Hch 5
5
Joda'me loec ñe'me Ananías nataq'aen Safira
1Qalaĝaja 'uo ñe'me onolec, lenaĝat Ananías, naloteguet jañe'me loua Safira, da'me yeme'n ga'me 'naleua'. 2Jenjo' jiyaĝaua, jo'ne naloteguet ga'me lelnataĝac jaga'me loua, navidiñe jaga'me lae 'uo nauedela't jaga'me laicaua qama'le jaga'me lae yanema joga'me Jesús lamaĝa's. 3Pedro enaac:
—Ananías, ¿toqoch'e auajeta ta'le Satanás am nomat nataq'aen am 'yetec da'me auoqovin ñe'me Dios Lepaqal jo'ne ja 'nalegue, da'me auen colaĝaye jaga'me lajo'vi ga'me a'naleua? 4¿Jeele ja adoĝot joona jogamaĝa aleua? Nataq'aen queda'me auemen, ¿qo'li ja adoqote jagamaĝa laicaua? ¿Toqoch'e naq'aeta ga'me adelnataĝac qama'le aua'uo dojo'? Ja auoqovi'n gaa'me ch'e jiyaĝa'u dite ñe'me Dios.
5Ca'li domachiya dojo', Ananías 'naqañe qama'le yeleu. Qama'le ena'uaque gaa'me jo'ne yauachigui yataqachiñe najaqachiguilo da'me loqolanaqa't. 6Chane'eja uo'oe gaa'me nejo' jo'ne yec'adeta lecoĝodiñe ga'me lapat qama'le yedodegue qaedi yijediñi.
7Yenoĝodegue ca'li ga'me tres horas da'me yenoĝoneuo jañe'me loua di'me Ananías, ja yayaten ga'me 'uo ca'li. 8Pedro yachimaĝata jañe'me:
—Jayem a'uaĝatem, ¿qo'li yepaquichigui jañe'me lajo'vi jo'ne qo'mi a'uaĝatapema da'me auemeñi ga'me a'naleuai?
Jaga'me 'yateguet:
—Jaja'a, naqaeñe lajo'vi.
9Pedro enaac:
—¿Toqoch'e mach'e ami da'me anayachiñeya't qaedi auapiyeñi ñe'me Jaliaĝanec Lepaqal? Na'cha'aeta na'me yedodegue di'me adoua qaedi yijediñi qama'le nayi da'me am, nach'e ena'am yedodegue qomle.
10Uayaloqota't taĝa Safira 'naqañe da'me yeleu ga'me nechateta'ña ñe'me Pedro. Ca'li yenoĝodeuo gaa'me nejo', qama'le yejomedalegue da'me joote yeleu, nach'e ena'am yedodegue yacheda'ña lae di'me loua da'me yijediñi. 11Qama'le ena'uaque ga'me nepi'iyaĝa'upi, nataq'aen ena'uaque gaa'me jo'ne nometedelegue da'me dojo', yataqachiñe najaqachiguilo da'me loqolanaqa't ca'li.
Qayoĝode' gaa'me nañoqotaĝanaĝaco jo'ne p'ajodaye nataq'aen 'nanaqa jo'ne qoyauanalo
12Na'yalo qoyen da'me yauo'oe gaa'me qayoĝode' 'nanaqa nataq'aen nañoqotaĝanaĝaco jo'ne qoyaloĝonalo ga'me jiyaĝadipi; nataq'aen ena'uaque jogaa'me yemeda'a nale ga'me Salomón najom. 13Qalaĝaja gaa'me jiyaĝa'u laqaya' qaya'te gamachaqaega ta'le ch'e lichiquetelegue da'me davitapegueta, mate mane'e yema ga'me noic jalcote da'me qoyen p'ajodaye. 14Nataq'aen nichiquetaye ga'me jiyaĝadipi, gaa'me jiyaĝa'u choqogaa'me yauo', jo'ne p'iida'a ñe'me Jaliaĝanec. 15Qoyedode'ga ga'me leuaĝaiquipi da'me loqoeyaĝac, qoyachetalo'te ga'me lela'te nataq'aen 'lochaĝala'te qaedi da'me Pedro tae'di qama'le uotaĝa ch'e lepaqal ga'me tatelo'te jogaa'me. 16Choqogaa'me noyaqolqa jo'ne ñeje'gue di'me Jerusalén qayoĝode' gaa'me jiyaĝa'u jo'ne yec'adeta yache'tape gaa'me leuaĝayaqa nataq'aen jiyaĝa'u jo'ne yeloiquiaĝa'tape ñe'me payac lepaqal jo'ne ja no'en; qama'le ena'uaque jogaa'me qoye'n yemedegue.
