Parei 7
7
A Stivn iv'ana arna Kaunsel kavrur a Epraham
1Laha, pris lil ivr ti a, “?V'nen lera iv'i v'nen dau, v'aha?”
2 #
Ap'u 12:1. A Stivn ivr ti a, “Tv'alk udlani, tetiak udlani, pavv'rn a kana. Atua la si p'sp'asan inelnal ha, iv'iv'en Hin an a pupuad tituei iv'i a Epraham, naran ilak a Mesuputemia, naran idahv'a kalak arna nut a Haran, 3kavr ani, kavr ti a, ‘Paruh arna v'anuam kaln tv'alm udlani kadav'a arna nadep' Kana p'ev'iv'en anh.’ 4#Ap'u 11:31; Ap'u 12:4.Laha, iln nut a Kaltia kadav'a kalak a Haran. Naran a tetian im'a, Atua ilev'lei ml kataui arna nadep' laha kvlak aranan hilaha. 5#Ap'u 12:7; 13:15; 15:18; 17:8.Arna naran lera, Atua idatudina nadep' lera kinkin ani ipav'i nkan. Aau, iatu ki ani ilil a ti ipatu tln aranan. V'eti Atua ituran ani a ti ipatau ani ipav'i nkan m'a nkar a natn apavtauatah ani, v'eti arna naran nen a natn idahei. 6#Ap'u 15:13,14.Atua ivr ani, kavr ti a natn apavlak arna v'anu uraur. M'ertu nen apavani ti apavrama kavv'i m'ertu na m'akarienar kavutakm anr pai ipanelnal ipav'av'a (400).
7 #
Avruh 3:12. V'eti Atua ivr ti a, ‘Kana p'utakm a m'ertu na v'anu la apavani ti apavrama kavv'i m'ertu na m'akarienar ha. Ipatauatah apavruh arna v'anu lera kavrama kavpata Kana arna nut laha.’ 8#Ap'u 17:10-14; Ap'u 21:2-4; Ap'u 25:26; Ap'u 29:31—35:18.Laha, Atua itaui ti a Epraham ipan p'au kav'iv'en turanienan. Dav'a, hin Aisak iak asn a Epraham, laha, arna satl (8) na napn nen a Epraham ien p'au nen, sarei, a Sikup iak asn Aisak, sarei, a tetiad arnal lman iru (12) aviak asn a Sikup.
A Stivn ivrur a tetiar naran avlak arna nut a Itsip
9 #
Ap'u 37:11;
Ap'u 37:28;
Ap'u 39:2,21. A tetiad nlr ipr a Susev' kavulul ani iv'a arna nut a Itsip, v'eti Atua ilak asnn. 10#Ap'u 41:39-41.Kalev'lei arna der udlani kani ti a Veru, iv'i mlin lil a Itsip, ilap'as ani, kala ti irndu sei, kataui ima kav'i mlin lil arna nut a Itsip kap'aur m'ertu udlani avlak al nmahan a Veru. 11#Ap'u 42:1,2.Arna naran lera, m'em'erien lil ima kaier nut a Itsip m'a nut a Kenan kani ti der lil ima aranar. Laha, a tetiad udlani ahavpasla tim'ah a nut kinkin ml. 12V'eti naran a Sikup irn v'nen a ti tim'ah iter a Itsip, itap'er a tetiad a ti apavrav'a, iv'i tertauamu nen. 13#Ap'u 45:1; Ap'u 45:16.Laha, naran avrav'a iv'i v'aru nen, a Susev' ivrp'ep'a nahan anr tv'aln udlani. Laha, a Veru irndu nl nam'elan a Susev'. 14#Ap'u 45:9,10,17,18; Ap'u 46:27.Sarei, a Susev' itep'a v'nen kavr ti a tetian, iv'i a Sikup, m'a nl nam'elan udlani avnelsaru pln ilm' (75) apavrama asnn. 15#Ap'u 46:1-7; Ap'u 49:33.Laha, a Sikup iv'a auei arna nut a Itsip kavlak m'er a tetiad dav'a dav'a kavram'a. 16#Ap'u 23:3-16; 33:19; 50:7-13; Susua 24:32.Laha, avlev' sur kavuirv'a arna nut a Sikem kataur al navap a Epraham itul sarei a nav'etan asnr a natn a Hamur, iv'i a tetian a Sikem.
