Matyu 9
9
To panangpalaing ne̍ Je̍sus ka lugpi
Mar. 2:1-12; Luk. 5:17-26
1Ket nawe̍ ngarud naglugan nge̍ Je̍sus ito bangka, ket dimelmang da nga nawe̍ ito ili nga pagedyanan na. 2Ket antuni, uwed da toley nga nange̍lbe̍t e̍ Je̍sus ka isa nga lugpi nga nakaida iya ida na. Ket ito nalasin ne̍ Je̍sus ya panamati da, kinunen na ito lugpi, “Anac ku, sinanama ka kuma ngin, ta napakawan diya basbasul mun,” kunen na.
3Ket uwed da met itun manursuru iya Linteg Hudyu antuni nga kinunen da iya lemlemmet da, “Ahah! Maikuntra met e̍ Apu Diyus ya kagkagiyen nidi nga toley!” kunen da.
4Ket gapu ta emmu ne̍ Je̍sus ya uwed iya lemlemmet da, kinunen na, “Ape̍ dake̍c ya uwed iya lemlemmet nu? 5Nagan ngarud ya nalaclaka nga patiyen nu? No kunec igina nga, ‘Napakawan ya basbasul mun,’ winno no kunec igina nga, ‘Bumangun kan se̍ manalan kan’? 6Itan, panecnekkac ngarud dakayu nga ya Anac nga Naipatoley, uwed turay na idi nga lubung nga mamakawan ka basul.” Ket kinunen na met ito lugpi, “Ket ikew, bumangun kan. Bacrunem ya idam, se̍ agawir kan,” kunen na.
7Ket bimangun ngarud to lugpi, se̍ nagawirin. 8Ket ito nasingen diya toltoley yan, uwed ngarud ansing dan, ket nidaydayaw da nge̍ Apu Diyus gapu iyan nga nakaskasdaaw nga pannakabalin nga nipaay na ka toley.
To panangpasurut ne̍ Je̍sus e̍ Matyu
Mar. 2:13-17; Luk. 5:27-32
9Ket ito manmanalan manin nge̍ Je̍sus nga pimanaw iyanin, tumaltalib met iya upisina nga babayadan ka buis. Ket uwed nasingen na nga isa nga lalaki nga agnagan ka Matyu, nga nakatugew ito upisina. Ket kinunen ne̍ Je̍sus igina, “Suruten nac,” kunen na, ket ginumnukat ngarud nge̍ Matyu, nga nawe̍ simurut met iginan.
10Ket bayat nito kauwed ne̍ Je̍sus se̍ diya adalan na iya baley ne̍ Matyu nga agsasangu da nga mangmangan, adu met diya agsingsingir ka buis se̍ diya naibilang nga managbasul nga nawe̍ nakisangu igida nga mangan. 11Ket dito Parisiyu, nasingen da yan, itu nga kinunen da ngarud kadiya adalan ne̍ Je̍sus, “Ape̍ nga kasangsangu met niya mistru nu nga mangan diya agsingsingir ka buis se̍ diya managbasul?” kunen da.
12Ket ito nagicna ne̍ Je̍sus to kinunen da, kinagi na, “Bekken met nga diya nakaradkad ya makasapul ka mangngagas, no di lugud diya agsakit. 13Ket no dakayu, masapul met nga maadal nu ya kaipapennan nidi nga naisurat iya Bibliya nga kunen na, ‘Bekken nga ya panangidatun ka animal ya paggugustuc, no di lugud ya panangaasi.’ Maawatan nu kuma ngarud ya kaipapennan niyan, ta agten met pe̍ iyaken, nga ya numbe̍tac, bekken met nga tasun awisec diya nalinteg nga toley, no di lugud diya managbasul,” kunen na.
To panursuru ne̍ Je̍sus maipanggep iya panangiparit iya pannangan
Mar. 2:18-22; Luk. 5:33-39
14Uwed itun dito adalan ne̍ Juan nga Mammautisar, nga nawe̍ e̍ Je̍sus, nga kinunen da igina, “Ape̍ kadi nga dakami se̍ diya Parisiyu, ket emmu mi ya agariman ka kari nga aganus nga madi mangan, ngem diya adalan mu nga gennung, madi da arimanen ya agten iyan?” kunen da.
15Ket kinunen ne̍ Je̍sus igida, “Kaspagarigan no uwed pakalun, ket bayat niya kauwed pekkem niya nubyu kadiya kabulun na, rumbeng kadi no sangitan da? Bekken met! Ngem madatngan nad ya timpu nga maipanaw igidan ya nubyu, ket itu nad mettin ya timpu nga mangiparit dan iya beggi da nga mangan.
16“Kaspagarigan pe̍ no ya panangitakup ka luput, ket madi ngarud rumbeng nga itakup tida ya kabarbaru nga luput iya daan nga kawwes. Ta no kumsen nad ya naitakup, mapigis ngarudin to kawwes, ket dumacdackel mettin to sigud nga pigis na. 17Ket kaspagarigan manin no ya papayan ka basi, ket bekken nga rumbeng nga maipay ya banal nga basi ka daan nga kadus nga lalat. Ta no agten iyan, bumtac nad met ya lalat, ket mibuyat ya basi yin. Ket ya lalat nga nakaipayan na, mapirdi pe̍ yin. Dikad pe̍ no ya banal nga basi, ket ya kabarbaru kuma ngarud nga kadus nga lalat ya pakaipayan na. Ket iya agten iyan, agpada da nga madi masayang,” kunen na.
