Luka 8

Bakhasi babaarongesakho Yezu

1Lwanyuma lwa bino, Yezu wakyeenda mu biriimba ni mu byaalo, nga aboolela kamakhuuwa kamalayi ke Buyiinga bwa Wele. Baleekelwa liikhumi na babili baaba ni naye, 2#Mat 27.55,56; Mrk 15.40,41; Luk 23.49atweela ni bakhasi balala babawonesebwakho kimisaambwa kimibi, ni tsindwale. Mu nibo mwabamo: Mariya uwalaangiwa Magadalena, uwawoonebwakho kimisaambwa kimibi musaafu, 3ni Yohanina umukyelema wa Kuza uwaba umubiikhi wa Herode, ni Susana, ni bakhasi babaandi swa.

Bakhasi bano baayeeta kumulimo kwa Yezu, ni baleekelwa beewe, nga baraambisa bibiindu byaawe byeesi baaba nabyo.

Lusimo lw'omumiitsi

(Mat 13.1-9; Mrk 4.1-9)

4Babaandu ni beloosela khukhwiitsa isi Yezu khukhwaama mu buli shiriimba, ni betsulawo, Yezu wabakanikhila lusimo luno ari: 5“Umumiitsi arura khumiitsa bumiitso bweewe mu mukuunda. Ne n'aba nga amiitsa, bumiitso bulala bwakwa khu ntsila, babaandu babusambakilila, ni binywiinywi bye mu ngaaki byabulya. 6Bubuundi bwakwa khwiloba lye khu lwanda, ne ni bwarura bwaniaala, lwekhuba liiloba shilyaba ni kameetsi kakamala ta. 7Bumiitso bubuundi bwakwa akari mu mawa, bwatsowela atweela ni nako, ni kamawa kabusindakilila. 8Ni bumiitso bubuundi bwakwa khu liiloba liilayi, bwatsowa, bwaanakho bibyaamo, khu buli shisina shitoondo shitweela.”

Yezu n'amala khubakanikhila bilomo bino, waloma ari, “Lekha uyo yeesi uli ni kamaru ke khuwulila awulile.”

Shitsiililwa she tsisimo

(Mat 13.10-17; Mrk 4.10-12)

9Baleekelwa beewe bamureeba bari, “Lusimo luno lumanyisa shiina?” 10#Isay 6.9Yezu wabelamo ari, “Inywe mwawebwele khumanya bimoonyo bye Buyiinga bwa Wele, ne isi babaandu babaandi, bili musimo tsonyene, nio, khulola balole, ne balekhe khubona ta; khurekeeresa barekeerese, ne balekhe khubimanya ta.”

Yezu asontsoola lusimo lw'omumiitsi

(Mat 13.18-23; Mrk 4.13-20)

11“Kamakhulu ke lusimo luno niko kano, bumiitso nibwo shilomo sha Wele. 12Bumiitso bubwakwa khu ntsila, nibo babaandu babawulila shilomo sha Wele, ne Sitaani weetsa wabawutulamo shilomo mu myoyo kyaawe, nio balekhe khufuna buwonesi nga babira mu khufukiilila ta. 13Bumiitso ibwo bubwakwa khu liiloba lye khu lwanda, nibo babaandu babawulila shilomo, bashifukiilila ni kumwikhoyo, ne lwekhuba si bali ni tsiindi tsindeeyi ta, bafukiililakho khakyeekhe, ne mu mbuka ye khukhakibwa, bakhasikhana. 14Bumiitso bubwakwa mu mawa, nibo babaandu, babawulila shilomo bulayi, ne nga batsiile, nilwe khukhwiyembelela, ni buyiindifu, ni kumwikhoyo kwe bulamu buno, bakhasikhana, balekha khwama bibyaamo ta. 15Ne bumiitso bubwakwa khu liiloba lilayi, nibo babawulila shilomo, bashiiliinda bulayi mu myoyo kyaawe ni bubwiyikinwa. Bawulila shilomo bashibiikha bulayi, ni lwe khukhwikhaliilikha, baanakho bibyaamo bilayi.”

Lusimo lwe taala

(Mrk 4.21-25)

16 # Mat 5.15; Luk 11.33 “Mbaawo umuundu uwambisa itaala, lwanyuma wakifumalikhakho shishipo ta, namwe wakira munguriiri ta. Ne akiwambisa, wakira khu shisiindi, nio akile buli uwingila mu ntsu abone buwaanga.

17 # Mat 10.26; Luk 12.2 “Lwekhuba mbaawo shishiindu shishabisibwa, shikhalibonesebwa ta. Namwe, mbaawo shishabisibwa shikhalimanyisibwa ta, namwe khureerebwa mu buwaanga ta.