Atua ilev'lar m'ertu a Isrel aranan a Musis
17 #
Avruh 1:7,8. V'eti naran napn Atua itturan sarei an a Epraham imima, m'ertu a Isrel avrama kavnelnal istudau arna nut a Itsip. 18Dav'a dav'a ier naran mlin uraur ip'tir, iarndau a Susev'. 19#Avruh 1:10,11; Avruh 1:22.Hin ihap'il m'er a tetiad kasnarr kanp'ilanr, kavr ti apavsran mardel iak ser av'aran a ti apavram'a. 20#Avruh 2:2.Arna naran lera, a Musis iak kav'i mardel p'as iamk, avp'auri nal itl al nmahan a tetian. 21#Avruh 2:3-10.V'eti naran avtaui av'aran, a natn tav'et a Veru ilev'lei kauauri inep'a ti iv'i a natn dui. 22Laha, a Musis ima karndu si udlani a Itsip kadama kahua arna v'nenan m'a parian.
23 #
Avruh 2:11-15. Laha, Naran ihih ti paian inelv'a (40), hin iv'ahur ti ipav'a kalar tv'aln udlani a Isrel. 24Kala ti dui a Itsip iamk iutakm a dui a Isrel iamk, kadav'a asnn a ti ipasr lm'an karapei karpep'n dui a Itsip lahara. 25Sena ti iv'ah ti tv'aln apavrndu ti Atua ipataui ti hin ipalev'lar arna derar, v'eti ahavrndaui. 26V'eti m'ih nen, ilar ardu a Isrel arru arthth hir kandidei a ti ipatukarr kavr ti a, ‘Ardu, kam'i krv'i tiamk. ?Inap'i hin krututakm a kam'i?’ 27V'eti tv'el dui la arthth hir hara itp'lei a Musis iv'a au kavr ti a, ‘?Hin ak itauh a ti pav'i mlinam'em' m'a dui ipav'ana hua m'a kam'em'? 28?Krn ti parp kana ipanep'a dui a Itsip la krpep'ni nanv' ha?’ 29#Avruh 18:3,4.Naran a Musis irn v'nen lera, iruh a Itsip kadav'a kalak a nut a Mitian. Atlera armardel arru arv'i dui ariak asnn.
30 #
Avruh 3:1-10. Dav'a pai inelv'a (40) iv'siau, enselan a Mlin Eia iv'iv'en Hin asnn al nep'v'en iluluv'en arna nai iamk a nut kaka asn ptha a Sainai. 31Laha, naran a Musis ilei, itah ani kamima asn nai iluluv'en a ti ipala mamahi karn drln a Mlin Eia ivr ani, kavr ti a, 32‘Kana nv'i Atuar a tetiam tituei, nv'i Atuan a Epraham kav'i Atuan Aisak kav'i Atuan a Sikup.’ Laha, a Musis ivrdedrn istudau kadedrn a ti ipap'ei. 33V'eti a Mlin Eia ivr ani, kavr ti a, ‘Pahsla susam arna tlm, sena ti nut kp'tir iv'i nutet.’ 34Kana ntla sera der udlani ier m'ertuak avlak a Itsip, katrn sarei a ti avtakal, kadama a nadep' a ti p'elev'lar. Hilaha nakm pama, Kana p'etap'ah pav'a a Itsip.
35 #
Avruh 2:14. A Musis la hir ahavrni ra kavvr ti a, ‘?Hin ak itauh a ti pav'i mlinam'em' m'a dui ipav'ana hua m'a kam'em'?’ Hin iv'i m'ertu Atua itap'ei arna lm'an ensel la iv'iv'en hin asnn arna nai iluluv'en hara, a ti ipav'i mlin kalev'la m'ertuan. 36#Avruh 7:3; Avruh 14:21; Nut Kaka 14:33.Hin iv'av'ar avruh, kan pari lilil m'ertu avtah ani m'a pari lilil iv'iv'en sei arna nut a Itsip, al Nata M'iel m'a nut kaka, pai inelv'a (40).
A Stivn ivr ti m'ertu a Isrel avmlen v'nenan Atua
37 #
TVH 18:15,18. A Musis lera, hin ivr anr arm'ertu a Isrel kavr ti a, ‘A Mlin Eia iv'i Atuam'i hin ipalev' Dui ipamk asnr tv'elm'i, ipap'tir kav'i Pruvet, ipanep'a kana. Kam'i pavv'rn ani.’
