Ubutukilo 38
38
Yuda ni Tamare
1Ha matangwa waze Yuda yahichika anakwo yaya ni kutwama ni umwe lunga Hira mu limbo lia Adulame#38:1 limbo lia adulame hi kusuku ko ni Betleheme.. 2Yamona ko umwe mwana pwo, jina lia tato te Shua, wa ku chifuchi cha Kanana. Yuda yamumbata. 3Pwo yaka ufumba, yasema mwana wa lunga, yamuluka ngwenyi, Ere. 4Pwo yaka nawa ufumba, yasema mwana wa lunga, yamuluka ngwenyi, Onane. 5Yasema nawa mwana wa lunga, yamuluka ngwenyi, Shela. Muze Shela hasemuka, Yuda te kali mu chihunda cha Akzibe.
6Yuda yambachila mwanenyi mutangu Ere, pwo, jina lienyi Tamare. 7Ere te kali chingulungulu, kashika Mwene Zambi yamushiha. 8Mba Yuda yambila Onane ngwenyi: “Yako umbate nyalie ahichika yayenu, ha kumanununa Shimbi jetu, hanga usangule vungu lia yayenu Ere.” 9Alioze mwe Onane yanyingika ngwenyi, ana waze keechi kabwa ana jenyi. Kashika te lieswe tangwa akulimona ni pwo yoze, mbuto yayimwanga hashi, ngwenyi: “Nyi ka, mungusangula vungu lia yaya.” 10Chuma chize alingile yichibwa chibi ku meso ja Mwene Zambi, kashika neye, Zambi yamushiha. 11Mba Yuda yambila tembwa mwanenyi ngwenyi: “Hiluka ku zuwo lia tatenu ndoo kuze mwanami Shela hakola.” Yamba chino mumu yanyonga ngwenyi, hanji Shela malinga afwe ngwe chize afwa ayayo. Mba Tamare yahiluka, yaya nikutwama maha tato.
12Muze miaka hiyabalika, pwo lia Yuda, yafwa kwenyi. Muze kufwa hichabalika, Yuda yazala mahina abema. Mba iye ni sepa lienyi Hira, mukwa Adulame, yaaya ku limbo lia Timna ha kutala waze te akukamba mapanga ja Yuda. 13Umwe mutu yalweza Tamare ngwenyi: “Ukwe we kanayi ku Timna ni kukamba mapanga jenyi.” 14Mba Tamare yazula mahina jenyi a utuliwa, yalifuka mahina eka ku meso, mba yaya ni kutwama ku chikolo cha Enaime, chihunda chize chili mu jila ya kuya ku Timna. Yanyingika ngwenyi, Shela hakola, alioze ndoo ni haliabwila ukwe wenyi kanda atayiza kulimbata ni Shela.
15Muze Yuda hamumona yanyonga ngwenyi, kota chitanji, mumu Tamare yalifuka hina ku meso. 16Yakundama hakamwihi haze abwile mwe pwo ku sesa lia jila, yamwamba ngwenyi: “Ngunazange kulimona ne.” Yuda te kanyingikine ko ngwenyi, kali tembwa mwanami.
Tamare ngwenyi: “Yika muungwaha?”
17Yuda ngwenyi: “Mungukutumina mwana pembe.”
Iye ngwenyi: “Muungwaha chifungo ndoo muukamutuma, nyi?”
18-19Yuda ngwenyi: “Chuma chika?”
Pwo ngwenyi: “Kazeya ke, ni muya we, ni lukanda we yoze uli nenyi mu kwoko lie.” Yamwaha yuma yize, mba yalimona nenyi. Tamare yahinduka, yakatuka ho, yaya kwenyi. Yazula mahina abema mba yazala nawa mahina jenyi a utuliwa. Mba pwo yalimona ngwenyi, nguli ni ufumba.
20Yuda yatuma sepa lienyi, mukwa Adulame, ngwenyi: “Anda mwana pembe yono, yako ukangutambwile yuma yami yize nahichikilile pwo yoze chitanji.” Alioze pwo yoze kamumwene ko. 21Yahula atu waze abwile ko ngwenyi: “Yolihi pwo yoze chitanji wabwile hano mu jila ya kuya ku Enaime?”
Ayo ngwo: “Hano kuhatwamine pwo chitanji.”
22Yahiluka kuli Yuda, yamulweza ngwenyi: “Chamumwene. Atu waze atwama ko kangulweza ngwo: ‘Kuno kukwatwamine niumwe pwo chitanji.’ ”
23Yuda ngwenyi: “Azuke koko. Nyi ka, matukolesa tuhu sonyi. Namutumina mwana pembe alioze kuwamumwene, hikwahwa.”
24Yikubalika tukweji atatu, mba umwe mutu yalweza Yuda ngwenyi: “Tembwa mwane Tamare, ufumba ali nawo.”
Yuda ngwenyi: “Yenu nukamuchize mu chihunda, nukamutuhwise haze. Nukamwoche ha kahia, akafwe.”
25Muze atu anatuhwisa Tamare haze, yatumina ukwe wenyi maliji ngwenyi: “Mutu yoze wanguhichikilile kazeya, ni muya, ni lukanda wenyi, mwe unakangwaha ufumba. Achitalenu nyi yuma yino yili yaya.”
26Yuda yanyingika ngwenyi, yuma yize yili niyenyi, yamba ngwenyi: “Kasamba kwenyi. Yami nalinga chibi, mumu chamuhanyine kuli mwanami Shela.” Mba Yuda hikalimwene ko nawa nenyi.
27Ha tangwa lia kusema yaamona ngwo, ana apasa ali mu jimo. 28Muze te anevu musongo wa kusema, mwana umuwika yatuhwisa kwoko. Chifunguji yakwata lie kwoko, yalijichika lwoji muchila, yamba ngwenyi: “Yono mwe mukulwana.” 29Alioze mwe mwana yahilwisa kwoko mu jimo. Mba mukwo yahanga kusemuka. Chifunguji yamba ngwenyi: “Ku tachi je wasemuka!” Yaamuluka ngwo, Pereze#38:29 Pereze mu hebreu linalumbunuka ngwo, “kabula jimo”. 30Mba mwanakwo yasemuka, yoze uli ni lwoji ku kwoko. Yaamuluka ngwo, Zera#38:30 zera mu hebreu linalumbunuka ngwo, “chivumbuko chichila”. 39.2: Yil 7.9.
Pilihan Saat Ini:
Ubutukilo 38: CHK1970
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.