Lucas 5

Si Jesus Nagtawag sang Nahauna nga mga Gintuton-an

(Mat. 4:18-22; Mar. 1:16-20)

1Isa#Mat. 13:1-2; Mar. 3:9-10; 4:1. sadto ka adlaw, si Jesus nagatindog sa baybayon sang Linaw sang Genesaret. Ang mga tawo nagdinaguso pakadto sa iya sa pagpamati sang pulong sang Dios. 2Nakita niya ang duha ka sakayan nga yara na sa higad sang linaw, kag ang mga mangingisda nakapanaog na sa paghugas sang ila mga pukot. 3Ang isa ka sakayan iya ni Simon. Ginsakyan ini ni Jesus kag ginpangabay niya si Simon nga itulak sing diutay ang sakayan halin sa baybayon. Nagpungko si Jesus sa sakayan kag nagpanudlo sa mga tawo.

4Sa tapos sia makahambal, nagsiling sia kay Simon, “Magpalawod ka kag ang imo mga kaupod kag iladlad ang inyo pukot, agod makakuha kamo sang mga isda.”

5Si#Juan 21:3. Simon nagsabat, “Manunodlo, nagpamukot kami sa bug-os gid nga gab-i kag wala gid kami sing may nakuha. Pero kon amo ina ang siling mo, iladlad ko ang pukot.” 6Ginladlad#Juan 21:6. nila ang pukot kag nakakuha sila sing madamo nga isda sa bagay nga ang ila mga pukot daw magisi na. 7Gani ginpaypay nila ang ila mga kaupod sa isa ka sakayan sa pagpalapit kag sa pagbulig sa ila. Nagpalapit sila kag ginpuno nila ang duha ka sakayan sang isda sa bagay nga daw malunod na sila. 8Sang makita ni Simon Pedro ang natabo, nagluhod sia sa atubang ni Jesus kag nagsiling, “Palayo ka sa akon, Ginoo, kay makasasala ako nga tawo!”

9Sia kag ang tanan niya nga mga kaupdanan natingala gid sa kadamo sang isda nga ila nakuha. 10Ang mga kaupod ni Simon nga si Santiago kag si Juan, nga mga anak ni Zebedeo, natingala man. Si Jesus nagsiling kay Simon, “Indi ka magkahadlok. Sugod karon magapangisda ikaw sang mga tawo.”

11Ginpatakas nila ang mga sakayan, ginbayaan nila ang tanan kag nagsunod kay Jesus.

Gin-ayo ni Jesus ang Isa ka Aruon

(Mat. 8:1-4; Mar. 1:40-45)

12Sang isa ka tion si Jesus didto sa isa ka banwa sa diin may isa ka tawo nga puno sang aro ang iya bug-os nga lawas. Sang pagkakita niya kay Jesus naghapa sia sa duta kag nagpakitluoy sa iya, “Sir, kon luyag mo, sarang mo ako maayo!”

13Gin-untay ni Jesus ang iya kamot kag gintandog sia nga nagasiling, “Luyag ko! Mag-ayo ka!” Sa gilayon nag-ayo sia sa iya balatian. 14Kag#Lev. 14:1-32. ginmanduan sia ni Jesus, “Indi ka magpanugid sini bisan kay sin-o, kundi kadto ka sa pari kag ipatan-aw ang imo kaugalingon. Dayon maghalad ka suno sa ginsugo ni Moises sa pagpamatuod sa mga tawo nga maayo ka na.”

15Pero ang balita nahanungod kay Jesus naglapnag pa gid, kag madamo nga mga tawo ang nag-abot sa pagpamati sa iya kag sa pagpabulong sang ila mga balatian. 16Pero sa masunson nagakadto sia sa maligwin nga mga lugar sa diin nagpangamuyo sia.

Gin-ayo ni Jesus ang Isa ka Paralitiko

(Mat. 9:1-8; Mar. 2:1-12)

17Isa ka adlaw sang si Jesus nagapanudlo, may mga Fariseo kag mga manunodlo sang Kasugoan nga nagapungko didto. Nagikan sila sa kabanwahanan sang Galilea kag Judea kag sa Jerusalem. Ang gahom sang Ginoo yara kay Jesus sa pagpang-ayo sang masakiton. 18May mga tawo nga nagayayong sang isa ka tawo nga paralitiko nga yara sa iya higdaan. Nagtinguha sila sa pagsulod sa balay agod ibutang nila ang paralitiko sa atubang ni Jesus, 19pero wala sila sang alagyan sa pagdala sa iya pasulod tungod kay nagaginutok ang mga tawo. Gani gindala nila sia sa ibabaw sang atop. Ginguhaban nila ang atop nga tisa, kag gintunton nila sia sa iya higdaan sa atubang ni Jesus sa tunga sang mga tawo. 20Sang makita ni Jesus kon daw ano kadako sang ila pagtuo, nagsiling sia sa paralitiko, “Abyan, ginapatawad ang imo mga sala.”

