Lucas 6

Ang Pamangkot Nahanungod sa Adlaw nga Inugpahuway

(Mat. 12:1-8; Mar. 2:23-28)

1Sang#Deut. 23:25. isa ka Adlaw nga Inugpahuway, si Jesus nag-agi sa kaumhan sang trigo. Ang iya mga gintuton-an nagpangutol sang mga uhay, ginligis nila ini sa ila mga kamot kag ginkaon ang mga uyas. 2May mga Fariseo nga nagpamangkot, “Ngaa bala ginahimo ninyo ang ginadumilian sang aton Kasugoan sa Adlaw nga Inugpahuway?”

3Nagsabat#1 Sam. 21:1-6. si Jesus sa ila, “Wala bala ninyo mabasahi ang ginhimo ni David sang sia kag ang iya mga kaupdanan gingutom? 4Nagsulod#Lev. 24:9. sia sa balay sang Dios, ginkuha niya ang tinapay nga nahalad sa Dios, ginkaon ini, kag ginhatagan man niya ang iya mga kaupdanan, bisan indi tugot sa bisan kay sin-o ang pagkaon sini luas lamang sa mga pari.”

5Kag si Jesus nagsiling sa ila, “Ang Anak sang Tawo amo ang Ginoo sang Adlaw nga Inugpahuway.”

Ang Tawo nga may Naitus nga Kamot

(Mat. 12:9-14; Mar. 3:1-6)

6Sang isa naman ka Adlaw nga Inugpahuway, nagsulod si Jesus sa sinagoga kag nagpanudlo. May tawo didto nga ang iya kamot nga tuo naitus. 7May mga manunodlo sang Kasugoan kag mga Fariseo nga nagapangita sing kabangdanan sa pagsumbong kay Jesus. Gani ginpanilagan nila sia sing maid-id kon bala magapang-ayo sia sa Adlaw nga Inugpahuway. 8Ugaling si Jesus nakahibalo sang ila mga panghunahuna kag nagsiling sia sa tawo nga naitus ang iya kamot, “Tindog ka kag magpatunga.” Ang tawo nagtindog kag nagpatunga. 9Dayon si Jesus nagsiling sa ila, “Mamangkot ako sa inyo: Ano ang ginatugot sang aton Kasugoan sa Adlaw nga Inugpahuway nga himuon ta? Ang magbulig bala ukon ang maghalit? Ang magluwas sang kabuhi sang isa ka tawo ukon ang magpatay?” 10Gintulok niya sila tanan kag nagsiling#6:10 nagsiling: Ang iban nga mga manuskrito maynagsiling nga may kaakig. sa tawo, “Untaya ang imo kamot.” Gin-untay niya ang iya kamot, kag nag-ayo ini liwat.

11Pero naakig gid sila, kag ginhambalan nila kon ano ang ila himuon kay Jesus.

Nagpili si Jesus sang Dose ka mga Apostoles

(Mat. 10:1-4; Mar. 3:13-19)

12Sa sadto nga tion nagtaklad si Jesus sa isa ka bakulod kag didto nagpangamuyo sa Dios sa bilog nga gab-i. 13Sang pagkaaga gintawag niya ang iya mga gintuton-an, kag nagpili sia sing dose nga gintawag niya nga mga apostoles. 14Ini sila amo ang masunod: si Simon nga ginhingalanan niya kay Pedro, kag ang iya utod nga si Andres; si Santiago kag si Juan, si Felipe kag si Bartolome, 15si Mateo kag si Tomas, si Santiago nga anak ni Alfeo kag si Simon nga gintawag nga makipungsodnon, 16si Judas nga anak ni Santiago kag si Judas Iscariote nga nangintraidor.

