Ինչպե՞ս Դիմակայել Տարբեր ՃնշումներինՕրինակ
![Ինչպե՞ս Դիմակայել Տարբեր Ճնշումներին](/_next/image?url=https%3A%2F%2Fimageproxy.youversionapi.com%2Fhttps%3A%2F%2Fs3.amazonaws.com%2Fyvplans%2F43264%2F1280x720.jpg&w=3840&q=75)
Արդյոք գտե՞լ ես ճիշտ հավասարակշռությունը
Սիրելի՛ բարեկամ, քրիստոնեական կյանքը, ինչպես նաև կյանքն ընդհանրապես, կարելի է հեծանիվի հետ համեմատել. որպեսզի առաջ ընթանաս ու վայր չընկնես, պետք է իմանաս, թե ինչպես պահպանել հավասարակշռությունդ: Իսկ հեծանիվի դեպքում հավասարակշռությունը պահելու համար պետք է շարունակել առաջ շարժվելը: Կանգնած ժամանակ շատ դժվար և գրեթե անհնարին է հեծանիվի վրա հավասարակշռություն պահելը։ Առաջարկում եմ մի պահ խորհել ասվածի շուրջ…
Ժողովողի գիրքը մեզ սովորեցնում է նաև հավասարակշռության մասին, որը պետք է պահպանել կյանքում։ Ահա թե ինչ ենք կարդում Ժողովող 3․1 խոսքում․ «Ամեն բանի ժամանակ կա և ժամանակ՝ երկնքի տակ բոլոր գործերին»։
Այսպիսով, կարելի է Ժողովողի թվարկումը շարունակել ու ասել, որ ժամանակ կա.
Աստծո Խոսքը կարդալու համար։
Մի լավ գիրք ընթերցելու կամ հետաքրքիր ու ուսուցողական ֆիլմ դիտելու համար:
Աղոթելու և Աստծո ներկայության մեջ պարզապես լռելու համար։
Քեզ սիրելի մարդկանց հետ հաղորդակցվելու և նրանց հետ տարբեր թեմաներից զրուցելու համար։
Եկեղեցի գնալու և և հոգևոր ծառայությանը նվիրվելու համար։
Աշխատելու և արձակուրդ գնալու համար։
Երկու ծայրահեղություն կա։ Մեկն այն է, որ մարդը չափազանց պահանջկոտ է լինում սեփական անձի հանդեպ և մաշեցնում է սեփական կյանքը՝ տարբեր ծանրություններ իր վրա վերցնելով։ Իսկ մյուս ծայրահեղությունն այն է, որ մարդը խուսափում է ցանկացած պատասխանատվությունից և մատնվում անգործության ու ծուլության։
Չափազանց պահանջկոտ լինելով իր հանդեպ կամ ընկնելով կրոնավորության ծայրահեղության մեջ՝ մարդը ոչ միայն ընկնում է դժբախտանալու և հիասթափվելու ծուղակի մեջ, այլև հեռանում է Աստծո սրտից:
Դու կարող ես անգիտակցաբար Աստծո հետ քո հարաբերությունները դարձնել կրոնական պարտականությունների մի ամբողջություն։ Աստված ցանկանում է, որ մենք մոտենանք Իրեն սիրուց դրդված: Մենք կարող ենք Աստծուն փնտրել և գտնել, եթե մեր ամբողջ սրտով փափագենք Նրա ներկայությանը (ընթերցի՛ր Երեմիա 29.13 խոսքը)։
Աստծո համար թանկ ու սիրելի՛ զավակ, Աստված այսօր հրավիրում է քեզ վայելելու այն կյանքը, որը Նա առատաձեռնորեն պարգևում է քեզ:
Ե՛կ միասին աղոթենք Դավիթ թագավորի պես՝ անկեղծ և բաց սրտով․ «Հա՛յր, խնդրում եմ, ներիր, որ հաճախ ունակ չեմ լինում գնահատելու քո պարգևած օրհնությունները: Խնդրում եմ՝ սովորեցրու ինձ վայելել Քո պարգևած յուրաքանչյուր բարիքը: Տո՛ւր ինձ իմաստություն՝ պահպանելու այն հավասարակշռությունը, որն անհրաժեշտ է սրբության կյանքը վայելելու և մյուսներին ծառայելու հաճույքը զգալու համար: Աղոթում ու խնդրում եմ Տեր Հիսուսի զորավոր անունով։ Ամե՛ն»:
Այո՛, Աստված սիրում է, երբ Իր զավակները վայելում են Իր պարգևած բարիքները:
Հիշի՛ր, որ դու Աստծո հրաշքն ես, և Աստված սիրում է քեզ։
Շնորհակալ եմ, որ դու կա՛ս։
Հ.Գ. Ընթերցանության այս ծրագրի տեքստը վերցված է «Քո հրաշքն՝ ամեն օր» ուղերձներից, որոնց շնորհիվ ամեն օր Արման Մանուկյանը կիսվում է Աստծո Խոսքի շուրջ խրախուսական մտորումներով՝ ի քաջալերանք յուրաքանչյուրի, ով սիրում և անկեղծորեն հետևում է Տեր Հիսուսին։
Եվ թող ամեն օրվա Ձեր հրաշքն ու քաջալերանքն անպայմա՛ն հասնեն Ձեզ ու լուսավորեն Ձեր կյանքը։
Այս Ծրագրի Մասին
![Ինչպե՞ս Դիմակայել Տարբեր Ճնշումներին](/_next/image?url=https%3A%2F%2Fimageproxy.youversionapi.com%2Fhttps%3A%2F%2Fs3.amazonaws.com%2Fyvplans%2F43264%2F1280x720.jpg&w=3840&q=75)
Այսօրվանից սկսած առաջիկա յոթ օրերի ընթացքում մենք միասին կքննենք, թե ինչպես դիմակայել տարբեր ճնշումների։ Կյանքը կարելի է համեմատել մարաթոնյան մրցավազքի հետ, որի ընթացքում յուրաքանչյուր մարդուց պահանջվում է համբերություն և դիմացկունություն։ Մեր կամքին հակառակ, մենք կարող ենք ներքաշվել մյուսների հետ մրցակցության մրցավազքի մեջ և կարող ենք նաև կորցնել Աստծո տված խաղաղությունն ու ուրախությունը:
More
Մենք ցանկանում ենք շնորհակալություն հայտնել hisus.am-ին այս պլանը տրամադրելու համար: Լրացուցիչ տեղեկությունների համար այցելեք՝ http://hisus.am/