Lucas 3
3
Ang Pagwali ni Juan nga Manugbautiso
(Mat. 3:1-12; Mar. 1:1-8; Juan 1:19-28)
1Karon ika-15 na nga tuig sang paggahom ni Emperador Tiberio; si Poncio Pilato amo ang gobernador sang Judea, si Herodes ang pangulo sang Galilea, kag si Felipe nga iya utod ang pangulo sang rehiyon sang Iturea kag Traconite; si Lisanias ang pangulo sang Abilinia, 2kag si Anas kag si Caifas amo ang Pinakamataas nga mga Pari. Sa amo nga tion ang Dios nagpadala sang iya mensahe kay Juan nga anak ni Zacarias nga nagaestar sa desierto. 3Gani nagpanglakaton sia sa bug-os nga kadutaan sang Jordan nga nagawali, “Untati ninyo ang pagpakasala kag magpabautiso, kag ang Dios magapatawad sang inyo mga sala.” 4Ini#Isa. 40:3-5 (LXX). suno sa ginsulat ni Isaias nga propeta sa iya libro:
“May nagawali sang mabaskog sa desierto:
‘Amana ninyo ang alagyan para sa Ginoo,
maghimo kamo sing tadlong nga dalan nga iya pagaagyan!
5Ang tagsa ka nalupyakan tampukan,
ang tagsa ka bukid kag bakulod tapanon,
ang tiko nga mga dalan tadlungon,
kag ang batsihon nga mga dalan kaayuhon.
6Ang tanan nga mga katawhan makakita sang kaluwasan sang Dios!’”
7Madamo#Mat. 12:34; 23:33. nga mga tawo ang nagkadto kay Juan agod mabautisohan niya sila. Nagsiling sia sa ila, “Mga kaliwat sang man-og! Sin-o ang nagsiling sa inyo nga makapalagyo kamo sa silot sang Dios nga madali na lang mag-abot? 8Pamatud-i#Juan 8:33. sa inyo mga buhat nga nagbiya kamo sa inyo mga sala. Indi kamo magsiling sa inyo mga kaugalingon nga si Abraham isa sang inyo mga kaliwat kay ginasiling ko sa inyo nga ang Dios makahimo sing mga kaliwat para kay Abraham halin sa sini nga mga bato! 9Ang#Mat. 7:19. Dios handa na sa pagwasay sang mga kahoy sa ila mga gamot. Gani ang tagsa ka kahoy nga wala nagapamunga sing maayo pagatapson kag idap-ong sa kalayo.”
10Ang mga tawo namangkot sa iya, “Ti, ano karon ang amon himuon?”
11Nagsabat sia, “Ang bisan sin-o sa inyo ang may duha ka panid nga bayu ihatag niya ang isa sa wala sing bayu, kag ang bisan sin-o sa inyo ang may kalan-on maghatag sa iya nga wala sing kalan-on.”
12May#Luc. 7:29. mga manugsukot sang buhis nga nag-abot sa pagpabautiso, kag nagpamangkot sila sa iya, “Manunodlo, ano ang himuon namon?”
13Nagsabat sia sa ila, “Indi kamo magsukot sing sobra sang sa ginasugo sa inyo.”
14May mga soldado nga nagpamangkot man sa iya, “Ti, kami iya, ano ang amon himuon?”
Nagsabat sia sa ila, “Indi kamo magkuha sang kwarta bisan kay sin-o sa pakusog nga paagi ukon sa pagbutangbutang. Magkuntento kamo sang inyo sweldo.”
15Nagdugang na gid ang pagpaabot sang mga tawo, kag nagpamangkot sila sa ila mga panghunahuna, kon si Juan bala amo na ayhan ang Cristo. 16Gani si Juan nagsiling sa ila tanan, “Ginabautisohan ko kamo sang tubig, pero may isa nga magaabot nga mas gamhanan pa sang sa akon. Indi gani ako takos sa paghubad sang higot sang iya mga sandalyas. Pagabautisohan niya kamo sang Espiritu Santo kag sang kalayo. 17Ginauyatan na niya ang iya inugpahangin sa pagpain sang tinggas sa upa. Dayon pagatipunon niya ang tinggas nga uyas sa iya bodega, pero pagasunogon niya ang upa sa kalayo nga indi gid mapalong.”
