Luka 10
10
Yezu arumana kamakhumi musaafu na babili
1Lwanyuma lw'ebyo, Umukasya warobola babaandi kamakhumi musaafu na babili, wabarumana khuutsya babili, babili, khumwinyoowayo ibweeni, mu buli shiriimba, na buli shifwo abe esi umweene atsya khuutsyamo. 2#Mat 9.37,38Wabaloma ari, “Likyesa likali, ne babakyesa bakyeekhe. Nashiryo ni muloombe Umukasya umweene we likyesa arumane baraambi babaandi mu likyesa lyeewe. 3#Mat 10.16Ni mutsye ana ari, bona mbarumana inywe nga kamasheese kamaana akari mu bitsuutse. 4Mukhayila khasawu khe tsinusu, namwe isawu ye bisutwa, namwe bilaalo, namwe mukhasheesa umuundu yeesi mu ntsila ta. 5Na buli ntsu isi mwinjilamo, munyoowa khuloma muri, ‘Lukoosi lube mu ntsu muno.’ 6Noola mu ntsu umwo mulimo umuundu uwasiima lukoosi, khusheesa khweenywe khwe lukoosi kane khurame khu niye. Ne noola ta, kane lukoosi lukobole isi muli. 7#1 Kor 9.14; 1 Tim 5.18Muramatsaka mu ntsu nyene iyo, nga mulya lundi nga munywa shoosi sheesi babawa, lwekhuba umuraambi akhila kumukheemba kweewe. Mukhakyeendaana kimilyango ta. 8Ni muba nga mwenjiile mu shiriimba ne babakaanila, ni mulye shoositsana sheesi babawa. 9Muwonese balwaale babaaliyo, mubalome muri, ‘Buyiinga bwa Wele bwetsile isi muli.’
10 #
Bur 13.51
“Ne buli shiriimba sheesi mutsyamo, ne balekha khubakaanila ta, mutsye mu mikhoosi kye mu shiriimba isho, mulome muri, 11#Mat 10.7-14; Mrk 6.8-11; Luk 9.3-5‘Ni lifukhuulu lye mu shiriimba sheenywe, liliwambile khu bikyele byeefwe, khulibasisakulila mwabeene,#10.11 Khusisakula lifukhuulu shaba shokesanisa shiri babekaanile. ne ni mumanye muri, Buyiinga bwa Wele bwabesyendeele ambi.’ 12#Rak 19.24-28; Mat 11.24 Mat 10.15Mbaboolela inywe ndi, khu shifukhu she khukhala kumusaango, Wele aliwambila shiriimba Sodoma shiisa khuminyisa shiriimba isho.
Biriimba bikhaafukiilila ta
(Mat 11.20-22)
13 #
Isay 23.1-18; Ezek 26.1—28.26; Yow 3.4-8; Amos 1.9,10; Zek 9.2-4 “Nga she kumutaambo kumukali isi iwe Korazini! Nga she kumutaambo isi iwe nawe Besusaida! Lwekhuba bye kamakaanga bibyakholewela mus'iinywe, biba bibyakholewela i Tulo, ni Sidoni, khali bayibiiyisa bibyonako khaale, nga bekhala behanyakakho likoshe, nga bakwaarire bitsina khukhwokesanisa bari bebiiyisile bibyonako. 14Ne Wele aliwambila Tulo ni Sidoni shiisa khu shifukhu she khukhalilakho kimisaango khufuurisa inywe. 15#Isay 14.13-15Ni nawe, Kaperunaumu, wakana wamweene khukhwiniinisa mwikulu? Taawe, wutsya khwikhisibwa asi i makoombe.”
16 #
Mat 10.40; Mrk 9.37; Luk 9.48; Yoh 13.20 Yezu waloma baleekelwa beewe ari, “Uyo ubarekeeresa inywe aba warekeeresile ise, ne uyo uwikaana khubarekeeresa inywe, ni nase aba wantsikaanile. Ni nooyo uwuntsikaana ise, aba wekaanile uyo uwanduma ise.”
Baarume kamakhumi musaafu na babili bakobola
17Baarume tsana kamakhumi musaafu na babili bakobola ni kumwikhoyo, nga baloma bari, “Umukasya, ikhaba ni kimisaambwa kimibi kyakhuwulila mu lisiina lyoowo.” 18Yezu wabelamo ari, “Nabona Sitaani nga awanukha nga luweni, khukhwaama mwikulu. 19#Zab 91.13Ne bona ise nabaweele inywe bunyala bwe khusaamba khu ndemu, ni makhata, ni khu maani koosi k'omusiku, naluundi inywe imbaawo shishinyala shabakholakho buubi mu saambo yoosi ta. 20Ne mukhekhoya lwekhuba kimisaambwa kimibi kibawulila ta, ne ni mwikhoye lwekhuba kamasina keenywe karonewele mwikulu.”
Yezu ekhoya
(Mat 11.25-27; Mrk 13.16-17)
21Mu saawa nyeneyo, Yezu nga wetsuule Umwoyo Umukhosefu, wekhoya, waloma ari, “Paapa Umukasya we likulu ni shiibala, ikhusiima lwekhuba bino wabibisa be kamakyesi ni baleekele, uryo wabibimbulila bababeele babaandu babusheele busa. Niabweene Paapa, shino yaba khusiima khwoowo. 22#Yoh 3.35 Yoh 10.15Paapa, wayimba ise bibiindu byoosi, nalundi imbaawo na mutweela umanyile nga umwaana n'ali ta, khurusakho Paapa, lundi imbaawo umanyile Paapa nga n'ali ta, khurusakho Umwaana, ni naabo beesi Umwaana akhalawo khumubabimbulila.”