38 #
Avruh 19:1—20:17; TVH 5:1-33. Dui lera hin ilak al sas arna nut kaka kalak asn ensel iv'ana m'ei arna ptha lera, nahan iv'i Sainai, kalak m'ei a tetiad kalev' v'nen la isilv' ha kataui ima asnd. 39V'eti a tetiad ahavrn ti apavsapa v'nenan, v'eti avtp'lei asnr iv'a au kavrn nam'er a ti apavrav'a ml arna nut a Itsip. 40#Avruh 32:1.Kavvr an a Erun kavvr ti a, ‘Pan atua kinkin apavv'ev'a nakd sena ti a Musis la iv'ev'a nakd nvruh arna nut a Itsip ra, navrndu v'ata itu hin asn.’ 41#Avruh 32:2-6.Sarei, arna naran nen, avan aitul iamk, iv'i net pluk, kavtrp'n si slm kavtau an aitul lera, kavrn ip'as ilil a sei avani al lm'ar uaki. 42#Emus 5:25-27.Sarei, Atua itetvan tahn anr, kalnr a ti apavpata si udlani iter arna p'knaran, inep'a nut atulul sarei ani inap'ei arna pukar pruvet, kavr ti a, ‘?U arm'ertu a Isrel, kam'i kvtrp'n si slm kavtuvn a sei a Kana pai inelv'a (40) arna nut kaka? 43Ihei. Kam'i kvua nmah kanuisan atua stu kinkin, nahan iv'i Mulek, kavua m'lk msi iv'i atuam'i, nahan iv'i Remvan. Arv'i aitul uaki kam'i kvani a ti pavpatei. Sena si lera, p'etep'a kam'i pavrav'a atah nut a Papilun.’
A Stivn ivrur nmah kanuisduan Atua
44 #
Avruh 25:9,40. A tetiad avua nmah kanuis arna nut kaka, iv'iv'en ti Atua ilak asnr. Avani inep'a nut Atua itaui inap'ei, kavr an a Musis kavr ti hin ipani ipanep'a nut itla sarei inap'ei. 45#Susua 3:14-17.Itauatah, a tetiad m'ei a Susua avlev' nmah kanuis lera asnr a tetiar, kavuirv'a arna nut avlev'lei asnr v'anudl, la Atua itp'av'r avruh arna nahr a tetiad ha, dav'a ier naranan a Divt. 46#2 Sam 7:1-16; 1 Krun 17:1-14.A Divt lera, Atua ilap'as ani. Hin imiman ani a ti ipam'ahu a ti ipan nmahan Atuan a Sikup. 47#1 Armlin 6:1-38; 2 Krun 3:1-17.V'eti a Sulumun ien nmahan Atua.
48V'eti Atua la ilil kasiv' si udlani ha, hin ialak al nmah m'ertu avani a lm'ar uaki, inep'a nut pruvet ivri inap'ei, kavr ti a, 49#Aisaia 66:1,2.‘Nut eia iv'i napl p'asak, nut a nadep' iv'i sei ntu tlk aranan. ?Pavhl nmah v'ata iviviln a ti p'ernrn Kana aranan? 50Kana nen si udlani lera a lm'ak uaki.’
A Stivn ivr ti m'ertu a Isrel avmlen M'im'iln P'as nakl
51 #
Aisaia 63:10. Kam'i udlani ptm'i ihua ihuadau. Kam'i kaavan p'au arna nlm'i m'a drlnam'i. Kvani inep'a nut a tetiam'i avani inap'ei, kavmlen M'im'iln P'as nakl. 52Pruvet kinkin ihei la a tetiam'i ahavtp'av'r ha, kavrpr m'ertu atvrp'ep'a sera ti Dui Viviln ipama, la kam'i kvandan a tahn kavrpep'ni ha. 53Kam'i udlani kvlev' v'nen hua al lm'ar ensel, v'eti kaavsapei.”
Avmhrp'n a Stivn
54Naran avrn v'nen lera ishs nlr, laha, nlr irer ani, avhaha lur. 55V'eti a Stivn ilini a M'im'iln P'as kaklau kap'a nut eia kala si p'sp'asan Atua, kalei a Iesu ip'tir arna m'ldu lm'an Atua, kavr ti a, 56“Pavlei, kana nla nut eia itapar, kala Net M'ertu ip'tir arna m'ldu lm'an Atua.”
57Laha, avv'ara eia a nadl lil, kavuakar drlnar, kavvrvr kavrav'a asnn iv'amk, 58Kavuadei kavsrani iv'a av'aran arna v'anu lil, kavmhrp'ni. Laha, m'ertu udlani la avlei kavrn v'nenan ha, avhsla klusar kavtau asn tl malakal iamk, nahan iv'i a Sul. 59Kavmhr a Stivn dav'a. Laha, iv'ara eia asn Atua, kavr ti a, “Mlin Lilak a Iesu, palev' m'im'ilk.” 60Laha, isisihpu kav'ara eia a nadl lil, kavr ti a, “Mlinak, mav'ahur si stuar lera.” Iv'ana inap'i lera, sarei, kadam'a.
Արդեն Ընտրված.
Parei 7: nmb
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2023 Presbyterian Reformed Church of Australia