Hch 6
6
Qoyiyaĝanalo siete jiyaĝa'u qaedi necochaĝa'u
1Jaa'me jaajo' noloqo'ote, queda'me nichiquetaye ga'me jiyaĝadipi jo'ne p'etaqadaiquipi, qama'le gaa'me jo'ne yadenaĝa't daa'me griego 'laqataqa male necotayapegue'to gaa'me jo'ne yadenaĝa't daa'me hebreo 'laqataqa, eetedapega queda'me ja yataqachiñe qoyeloja'agueta gaa'me p'ail jo'ne griega lajel nale 'uo ga'me qolecochaĝanegueta jo'ne nalochiguilo gaa'me noloqo'ote. 2Qama'le jogaa'me doce namaĝa's yemata'a'ajalo ena'uaque ga'me p'etaqadaiquipi, qama'le yanema da'me 'laqata'j:
—Ja 'noota ta'le janaĝajoĝoñe da'me ja'aĝataqatac da'me dojo' 'laqataĝanaĝac ñe'me Dios qaedi ma'te qadema'a da'me jeloĝolegue da'me qolecochiyalo gaa'me p'ail. 3Chane'eja, ami yaqaya'olqa, aueloyapiye gaa'me siete jiyaĝa'u jo'ne qoyateto'n queda'me najaqachiguilo ñe'me Dios Lepaqal nataq'aen yatenaĝanaĝayaqa, qaedi jenaĝa yelodelegue da'me dojo' 'nonataĝanaĝac. 4Qama'le da'me qo'mi qamqa'me qolaqatalegue da'me qanetamenaĝac nataq'aen jechoĝotaqatac da'me 'naqataĝanaĝac jo'ne chiyoĝogue ñe'me Dios.
5Ena'uaque jogaa'me niyamaĝadidiye da'me dojo', qama'le qo'yatetelegue ñe'me Esteban, jiyaĝaua jo'ne yataqatelegue da'me lepe'e nataq'aen najaqachigui ñe'me Dios Lepaqal jo'ne ja 'nalegue, choqoñe'me Felipe, ga'me Prócoro, ga'me Nicanor, ga'me Timón, ga'me Pármenas nataq'aen ñe'me Nicolás nach'eñe Antioquía le'ec jo'ne joca'li uetaue da'me lepe'e' ga'me judiopi. 6Qama'le qoyauegalo gaa'me namaĝa's jogaa'me, qaedi yachalo'te naa'me loua' da'me netamelo'te. 7Joda'me 'laqataĝanaĝac ñe'me Dios nichiquetaye da'me qo'yaĝatetac, qama'le ga'me p'etaqadaiquipi jo'ne Jerusalén laje'pi jalcote da'me nichiquetaye, chayovida'alo qayoĝode' ga'me judiopi tamenaĝaiqui lo'olpi yacoteguet da'me 'naqataĝanaĝac.
Qoyecoñe' ñe'me Esteban
8Esteban, najaqachigui da'me 'lañaĝac nataq'aen da'me liyalaqataĝanaĝac ñe'me Dios, yauo'oe ga'me nañoqotaĝanaĝaco jo'ne qoyoqoye'ema nataq'aen 'nanaqa 'me yaloĝotapegalo ga'me noic. 9Uo'oe gaa'me jo'ne chiyoqodaue ga'me judiopi nemaĝaiqui lenaĝat «Jogaa'me qoyejodegue», nach'e ena'ama gaa'me chiyoqoda'a di'me Cirene, di'me Alejandría, di'me Cilicia nataq'aen di'me Asia, paja'a necotedapegue' ca'li ñe'me Esteban; 10qalaĝaja ja yaqanate't ta'le nichateda'aguet, qa'a daa'me 'laqataqa 'uo da'me layatenaĝanaĝa'j jo'ne yanema ñe'me Dios Lepaqal jo'ne ja 'nalegue. 11Uo'oe gaa'me qoyejete'n qaedi yachimaĝachidiñe gaa'me 'laqataqa jo'ne eetedapega domachiyalo gaa'me 'laqataqa jo'ne ye'uetedac ñe'me Moisés nataq'aen ñe'me Dios. 12Qama'le naq'aeta da'me dojo' yauote da'me ja en 'te niyamaĝa q'ae'n ga'me jiyaĝadipi, joga'me 'yaĝaicachidipi nataq'aen ga'me judiopi napaĝaguenoqo'tpi; qama'le necodidiye ñe'me Esteban, da'me yaue'j da'me qoyen yec'ata ga'me lemaĝaiqui gaa'me p'ajodaye. 13Choqoda'me qoyauo'oe gaa'me choqotaĝanaĝayaqa jo'ne pecayaqa, jo'ne eetojo' ga'me 'laqata'j:
—Jenjo' jiyaĝaua ja yaĝadiñi gaa'me 'laqataqa jo'ne nautetedapega ga'me ja 'nalegue tamenaĝaiqui nataq'aen nautenalo daa'me Dios lamaĝajoĝonaĝaco. 14Jomachaĝa da'me 'yaĝatetac ga'me Jesús Nazaret le'ec, da'me enaac nejoyiñe qomle ga'me tamenaĝaiqui, nataq'aen da'me janaqa'ac qat'oyaĝac jo'ne Moisés qo'mi yepotanegueta yadalaĝat qomle.
15Gaa'me jaliaĝanaqa nataq'aen ena'uaque ga'me ueteda'a ga'me ñechidiñe, ca'li yec'ate'n ñe'me Esteban qama'le yauata da'me latajoĝoc ena'am ga'me piyem le'ec.
Արդեն Ընտրված.
Hch 6: TSN
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Nuevo Testament Toba del Oeste © 2010 Sociedad Bíblica Argentina