23Lwanyuma Yezu weshebukha isi baleekelwa beewe wabaloma mu shimoonyo ari, “Nga muli ni khabi inywe khubona bibiindu byeesi mubona! 24Lwekhuba mbaboolela ndi, baŋoosi bakali ni bayiinga baakana khubona inywe byeesi mubona ari, ne si babibonakho ta, ni khuwulila byeesi inywe muwulila ari, ne si baabiwulilakho ta.”
Lusimo lw'Omusamariya Umulayi
25 #
Mat 22.35-40; Mrk 12.28-34 Lulwoola abaawo umuleekeli we kamakaambila mutweela uweetsa isi Yezu khumukhakilisa, nga amureeba ari, “Umukasya nakhila khukhola shiina nio inyoole bulamu bukhawawo ta?”
26Umukasya wamwiilamo ari, “Sharonebwa shiryeena mu makaambila? Kaloma karyeena?”
27 #
Maka 6.5
Lev 19.18
Umusaani welamo ari, “Sharonebwa shiri, kanaatsaka Umukasya Wele woowo, ni kumwoyo kwoowo kwoosi, ni bulamu bwoowo bwoosi, ni kamaani koowo koosi, lundi ni bibyambaaso byoowo byoosi; nalundi ukanatsake umwesanwa woowo nga iwe ni wikana wamweene.”
28 #
Lev 18.5
Yezu wamwiilamo ari, “Wakobolemo bulayi. Kholatsaka uryo, ni nawe kane ube umulamu.”
29Ne lwekhuba umuleekeli we kamakaambila akana khukhwiyokesana bulayi bweewe, wareeba Yezu ari, “Umwesanwa wase niye naanu?”
30Yezu wamwiilamo ari, “Abawo umusaani mutweela, uwaba nga ama i Yerusalemu nga ekha i Yeriko, wakwa mu banuuli, bamwabulamo tsingubo, bamukhupaka, bamulekha nga awootsawootsa busa. 31Ne lwanyumakho, abawo umusaayi uwaba ali khubira mu ntsila iyo, ne n'abona umusaani umukhupe, wamutataya, wabirawo khu luwande lulundi, watsya. 32Lundi abawo umusaani umu Levi, uweetsa mu shifwo sheenesho, walola khu musaani umukhupe, wamutataya, wabirawo busa, watsya. 33#2 Kim 28.15Ne Umusamariya mutweela naye uwaba abira mu ntsila iyo, woola isi umusaani umukhupe. Ne n'amubona wamuwambila shiisa, 34watsya is'ali, wabowelela kamakoontsyo, nga wamalile khukatsukhakakho kamafura kakawonesa atweela ni fiini. Lwanyuma wara umusaani umukhupe khu sikilya yeewe, wamureera mu ntsu iye bukono, wamuliindilayo. 35Ni bwasha khu shifukhu shishelakho, wabukula tsidinari tsibili, watsiwa umuliindi wentsu ye bukono, wamuloma ari, ‘N'ulwalise umusaani yuno, ne tsinusu tseesi kane ube wabirisilemo, nga nakoboole ikhaakhuliipe.’ ”
36Kila Yezu areeba umuleekeli we kamakaambila ka Musa ari, “Aso naanu khu basaani bataru bano, isi wambaasa khuuba umwesanwa w'omusaani uwakwa mu banuuli?”
37Umuleekeli wamwiilamo ari, “Uyo uwamukholela bye shiisa.” Kila Yezu amwiilamo ari, “Nawe n'utsye ukholatsake uryo.”
Yezu akyeniyila Maliza ni Mariya
38 #
Yoh 11.1
Ni lwoola, Yezu ni baleekelwa beewe, baaba batsya mu ntsila, weetsa khu shaalo shitweela khukhwabakho umukhasi uwalaangiwa Maliza, uwamwakaanila mu ntsu yeewe. 39Maliza aba ni yaayawe umukyeekhe uwalaangiwa Mariya, uwekhala asi ambi ni bikyele by'Omukasya, nga arekeeresa khuleekela khweewe. 40Ne Maliza waba mwiyembelefu naabi, lwe khubiraana khukali, ni lwe tsiŋoonaŋoona. Weetsa isi Yezu wamuloma ari, “Umukasya iwe siwinaanayo khubona nga yaaya wase wandekheele ise senyene khukhola bubwakaanisi bwe she khulya ta? Mulome etse anjeete.”
41Umukasya wamwiilamo ari, “Maliza! Maliza! Wariire lundi weyembeleele lwe bibiindu bikali. 42Ne walekha khumanya uri, shishiindu shitweela shonyene nisho shishikaniwa ta; Mariya warobolewo shifuura buulayi, nisho shikhalekhe khumurusibwakho ta.”
Pilihan Saat Ini:
Luka 10: LCE
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Lumasaaba Catholic Bible © The Bible Society of Uganda, 2017.