Necanague'j jogaa'me Jesús lamaĝa's
17Ñe'me tamenaĝaiqui lo'olpi lejaliaĝanec nataq'aen jogaa'me uetedaue da'me 'loyaĝa'j joga'me saduceopi jo'ne ueteda'ajop joñe'me yataqachiñe najaqachiguilo da'me lep'aguenataĝanaĝa'j, 18qama'le yecoñe't jogaa'me namaĝa's qaedi qoyanedaue jaga'me coñetaĝanaĝaiqui jogaa'me. 19Qalaĝaja 'uo ñe'me piyem le'ec jo'ne chiyaqaje'ma ñe'me Jaliaĝanec, ca'li pi'yaq 'youatedegue gaa'me najo'mi jaga'me coñetaĝanaĝaiqui, qama'le yauedegue, enaac: 20“Jamoyi, qama'le anechachiñi da'me auec'achiya ga'me tamenaĝaiqui, a'uaĝachetapema ena'uaque daa'me noyaqa da'me dojo' 'naqataĝanaĝac jo'ne chiyaqayi da'me 'noyaĝac.” 21Queda'me naq'aeta da'me domachita, ca'li ne'teta ga'me nolo' laqaya, tadoue ga'me tamenaĝaiqui qama'le paja'a dapaĝaguenataĝa'n.
Chane'eja ñe'me lejaliaĝane'j ga'me tamenaĝaiqui lo'olpi nataq'aen jogaa'me ueteda'ajop ñe'me yiyaĝanalo yema ga'me 'yaĝaicachidipi jo'ne israelpi qaedi yec'adeta ga'me dajoya't gaa'me p'ajodaye jiyaĝa'u, qama'le qodelataĝanalo gaa'me namaĝa's jo'ne netedaue jaga'me coñetaĝanaĝaiqui. 22Qalaĝaja ca'li gaa'me coico laje' yovideta jaga'me coñetaĝanaĝaiqui, ja qoyauanalo. Chane'eja ga'me 'laqataĝanaĝa'j da'me 'viyela', 23enapega't:
—Jauanaĝa jaga'me coñetaĝanaĝaiqui da'me yataqachiñe nedo'ta't da'me napadichiguilo gaa'me jo'mi, nataq'aen gaa'me vitaĝayaqa p'adegue uetaue'ta gaa'me jo'mi; qalaĝaja ca'li jo'ouataĝaye, qaya'te gamachaqaega jauanaĝa ga'me p'auo.
24Mane'e ca'li domachita, ñe'me lejaliaĝanec ga'me vitaĝayaqa ga'me tamenaĝaiqui nataq'aen joga'me tamenaĝaiqui lo'olpi nenatetapega't da'me jach'e jogamaĝa 'uo qomle ga'me dajo'tague da'me dojo'. 25Qanach'ega ua'a ca'li 'uo ga'me yovidauo, jo'ne eet'oi:
—Jogaa'me jo'ne auañetedaue jaga'me coñetaĝanaĝaiqui, uetedaue nayi ga'me tamenaĝaiqui yapaĝague'tape ga'me jiyaĝadipi.
26Joñe'me lejaliaĝane'j ga'me vitaĝaiquipi, nach'e ena'am gaa'me vitaĝayaqa, yitaĝa dajoyilo ca'li qaedi nauedeuo; qalaĝaja ja yauaĝalo'te jogaa'me, qa'a t'oidapega ga'me jiyaĝadipi ta'le qoyijaĝaque ga'me qadipi. 27Ca'li yovi't, qama'le qoyaue'ualo gaa'me jiyaĝa'u p'ajodaye 'me dajo'ta't, ñe'me lejaliaĝane'j ga'me tamenaĝaiqui lo'olpi, eetojo':
28—Qo'mi yataqachiñe ja qaualajaĝa'ta da'me ami je'elataqatapeguema da'me yitaĝa auapaĝagueñitapec ñe'me jiyaĝaua. Qama'le ¿jach'e ga'me auauoyi? Yataqachiñe aueñi yema'ña da'me dojo' adapaĝaguenataĝanaĝaqui jena'me jenjo' Jerusalén, choqoda'me uoja'eda nayi jetaque qo'mi qoyep'aĝalo'te dojo' leleuaĝa di'me jiyaĝaua.
