamac itun tasun matungpal to kinagi nito mammadtu nga Isayas, ito kinunen na, “Nipac na diya dipe̍re̍nsiya niya begbeggi tida, se̍ inagasan na diya sacsakit tida,” kunen nito Isayas.
Ya rebbeng diya pasurut ne̍ Je̍sus
Luk. 9:57-62
18Ket ito nasingen ne̍ Je̍sus dito nakad-adu nga toltoley iya le̍cbut na, nibilin na kadito adalan na nga kunen na, “Tidan, dumelmang tida iya baybayin,” kunen na.
19Ket uwed met imadenni igina itun nga isa nga manursuru iya Linteg Hudyu, ket kinunen na e̍ Je̍sus, “Mistru, sumurut tac met ikew iya orey awac nga kapennam,” kunen na.
20Ket kinunen ne̍ Je̍sus igina, “Utubem man yani: No diya musang, uwed pagedyanan da nga re̍kab. Ket se̍ diya sibsibud, uwed pe̍ sucbut da. Ngem ya Anac nga Naipatoley, awan met nga gennung pagedyanan na tasun uwed kustu nga pagidaan na,” kunen na.
21Ket uwed met pe̍ sabali nga pasurut ne̍ Je̍sus nga nagkunen igina, “Sumurut tac pe̍, Apu, ngem palubusan nac kay pekkem nga mawe̍ mangsingen iya pannakaitamen ne̍ amac,” kunen na.
22Ngem kinunen ne̍ Je̍sus, “Suruten nac lugudin, ta biyang met diya maiyarig ka natey ya makaemmu kadiya minatey da,” kunen na met.
To panangpatalna ne̍ Je̍sus iya belluut
Mar. 4:35-41; Luk. 8:22-25
23Ket itun, nawe̍ naglugan nge̍ Je̍sus ito bangka, ket nibulun ngarud igina dito adalan na. 24Ket ya napasamac itun, nagbelluut met ka nabileg gin, ket masacsacduwan mettin to bangka da. Ngem e̍ Je̍sus, agtudtudug. 25Ket dito adalan, nawe̍ da ngarud linukag nge̍ Je̍susin, nga kinunen da, “Apu! Isalakan nakami kay, ta matey tidan!” kunen da.
26Ket kinunen ne̍ Je̍sus igida, “Ape̍ mansing kayu? Nakapsut met ya panamati nu!” kunen na. Ket bimangun nge̍ Je̍sus, se̍ na met binilin to belluut se̍ palung nga agtalna da. Ket natalna met nga tutu ya aminin.
27Ket nasdaaw ngarud dito adalan na, nga kinunen da, “Nagan ngata ya katotoley nidi? Ta orey ya belluut se̍ diya palung, ket agtungpal da met igina!” kunen da.
Dito duwa nga lalaki nga naluganan ka sairu
Mar. 5:1-2; Luk. 8:26-39
28Ket ito nakadateng de̍ Je̍sus enna demmang iya sakup diya iGadara, uwed met duwa nga lalaki nga naluganan ka sairu, nga naggayat da met kadiya tatamennan, ket simabet da e̍ Je̍sus. Ket diya toltoley antuni nga lugar, madi da mabalin ya manalan nga tumalib kadiyan nga tatamennanin, gapu ta nakauy-uyung dito duwa nga lalaki. 29Ket dito duwa nga lalaki, kinunen da e̍ Je̍sus ka nabileg, “Anac ne̍ Apu Diyus! Nagan ngarud ya biyang mu dakami? Inumbe̍t ka aya idi tasun parigaten nakami ita, sacbay niya naikeddeng nga pannakadusa mi?” kunen da.
30Ket iya bekken nga deyyu antuni, uwed met isa nga dackel nga bungguy diya abuy nga agsebsebbuc. 31Ket dito sairu nga naglugan kadito duwa nga lalaki, nagpakaasi da e̍ Je̍sus, nga kinunen da, “No pagtalawen nakami, dituni nga abuy kuma ya pangiyalisam dakami,” kunen da.
32Ket kinunen ne̍ Je̍sus igida, “Ala, ingkayu ngarudin!” kunen na. Dikad pe̍ pimanaw ngarud dito sairu, nga nawe̍ da limugan kadito abuy. Ket dito abuy, nagtatagtag da met nga aminin nga nanagus iya nangiras, nga nawe̍ da iya baybayin. Ket nalibet da mettin iya danum.
33Ket diya agay-aywan kadito abuy, nagtalew da ngarudin. Ket nawe̍ da iya ili, nga nipadapadamag da amin nito napasamac, nangruna maipanggep kadito lalaki nga naluganan itun. 34Ket diya toltoley ito ili, nawe̍ da nga amin simabet e̍ Je̍sus. Ket ito nakadateng da iya edyan ne̍ Je̍sus, nagpakaasi da ngarud igina nga pumanaw kuma kanu iya sakup dan.
Pilihan Saat Ini:
Matyu 8: YBT
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 1990 New Tribes Mission, Sanford, FL 32771-1487, USA.
Printed in the Philippines.
