Ubutukilo 39
39
Josefe ni pwo lia Potifare
1Aishmaele yaatwala Josefe ku chifuchi cha Egiptu. Kwenako Potifare, Kaegiptu, mwata wa tujita waze akufunga zuwo lia mwanangana, yamulanda. 2Mwene Zambi yabwa hamwe ni Josefe, neye yayuka. Te kaatwama mu zuwo lia mwene wenyi. 3Mwata wenyi yamona ngwenyi, Mwene Zambi kali hamwe ni Josefe ni kukukwasa Josefe ku yeswe yize te akulinga. 4Potifare yawahilila ni Josefe ha milimo yize te akumulingila. Kashika yamupwisa mwata wa yuma yenyi ni zuwo lienyi lieswe. 5Chize ku tangwa lize, Mwene Zambi yawahisa zuwo lia Potifare, ni yuma yenyi yeswe ya mu zuwo ni ya ku minda, ha mukunda wa Josefe. 6Mba Potifare yakunjika yeswe mu moko jenyi, iye katalile ko nawa Chuma nichimwe shina kulia wika.
Josefe te mwana lunga mubema ku mujimba ni ku meso. 7Muze amwe matangwa haabalika, pwo lia mwata wenyi yabutuka kumusa meso. Mwe pwo yamwamba ngwenyi: “Tweya tulimone.” 8Josefe yalituna ngwenyi: “Ka! Tala, mwata wami keshi kutala ku Chuma nichimwe mu zuwo muze nguli kuno. Yami nguli ni chiyulo ha kutala yuma yenyi yeswe. 9Yami nguli ni chiyulo ngwe iye. Kangukanjishile ku Chuma nichimwe, shina yena pwo lienyi. Ngwe kuchi munguhasa kulinga yibi yibwa haha ni kuvulumuna ku meso ja Zambi?” 10Tangwa ha tangwa mwe pwo te kakuhula Josefe ha kulimona nenyi, alioze iye te keshi kutayiza kwenyi.
11Limwe tangwa Josefe yaya Akulinga milimo yenyi mu zuwo. Te kumushi kavumbi mukwo niumwe. 12Mba pwo lia Potifare yakwata Josefe ku kazaku kenyi ngwenyi: “Tuye tulimone.” Alioze Josefe yatusuka mu moko jenyi, yatuhuka haze. Kazaku kenyi yasala mu moko ja pwo yoze. 13Muze mwe pwo hamona ngwenyi, Josefe hahichika kazaku kenyi, hachina haze, 14yatambika tuvumbi twenyi a mu zuwo, ngwenyi: “Haa, puu! Talenu, lunga liami hananeha Kahebreu yono mu zuwo lietu, alioze tala, kanatuhepwisa. Heza ni kunguhula mu chibatulo cha mu zuwo ngwenyi: ‘Tulimone’ alioze muze yami hinateta, 15hahichika kazaku kenyi, hachinyina haze.”
16Mwe pwo yasweka kazaku ka Josefe ndoo lunga lienyi yahiluka. 17Mba yamwambulwila je sango ngwenyi: “Ndungo yono Kahebreu wanehene kuno, hanjila muchima lia zuwo liami, yangukwata. 18Muze natetanga yachinyina haze, alioze kazaku kenyi yasala mu moko jami.”
19Mwene wenyi yevwa ufwatulo kuhiana ha kwivwa yize yeswe Josefe halinga ni pwo lienyi. 20Yalweza atu ha kukwata Josefe. No yaamukwata, yaamusa mu zuwo lia lamba, muze te akusa funge ja mwanangana. Josefe yatwama ko, 21alioze Mwene Zambi yabwa hamwe nenyi, yamuwahisa. Ha chino mwata wa zuwo lia lamba yawahilila nenyi. 22Yamwaha Josefe chiyulo cha kutala funge eswe ni milimo yeswe ya mu zuwo lia lamba. 23Mwe mwata katalile ko nawa Chuma nichimwe chize akunjikile mu moko ja Josefe, mumu Mwene Zambi yabwa hamwe nenyi, ni yize yeswe te akulinga yiyiwaha.
Pilihan Saat Ini:
Ubutukilo 39: CHK1970
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.