29Pedro nataq'aen gaa'me namaĝa's laqaya' 'yadeteguet:
—Mach'e qa'nelopaguec da'me je'etaq ga'me qo'mi yamaĝalo'te ñe'me Dios jo'ne ja yiyamaĝaden ga'me jiyaĝadipi. 30Ñe'me Nedios dia'me qadet'al nach'eñe 'niyelaĝachijeguem ñe'me Jesús, nach'eñe jo'ne aualachi ca'li auachiyalegue jaga'me sodoso da'me aueñi netaĝatañe. 31Dios yañijeguem qama'le yana'ña na'me yayaten, qama'le en najoĝola' nataq'aen nec'alaĝaiqui qaedi ga'me Israel c'oqo'tepi 'viyelaĝadeta ñe'me Dios qama'le yacoteguet da'me qoyapalaĝa't daa'me loeco. 32Nach'eda dojo' qo'mi aqataĝanaĝayaqa, qama'le nach'e ena'am ñe'me Lepaqal ja 'nalegue, jo'ne Dios yanema ga'me jo'ne yoqochideta joñe'me.
33Ca'li domachita da'me dojo', qama'le dalemata'y nataq'aen jetaque yala't jogaa'me. 34Qalaĝaja 'uo ñe'me jiyaĝaua jo'ne uetauelo ga'me p'ajodaye jo'ne fariseo, lenaĝat Gamaliel, jo'ne nach'e ena'am uetauelo ga'me judiopi napaĝaguenoqo'tpi, jenjo' jo'ne yema ga'me noic yataqachiñe qouatec'a. Jenjo' jiyaĝaua ñechachiñe ca'li qama'le damaĝajoĝolegue da'me cha'li qoyen p'adegue gaa'me namaĝa's. 35Yem qama'le enapegalo gaa'me jaliaĝanaqa laqaya':
—Ami Israel c'oqo'tepi, 'noota qom achiya'aguet ga'me jo'ne a'vichiyeque naa'me naajo' jiyaĝa'u. 36Qa'a ja copaja'a quelqaya ñijeguem di'me Teudas, eetapela't jiyaĝaua jo'ne 'uo da'me yaqanatet, qama'le uo'oe ga'me cuatrocientos jo'ne quetedapegue'. Qalaĝaja di'me qoyalat ca'li, nataq'aen gaa'me lauegaqataqa nelagaĝa, qama'le ua'a ca'li yema yenoĝonegue. 37Ca'li cop'a da'me dojo', noloqo'ote ca'li qoya'uo ga'me nedela't ga'me jiyaĝadipi, ñijeguem di'me Judas Galilea le'ec, qama'le yaqanateta da'me uo'oe gaa'me lauegaqataqa; qalaĝaja nach'e ena'am qoyalat, qama'le ena'uaque ga'me nelagaĝa gaa'me lauegaqataqa. 38Qo'che' ami ñoqoteteneque da'me aĝañi'tape naa'me naajo' jiyaĝa'u nataq'aen ena'te aualequechiñe' jogaa'me. Qa'a qom jenjo' 'nonataĝanaĝac mach'e loequiaĝa'j gaa'me jiyaĝa'u qama'le yenoĝonegue; 39qalaĝaja qom loequenataĝanaĝac ñe'me Dios qama'le ja auaqanachichi ta'le anomachi. Achiya'aguet da'me dojo', qa'a ja auayachiñe da'me ma'te aueloquitapegue' jodamaĝa ñe'me Dios.
Qama'le jogaa'me yoqochideta. 40Chane'eja qoyiyaĝane'galo gaa'me namaĝa's, qoye'uaĝa'n nataq'aen qoyecochaĝateque ta'le quetedalegue da'me lañoqotaĝanaĝac ñe'me Jesús; yem qama'le qoyejodegue. 41Jogaa'me Jesús lamaĝa's yenoĝodegue, queda'ae ga'me ueteda'a gaa'me jaliaĝanaqa, yataqachiñe made'tape queda'me Dios yaje'tem da'me qoya'uo lachoĝode'j qa'a yajouaĝat da'me lenaĝat ñe'me Jesús. 42Yemeda jaa'me noloqo'ote dapaĝaguenataĝa'tape nataq'aen 'yaĝatetedac da'me onaĝaic 'laqataĝanaĝac ñe'me Jesús mach'e Dios Liquiyac, nale uetedaue ga'me tamenaĝaiqui nataq'aen nale ueteda'a gaa'me 'nachaqa'te.
Արդեն Ընտրված.
Hch 5: TSN
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Nuevo Testament Toba del Oeste © 2010 Sociedad Bíblica Argentina