To anac nito pangulu diya Hudyu,
se̍ to babey nga uwed sarut na
Mar. 5:21-43; Luk. 8:40-56
18Ket ito madama pekkem nga agkagkagi nge̍ Je̍sus igida maipanggep iyan, uwed met inumbe̍t nga isa nga pangulu diya Hudyu. Ket nagparintumeng iya sangu ne̍ Je̍sus nga kinunen na, “Katkatey ngas niya balasitang ku. Ngem umbe̍t ka kuma, nga mangipatey iya imam igina, ket mabiyag,” kunen na.
19Ket iya agten iyan, ginumnukat ngarud nge̍ Je̍sus, ket nipuyut igina, agraman diya adalan na.
20Ket itun, uwed met ya isa nga babey nga marigrigatan ka sangapulu ket duwa nga dagunin gapu iya panagbulus niya daga na. Ket imadenni yin to babey iya likud ne̍ Je̍sus, se̍ na sine̍cde̍ng ya gayad niya luput ne̍ Je̍sus. 21Ta kinunen nito babey iya lemlemmet na nga, “No mase̍cde̍ng ku kuma orey ngas ya luput na, malaingan nac kun,” kunen na.
22Ket e̍ Je̍sus, limaw-ing ngarud. Ket ito nasingen na to babey, kinunen na igina, “Sinanama ka kuma, anac ku, ta nalaingan kan gapu iya panamatim,” kunen na. Ket sigida nga nalaingan to babey yin.
23Ket ito sinumpuc nge̍ Je̍sus ito baley nito pangulu, nasingen na diya agpacpauni ka palpaldeng, se̍ diya adu nga toley nga napagas. 24Itu nga kinunen na, “Pumanaw kayu idi! Ta bekken met nga natey ya ebbing, no di ngas mat-atudug,” kunen na. Ket nigalgalec ngas dito toley nge̍ Je̍sus. 25Ket ito naparuwarin dito toltoley, nawe̍ nge̍ Je̍sus iya uneg, ito edyan nito ebbing, ket inicman ne̍ Je̍sus ya ima na. Ket bimangun mettin to ebbing. 26Ket nagdinamag yani kadiya amin nga sakup niyan nga lugar.
To panangpalaing ne̍ Je̍sus ka duwa nga kulap
27Ket ito manmanalan manin nge̍ Je̍sus nga pimanaw iyan, uwed met duwa nga lalaki nga kulap nga nipuyut igina. Ket nipkaw da nga kinunen, “Kapututan nito Ari Dabid! Kaasiyan nakami kay!” kunen da.
28Ket ito imuneg gin de̍ Je̍sus iya baley, nawe̍ met dito kulap iya edyan na. Ket kinunen ne̍ Je̍sus igida, “Patiyen nu kadi nga kabaellac ya adngen nu?” kunen na.
Ket kinunen da met, “Bo, Apu,” kunen da.
29Ket iya agten iyan, sine̍cde̍ng ngarud ne̍ Je̍sus dito mata da nga kinunen na, “Maariman ngarud sigun iya patiyen nu,” kunen na. 30Ket nakasingen da ngarudin.
Ket binilin ne̍ Je̍sus da nga siiinget, nga kinunen na, “Awan pakaibagaan nidi,” kunen na. 31Ngem ito pimanaw dito duwa, nawe̍ da lugud met niwaras yani nga damag iya amin nga sakup niyan nga lugar.
To panangpalaing ne̍ Je̍sus ito naumel nga lalaki
32Ket ito rumrumwar dan, uwed met isa nga lalaki nga nipen diya toley iya edyan ne̍ Je̍sus. Naumel yan nga lalaki gapu ka sairu nga naglugan igina. 33Ket ito napatalew to sairu win, makakagi mettin to lalaki. Ket nasdaaw met diya toltoley nga nakasingen idi, nga kinunen da, “Awan pekkem agten idi nga nas-asingen tida idi nga Israe̍l itun,” kunen da.
34Ngem diya Parisiyu, kinunen da, “Ahah! Ya panangpatalew na ka sairu, ket gapu was met iya turay nga e̍cde̍ niya pangulu diya sairu igina,” kunen da.
To kaasi ne̍ Je̍sus kadiya toltoley
35Ket itun, nawe̍ pinasyar ne̍ Je̍sus diya amin nga il-ili se̍ purpuruc antuni. Nangisursuru kadiya gigimungan da, nga nikaskasaba na ya Makaparagsac nga Damag maipanggep iya nadiyusan nga panangituray, se̍ pinalpalaing na met diya uwed orey nagan na nga sakit winno kinakapsut niya beggi da.
36Ket ito nasingen na dito adu nga toltoley nga naurnung antuni, naasiyan ngarud igida, ta arig da nga karne̍ru nga awan agay-aywan igida, nga nariribuc se̍ nagewweng da. 37Itu nga kinunen na kadito adalan na, “Arig nga adu win diya magani kuma, ngem e̍teng ngas diya aggani. 38Itu nga agkararag kayu kuma ngarud nga agadeng iya akin-kuwa iya magani, tasun uwed da ibon na kuma nga mawe̍ manggani kadiya ipagani na,” kunen na.
Pilihan Saat Ini:
Matyu 9: YBT
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 1990 New Tribes Mission, Sanford, FL 32771-1487, USA.
Printed in the Philippines.
