Luka 9
9
Yezu arumana baleekelwa liikhumi na babili
(Mat 10.5-15; Mrk 6.7-13)
1Yezu walaanga baleekelwa beewe liikhumi na babili atweela, wabawa kamaani ni bunyala, khuwoona kimisaambwa kimibi kyoosi mu baandu, ni khuwonesa tsindwale tsaawe. 2Aryo wabarumana khuutsya khuboolela kamakhuuwa ke Buyiinga bwa Wele, ni khuwonesa balwaale. 3Wabaloma ari, “Mukhatsya ni shishiindu shoosi ta, akhaba imiimbo, namwe isawu, namwe biilyo, namwe tsinusu, namwe mukhatsya ni ingubo ye khabili ta. 4Mu buli intsu yoosi mweesi mwinjila, ne babakaanila, mumenya mu bweenemwo, khukhwoolesa ni mulirura mu shiriimba isho. 5#Bur 13.51#Luk 10.4-11Ne isi babaandu bakhabakaanila ta, musisakula lufuumbi luluuli khu bikyele byeenywe nga murura mu shiriimba isho. Khusisakula lufuumbi ulwo khabe nga khabonelo khe khubareewula isi bali.”
6Baryo baleekelwa baatsya, bakyeenda mu byaalo byoosi, nga baboolela Kamakhuuwa Kamalayi, lundi nga bawonesa babaandu boosi, buli esi batsyatsaka.
Herode eyembelela khulwa Yezu
(Mat 14.1-2; Mrk 6.14-29)
7 #
Mat 16.14; Mrk 8.28; Luk 9.19 Nga bishiili biryo, Herode umuwuli wa Galilaaya, n'awulila byoosi bibyakholekha, watabukha naabi, lwekhuba babaandu balala baaba baloma bari, Yohana Umubatisa walamukhile. 8Babandi baloma bari, Eliya wabonekhele, ni babaandi bari, mutweela khu baŋoosi be khaale walamukhile khukhwaama mu bafu. 9Kila Herode aloma ari, “Ise nalakila baremakho Yohana kumurwe, ne lundi naanu uyu, isi mbulilakho bibiindu bino?” Aryo wakhakakho nga akana abonekho khu Yezu.
Yezu aliisa babaandu biikana biraano
(Mat 14.13-21; Mrk 6.30-44; Yoh 6.1-14)
10Baarume ni baamala khukobola, basontsoola Yezu ibyo byoosi byeesi baakhola. Yezu weyawula khu baandu, wayila baleekelwa beewe, watsya ni nabo bonyene mu shiriimba shishilaangibwa bari Besusaida. 11Ne kamatuuli ke babaandu ni bashimanyakho baryo, bamuloondakho. Aryo Yezu wabakaanila, wababoolela bibiwaamba khu Buyiinga bwa Wele, lundi wawonesa ibo babakana khuwonesebwa.
12Inyaanga ni yaba nga ikana khukwa, baleekelwa liikhumi na babili beetsa isi Yezu, bamuloma bari, “Siibula babaandu batsye mu biriimba, ni mu byaalo, bibibotokhelele ano, beeweentseleyo bye khuulya, ni ekhukona. Lwekhuba shiifwo shino shayitala naabi.”
13Ne Yezu wabelamo ari, “Inywe mwabeene ni mubawe shakhulya.” Nabo bamuloma bari, “Ano khuliwo ni kimikaati kiraano, ni tsinyeeni tsibili, akhali nga khuli ni khuutsya khukulayo biilyo bye babaandu bano boosi.” 14Lwekhuba basaani babaabawo baaba boola biikana biraano (5,000).
Yezu waloma baleekelwa beewe ari, “Ni mubekhase asi mu bipuri, nga buli shipuri babaandu kamakhumi karaano.”
15Baleekelwa beewe bakhola baryo, bekhasa babaandu boosi. 16Yezu wabukula kimikaati ikyo kiraano, ni tsinyeeni tsibili, wenyusa tsimoni mwikulu, wabiloombela ikhabi, wabimenyulakamo. Aryo wabiwa baleekelwa beewe, babikabile babaandu. 17Boosi baalya, bekura. Baleekelwa beewe babusanisa bubuya bubwarama, betsusa bibiipo liikhumi na bibili.
Yezu niye naanu?
(Mat 16.13-19; Mrk 8.27-29)
18Lulwoola Yezu aba ali khuloomba mu shimoonyo, baleekelwa beewe beetsa is'ali, naye wabareeba ari, “Babaandu baloma bari ise ndi naanu?”
19 #
Mat 14.1,2; Mrk 6.14,15; Luk 9.7,8 Beelamo bari, “Balala baloma bari, iwe uli Yohana Umubatisa, babaandi bari iwe uli Eliya, ni babaandi bari, iwe uli mutweela khu baŋoosi be khaale ulamukhile khukhwaama mu bafu.”
20 #
Yoh 6.68,69 Kila Yezu abareeba ari, “Ne inywe muloma muri ise indi naanu?”