18 # Mat 25.29; Luk 19.26 “Nashiryo ni mwitsililise, isaambo yeesi murekeeresamo. Lwekhuba buli mundu uli ni shishiindu balimuloselakho. Ne uyo ukhalikho na shiindu shoosi ta, balimurusakho ni khafwiiti abe kheesi ambaasa ari ali nakho.”

Maayi ni babandaaye ba Yezu

(Mat 12.46-50; Mrk 3.31-35)

19Lulwoola, maayi ni babandaaye ba Yezu, beetsa khumubona, ne balekha khwoola is'ali ta, lwe lituuli lye babaandu. 20Mutweela khu baandu bababawo waboolela Yezu ari, “Maayi woowo, ni babandaayo bali ibulafu bakana khukhubona.”

21Yezu wabaloma boosi ari, “Maayi wase ni babandaayase nibo babarekeeresa shilomo sha Wele, bakhola nga ni shiloma.”

Yezu asilisa ikhuungu

(Mat 8.23-27; Mrk 4.35-41)

22Lutweela Yezu waloma baleekelwa beewe ari, “Kha khwambukhe injelekha we nyaantsa.” Baryo baniina mwikhoŋolo baatsya. 23Ne ni baaba nga batsya, Yezu liilo lyamuwamba. Lubaluba abalukhawo ikhuungu ye kamaani yawuutsa khu nyaantsa, ni likhoŋolo lyarakikha khukhwitsulamo kameetsi, baaba nga bali mu buwangafu bukali naabi.

24Baleekelwa baatsya isi Yezu bamusisimusa, nga baloma bari, “Musakhulu, Musakhulu, khwahela!.”

Aryo Yezu wenyukha, wakhookhela ikhuungu, ni khutumbuukha khwe kameetsi, byawoleela; abawo khukwalaala khukali. 25Yezu kila abareeba ari, “Khufukiilila khweenywe khuli ena?”

Ne boosi baarya naabi, belaliila nga betsuule lisuno nga baloma bari, “Umusaani yuno niye naanu, bona akhookhela ikhuungu ni kameetsi byamuwulila?”

Yezu awonesa uwabakho kimisaambwa kimibi

(Mat 8.28-34; Mrk 5.1-20)

26Lwanyuma Yezu ni baleekelwa beewe boola khu shaalo she Bagerasene, shishilolelaniile ni Galilaaya. 27Ne Yezu n'arura mwikhoŋolo, nga ali khu lwoomu, wakanana umusaani uwabakho kimisaambwa kimibi, nga ama mu shiriimba. Kimisaambwa kino kyaba kyamumalakho imbuka indeeyi, nga s'akwaara tsingubo ta, lundi nga s'amenya mu ntsu ta, khurusakho mu mafuluma keesi basiikhatsakamo baafu. 28Umusaani n'abona Yezu, walilila angaaki, wakwa asi mu moni tsa Yezu, waloma ni likono likali ari, “Yezu, Umwaana uwa Wele Uli Angaaki lukali, ufunisa ise shiina? Ikhwikontselela ukhaamba shitaambiso ta.” 29Umusaani aloma aryo lwekhuba Yezu aba walakiile kimisaambwa khumururamo. Lwekhuba tsifuunda ngali, nga kimisaambwa kino kyamuwaambile, abe abowebwa kiminyololo kamakhono ni bikyele byeewe, waliindibwila ilala, ne shitweela busa, aba anyala watingula kiminyololo, kimisaambwa kyamupemesa, kyamuyila iyo mu mubiimbi.

30Yezu wamureeba ari, “Lisiina lyoowo naanu?” Naye welamo ari, “Ise liiye likali.” Lwekhuba kimisaambwa kimibi mikali kyaba kyamwingilamo. 31Kiryo kimisaambwa kimibi kino kyekontselela Yezu naabi kiri alekhe khukikhookhela khuutsya khuwelela imakoombe ta.

32Ne abawo tsimbiitsi tsingali tsitsaba tsiliila khu ndulo khwe lukoongo. Kiryo kimisaambwa kimibi kino kyekontselela Yezu kiri, akilekhe kitsye mu mbiitsi itso, naye Yezu aryo, wakifukiilila. 33Ne kimisaambwa kimibi ni kyarura mu musaani, kyaatsya kyaweela mu mbiitsi, ni tsimbiitsi tsoosi tsafulumukha, tsaselengela ilumya, tsaweela mu nyaantsa, tsahela. 34Babaayi be tsimbiitsi ni babona bino, barindimukha tsindimo, baatsya basalanisa kamakhuuwa kano mu shiriimba ni mu byaalo. 35Baryo babaandu bakali barurayo beetsa khubona bibibeelewo. Ne ni beetsa isi Yezu, banyoola umusaani isi kimisaambwa kyaruramo, nga wekhaale asi abikyele bya Yezu, nga wakwaarire tsingubo, lundi nga kamakyesi kamukobolemo; babaandu baarya naabi.