21Ang mga manunodlo sang Kasugoan kag ang mga Fariseo nagmuno sa ila kaugalingon, “Sin-o bala ini nga tawo nga nagapasipala sa Dios? Wala sing tawo nga makapatawad sang mga sala, kundi ang Dios lamang!”

22Si Jesus nga nakatungkad sang ila mga painuino nagsiling sa ila, “Ngaa bala nagapainuino kamo sing subong sina? 23Diin bala ang mas mahapos isiling, ‘Ginapatawad ang imo mga sala,’ ukon ang pagsiling, ‘Tindog ka kag maglakat’? 24Karon pamatud-an ko sa inyo, nga ang Anak sang Tawo may awtoridad sa duta sa pagpatawad sang mga sala.” Gani nagsiling sia sa paralitiko, “Nagasiling ako sa imo, tindog ka, dalha ang imo higdaan kag magpauli!”

25Sa gilayon nagtindog ang tawo sa atubang nila, nagkuha sang iya higdaan kag nagpauli nga nagadayaw sa Dios. 26Ang tanan natingala gid! Sa daku nga kahadlok nagdayaw sila sa Dios nga nagasiling, “Daw ano ka makatilingala nga mga butang ang aton nakita karon nga adlaw!”

Gintawag ni Jesus si Levi

(Mat. 9:9-13; Mar. 2:13-17)

27Sa tapos sini naggwa si Jesus kag nakita niya si Levi nga isa ka manugsukot sang buhis nga nagapungko sa iya opisina. Nagsiling si Jesus sa iya, “Upod ka sa akon.” 28Nagtindog si Levi, ginbayaan niya ang tanan kag nagsunod sa iya.

29Dayon si Levi naghiwat sing daku nga punsyon sa iya balay para kay Jesus, kag didto upod nila ang madamo nga mga manugsukot sang buhis kag iban pa nga mga tawo. 30May#Luc. 15:1-2. mga Fariseo kag mga manunodlo sang Kasugoan nga kaupod nila nga nagreklamo sa mga gintuton-an ni Jesus. Nagpamangkot sila, “Ngaa bala nga nagakaon kamo kag nagainom upod sa mga manugsukot sang buhis kag sa iban nga mga makasasala?”

31Si Jesus nagsabat sa ila, “Ang mga tawo nga may maayo sang lawas wala nagakinahanglan sang manugbolong, kundi ang mga nagamasakit lang. 32Wala ako nag-abot sa pagtawag sang mga matarong, kundi sang mga makasasala sa paghinulsol.”

Ang Pamangkot Nahanungod sa Pagpuasa

(Mat. 9:14-17; Mar. 2:18-22)

33May mga tawo nga nagsiling kay Jesus, “Ang mga gintuton-an ni Juan kag ang mga gintuton-an sang mga Fariseo nagapuasa kag nagapangamuyo sing masunson, pero ang imo mga gintuton-an padayon nga nagakaon kag nagainom.”

34Nagsabat si Jesus sa ila, “Mapapuasa bala ninyo ang mga inagda sa kasal samtang yara pa ang nobyo kaupod nila? 35Pero magaabot ang tion nga ang nobyo kuhaon sa ila, kag dayon magapuasa sila sa sadto nga mga adlaw.”

36Si Jesus nagsugid sa ila sini man nga palaanggiran: “Wala sing tawo nga nagagunting sa bag-o nga bayu kag itukap ini sa daan nga bayu. Kon himuon niya ini, magisi niya ang bag-o nga bayu kag ang tinabas nga bag-o indi nagakabagay sa daan. 37Wala man sing tawo nga nagasulod sang bag-o nga bino sa daan nga mga sulodlan nga panit. Kon himuon niya ini, ang bino nga bag-o magabusdik sang sulodlan nga panit, ang bino mauyang kag ang sulodlan nga panit indi mapuslan. 38Sa baylo, ang bag-o nga bino dapat isulod sa bag-o nga sulodlan nga panit! 39Kag wala man sing bisan sin-o nga maluyag sang bag-o nga bino sa tapos sia makainom sang daan nga bino. Kay nagasiling sia, ‘Ang daan nga bino mas maayo.’”

Pilihan Saat Ini:

Lucas 5: MBBHIL12

Sorotan

Berbagi

Salin