Petero welamo ari, “Iwe Uli Kristu wa Wele.”
Yezu akanikha khu khutaambisibwa khweewe
(Mat 16.20-28; Mrk 8.30; 9.1)
21Abweenewo Yezu wabakhonyakilila naabi, balekhe khuboolelakho shino umuundu yeesi ta. 22Aryo kila Yezu abaloma ari, “Umwaana w'Omuundu shimwakhila khutaambisibwa musaambo tsingali, basakhulu ni basaayi bakhulu, ni baleekeli be Kamakaambila ka Musa bamwikaane. Bali mwiira, ne khu shifukhu she kataru, alilamusibwa khukhwaama mu bafu.”
23 #
Mat 10.38; Luk 14.27 Lwanyuma wabaloma boosi ari, “Buli mundu yeesi ukana khuuba umulondeleli wase, akha khukhwiyikaana umweene, etyuukhe kumusalaba kweewe buli shifukhu anondelele. 24#Mat 10.39; Luk 17.33; Yoh 12.25Lwekhuba buli mundu yeesi ukana khuwonesa bulamu bweewe alibufwilwa, ni nooyo ufwilwa bulamu bweewe khu lwase, alibuwonesa. 25Umuundu shimuyeeta shiina khukhwifunila shiibala shino shoosi, n'endi wakosa namwe wafwiilwa bulamu bweewe? 26Buli mundu uwumambiwila ise kamaŋaanyu, ni bilomo byase, Umwaana w'Omuundu naye alimuwambiwila kamaŋaanyu n'alikobola mu shiriifwa sheewe, ni mu shiriifwa sha Paapa, ni she bamalayika beewe bakhosefu. 27Ilala mbaboolela ndi, iliwo batweela khuubo babemikhile ano, bakhalitsemakho khuufwa na khafwiiti ta, khukhwoolesa ni balibona Buyiinga bwa Wele.”
Khumweekhamweekha khwa Yezu
(Mat 17.1-8; Mrk 9.2-8)
28Lwanyuma lwe bifukhu shinaane khukhwaama nga Yezu n'aloma bilomo ibyo, wayila Petero, Yohana, ni Yakobo, waniina khu lukiingi, khuloomba. 29Ne n'aba nga aloomba, imbonekha ye mu moni mweewe yakalusibwa, ni bikwaaro byeewe byekyela biwaanga nga bimweekhamweekha. 30Abweenewo abonekhawo basaani babili nga bakanikha ni naye; nga nibo Musa, ni Eliya. 31Babonekha mu shiriifwa she angaaki naabi, nga bakanikha ni naye bibiwaamba khu mbuka iye khururawo khweewe, iyaba ili ambi khukhwoolelela khubirira mu khuufwa khweewe i Yerusalemu. 32Ne Petero ni basheewe baaba bawungukhila lukali, ne ni basisimukha, babona shiriifwa sheewe, ni basaani babili babaaba beemile ni naye. 33Ne basaani babili bano ni baaba barekukhawo isi Yezu, Petero waloma Yezu ari, “Musakhulu nga shilayi ifwe khuuba nga khuli ano! Ari khakhusimikhe bisari bitaru; shitweela shishoowo, shitweela sha Musa, ni shishiindi sha Eliya.” (Ne ilala Petero s'amanya shaloma ta).
34Ne Petero n'aba nga ashiloma aryo, namufweeli weetsa wabafusilisa, nabo betsula khuurya, nga namufweeli abafusilisa. 35#Isay 42.1; Mat 3.17; 12.18; Mrk 1.11; Luk 3.22#2 Pet 1.17,18Ulwo likono lyarura mu namufweeli nga liloma liri; “Oyu Umwaana wase, isi narobola, ni mumurekeerese.” 36Likono ni lyamala khukanikha, banyoola nga Yezu ali yenyene. Baleekelwa bashisilila busa, balekha khuboolelakho umuundu yeesi, mu mbuka iyo byeesi baabona ta.
Yezu awonesa uwabakho shisaambwa shiibi
(Mat 17.14-18; Mrk 9.14-27)
37Shifukhu shishelakho, Yezu ni baleekelwa beewe ni baaba nga beekha khukhwaama khu lukiingi, lituuli lye babaandu bakali lyamwakaanana. 38Mu lituuli ilyo, mwabamo umusaani uwayokesela angaaki ari, “Umuleekeli, ikhwikontselela, n'uwaambile umusoleeli wase shiisa lwekhuba niye umwaana wase mutweela yenyene. 39Shisaambwa nga shamuwaambile, awayuluukha, shimutuunda asi, abalikhaka, wafuura lifulo imunwa. Shimukholatsaka shiryo, nga shimutaambisa, shikana khumuwesa. 40Ni nase nikontseleele baleekelwa boowo khushiwoona shimururekho, ne bakhasikhana.”