36Ni naabo babaabona nga kimisaambwa kimibi kirura mu musaani, baboolela babaandu isaambo isi awonesebwamo. 37Ni abweenewo, babaandu boosi be mu bisiintsa bibyesaane ni Gerasene, bekoontselela Yezu bari, arure isi bali atsye, lwekuba baaba bariire naabi. Aryo Yezu waniina mwikhoŋolo, wakobolayo.

38Ne umusaani uwarusibwamo kimisaambwa kimibi, waloomba Yezu ari, atsye ni naye. Ne Yezu wamusiibula ari, 39“Kobolayo ingo weenywe, uboolele bikali byeesi Wele akhukholele.” Aryo umusaani watsya mu shiriimba mwoosi, waboolela babaandu byeesi Yezu amukholela.

Yezu awonesa umukhaana wa Yayiro

(Mat 9.18-26; Mrk 5.21-43)

40Ni lwoola, Yezu n'akobola, babaandu bamwakaanila lwekhuba baaba bamuliindile. 41Ne abawo umusaani lisiina lyeewe Yayiro, uwaba umuwuli w'entsu ye khukhwisaayilamo, weetsa, wakwa asi abikyele bya Yezu, wamwikontselela ari atsye, enjile mu ntsu yeewe, 42lwekhuba umukhaana weewe mutweela yenyene, uwaba uwe kimiiko liikhumi na kibili, aba mulwaale, nga ali ambi khuufwa.

Aryo Yezu n'aba nga ali mu ntsila atsya, babaandu baaba nga bayindana naabi tsimbeka tsoosi. 43Mubeene ibo mwabamo umukhasi umulwaale we khukhwibeena kamafuki khumala kimiiko liikhumi na kibili; uwaba wamalila bibiindu bye mu bulamu bweewe khu bakaangi, n'enga mbaawo unyala khumuwonesa ta. 44Umukhasi uyu weetsa, nga amila imukoongo wa Yezu, watiila khu ndulo khwe ngubo yeewe, khangu akho khukhwibeena khwe kamafuki khwakamilawo.

45Yezu wareeba ari, “Naanu uwundiililekho?”

Babaandu bababawo boosi ni bekaanaka, Petero waloma Yezu ari, “Musakhulu, babaandu boosi bakhubotokhelele nga bayindana busa, basiindikhana.”

46Ne Yezu waloma ari, “Iliwo umuundu uwundiililekho, lwekhuba ise niwuulile nga kamaani kambwamo.”

47Umukhasi n'amanya ari s'anyala webisa lundi ta, weetsa nga nanikina, wakwa asi abikyele bya Yezu. Waboolela Yezu akari mu baandu boosi, lwashiina amutiililekho, lundi nga nawonelewo bulwaale bweewe khangu akho. 48Yezu wamuloma ari, “Mukhaana wase, lwe khufukiilila khwoowo wawonisibwile. N'utsye mu lukoosi.”

49Yezu n'aba nga ashikanikha, umurume wama mu ntsu ya Yayiro, umuraangilisi tsana w'entsu ye khukhwisaayilamo, nga aloma ari, “Umukhaana woowo wafwiile, ukhataambisa umuleekeli lundi ta.”

50Ne Yezu n'awulila shino, waloma Yayiro ari, “Ukheyembelela ta, iwe n'ube busa ni khufukiilila, n'umukhaana woowo kane awonesebwe.”

51Yezu n'ola khu ntsu ya Yayiro, s'afukiilila umuundu yeesi khukhwinjila ni naye mu ntsu ta, khurusakho Petero, ni Yohana, ni Yakobo, ni paapa ni maayi b'omwana. 52Boosi bababawo baaba balila, nga bakhupa kimibala. Ne Yezu wabaloma ari, “Mukhalila ta, umukhaana yuno mbakhufwa ta, ne wakonele busa.”

53Babaandu bamutsekhelela busa, lwekhuba baaba bamanyile bari wafwiile. 54Ne Yezu wamuwamba kumukhono, wamuloma ari, “Mwana wase, yinyukha.” 55Bulamu bweewe bwakobola, khangu akho wenyukha weema. Lwanyuma Yezu wabaloma bamuwekho khe khuulya. 56Basaali beewe basamilila busa, ne Yezu wabakhonyakilila ari, balekhe khuboolelakho umuundu yeesi ibyo bibibeelewo ta.

Pilihan Saat Ini:

Luka 8: LCE

Sorotan

Berbagi

Salin