18Gani sa madamo kag nagkalainlain nga paagi nagwali si Juan sang Maayong Balita sa mga tawo. 19Pero#Mat. 14:3-4; Mar. 6:17-18. ginsaway niya si Herodes nga Gobernador tungod kay ginpuyo niya si Herodias nga asawa sang iya utod, kag tungod sang madamo nga mga kalautan nga nahimo niya. 20Dayon si Herodes naghimo pa gid sing malain nga butang paagi sa pagpabilanggo kay Juan.
Ang Pagbautiso kay Jesus
(Mat. 3:13-17; Mar. 1:9-11)
21Karon sang mabautisohan na ang tanan nga mga tawo, si Jesus ginbautisohan man. Sang nagapangamuyo sia, nag-abri ang langit 22kag#Gen. 22:2; Sal. 2:7; Isa. 42:1; Mat. 3:17; Mar. 1:11; Luc. 9:35. ang Espiritu Santo sa dagway sang pating nagkunsad sa iya. Dayon may isa ka tingog halin sa langit nga nagasiling, “Ikaw ang akon hinigugma nga Anak. Nalipay gid ako sa imo.”
Ang Lista sang mga Katigulangan ni Jesus
(Mat. 1:1-17)
23Sang pagsugod ni Jesus sang iya bulohaton mga traynta na ka tuig ang iya edad. Abi sang mga tawo, anak sia ni Jose nga anak ni Eli. 24Si Eli anak ni Matat, si Matat anak ni Levi, si Levi anak ni Melqui, si Melqui anak ni Jane, si Jane anak ni Jose, 25si Jose anak ni Matitias, si Matatias anak ni Amos, si Amos anak ni Nahum, si Nahum anak ni Esli, si Esli anak ni Nagge, 26si Nagge anak ni Maat, si Maat anak ni Matatias, si Matatias anak ni Semein, si Semein anak ni Jose, si Jose anak ni Joda, 27si Joda anak ni Joanan, si Joanan anak ni Resa, si Resa anak ni Zorobabel, si Zorobabel anak ni Salatiel, si Salatiel anak ni Neri, 28si Neri anak ni Melqui, si Melqui anak ni Adi, si Adi anak ni Cosam, si Cosam anak ni Elmadam, si Elmadam anak ni Er, 29si Er anak ni Josue, si Josue anak ni Eliezer, si Eliezer anak ni Jorim, si Jorim anak ni Matat, si Matat anak ni Levi, 30si Levi anak ni Simeon, si Simeon anak ni Judas, si Judas anak ni Jose, si Jose anak ni Jonam, si Jonam anak ni Eliaquim, 31si Eliaquim anak ni Melea, si Melea anak ni Mena, si Mena anak ni Matata, si Matata anak ni Natan, si Natan anak ni David, 32si David anak ni Jesse, si Jesse anak ni Obed, si Obed anak ni Booz, si Booz anak ni Salmon, si Salmon anak ni Naason, 33si Naason anak ni Aminadab, si Aminadab anak ni Admin, si Admin anak ni Arni, si Arni anak ni Ezron, si Ezron anak ni Fares, si Fares anak ni Juda, 34si Juda anak ni Jacob, si Jacob anak ni Isaac, si Isaac anak ni Abraham, si Abraham anak ni Tera, si Tera anak ni Nahor, 35si Nahor anak ni Serug, si Serug anak ni Reu, si Reu anak ni Peleg, si Peleg anak ni Eber, si Eber anak ni Sela, 36si Sela anak ni Cainan, si Cainan anak ni Arfaxad, si Arfaxad anak ni Sem, si Sem anak ni Noe, si Noe anak ni Lamec, 37si Lamec anak ni Metusela, si Metusela anak ni Enoc, si Enoc anak ni Jared, si Jared anak ni Mahalaleel, si Mahalaleel anak ni Cainan, 38si Cainan anak ni Enos, si Enos anak ni Set, si Set anak ni Adan kag si Adan anak sang Dios.
Pilihan Saat Ini:
Lucas 3: MBBHIL12
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Maayong Balita nga Biblia © Philippine Bible Society, 2012