41Yezu welamo ari, “O inywe bakhafukiilila ta, lundi kumuboolo kukwaborokha, kane imenyatsake ni nanywe khumala mbuka shiina nga imbekhalilikha? Reera ano umusoleeli woowo.”
42Ne umusoleeli n'aba nga etsa, shisaambwa shiibi tsana shamukhupa asi, wabalikha. Ne Yezu wakhookhela shisaambwa, wawonesa umusoleeli, wamukoboselayo paapawe. 43Boosi beyaanga, lwe kamaani ka Wele kamakali.
Yezu akanikha lundi khu khufwa khweewe
(Mat 17.22-23; Mrk 9.30-32)
Ne boosi ni baaba nga bashiyaanga lweebyo byeesi Yezu akhola, waloma baleekelwa beewe ari, 44“Ni muwulilise bulayi, mulekhe khwibilila ibyo byeesi intsya khubaboolela ta: Umwaana w'Omuundu atsya khuwaanibwayo mu mikhono kye babaandu.” 45Ne baleekelwa nibo balekha khumanya sheesi shino shimanyisa ta. Shaba shababisiwilekho, balekha khumanya ta, ne baarya khumureeba shilomo isho nga ni shili.
Naanu Ufuura Bukhulu?
(Mat 18.1-5; Mrk 9.33-37)
46 #
Luk 22.24
Abawo khukhaandisana akari e baleekelwa ba Yezu, nga bakhaandisana bari, naanu ufuura bukhulu mu nibo. 47Ne Yezu n'amanya bibyambaaso bye mu myoyo kyaabwe, aryo wawamba umwaana umufwiiti, wamwimisa mu mbafu mweewe, 48#Mat 10.40; Luk 10.16; Yoh 13.20wabaloma ari, “Buli mundu yeesi uwakaanila umwaana umufwiiti nga yuno ari mu lisiina lyase, aba wantsakaniile ise. Na buli mutweela uwuntsakaanila ise aba wakaaniile uyo uwanduma ise. Lwekhuba uyo uli umufwiiti mus'iinywe mweesi niye ufuura bukhulu.”
Khuraambisa lisiina lya Yezu
(Mrk 9.38-40)
49Yohana waloma ari, “Musakhulu, khwaboone umuundu nga awoona kimisaambwa kimibi, nga araambisa lisiina lyoowo, khwakhakakho khumukhangabisa, lwekhuba s'ali mutweela khusiifwe ta.”
50Yezu wamwiilamo ari, “Mukhamukhangabisa ta, lwekhuba uyo ukhalikho busiku is'uli, aba uwe khu luwande lwoowo.”
Yezu bamwikaana i Samariya
51Ni lwoola bifukhu nga bili ambi, Yezu aniinisiwe mwikulu, wakhalilawo ilala khuwamba intsila iye khuutsya i Yerusalemu. 52Aryo warumana baarume khumwinyoowayo ibweeni, batsye mu shaalo she Samariya, khumuŋoonaŋoonela byoosi. 53Ne babaandu b'eyo balekha khumwakaanila ta, lwekhuba baamanya bari, atsya i Yerusalemu. 54#2 Bay 1.9-16Ne baleekelwa beewe, Yohana ni Yakobo, ni babona baryo, baloma Yezu bari, “Umukasya, ukana khulaangile kumulilo kwiikhe khukhwaama mwikulu, kubooshe?”
55Yezu washuukha wababiiyisa lwe lomo iyo. 56Baryo Yezu ni baleekelwa beewe baatsya mu shaalo shishiindi.
Buwangafu bubuuli mu khulondeelela Yezu
(Mat 8.19-22)
57Ni lwoola, ni baaba nga bali mu ntsila batsya, umusaani mutweela waloma Yezu ari, “Kane ikhulondelelatsake osi esi kane wutsyatsake.”
58Yezu wamwiilamo ari, “Tsishipwe tsili ni kamalowo kaatso, ni binywiinywi bye mu ngaaki bili ni biiswi byabyo, ne Umwaana w'Omuundu s'ali ni esi ara kumurwe ta.”
59Lwanyuma Yezu waloma umuundu ukuundi ari, “Iwe inondelele.” Ne umuundu uyo wamwiilamo ari, “Umukasya, ndekhe inyoowe intsye isiikhe paapa wase nio.”
60Yezu wamuloma ari, “Lekha baafu basiikhe baafu baawe, ne iwe n'utsye uboolele kamakhuuwa ke Buyiinga bwa Wele.”
61 #
1 Bay 19.20
Umuundu ukuundi wamuloma ari, “Umukasya, ise kane ikhulondelele, ne khanyoowe intsye, isibule be mungo mwase nio.”
62Yezu wamuloma ari, “Mbaawo umuundu ulimisa n'imbako iye tsikhaafu, ne weshebukhaka imukoongo, s'akhila Buyiinga bwa Wele ta.”
Pilihan Saat Ini:
Luka 9: LCE
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Lumasaaba Catholic Bible © The Bible Society of Uganda, 2017.