Si Jesus Nagpanudlo kag Nagpang-ayo

(Mat. 4:23-25)

17Sang nagdulhog si Jesus halin sa bakulod kaupod sang iya mga apostoles, nagtindog sia sa matapan nga lugar kaupod ang iya madamo nga mga gintuton-an. Didto may madamo nga mga tawo halin sa Judea, Jerusalem kag mga banwa sa baybayon sang Tiro kag Sidon. 18Nagkadto sila didto sa pagpamati kay Jesus kag sa pagpabulong sang ila mga balatian. Ang mga ginatublag sang malaut nga mga espiritu nagkadto man kag ginpang-ayo. 19Ang tanan nga mga tawo nagtinguha sa pagtandog sa iya, kay may gahom nga nagagwa sa iya kag nagaayo sa ila tanan.

Kalipay kag Kasubo

(Mat. 5:1-12)

20Gintulok ni Jesus ang iya mga gintuton-an kag ginsingganan:

“Malipayon kamo nga mga imol,

kay inyo ang Ginharian sang Dios!

21“Malipayon kamo nga ginagutom karon,

kay pagabusgon kamo!

“Malipayon kamo nga nagahibi karon,

kay magakadlaw kamo!

22“Malipayon#1 Ped. 4:14. kamo kon ang mga tawo magdumot sa inyo, magsikway sa inyo, magpasipala sa inyo, kag magtawag sa inyo nga malaut tungod sa Anak sang Tawo! 23Magkasadya#2 Cron. 36:16; Bin. 7:52. kamo kon ina matabo kag maghinugyaw, tungod kay daku ang inyo balos sa langit. Kay sang una, amo man ini ang ginhimo sang ila mga katigulangan sa mga propeta.

24“Pero makaluluoy man kamo nga mga manggaranon karon,

nga nakaagom na sang masulhay nga pagpangabuhi!

25“Makaluluoy man kamo nga mga busog karon,

kay gutomon kamo!

“Makaluluoy man kamo nga nagakadlaw karon,

kay magapangasubo kag magahibi kamo!

26“Makaluluoy man kamo kon ang tanan nga mga tawo magdayaw sa inyo, kay amo man ini ang ginhimo sang ila mga katigulangan sa di-matuod nga mga propeta.

Ang Paghigugma sa Kaaway

(Mat. 5:38-48; 7:12a)

27“Pero nagasiling ako sa inyo nga nagapamati sa akon: Higugmaa ang inyo mga kaaway, ayuhi ang mga nagadumot sa inyo, 28pakamaayuha ang mga nagapakamalaut sa inyo, kag pangamuyoi ang nagatratar sing malain sa inyo. 29Kon may magtampa sa imo sa pihak nga guya, itaya man ang pihak. Kon may magkuha sang imo kunop, ihatag man pati ang imo bayu. 30Hatagi ang nagapangayo sa imo, kag kon may magkuha sang imo mga pagkabutang, indi na pagbawia ina sa iya. 31Himua#Tob. 4:15; Mat. 7:12. ninyo sa mga tawo ang luyag ninyo nga himuon man nila sa inyo.

32“Kon ang ginahigugma ninyo amo man lang ang nagahigugma sa inyo, ano bala nga kaayuhan ang inyo nahimo? Bisan gani ang mga makasasala nagahigugma sa mga nagahigugma sa ila. 33Kag kon ang ginahimuan ninyo sing maayo amo man lang ang nagahimo sing maayo sa inyo, ano bala nga kaayuhan ang inyo nahimo? Bisan pa gani ang mga makasasala nagahimo man sina! 34Kag kon ang ginapahulam ninyo amo man lang ang inyo ginalauman nga makabayad sa inyo, ano bala nga kaayuhan ang inyo nahimo? Bisan gani ang mga makasasala nagapahulam man sa mga makasasala kag sila ginabayaran sang amo man nga kantidad. 35Indi#Sir. 4:10-11. amo ina! Higugmaa ang inyo mga kaaway kag himua ang maayo sa ila. Magpahulam kamo nga wala nagapaabot nga bayaran. Dayon magabaton kamo sing daku nga balos, kag mangin mga anak kamo sang Labing Mataas nga Dios. Kay maalwan sia sa mga tawo nga walay kabalaslan kag mga malaut. 36Magmaluloy-on kamo, subong nga ang inyo Amay maluloy-on.

