Matyu 7
7
Maipanggep iya di tida kuma nga mangpabasul
Luk. 6:37-38, 6:41-42
1“Madi kayu kuma pabasulen ya kapada nu, tasun madi kayu kuma pe̍ mapabasul. 2Ta no kumaan niya inget niya panangusig nu, agten iyan nad met ya pannakausig nu. Se̍ no kumaan niya panangaasi nu, agten iyan nad met ya pannakakaasi nu.
3“Ape̍ nga dellawem ya puling nga uwed iya mata niya kapadam, ngem madi ka met madlaw ya tabla nga uwed iya mismu nga matam? 4Ket bayat niya kauwed pekkem niya tabla iya matam, ape̍ nga kunem iya kapadam nga, ‘Da, ta ipac ku ya puling mu’? 5Ay! Aginlilinteg ka met no agten iyan! Ta masapul nga ipac mu pekkem nga mona ya tabla nga uwed iya mismu nga matam, tasun nabatad ya panagsingem nga mangipac iya puling nga uwed iya mata niya kapadam.
6“Ket no maipanggep kadiya maipaay e̍ Apu Diyus, madi nu ngarud ipalak-am kadiya maibilang nga asu. Kaiyarigan na pe̍ ya pe̍rlas nga alahas. Madi kayu ngarud ipalladaw diya pe̍rlas iya sangu diya maiyarig nga abuy, ta kaynun no gudgudlan da nga silulucsew, se̍ dakayu ngas ranggasan.”
Maipanggep iya panagadeng tida e̍ Apu Diyus
Luk. 11:9-13
7“No uwed masapul nu, agadeng kayu kuma e̍ Apu Diyus, ket mae̍cdan kayu ngarud. Agsapul kayu, ket makasmac kayu ngarud. Agtogtog kayu, ket mailukat ya ruwangan dakayu. 8Ta amin nga agadeng, mae̍cdan da. Ket ya agsapul, makasmac. Ket ya agtogtog, mailukat ngarud para igina ya ruwangan.
9“Ket kaspagarigan pe̍ no dakayu nga lalaki, no uwed agadeng nga anac mu ka tinapay, bekken met nga batu ya e̍cde̍m igina! 10Winno no lames kuma ya adngen na, malaga aya ya e̍cde̍m igina? Bekken met! 11Ngarud, orey dakayu nga toley nga uwed kinadake̍c na, emmu nu met latta ya mange̍cde̍ ka nabaru kadiya anac nu. Ket no ya Ama nu nga uwed ka langit, di ngarud nangnangruna ya panange̍cde̍ na ka nabaru kadiya agadeng igina? 12Ket iya agten iyan, ya gabay nu nga mawangel kuma dakayu, itu kuma ya wanglen nu mettas iya kapada nu. Ta itu ya kaipapennan niya sursuru iya Linteg nito Muyse̍s se̍ ya panursuru dito mammadtu.”
To pangngarig maipanggep iya nailet nga ruwangan
Luk. 13:24
13“No maipanggep iya pannakaiturung iya biyag nga e̍cde̍ ne̍ Apu Diyus, maiyarig iya ruwangan. Ket ya nailet nga ruwangan kuma ngarud ya umuneggan nu. Ta ya ruwangan nga nawaya, se̍ ya dalan nga nalaka, itu nga gennung ya mawe̍ iya agnanayun nga pakapukawan, ket adu met diya toltoley nga lumnec iyan nga ruwangan. 14Ngem ya ruwangan nga mawe̍ iya biyag nga e̍cde̍ ne̍ Apu Diyus, nailet nga gennung, se̍ narigat met ya dalan, ket e̍teng ngas diya toley nga makasmac idi.”
To pangngarig maipanggep iya nabaru nga kayu
Luk. 6:43-44
15“Agannad kayu ngarud, ta uwed da met busid nga mangikaskasaba kanu ka kagi ne̍ Apu Diyus, nga makapagparang dakayu nga arig nga karne̍ru nga nanacman. Ngem ya kinapudnu na, agten da met iya atap nga asu nga nauyung. 16Ngem gapu iya pagbanagan niya ugali da, mailasin nu da. Ta agten mettas iya panangilasin kadiya mula: Bekken met nga maburas ka narasi nga mula ya bisic ubas, se̍ bekken pe̍ nga maburas ka narasi nga ruut ya bisic igus. 17Ket agten pe̍ iyan ya kayu: Diya nabaru nga kayu, mamisic da met ka napaw-is. Ngem diya kayu nga uwed sakit da, mamisic da nga gennung ka dake̍c. 18Ngarud, madi mabalin nga mamisic ka dake̍c ya kayu nga nabaru. Ket ya kayu nga uwed sakit na, madi met mabalin nga mamisic ka napaw-is. 19Ket diya kayu nga madi makabisic ka napaw-is, macleng se̍ maitemsit ka apuy. 20Ket iya agten met pe̍ iyan, diya busid nga mangasaba, mailasin nu da gapu iya pagbanagan niya ugali da.”
To pangngarig maipanggep kadiya madi em-emmu niya Apu
Luk. 13:25-27
21“Ket bekken nga amin nga mangawag iyaken ya makalak-am nad iya panangituray niya Nailangitan, orey diya agkunen iyaken nga, ‘Apuc, Apuc’. Ta diyan nas tutu nga agtungpal iya tarigagay niya Amac nga uwed ka langit diya makalak-am nad iya panangituray na. 22Ket nad no panangukum iya modi nga timpu, adu nad diya agkunen iyaken nga, ‘Apu! Apu! Ape̍ di nakami alac? Ket ya nagan mu mettas ya inusar mi ito panangikasaba mi iya kagim! Se̍ nangpatalew kami met pe̍ ka sairu gapu iya nagan mu, se̍ adu met diya nakaskasdaaw nga inariman mi gapu iya panangusar mi iya nagan mu,’ kunen da nad met.
23“Ket ibagac nad met igida, ‘Pulus nga madi nakayu em-emmu. Agtalew kayu lugud idi nin, dakayu nga managdacdake̍c!’ kunec nad mettas.”
To pangngarig maipanggep kadiya duwa nga agbaley
Luk. 6:47-49
24“Dikad pe̍ amin nga dumngeg kadidi nga kagic se̍ agtungpal kadidi, maiyarig da met iya isa nga nasirib nga toley nga nangipasikad ka baley na iya pinas. 25Ket itun, nagudan, naglayus se̍ nagbelluut, ket nadalapus yan nga baley. Ngem madi met narogpac, ta batu met ya nangisaadan na.
26“Ngem diya toley nga agdengngeg kadidi nga kagic, ngem madi da met tungpalen, ket maiyarig da met iya isa nga toley nga awan pannakaawat na, nga nangipasikad ka baley na iya laplapuc nga edyan. 27Ket itun, nagudan, naglayus se̍ nagbelluut, ket nadalapus met ya baley na. Ket narogpac nga pudnu win,” kunen na.
28Ket nalpasin nge̍ Je̍sus itun nga nangisuru kadiyan. Ket diya toltoley, nasdaaw da ngarud iya panangisuru na, 29ta naturay met ya panangisuru na, nga bekken nga agten iya panangisuru diya manursuru iya Linteg antuni.
Pilihan Saat Ini:
Matyu 7: YBT
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 1990 New Tribes Mission, Sanford, FL 32771-1487, USA.
Printed in the Philippines.