Ang Paghukom sa Iban

(Mat. 7:1-5)

37“Indi kamo maghukom sa iban, kag ang Dios indi man maghukom sa inyo. Indi kamo magkondenar sa iban, kag ang Dios indi man magkondenar sa inyo. Magpatawad kamo sa iban, kag ang Dios magapatawad man sa inyo. 38Magpanghatag kamo sa iban, kag ang Dios magahatag man sa inyo. Ang ihatag sa inyo nasukob sing maayo, nadasok, nauyog, kag nagaawas. Ang Dios magabutang sini sa imo sabak. Kay ang ginagamit ninyo nga talaksan para sa iban amo man ang talaksan sang Dios para sa inyo.”

39Kag#Mat. 15:14. si Jesus nagsugid sa ila sini nga palaanggiran: “Ang isa ka bulag indi makatuytoy sa isa man ka bulag. Kon himuon niya ini, sila nga duha madagdag sa kanal. 40Wala#Mat. 10:24-25; Juan 13:16; 15:20. sing estudyante nga maglabaw pa sang sa iya maestro, pero kon matapos na sang isa ka estudyante ang iya kurso, manginsubong na sia sang iya maestro.

41“Ngaa bala ginahimutaran mo ang diutay nga puling sa mata sang imo utod, pero wala mo ginasapak ang puling nga daw troso kadako sa imo kaugalingon nga mata? 42Paano ang pagsiling mo sa imo utod, ‘Utod, ipakuha sa akon ang diutay nga puling sa imo mata,’ pero indi gani ikaw makakita sang puling nga daw troso kadako sa imo kaugalingon nga mata? Hipokrito ka! Kuhaa anay ang puling nga daw troso kadako sa imo kaugalingon nga mata kag dayon makakita ka sang maathag sa pagkuha sang diutay nga puling sa mata sang imo utod.

Ang Kahoy kag ang Iya Bunga

(Mat. 7:16-20; 12:33-35)

43“Ang maayo nga kahoy wala nagapamunga sing malain nga bunga, ukon ang malain nga kahoy wala nagapamunga sing maayo nga bunga. 44Ang#Mat. 12:33. tagsa ka kahoy makilala mo sa iya bunga. Wala kamo nagapamupo sing mga higos sa mga talungon, kag wala man kamo nagapamupo sing mga ubas sa mga sapinit. 45Ang#Mat. 12:34. maayo nga tawo nagapagwa sang maayo nga mga butang tungod sang maayo nga manggad nga yara sa iya tagipusoon, kag ang malain nga tawo nagapagwa sang malain nga mga butang tungod sang malain nga manggad nga yara sa iya tagipusoon. Kay kon ano ang sulod sang tagipusoon amo man ang ginahambal sang baba.

Ang Duha ka Manugpatindog sang Balay

(Mat. 7:24-27)

46“Ngaa ginatawag ninyo ako, ‘Ginoo, Ginoo,’ kag wala ninyo ginahimo ang akon ginasiling sa inyo? 47Ipakita ko sa inyo kon daw ano ang tagsatagsa nga nagapalapit sa akon, kag nagapamati sang akon mga pulong kag nagatuman sini. 48Kaangay sia sang isa ka tawo nga nagpatindog sang balay. Nagkutkot sia sing madalom kag iya ginpasad ang sadsaran sa igang. Ang suba nagbaha kag ang tubig nagsampi sa sina nga balay, pero wala ini makauyog sa balay tungod kay napasad ini sing malig-on. 49Pero ang bisan sin-o nga nagapamati sang akon mga pulong kag wala nagatuman sini kaangay sia sang isa ka tawo nga nagpatindog sang iya balay sa duta, nga wala nagpasad sing sadsaran. Sang ginbahaan ini nga balay natumba ini sa gilayon, kag nawasdak.”

Pilihan Saat Ini:

Lucas 6: MBBHIL12

Sorotan

Berbagi

Salin